Tiago 5 - Tradução Bíblica Pacaas Novos

Ca hu tococwa co caramaju nana ma', co quep em' nonon oro wari'

¹ Tomi' xim inuhu' pain ca caramaju hwe ma' quem. Taraju wet je e'. Awaran je, awaran tamana je. Xi om ne ca ma' ara ne carawa ca om awi ca maqui' pa' xim nuhu' ta. Ximin je, jain jain tamana je.

² Em' pin na oro caramajuhu'. Cao' pin non womuhu' caxicon tohoro' quem.

³ Oro caramajuhu' ca cut moin' ximama' hwe ma', je ouro nuhu' pain prata nuhu' ma', tot mao ac ne na pahu'. Je tara i ma' ca to' querec pin' xim xihwe pain ca win xumu e' pan xujuhu' ma', pain ca narain ho' taxipa' hwein oro caramajuhu' ma'. Ac xe turuhu', ac ca wiran pin cuhu' turuhu'. Cut moin' tamana a xihwein oro caramajuhu' pain oro xec nein ca win pi' pin ta' ne macan' ta.

⁴ Noro jujun oro co taramaja to nanain totahu' ma'. Merem awaran nunuhu', xi pagar huhun pain ca taramaja nucucun ta. Mixein huhun, narain ho' huhun pain dinheiro nucucun. Taraju nain ca merem awaran nucucun Taramaxicon Iri' Jam co hwara' opa tiquin' ca' nonon oro taramaxicon ma' quem.

⁵ Ma' ma' pi' pin nuhu' oro carawa ca param hwe pain macan' ca', mija na ca tomi' querec te ximama' nuhu' pain ca waraju nuhu' ma' quem. Pain ca win xumu e' hwein oro ca param pan nuhu' ma', ac ca pa' mi' pa' mi' towe pin xujuhu' na. Win ne caji carawa ca pa' mi' pa' mi' towe pin wa ca', pain ca to' pa' pin xi' wa ca', ac i ma' xujuhu' ta.

⁶ Em' hwe ta huhun wari' co xuruxut xo' nana ma', to' parapa' pin huhun. Om ca quep in pin ac cucuhu' quem.

Ca quereme cara je tococwa pain oro ca to' i'ina nuhu' ta tococwa

⁷ Je ca tomi' xuhu' ca' xere. Winim' cara jun Taramaxicon nexi' pain ca in qui' ta' nucun. Noro jun wari' co tota ma', pain ca oin' tain cain oro ca oin' ca ma'. Winim' nain xowi' pain ca xo' oin' tain ca ma', je pain ca paca' pin ta' ne ca oin' ca ma' quem. Winim' nain macan' pain ca to' orot nein, winim' nain ca mi xo' nein quem. Om ca toron ne ximicon, winim' cara e' na.

⁸ Winim' cara ac i ma' jun Taramaxicon nexi' quem. Quereme je, hwara' opa je pain iri' xumuhu' ma', xi om ne ca wixicam pin ara ne xec nein ca maqui' ta' nucun ta.

⁹ Ta tomi' wijimi xujuhu' me xere. Ma' ta om tomi' em' pan xihwe ta. Xi om ne ca wixicam pin ara ne ca maqui' nucun co ma' co iri' Juiz ma', co tomi' xo' xim napari' pain oro carawa ca ara iri' ca'. Wara xat pe ho' pin nain man ca corom wa ma', pain ca corom hwet xim capari' ma'.

¹⁰ Noro jujun oro profeta co tomi' hwet jujun pain capija oro wari' ta ca Taramaxicon Iri' Jam pane. Jain jain paxi' nana pain oro ca to' i'ina nonon pane. Ane quereme cara cacain ne. An xiho' jujun ta xere.

¹¹ Querec pin' ururun oro wari' co quereme cara nanain carawa ca to' i'ina nonon ma', querec pin' ururun pain ca param mi' pan cocon pain oro ca awi wa Iri' Jam ta. Wara taxi' ara xi' hwein i ma' cocon. Taxi' hun Jó cara pane. Quereme cara nain ca ximin nucun pane. Taxi' hun pain ca aram aram quep xiho' con Taramaxicon Iri' Jam quem. Xi om ne ca xiram pa' tamana taxipa' ara ca Taramaxicon Iri' Jam ta, je curucun mao na.

¹² Tomi' xim inuhu' pain i ca' quem xere, tomi' mip xim inuhu': Mo ta wara tomi' pe xujuhu' pain ca ara xi' hwe ma', ta an hwet ximama' hwein wixinain pawin pain ca tomi' nuhu' me. Ta an hwet ximama' hwein wixinain macan' je oro carawa nein quem me. Ta an hwet ximama' camain' hwein wixinain oro carawa pain ca ma' ta howa cacapa' oro win ma' ne pain ca ara tain ta' ca' hwe me. Mo ta wara tomi' pe xujuhu' pain ca ara xi' hwe ma', ara xin ta e' je. Mo ta om ara xin hwein, om ta ara xin ta e' je. Ma' ta om wap cuhu' Iri' Jam ta inuhu'.

Ca om ha' ne pain ca tara con ta'a hun Iri' Jam pain ca tomi' hun ma'

¹³ Tomi' querec inuhu': Ma' na win ma' nuhu' co to' i'ina non carawa ma' quem? Tomi' toron Iri' Jam ta. Ma' na win ma' nuhu' co tomi' querec te ma' quem? Com querec te mi' toron pain tamara' Iri' Jam ta.

¹⁴ Ma' na win ma' nuhu' co caxi ma' quem? Tomi' ca' turuhu': Mo'o jujun co querec wet nanapari' pain ca cut in xijexi' pain ca howa xun Jeju ma'. Tomi' mi' tatarapa' con Iri' Jam, ji'ao mi' tatarapa' pain wina pain homain oliva quem. To' xio ron ta ac cocon tara Taramaxicon nexi' Jeju pata' ta, ac i ma' tara ca tomi' cuhu' ma'.

¹⁵ Mo ta tomi' mi' cocon con Iri' Jam co caxi ma', mo ta howa xo' cocon pain ca ha' tarapari' ta caca ma', xio pin ac ca tara ta. An tequi' pe toron Taramaxicon nexi' quem. Am caracat ca quem. Je i ma' ira, xic am pin ac xine tara ca caracat nucun ta.

¹⁶ Je ca tomi' xuhu' ca'. Tomi' hwet mi' xujuhu' pain ca caracat nuhu' ma'. Tomi' mi' xujuhu' con Iri' Jam quem. Ma' ta xio pin hwe. Wari' co xut xo' ma', tomi' mi' iri non con Iri' Jam win ma' ca ne, hwara' opa tamana na ca tomi' nucun. Mi' pan non pain ca tomi' nucun Iri' Jam ta.

¹⁷ Noro jun profeta Elias cara pane. Wari' na, ac iri' ca' na quem. Ane tomi' con Iri' Jam ne, tomi' mip non pain iri' ximicon. Om ta pan' mami' ne xowi' pum ta Te Iri' Jam iri non ne, am pin ac ne na quem. Cawaxi' pa' nonon, cawaxi' pa' mami' nonon quem. Ma' 3 pin iri na cawaxi' pain ca om pan' mami' ne xowi' cocon ne, maqui' pa' ac cocon na ximijain xijein quem.

¹⁸ Tomi' mami' ac con na Iri' Jam. Pan' tara xowi' pum ta Te Iri' Jam iri non ne, pan' ac ne na, tarama' ac ne na oro ca oin' ximama' caca pane quem.

¹⁹ Tomi' xim inuhu' pain i ca' quem xere. Mo ta ma' ca win ma' nuhu' co tomi' ha' tomi' ha' om pin nain capijacon Iri' Jam ca iri'o' ma', mo ta ma' ca xucun win ma' nuhu' co an in ton non ma', pain ca in hwet ron Iri' Jam, tomi' ha' mami' rain capijacon ca iri'o' ta con ma',

²⁰ mam' pe wet ac hwein tara i ca': To' cwirin' pin iri non pain ca caracat nucun win ma' ca ne, to' witan ca' ac con tara pain ca mi' pin wa. Xic am mija pan tarain ca caracat nucun Iri' Jam ta. Je i ca' ca xirao' ne ca'.