Tito 1 - Tradução Bíblica Pacaas Novos

¹ Paulo ina pain ca xirao' mi' xim ca'. Wari' nucun Iri' Jam ina pain ca taramaja mi' e' ton ca'. Apóstolo ra napa' Jeju Cristo quem, pain ca tomi' hwet roron pain capija oro wari' ta capa' pane. Quep xiho' roron oro wari' co tora' ta' cwa' napa' pane. Ma' ta howa xo' cacapa' ta napa' cocon. Ma' ta taraju pa' cacain capija ca iri'o' ca', ca ca' na nonon pain ca xuruxut xo' taxi' wa pain ca win xumu e' cacain ca param ne ta napa'.

² Ma' ta om tara pum ta'a camain' cacapa' pain ca mi' ton toton pain ca e' cara wa ta napa' cocon. Wara tomi' pe mi' napari' pain ca e' cara wa Iri' Jam. Pain ca om tom ma' querec cain macan' pane, wara tomi' pe mi' napari' pain. Om ca tomi' mixein camain' capari' ta.

³ Maqui' pin iri na xec nein ca wara coromicat an pe xo' ca pane ne, an hwet mi' ac capari' na pain capijacon ca'. Pijim' rain ta napa' Iri' Jam co to' witan napari' quem.

⁴ Xirao' mi' inem pain ca xirao' ne ca' Tito. Ac ca iri' panxita' xim na. Xi om ne ca howa wi ara xun Cristo Jeju. Tomi' inon Cotere' Iri' Jam con Cristo Jeju co to' witan napari'. Param inonon pain ca quep xiho' quequem pain ca mi' quequem pain ca param nucucun. Param inonon pain ca mi' quequem pain ca om toron ne xumum quem.

Ca taramaja nucun Tito pain Creta

⁵ Je ca tomi' xim pane, pain ca an pe pin xim pain xixi pan nein macan' Creta ma'. Ma' ta ara pi' pin main oro ca taramaja nexi' ca om na capari' pain ca ara pi' pin iri' pane inem. Ma' ta tora' momon co querec wet nonon co cut in xucucun pain ca howa cocon Jeju pain oro xijein cidade ma'. Win ne ca tomi' xo' xim pane. Tomi' ca' inem pane:

⁶ Wari' co querec wet nonon co howa nonon Jeju ma', om ca na ne pain ca hwet ne wixicon pain ca caracat wa ta. Na e' na pain ca xica' pe cama manacon. Mana panxica ma', na e' na pain ca howa cocon Iri' Jam. Om ta hwet ne wixicocon pain ca tamanain to wa pain ca om tomi' ha' wa ta.

⁷ Wari' co querec wet nonon co howa nonon Jeju ma', na e' na pain ca om hwet ne wixicon. Xi wirico pan ara ca Iri' Jam co mi' non pain ca taramaja nucun pain ca querec wet roron co howa nonon Jeju ta con. Om ta tomi' xec xec ca. Om ta mana' ximao ca. Om ta toc tamanain pe cain comi uva ca mana'. Om ta to' xitoton na cocon oro wari' co tomi' taparam' nonon ma'. Om ta mixein con win ma' ca pain ca param ximao cain dinheiro.

⁸ Om ca na camain' ne pain ca ara ac i ma' ca ma'. Ara ca' e' tara: Tomi' querec te totoron oro wari' co hwet nonon pain xiricon. Param e' tarain ca awi wa. Coromicat xo' tara. Xut xo' tara. Win xumu e' tarain oro ca param nucun Iri' Jam. Ma' tara ximicon pain ca om ara e' cain ca param pan nucun.

⁹ Wari' co querec wet nonon co howa nonon Jeju ma', na e' na pain ca howa cara cain capijacon Iri' Jam ca wara pijim' iri' ca', ca iri'o' ca'. Na e' na pain ca tomi' ha' cara cain quem. Om ca mixein camain' capari' capijacon Iri' Jam ca tomi' hwet napari' con Jeju ta. Mo ta howa cara cain pain ca tomi' ha' cain, na ac con tara pain ca quep xiho' cocon oro win ma' ca pain ca hu xo' cocon ma'. Na ac con tara pain ca tomi' tomi' na cocon oro win ma' ca co ari nanain quem.

¹⁰ Xi mija ara caca co ari nanain capijacon Iri' Jam ca ca' na xo' iri' ca'. Om ca tomi' ha' je na caca. Pijim' iri tata oro win ma' caca ne, tomi' ximama' e' ac tococwa na. Om ca quep xiho' tococwa pain ca pijim' nucucun. Mixein e' tata. Caram ma' co tomi' ha' nanain oro ca xirao' nucun Moisés ma', co howa paxi' nonon Jeju ma', wiricoco nana co pijim' tamana ac i ma' nana ma'. Mo ta om tomi' ha' hwein ca xirao' nucun Moisés ma', om ta to' witan cuhu' Jeju ta tata oro win ma' caca ma'.

¹¹ Na e' na pain ca pijim' ximama' maho' je e' momon ta. Xi to' i'ina ara tococwa co howa nonon Jeju ta. Caram ma' co howa nonon ma', to' i'ina pin ac tococwa na, to' i'ina pin ac tacacama na oro ca nari nucucun ma' quem. Om xi pijim' caca ta. Pijim' ximama' e' nana, ma' ta cut tamana xin dinheiro pain ca mixein nexi' ta nana.

¹² Ma' na hwanana nucucun cara pane, co profeta xi' ma caca oro wari' nein Creta pane, tomi' ca' nonon oro win ma' ca pane. Ca' nonon pane: Mixein taxipa' nana oro win ma' nexi' pain Creta ca'. Ac carawa nein mi ca mana' nana. Om ca awi camain' caca. Noc taxipa' nanain ca taramaja wa, param e' nanain ca cao' wa ta na pain ca pan to' cain taraxicocon oro win ma' ca pane.

¹³ Iri'o' na ca tomi' nucun quem. Je ca tomi' xim ca'. Tomi' mip rain taraxicocon co howa ximama' nonon ma'. To' querec pin' roron pain ca pan teretem nucucun co pijim' ximama' nana ma' quem. Ma' ta howa xo' caca.

¹⁴ Ma' ta om taraju wet cocon co pijim' ximama' nanain oro ca pijim' nucucun hwanana nucucun oro judeu. Ma' ta om taraju wet cocon oro wari' co tomi' ha' xut me nana ma', co ari taxipa' nanain capijacon Iri' Jam ca iri'o' quem.

¹⁵ Xi to' em' taxi' capari' carawa ca cao' wa pain ca howa xun Cristo Jeju ta. Oro wari' co xumu xo' nana con Iri' Jam ma', co hohoc pin wawa pain ca caracat nucucun ma', querec awi nonon oro carawa ca cao' wa. Om ca ein cacain, cao' cao' pi' pin nanain quem. Oro wari' co om xumu xo' nana con Iri' Jam ma' iri nana ne, co om hohoc pin wawa pain ca caracat nucucun ma', co om howa nonon Cristo Jeju ma', om ca quep xiho' cocon oro ca ara xi' paxi' caca ma', pain ca to' hohot pin xijexi' con Iri' Jam caca ma'. Om ca to' querec awi ac tococwa con Iri' Jam ta. Em' cara na ca coromicat nucucun. Om ca toron camain' ne ximicocon pain ca caracat nucucun quem.

¹⁶ Taxi' urut con Iri' Jam paxi' nana, ane mixein caca ne. Querec pin' tata pain ca noc cocon ma', xi om ne oro ca ara nucucun pain ca pan teretem pan caca ta. Om ca querec awi cacapa' ta nonon Iri' Jam. Xi tomi' ha' caca ta. Om ca ara taxi' cacain ca awi wa quem.