Tiago 3 - Tradução Bíblica Pacaas Novos

Ca hwara' opa pan ne petehwet nexi'

¹ Ta mija caca co jain jain nanain ca ca' na wa capijacon Iri' Jam pahu' ta xere. Ma' paric ca' e' tatara co param nanain pahu', xi om ne ca taxi' ara hun Iri' Jam ma', pain ca tomi' xo' xim capari' pain ca xuruxut nexi' pain ca ca' na xin capijacon ta. Om ta tomi' xo' mip tococwa pain ca xuruxut nucucun oro co om ca' na nanain capijacon. Wari' pain ca ca' na xin capijacon ca' iri tara ne, tomi' xo' mip pan tarapari' pain oro coximinain ca xuruxut nexi'.

² Camara' camara' pi' pin ara xi' iri', xi om ne ca ma' taxipa' ara capari' oro xijein ca caracat wa ta. Wari' co om pan' ma', pain ca om tomi' pan tem ca ma', wirico co iri' wari' ta. Ximicon hwanana na, xi om ne ca miri'om taxi' ara cain ca param nucun. Om ca ara e' cain ca param nucun.

³ Noro jein cavalo ma'. Tucu pan caho' irin capijain pain arain too. Mama' xin i cain ta iri iri' ne, cuc in cuc in ac xin na, tomi' ha' ac capari' na.

⁴ Noro jein oro mam' horoho wa ma' quem. Cote ne paxi' na, joc in joc in paxi' ta pain camana' quem. Ane joc wat taxi' pan cain wari' co quep nain ne. Mo ta mao tain cain ca, mam' joc wat joc wat xo' ac cain na pain wijimain arain xinain pain nomoji ma'.

⁵ Ac i ma' na pain petehwet nexi' quem. Om paxi' na ca hwara' ne, ane hwara' opa pan ne ne. Je ca mam' tomi' xec xec ximama' iri' ca'. Noro jein wijimain xe ma' quem. Om paxi' na ca hwara' ne pain ca xo' caraho' ne ma', ane ha' ne pain ca tom tom pi' pin nein cote ne nahwarac ne.

⁶ Ac xe ca to' em' nain oro pana pain mi na petehwet nexi' quem. Pan tem tamana na. Pe paxi' nain winaxi', ane to' em' to' em' pi' pin nein oro coximinain cwerexi' ne. Ac ca tom tom pi' pin capari' na. Wirico Caxicon Jam co caraho' nain xajinain petehwet nexi' ta, ac je na.

⁷ Ha' napari' pain ca to' quereme pin xin oro carawa, tomi' ha' pin ac capari' na. Je oro carawa ca to nain mi, oro me, oro em', oro carawa ca to nain com ma' quem, ma' nana wari' co to' quereme taxipa' nanain, tomi' ha' pin ac tococwa na quem.

⁸ Ane om tomi' ha' ra na ne petehwet nexi' ne. Om na wari' co to' quereme taxi' nain petehwet nucun, om na wari' co to' tacana pe taxi' nain. Xi awi ra na ne ta. Ac cominain xicon caxicon em' cwa' na pain ca huru huru mi' pin con wari' ma', ac i ma' na petehwet nexi'.

⁹ In ac urun Taramaxicon Iri' Jam co Te iri' cwa', mam' in ac urun pain petehwet nexi', mam' tomi' noro ac xuxun na pain oro win ma' nexi' co tomi' ma' pin ca Iri' Jam quem, co an xiho' tatarapa' ta ca pain ca xo' tomi' ma' qui' tococwa pane.

¹⁰ Cain' cain' xixi' quem? Xica' pe paxi' na capijaxi', ane tocwan ne ca tomi' nexi' ne. In ac urun Iri' Jam, tomi' noro tomi' noro ac xuxun na oro win ma' nexi' ma'. Om ca na ne pain ca ac i ma' iri' ta xere.

¹¹ Noro jein comicon hoi hoi ma'. Weweweo qui' iri nain com ca toc awi ne, ma' tara ca weweweo qui' ac nein com ca toc quirijo ra? Om na ta!

¹² Noro jein oro xijein panaji memem quem xere. Panajinain figo ma', mi nain azeitona ra? Om na. Panaji uva ma' quem, mi nain figo ra? Om na quem. Ac i ma' na comicon hoi hoi ma' quem. Mo ta weweweo qui' nein com ca toc quirijo ma', om ca jao jao weweweo qui' ac nein com ca toc awi ma' quem.

Ca coromicat xo' nucun Iri' Jam

¹³ Wahu' pain ca coromicat xo' ina ta hwe ma', je pain ca taraju pa' xo' ina ta hwe ma' quem, an hwet pe jein ca xuruxut xo' nuhu' pain ca ara hwein oro ca awi wa ta. Om ta xec xec hwe pain, tomi' wixite e' je pain. Querec pin' ac xihwe tara pain ca xuruxut xo' nuhu'.

¹⁴ Wahu' pain ca juhum' ne xumuhu' pain ca noc mi' caracan xujuhu' pain oro carawa ma' iri nana ne, je pain ca joc in pin xujuhu' pain ca ara e' hwein ca param pan nuhu' ma', om ca ha' ne pain ca xec xec hwe pain. Je xi om ari hwein capijacon Iri' Jam ca iri'o' ma', pain ca xec xec ac i ma' hwe ta.

¹⁵ Oro ca coromicat ximama' ac i ma' wa ma', om ca maqui' nein pawin. Maqui' nain macan'. Maqui' nain ca coromicat nein ca wari' wa pain ca om howa tocwa Iri' Jam ma'. Maqui' non Caxicon Jam.

¹⁶ Mo ta noc mi' caracan xijexi' pain oro carawa ma', mo ta joc in pin xijexi' pain ca ara e' xin ca param pan nexi' ca', ja' teretem ac xijexi' na, ara tamana ac xin na oro ca om awi wa quem.

¹⁷ Ane jimao ne ca coromicat xo' wa ca maqui' nain pawin ne. Mo ta coromicat xo' iri', to ni ca' ac xin na ca caracat wa pain ca win xumu cain' xun Iri' Jam. Ca' ac iri' na quem: Quep xiho' ururun oro win ma' nexi' pain ca mana' caracan xucucun ma'. Tomi' querec te caracan xijexi'. Tomi' wixite xijexi' pain ca win xumu xin ca param pan nucucun oro win ma' nexi'. Xiram pa' tamana xijexi' pain ca ara mi' xijexi' pain oro ca awi wa. Om ca tomi' querec te paxica' xijexi', om ca tomi' capijacocon e' xijexi', tomi' iri'o' xijexi'.

¹⁸ Mo ta quep xiho' ac i ma' xuxun oro win ma' nexi' cwa', quep xiho' ac i ma' ac cacapari' tara, xuruxut xo' xuruxut xo' pi' pin ac iri' tara pain ca ara e' xin ca param pan nucun Iri' Jam quem.