Tiago 1 - Tradução Bíblica Pacaas Novos

¹ Tiago ina pain ca xirao' mi' xuhu' ca'. Taramaja mi' e' inon Iri' Jam con Taramaxicon nexi' Jeju Cristo. Xirao' mi' inuhu' pain ca judeu iri' ca', pain ca wawaran to hwein oro xijein macan' ma'. Tomi' querec te inuhu' ta.

Oro ca to' i'ina tococwa

² Je i ca' ca xirao' mi' xuhu' ca' xere. Ma' iri turuhu' oro ca to' i'ina wa ne, je i ma' ira je, tomi' querec te tamana je pain.

³ Xi om ne ca taxi' ara hwein i ca' ta: Mo ta howa cara hun Iri' Jam pain ca to' i'ina cuhu', hwara' opa hwara' opa tiquin' ac ne tara ca howa nuhu'.

⁴ Na e' na pain ca hwara' opa hwara' opa tiquin' hwe pain ca howa hun Iri' Jam ta. Ma' ta ximicon hwanana hwe pain ca howa nuhu' ma', ma' ta hohot pin hun Iri' Jam pain oro ca ara hwe ma' quem. Hohot cara ac hun tara pain ca xuruxut xo' nuhu' ta.

⁵ Mo ta ma' ca win ma' nuhu' co om taraju pa' xo' ma', pain ca om querec pin' cain ca param nucun Iri' Jam ma', tomi' pan toron ta. Mi' ne pain ca taraju pa' wa, mi' ne pain ca querec pin' tain ca param nem pain ca xut xo' wa ta toron. Mi' ac tocwa pain tara. Xi xiram pa' taxipa' ara capari' pain ca tomi' xun ca'. Om ca pan to' cain tarajixi' pain ca tomi' xun quem, ara mi' querec te napari' pain, je curucun mao na.

⁶ Howa xun pain ca mi' ne pain xun ca'. Om ta tara con ta'a camain' xun pain. Wari' co tara con ta'a non Iri' Jam ma', pain ca tama' waran ne ca howa nucun ma', an xiho' ara xi' nain com ca wap in wap in ma', pain ca nocom nocom ne pain hotowa ma'.

⁷ Wari' co coromicat ac i ma' ma', om ta cut cain carawa ca mi' ne pain con Taramaxicon nexi'. Om ca ha' ne pain ca mi' tarapa' pain con.

⁸ Xi om ne ca tocwan ara ne ca coromicat nucun ta. Coromicat ximao na, om ca taxi' camain' cain carawa ca ara ta' ca.

Co ximin nana pain ca om cocon carawa, wiricoco co caramaju nana quem

⁹ Wari' co howa ma', co ximin pain ca om con carawa ma', tomi' querec te e' tara pain ca xiram pa' pan con Iri' Jam. Ac ca to' caramaju pin tocwa na pain ximicon.

¹⁰ Wari' co howa ma', co caramaju ma' iri na ne, tomi' querec te e' tara pain ca ximin pin ca pain ca om pin ne caramaxicon quem. Xi om ne ca to' querec pin' ara tocwa pain ca om quep xiho' con caramaxicon. Main pan' am ta' ara xi' na, win ne hwijein tononoin ma'.

¹¹ Nonoc pin iri na xina pain ca hwet qui' ca pain xo' xec ne, xain ac cain na tononoin, cono' pin ac ne na, camara' pin ac ne na hwijein. Awi awi om pin ac ne na quem. Ac i ma' na wari' co caramaju ma' quem. Taramaja taramaja ca' na pain oro ca taramaja nucun ma', aram aram mi' pin ac ca na quem.

¹² Param mi' ta pain ca awi wa wari' co hwara' opa cara pain ca quereme cain oro ca to' i'ina non ma'. Querec pin' pan iri toron Iri' Jam ne, pain ca hohot mapa' ta con ma', mi' ac con pain tara carawa ca wara tomi' pe con ma', pain ca e' pe ho' cara ne ta con ma'. Wari' pain ca om noc xun ca', wara tomi' pe napari' pain i ma' ta.

¹³ Wari' co tomi' querec wa pain ca caracat ra tocwa ma', om ca na ne pain ca tomi' ca' ca: Wirico Iri' Jam co tomi' querec napa' ma', wirico co caracat ra napa' ma', om ca na camain' ne pain ca tomi' ac i ma' ca ta. Xi caracat ra ha' ca Iri' Jam ta. Om ca caracat je capari' quem.

¹⁴ Wari' pan ara xi' na co param nain ca caracat wa. Caracat je pan napari' ximixi' pain ca param pan teretem nexi' ta, ac i ma' ac i ma' xam' napari' ximixi'. Mixein napari', ac ca cuc cuc capari' na, ac ca cuc in capari' na pain ca caracat je caracat je capari' ximixi' pain ca param pan teretem nexi'.

¹⁵ To' ara ac i ma' iri napari' ca param pan teretem nexi' ne, to' caracat ac capari' na, aram aram to' parapa' pin ac capari' tara quem.

¹⁶ Je ca tomi' xuhu' pain ca tomi' querec te xuhu' ca' xere. Ma' tara xumuhu' me, coromicat xo' je.

¹⁷ Oro carawa ca awi ca ma' napari' ca', wirico Iri' Jam co mi' napari' pain. Maqui' nain pawin, maqui' non Cotere' co tomi' ma' pin non xina con panawo' con pijo' pane. Xin in taxipa' paxi' na ca toha nucun xina con panawo' con pijo' ma'. Iri' Jam ma' iri na ne, om ca xin in camain' ca. Je curucun mao na.

¹⁸ Mi' iri napari' pain ca howa xin capijacon ca iri'o' ca' ne, to' e' ac capari' na, mana panxita' pin ac capari' na quem. Maqui' nain ximicon, wirico co coromicat an pe mi' napari' pain. Tomi' ca' napari': Tomi' querec te paxi' inain oro carawa ca tomi' ma' ta' ca', ane tomi' querec te tamana pan xuhu' pain ca wari' ne xuhu' ca' ne napari'.

Ca tomi' ha' jein capijacon Iri' Jam tococwa

¹⁹ Je ca tomi' xuhu' pain ca tomi' querec te xuhu' ca' xere. Mam' pe wet jein i ca': Tomi' iri xujuhu' ne, momon taraju wet cain' ac hwe tara. Ta tomi' hap hwe me, tacana to cain' je pain ca taraju wet xujuhu'. Ta xain ne winahu' me, ta mana' hap hwe me.

²⁰ Xi quep xiho' capari' ca mana' wa ta. Mo ta mana' iri', om ca hohot ac xun Iri' Jam.

²¹ Je ca tomi' xuhu' ca': An to an to pi' pin jein oro ca caracat wa je oro ca pan teretem wa ta. Ta xec xec hwe me, tomi' ha' jein capijacon Iri' Jam ca pijim' mi' xihwe ma'. Ac ca oin' pe xine ara xi' na pain xumuhu' ta. Hwara' opa na, to' witan taxi' nuhu' quem.

²² Tomi' ha' jein capijacon Iri' Jam. Ta taraju e' hwein me, tomi' ha' jein. Mo ta taraju e' hwein, om na xumuhu', xi coromicat xo' hwe ta.

²³ Mo ta taraju e' hwein capijacon Iri' Jam, mo ta om tomi' ha' hwein, an xiho' hun wari' co noro e' nain jamicon pain ca mam' querec ca jamu wa.

²⁴ Noro noro ca' nain jamicon, in ca' iri nain ne, ji'am hap pin ac cain na ca noro e' ca ma', pain ca noro e' cain jamicon ma'.

²⁵ Ane om ac i ma' ne con wari' co noro wixite nain capijacon Iri' Jam ma', pain ca coromicat xo' cain ca tomi' nucun ca om em' camain' ma', ca to' witan capari' ma'. Mo ta jain jain cain pain ca tomi' ha' xitain na cain ma'. Mo ta om taraju e' cain, mo ta om ji'am pin cain, mo ta tomi' ha' taxipa' cain, quep xiho' pan ac con na Iri' Jam pain oro ca ara ca ma'. Param mi' ac con na pain ca awi wa quem.

²⁶ Wari' co coromicat ca' ma': Xut xo' ina pain ca win xumu ton Iri' Jam ta, mo ta coromicat ac i ma' ca, mo ta om an in an in cain ca tomi' nucun, mo ta tomi' ximao e' ca, om ca quep xiho' camain' con ca xut xo' paxi' nucun. Om na ximicon, xi xut xo' ca ta.

²⁷ Wari' co hohot ton non Cotere' Iri' Jam ma' iri na ne, pain ca xut xo' iri'o' ca pain ca win xumu xo' con ma', ara ac i ca' na: Querec wet nonon oro hwijima' co cono' ca' nanam mana cote cacama cacam waram jicacam ma', querec wet nanam oro narima' co cono' ca' nanam waram taxicacam ma', querec wet nanam pain oro ca to' i'ina nanam quem. Ara xite xucun, om ca to' em' camain' xucun pain ca an xiho' cocon oro caracat co om howa nonon Iri' Jam quem.