Romanos 8 - Tradução Bíblica Pacaas Novos

Ca quep xiho' capari' pain ca xuruxut xo' wa Tamataracon Iri' Jam

¹ Je ca tomi' xuhu' ca': Pain xocori ca' iri na ne, pain ca win cwere pin xun Cristo Jeju cwa', om ca em' hwe ta mami' capari' Iri' Jam. Om ca wap xim mami' capari'.

² Tamataracon Iri' Jam ma', ca hwara' opa ma', to' e' napari'. To' witan napari'. Xi om ne ca win cwere ara xun Cristo Jeju ta. To' witan ca' napari' pain ca hwara' opa nein ca caracat wa. To' witan ca' napari' pain ca hwara' opa nein ca cono' wa quem.

³ Ca xirao' nucun Moisés ma', om ca hwara' opa ne, om ca to' om pin ac nein ca hwara' opa nein ca caracat nexi'. Xi tomi' ha' pan xin ta. Ane hwara' opa pan ca Iri' Jam ne. To' om pin nain ca hwara' opa nein ca caracat nexi', xi om ne ca mam' ara capari' con iri' Panxica cwa' ta. An tan pan rain curucucun oro wari' co caracat nana ma', mi' pin caho' roron pain ca caracat nucucun ta non, to' om pin ac cain na ca hwara' opa nein ca caracat nexi' ca pe ho' napari' pain cwerexi' ca'.

⁴ Ma' ta tomi' ha' iri'o' hwein ca xirao' nucun Moisés ta napari'. Om paxi' na ca tomi' ha' taxipa' xin oro ca param nexi'. Tomi' ha' taxipa' irin Tamataracon Iri' Jam.

⁵ Win xumu ara xi' nanain oro ca param ne ca cwere wa oro wari' co tomi' ha' taxipa' nanain oro ca param nucucun ma'. Ane win xumu pan cacain oro ca param ne Tamataracon Iri' Jam oro wari' co tomi' ha' taxipa' nanain Tamataracon Iri' Jam ne.

⁶ Oro wari' co win xumu nanain oro ca param nucucun ma', cono' ac caca tara. Oro wari' co win xumu nanain oro ca param ne Tamataracon Iri' Jam ma' iri nana ne, ma' ac cocon tara ca om pi' ra ha' ne ca e' wa, om ac ne tara ca toron ne ximicocon quem.

⁷ Je ca noc cocon Iri' Jam oro wari' co win xumu nanain oro ca param nucucun ma'. Xi tomi' ha' cacain capijacon ta. Om ca tomi' ha' taxi' cacain quem.

⁸ Oro wari' co win xumu nanain oro ca param nucucun ma', om ca hohot ac cocon Iri' Jam.

⁹ Ane om win xumu xin oro ca param nexi' ne. Win xumu irin oro ca param ne Tamataracon Iri' Jam. Mo ta pe ho' capari' pain ximixi' Tamataracon Iri' Jam ma', win xumu ac irin na oro ca param nein. Wari' co om non Tamataracon Cristo ma', om ca wari' nucun Cristo ca.

¹⁰ Mo ta pe ho' capari' pain ximixi' Cristo ma', e' na tamataraxi'. Cono' pin paxi' na cwerexi' ca', xi ma' ara ne ca caracat wa ta. Ane e' ne tamataraxi' ne. Xi om ne ca to' hohot pin ara capari' Iri' Jam ta.

¹¹ Mo ta pe ho' capari' pain ximixi' Tamataracon Iri' Jam ca to' e' mami' non Jeju pane, main to' e' mami' ac capari' tara quem. Main to' e' mami' tarapari' Iri' Jam co to' e' mami' non Cristo Jeju pane. Pain ca aram aram mi' pin ta' ne cwerexi' ca', to' e' mami' ac capari' tara. Tamataracon ca pe ho' napari' ca', je tara ca mam' to' e' mami' capari' quem.

Ca mana panxica Iri' Jam pin iri'

¹² Je ca tomi' xuhu' ca' xere: Na e' na pain ca tama' tomi' ha' xin Tamataracon Iri' Jam. Om ca na ne pain ca tama' tomi' ha' xin cwerexi' pain oro ca param nexi'.

¹³ Mo ta tama' tomi' ha' xin oro ca param nexi' ca', xuruxut xumu ac xin tara ca cono' wa. Pain ca an to pin xin oro caracat nexi' ma' iri na ne, ac ca to' parapa' pin xin tara, ac ca mam' to' parapa' pin xin tara pain Tamataracon Iri' Jam ma'. E' ac xi' tara ta.

¹⁴ Wari' pain ca o mama' capari' Tamataracon Iri' Jam ca', mana panxica Iri' Jam mana panxica Iri' Jam pi' pin iri' quem.

¹⁵ Xi mi' ara capari' pain Tamataracon ta. Tamataracon ca mi' capari' ca', om ca mi' capari' pain ca in hwet xin ca tama' jin' nexi' pain ca an xiho' mami' xun wari' co jin' non taramaxicon nucun ma', om na. Mi' iri napari' pain Tamataracon ne, je ca to' mana panxica Iri' Jam pin capari'. Je ca ha' capari' pain ca Te pin xun Iri' Jam cwa'.

¹⁶ Pain ca Te pin xun Iri' Jam cwa', je Tamataracon ca tomi' xo' nain ximixi'. To' taxi' napari' pain ca mana panxica Iri' Jam pin iri' ca'.

¹⁷ Je ca mi' xim capari' pain oro ca awi wa ca wara tomi' pe mi' capari' pane, xi om ne ca mana panxica ara iri' ta. Main cut xin con, cut wi xin con Cristo. Mo ta an xiho' xun Cristo pain ca jain jain nucun pain macan' ca', mo ta jain jain wi xun, tomi' querec te ac capari' tara Iri' Jam. Tomi' querec te wi ac capari' tara con Cristo, mi' wi ac capari' tara pain ca jao jao ma' xun pain ca awi nucun pain ca hwara' opa nucun quem.

Oro ca awi wa ca mi' xim capari' Iri' Jam

¹⁸ Ca' na ca coromicat ne ca'. Oro ca jain jain nexi' ca', pain ca to' i'ina capari' oro carawa pain xocori ca', om ca an xiho' camain' nein ca awi wa ca mi' xim capari' Iri' Jam ta. Tiquin' mao pan na ca awi nein oro ca mi' xim capari' ma', pain ca mi' xim capari' pain ca jao jao ma' xun pain ca awi nucun pain ca hwara' opa nucun ma'.

¹⁹ Winim' non Iri' Jam oro carawa ca tomi' ma' pin ca ca'. Winim' non pain ca aram aram cut hwerehwet to xim capari' pain ca aram aram momon cwa' mana panxita' cwa' xim capari' ca'. Mija na ca winim' con, winim' cara non, jain jain na, param tamana non pain ca cut hwerehwet to xim capari' ca'.

²⁰ Em' pin ma' tara ne ara xi' nain oro carawa Iri' Jam pain cara pane, em' pin ma' tara ne nain oro carawa ca tomi' ma' pin ca pane. Om paxi' na ca em' ne pane, ane em' pin ma' tara ne pan cain pane ne.

²¹ Oro carawa ca tomi' ma' pin ca ma', winim' nain xec nein ca aram aram awi pin ta' ne. Witan ca' ac nein tara ca em' wa ca'. Witan wi ac capari' tara quem. Witan pan xi' pain ca mana panxica Iri' Jam iri' ca', jao jao ma' ac xun tara Iri' Jam pain ca awi nucun pain ca hwara' opa nucun. Witan wi tarapari' oro carawa ca tomi' ma' pin ca quem. Jao jao ma' toron Iri' Jam pain ca awi nucun pain ca hwara' opa nucun quem.

²² Taxi' ara xi' irin i ca': Ac ca jain jain pi' pin ne na oro carawa ca tomi' ma' pin ca Iri' Jam. Ac ca toron ne na ximi, win cama narima' pain ca caxi cama pain ca pan ta' ca cawinacam cwa', ac i ma' na ca toron ne ximi oro carawa ca'. Pain ca xo' em' qui' ne pane, pain ca xo' caracat qui' ca Adão pain cara pane, mao ac ne ma' na, ca toron ac ne na, ca toron ac ne na, ca toron pa' ac capari' na pain xocori ca' quem.

²³ Om ca toron xica' to ne ximi oro carawa ma'. Toron iri' quem. Wara mi' paxi' napari' pain Tamataracon Iri' Jam pane, pain ca xo' mi' xim pain oro ca param ne qui' capari' pane. Ane toron ne iri' ximixi' ca' ne. Winim' irin xec nein ca aram aram iri' mana panxita' pin xim capari' pain ca aram aram to' e' mami' xim capari' ca'.

²⁴ Je ca winim' iri' ca', pain ca xo' to' witan qui' capari' Iri' Jam pane, winim' cara ac irin na oro ca mi' xim capari'. Mo xi wara ma' capari' oro ca mi' xim capari' ca', je i ma' xira ca om winim' winim' wet qui' xin quem. Je ca tomi' xuhu' ca': Pain ca wara ma' con carawa wari' ma', om ca winim' winim' wet cain.

²⁵ Ane winim' winim' wet xin oro ca om mi' querec capari' Iri' Jam ne. Winim' cara irin.

Ca tomi' mi' capari' con Iri' Jam Tamataracon

²⁶ Om ca xica' pe ne ca winim' cara nexi' ca quep xiho' napari'. Quep xiho' napari' Tamataracon Iri' Jam quem. Xi hwara' opa iri' ta. Xi tomi' xo' taxi' xun Iri' Jam quem. Ane tomi' mi' capari' con Tamataracon ne. Tomi' mip non, tomi' non iri' ximinain. Om ca hwet ne capijain pain ca tomi' mi' capari' con, xi tomi' ne iri' ximinain pain ca tomi' mi' capari' con Iri' Jam ta.

²⁷ Querec pin' nain ximixi' pain ca coromicat nexi' Iri' Jam. Je ca taxi' cain ca coromicat nein Tamataracon pain ca tomi' ne iri' ximinain ma', pain ca tomi' mi' capari' con. Tomi' nain ca param pan nucun Iri' Jam. Pain ca tomi' mi' capari' con, pain ca wari' nucun Iri' Jam iri' ca', tomi' nain ca param pan nucun Iri' Jam.

²⁸ Taxi' irin i ca' quem: Oro carawa ca ara napari' ca', je ca mam' quep xiho' capari' Iri' Jam ta. Mam' quep xiho' quep xiho' pi' pin napari' pain oro carawa ca ara napari'. Pain ca om noc xun Iri' Jam cwa', mam' quep xiho' pan napari' pain oro carawa ca ara napari'. Wara tomi' ca' napari' Iri' Jam: Wari' ne inuhu' ta napari'. Ma' ta aram aram ara tain ca param ne pahu' ta napari'.

²⁹ Xi wara querec pin' ara capari' pain ca om ma' querec ne macan' pain cara pane, wara tora' napari' pane. Ma' ta main an tan pan hun Panxita' ta napari'. Ma' ta aji' hun pain ca xere xujuhu' ma' napari'.

³⁰ Pain ca wara tora' capari' ca', wari' ne napari'. Pain ca wari' ne capari' ca', to' hohot pin napari'. Pain ca to' hohot pin capari' ca', mi' napari' pain ca jao jao ma' xun pain ca awi nucun pain ca hwara' opa nucun ta.

Ca om noc capari' Iri' Jam

³¹ Ac i ma' napari' Iri' Jam quem. Tama' quep xiho' napari'. Je ca taxi' xin ca om ma' camain' ca wari' co to' quiji' pin taxi' napari' ta.

³² Win ne ca om narain ho' capari' con Panxica pane, pain ca mi' pin caho' pin roron ta con pari' pane. Mi' napari' con, mi' mi' xam' napari' pain oro carawa con quem. Je ca tomi' xuhu' ca': Om ta mi' e' capari' pain oro carawa quem ra? Mi' e' tarapari' pain, xi wara mi' ara capari' con Panxica ta.

³³ Tora' napari' Iri' Jam. Ma' tara wari' co tomi' em' napari' con Iri' Jam ra? Om na ta. Wirico Iri' Jam ara xi' na co wara to' hohot pin napari' ta.

³⁴ Ma' tara wari' co em' pin hwe ta napari' ra? Om na ta. Mi' pin caho' ara xi' napari' Cristo Jeju. Mi' pin na, e' mami' ac ca na quem. Xao pe ho' pin nain iri' curucun Iri' Jam. Tomi' mi' napari' con quem.

³⁵ Ma' tara wari' co to' om pin taxi' nain ca om noc capari' Cristo ra? Om na ta. Om na wari', om na carawa ca to' om pin taxi' nain ca om noc capari' Cristo. Mo ta to' i'ina capari' oro carawa ma', je tara i ma' ca to' om pin taxi' nain ca om noc capari' Cristo ra? Mo ta jain jain iri' pain oro carawa ca ara napari' ca', mo ta ja' tequi' quep em' cacapari' oro wari' pain ca howa xun Iri' Jam cwa' quem, je tara i ma' ca to' om pin taxi' nain ca om noc capari' Cristo ra? Mo ta om capari' carawa ca cao' wa ca', mo ta om capari' wom cwa' quem, je tara i ma' ca to' om pin taxi' nain ca om noc capari' Cristo ra? Mo ta ma' capari' carawa ca to' cono' pin xim napari' ca', mo ta to' parapa' pin xim cacapari' quem, je tara i ma' ca to' om pin taxi' nain ca om noc capari' Cristo ra?

³⁶ Win ne ca xirao' pe xine pain capijacon Iri' Jam ca': Tama' ma' naparut wari' co tama' to' parapa' pin xim naparut pain oro xijein xec. Xi om ne ca howa ara urut pum ta. Quep em' nanaparut oro wari', ac ovelha urut cocon. Win ne ovelha pain ca to' parapa' pin xi' wa ma', ac i ma' urut cocon. Ac i ma' na ca xirao' pe xine pain capijacon Iri' Jam pane.

³⁷ Ac je paxi' napari' oro carawa ca to' ara pin napari' ca', ane om to' quiji' pin capari' ne. Hwara' opa cara iri'. Wirico Cristo ma', co om noc napari' ma', wirico co to' hwara' opa napari'.

³⁸ Om na carawa ca to' om pin taxi' nain ca om noc capari' Iri' Jam ta, taxi' ina ta. Mo ta cono' pin iri', mo ta e' iri' quem, je tara i ma' ca to' om pin nain ca noc capari' ra? Om na ta. Oro jam co taramaja mi' nonon Iri' Jam ma', oro caxicon jam co taramaja mi' nonon Caxicon Jam ma' quem, om ca to' om pin taxi' cacain ca om noc capari' Iri' Jam. Oro carawa ca ara napari' pain xocori ca', oro carawa ca om ara querec napari' quem, oro taramaxicon co hwara' opa nana ma' quem, om ca to' om pin taxi' ac cacain ca om noc capari' Iri' Jam.

³⁹ Oro carawa ca to nain pawin cain, oro carawa ca to nain macan' ca' quem, om ca to' om pin taxi' nein ca om noc capari' Iri' Jam. Om na carawa ca to' om pin taxi' nein ca om noc capari' Iri' Jam ta. Pain ca om noc capari' Iri' Jam cwa', wirico Taramaxicon nexi' Cristo Jeju co an hwet mi' napari' pain ca om noc capari' ta.