Tiago 2 - Tradução Bíblica Pacaas Novos

Ca om ha' ne pain ca tomi' querec te paxica' tococwa oro wari'

¹ Je ca tomi' xuhu' ca' xere. Wahu' pain ca howa hun Taramaxicon nexi' Jeju Cristo co awi tamana ma', pain ca om caracat nucun pain ca hwara' opa tamana nucun ma', om ca ha' ne pain ca tomi' querec te paxica' huhun oro wari' ta.

² Tomi' xun wari' co corom hwet nuhu' pain ca cut in xujuhu' ma', pain ca howa hun Taramaxicon nexi' ma'. Am corom hwet cuhu' wari' co caramaju ma', co to nain micon oro anel ca mam' quep xine pain ouro ma'. Awi tamana na womicon quem. Corom ac ca na xucun wari' co iri' co ximin ma'.

³ Mo ta tomi' querec te paxica' huhun, mo ta tomi' querec te tamana hun co awi tamana womicon ma', mo ta tomi' ca' hun: Hap ra, xao pe rain i ca', xao pe rain pana ca awi ca', mo ta tomi' ac i ma' hun pain ca tomi' querec te tamana hun ma'. Mo ta om tomi' querec te homa hun co ximin ma', mo ta tomi' ca' hun: Xat cara pe rain i ma' ta. Am tomi' ca' hun quem: Xao pe rain macan' ma', xao pe ho' e' ne pain caxima ca', mo ta tomi' ac i ma' hun.

⁴ Cain' cain' xihwe quem? Om ca tomi' querec te paxica' huhun ra? Tomi' querec te paxica' huhun ma' ira! Om ca querec querec ac wiricoco cucuhu'. Tomi' querec te e' hun xucun pain ca awi ca womicon ma', noc ac hun na xucun pain ca ximin nucun ma' quem.

⁵ Je ca tomi' xuhu' pain ca tomi' querec te xuhu' ca' xere. Taraju wet je e'. Oro wari' co ximin nana pain macan' ca', wiricoco co tora' pan ca Iri' Jam ma', pain ca howa xine cocon ma'. Tomi' ca' tata: Howa iri mahu' ne, ac ca caramaju tamana hwe na. Main mi' xuhu' pain ca to ho' mahu' pain ca aram aram taramaxicon pe ho' xuhu' ta' ta. Wara tomi' pe ara xi' inuhu' pain, xi om noc ara mahu' ta pan tata.

⁶ Je ca tomi' xuhu' ca'. Tora' paxi' nonon co ximin nana Iri' Jam ma', ane noc pan huhun ne. Para tomi' querec te e' huhun co caramaju nana ma' quem? Om ca wiricoco caca co to' i'ina nunuhu' pain ca quep em' cucuhu' ra? Om ca wiricoco caca co o mi' nunuhu' cocon oro juiz ra?

⁷ Om ca wiricoco caca co tomi' napat nonon Jeju co wari' ne nuhu' ra? Tomi' napat nanain wixicon ca awi tamana quem.

⁸ Ma' na ca xirao' an pe xine ca tomi' ha' je capari' Iri' Jam. Xirao' mi' ca' napari': Ta noc momon oro win ma' ma me ta. Win ne ca om noc pan xijem ma' quem napari'. Mo ta tomi' ha' hwein ca tomi' nucun ca', ara xo' ac hwe tara ta.

⁹ Ane om ara xo' hwe pain ca ari hwein ca tomi' nucun ne. Mo ta tomi' querec te paxica' huhun oro wari' ma', em' hwe, xi om ne ca caracat ara hwe pain ca ari hwein ca tomi' ne ta ac cuhu' tara Iri' Jam.

¹⁰ Je ca tomi' xuhu' ca'. Wari' co tomi' ha' paxi' nain oro wirain ca tomi' ha' je capari' Iri' Jam ma', mo ta ma' xica' pe ne ca tomi' nucun ca om tomi' ha' ca ma', ari ari pi' pin nain oro ca tomi' nucun. Em' ma, xi tomi' ha' tomi' ha' pi' pin main ca tomi' ne ta non Iri' Jam.

¹¹ Xi wirico ara ca Iri' Jam co tomi' ca' napari': Ta quep mam xequem narima' me ta napari'. Wirico co tomi' ca' napari' quem: Ta to' pa' mon wari' me ta napari'. Wirico Iri' Jam co tomi' tomi' pi' pin nain. Om paxi' tara ca quep mam xequem narima' ma'. Mo ta to' pa' mon wari' ma', ari ari pi' pin main oro ca tomi' nucun.

¹² Je ca tomi' xuhu' ca', ma' tara xumuhu' me. Main tomi' xo' xim ara xi' napari' Iri' Jam pain oro ca ara iri' ca'. Am tomi' ha' hwein oro ca tomi' ne ca to' witan nuhu' ca', am om tomi' ha' hwein, ac i ma' tara pain ca tomi' xo' xim capari'. Je ta ma' ne xumuhu' pain oro ca tomi' nuhu' ma', je pain oro ca ara nuhu' ma' quem.

¹³ Oro wari' co om xiram pa' nonon oro win ma' caca ma', om ta xiram pa' pan tococwa pain ca tomi' xo' xun tococwa pain oro ca tomi' caca, je pain oro ca ara caca quem. Oro co xiram pa' nonon oro win ma' caca ma' iri nana ne, xiram pa' ac tococwa tara pain ca tomi' xo' xun tococwa ta.

Ca an hwet pe jein ca howa nuhu' tococwa

¹⁴ Je ca tomi' xuhu' ca' xere: Hohot tara pain ca howa ina ta e' iri' ra? Mo ta om an hwet pe xin ca howa nexi', mo ta om tomi' ha' xun Iri' Jam pain ca ara jein ca awi wa ta capari' ca', je pain ca xiram pa' jujun oro wari' ta capari' ca', ma' tara ca witan ac iri' pain ca howa ina ta e' iri' ra?

¹⁵ Tomi' xixim oro xerexi' co ximin nana cwa'. Am om cacam wom, am om cacam carawa ca cao' wa.

¹⁶ Hwet iri nanapari' ne, tomi' tomi' ca' nanapari', mama' urut ta ac cacapari' na quem. Mo ta tomi' ca' e' xixim: E'e', mama' je ta. To jun to' om capin' nuhu' ma', cao' cao' ma'am je quem, mo ta tomi' ximama' ac i ma' e' xixim pain ca om xiram pa' xixim ma'. Cain' cain' xixi' quem? Hohot na ca tomi' ximama' e' iri' ra? Om na ta.

¹⁷ Je ca om na ne pain ca howa e' iri' pain ca om tomi' ha' xun Iri' Jam pain ca ara jein ca awi wa ta capari' ca', je pain ca xiram pa' jujun oro wari' ta capari' ca' quem. Wari' co ac i ma' ma', howa ina ximao e' na, xi querec pin' tocwa pain ca howa nucun ta. Ac wari' co mi' pin ma', co pe ximao e' ma' quem. Ac ca mi' pin ne na ca howa nucun ta.

¹⁸ Am ma' ca wari' co tomi' ca' napa' ma': Ma' na wari' co howa non Iri' Jam, je ca to' witan tocwa ma'. Ma' ac ca na xucun wari' co xiram pa' nonon oro wari', je ca to' witan tocwa ma', am ac i ma' ne ca tomi' capa' wari' ma'. Cain' cain' xira quem ac ton na. Mo ta howa inon Iri' Jam ta e' mapa' ma', mo ta om an hwet mi' mapa' pain ca howa nem pain ca xiram pa' momon oro wari' ma', om ca querec pin' ac xim pain ca howa iri'o' nem. Wata' iri na ne, xiram pa' inonon oro wari', je ca querec pin' mapa' pain ca howa iri'o' ne ca', ac i ma' tara ca tomi' ton ta.

¹⁹ Ma' xica' pe na Iri' Jam ta na ca howa nem ra? Je i ma' ira! Howa ac i ma' nana oro caxicon jam quem. Howa paxi' nonon Iri' Jam, ane jin' cocon ne, cocoroc nana pain ca jin' cocon ta.

²⁰ Om ca coromicat xo' ca wari' co howa ac i ma' ta. Je xi taraju pa' ca quem? Taraju wet je e'. Tomi' xo' xuhu' pain i ca': Om ca na ne pain ca howa e' iri' pain ca om tomi' ha' xun Iri' Jam pain ca ara jein ca awi wa ta capari' ca'. Pain ca howa ac i ma' iri', om ca howa iri'o' iri' ta.

²¹ Noro jun hwanana nexi' Abraão cara pane. Para to' hohot pin inem ta con Iri' Jam quem? Taraju pa' je e': To' hohot pin inem, xi om ne ca ara pan nem pain ca an terem' pe mon panxima Isaque pain pacun ca tom tain' pe mi' xim mapa' con ta non pane.

²² Taraju pa' hwe? Howa non Iri' Jam Abraão pane, tomi' ha' non pain ca ara cain ca ara ra tocwa quem. Ara iri nain ca ara ra tocwa pane ne, querec pin' ac tocwa na pain ca howa iri'o' nucun.

²³ Hwet pin ac ne na ca xirao' an pe xine capijacon Iri' Jam quem. Ca' na con: Howa non Iri' Jam Abraão. Je ca tomi' tocwa ma', tomi' pan non Iri' Jam: To' hohot pin inem, xi om ne ca howa ara mapa' ta non. Iri' win ma' ne inem ta non quem.

²⁴ Taraju pa' je e'. To' hohot napari' Iri' Jam pain ca tomi' ha' xun ca', pain ca ara xin carawa ca ara je capari' ca'. Om ca to' hohot capari' pain ca howa e' iri' pain ca om tomi' ha' xun quem.

²⁵ Je ca ara ne cam Raabe pane quem. Caxicam narima' paxi' na ira. Ane to' hohot tacama pain ca ara pan nequem pane ne. Quep xiho' iri tata wari' nein Israel ne, pain ca noro noro cacain oro macan' pain Canaã pane, narain ho' ac tococwa na cocon oro soldado co quep xun nonon ira. Mam' pe mi' ac tococwa na pain xijein wana, in mama' ac caca na pane. Je ca to' hohot cam Iri' Jam quem.

²⁶ Je ca tomi' xuhu' ca': Noro jun wari' co mi' pin ma'. Om pin iri na ca wereme ca ne, pain ca hwet ca' con tamataracon ma', taxi' ac xun na pain ca mi' pin nucun. Ac i ma' na pain ca howa nexi' quem. Mo ta om an hwet pe xin ca howa nexi' ca', mo ta om tomi' ha' xun Iri' Jam pain ca ara jein ca awi wa ta capari' ca', je pain ca xiram pa' jujun oro wari' ta capari' ca', om ca howa iri'o' iri'. Ac ca mi' pin ne na ca howa nexi' ta.