Tiago 4 - Tradução Bíblica Pacaas Novos

Ca win xumu jein ca param pan ne Iri' Jam tococwa

¹ Main ca maqui' ac ne ca tama' noc xujuhu' pain ca tama' mana' caracan xujuhu' ma' quem? Om ca maqui' nein ca param ximama' nuhu' pain ca ari hwein ca param pan nucun Iri' Jam ra?

² Param ximama' hwein caramaji macan', ane om ha' cuhu' pain ca cut hwein ne. Jain jain hwein, to' pa' pin ton waximain ta ac hwe na, ane om cut ca' ac xujuhu' pain ne. Je ca mana' caracan xujuhu' ma', noc mi' xujuhu' pain quem. Om om nuhu' carawa ca param hwe ma', xi mi' xut pain hun Iri' Jam ta.

³ Mi' xut pain iri hun ne, om ca mi' cuhu' pain, xi mi' xut pain xo' hun ta. Mi' xut pain paxi' hun, ane param e' hwein ne, ma' ta mam' waraju ximama' xi' pain ca param pan nexi' ta hwe ma'.

⁴ Cain' cain' xihwe pain ca an pe pin hun Iri' Jam quem? Om ca taraju pa' hwe ra? Wari' co win ma' ne nonon oro co tama' pan teretem nana pain ca om howa cocon Iri' Jam ma', wirico co noc non Iri' Jam.

⁵ Tomi' ximao tarapari' Iri' Jam pain ca xirao' an pe xine capijacon ra? Tomi' ca' napari': Tamataracon Iri' Jam ca an pe mi' capari' ca', pain ca pe ho' roron ta cain pari', param tamana napari'. Jain jain napari', win xumu e' xine ta napari'.

⁶ Ac i ma' paxi' napari', ane quep xiho' capari' pain ca xiram pa' tamana capari' ne. Je ca xirao' an pe xine pain capijacon Iri' Jam quem: Ari nonon oro co xec xec nana Iri' Jam ta. Oro co om xec xec nana ma' iri nana ne, xiram pa' tata, quep xiho' tata quem. Ac i ma' na ca xirao' pe xine pain capijacon Iri' Jam pane.

⁷ Je ca tomi' xuhu' ca', tomi' ha' cara jun Iri' Jam. Ari jun Caxicon Jam, mo ca' ac cuhu' tara.

⁸ Wixicam pin jun Iri' Jam, wixicam pin ac cuhu' tara quem. Wahu' pain ca caracat hwe ma', cwirin' pin je. Win ne ca hohoc xo' hwein muhu' pain ca mixem tamana nein ma', ac i ma' tara ca an to pin hwein ca caracat nuhu'. Wahu' pain ca param tocwan hwe ma' quem, an to pin jein ca param ximama' nuhu', win xumu e' jun Iri' Jam.

⁹ Tomi' xaxa' tamana je pain ca pan teretem nuhu'. Awaran je, awaran xoc je. Tatam' maho' je, awaran e' je. Tomi' querec te ximama' maho' je, tomi' xaxa' e' je.

¹⁰ Querec pin' xujuhu' pain ca ximin nuhu' pain ca om querec awi cuhu' Taramaxicon Iri' Jam. An tequi' to ac cuhu' tara, mi' ac cuhu' tara pain ca querec awi cuhu' quem.

Ca om ha' ne pain ca tomi' em' xujuhu'

¹¹ Ta tomi' napat xujuhu' me xere. Wari' co tomi' napat non win howa ca ma', am tomi' em' con quem, wirico co tomi' napat nain capijacon Iri' Jam ca tomi' ha' je capari'. Tomi' in pin nain quem. Je ca tomi' xuhu' ca', tomi' inon wari' co tomi' in pin nain capijacon Iri' Jam ca tomi' ha' je capari'. Mo ta tomi' in pin main capijacon Iri' Jam, om ca tomi' ha' main. Joc in pin main, ac juiz ma pain ca joc in pin main quem.

¹² Xica' pe na Iri' Jam co Taramaxicon ma', pain ca tomi' ha' xine capari' ca'. Wirico co Juiz ma' quem, pain ca tomi' xo' ton cocon oro wari' pain oro ca ara caca ma' quem. Wirico co to' witan taxi' ma', wirico co wap taxi' ma' quem. Je ca tomi' xim ca', ma' na ca an xiho' ac mon Iri' Jam pain ca tomi' em' mon win howa ma ra? Xi taramaxicon ma ta.

Ca om ha' ne pain ca xec xec wa pain ca coromicat an pe xo' xine carawa ca ara xi' wa ma'

¹³ Tomi' xim inuhu' pain ca coromicat an pe xo' xin hwein carawa ca ara xi' hwe ma'. Taraju wet je e'. Tomi' ac i ca' hwe: Mama' xin urut pain cidade cain, mama' ho' xi' urut pain xec ca', am pain xijein xec tara, mama' xi' urut ta. Cawaxi' pa' taraparut pain i cain. Taramaja xi' urut, cut xut pain carawa, vender vender ac xut pain tara, cut tamana ac xut tara pain dinheiro ta, ac i ma' na ca tomi' nuhu' ma'.

¹⁴ Cain' cain' xihwe quem? Xi taxi' hwein carawa ca xec ara xim nuhu' ta. Am e' e' wet hwe pain xijein cawaxi', am cono' hap xi' hwe. Ac murucucu' ara xi' hwe. Win ne murucucu' pain xo' xec ma'. Piri' mao na, pi' pin hap ac ne na. Ac i ma' hwe quem.

¹⁵ Om xi tomi' ac i ma' hwe ta. Tomi' ca' e' je: Tara parut ta'a, mo ta param mi' caparut pain ca e' e' wet urut pain oro xijein xec Taramaxicon Iri' Jam cwa', mo ta param mi' caparut pain ca ara xut pain carawa ca ara xi' urut ca', tara con ta, ac i ma' tara ca tomi' nuhu' ta.

¹⁶ Ane xec xec e' hwe ne. Xin to hwe pain ca coromicat an to xo' ximama' hwein oro ca ara xi' hwe ma'. Pan teretem hwe pain ca xin to ac i ma' nuhu' ta.

¹⁷ Je ca tomi' xuhu' ca': Wari' co querec pin' paxi' nain carawa ca awi ca ara ra con Iri' Jam ma', mo ta om ara cain, caracat ac ca na.