Romanos 7 - Tradução Bíblica Pacaas Novos

Ca tomi' mi' cain ca an tacama narima'

¹ Tomi' ca' inuhu' ta xere, xi om ne ca taraju pa' ara hwein ca xirao' nucun Moisés ta. Tomi' ha' je napari' ca xirao' nucun Moisés pain ca e' e' wet nexi' ca'. Mo ta cono' pin xi', om ca tomi' ha' je mami' capari'.

² Win cama narima' co ma' nam tarama'. Pe ho' cara ron taxim ta ac cam na ca xirao' nucun Moisés. Pain ca e' e' wet nucun taxicam ma', om ca an pe ac con. Win cwere nam, ac ca tucu pan cam na. Mo ta mi' pin ca taxicam, ac ca tacom' hot pin tacama na. Xi pe ho' cara ron mami' cam ca xirao' nucun Moisés ta.

³ Mo ta quep ne con xucun tarama' pain ca e' e' wet nucun taxicam ma', hwet ac ne na wixicam, om na ximicam ta ac tacama na. Mo ta mi' pin ca taxicam ma', ac ca tacom' hot pin tacama na, om ca pe ho' cara ron mami' cam ca xirao' nucun Moisés. Xi om pin ara cam tarama' ta. Mo ta an cama xucun tarama, om ca hwet ne wixicam, om ca om na ximicam ta tacama.

⁴ Ac i ma' iri' quem xere: Ac ca cono' pin iri' na. Cono' ca' irin ca xirao' nucun Moisés, xi om ne ca cono' wi ara xun Cristo ta. Ac i ma' napari', win cwere pin urun xucun tarama' ma', wirico co e' mami' pane. Ma' ta ara hwein ca awi wa pain ca taramaja mi' mahu' ta napari' Iri' Jam.

⁵ Pain ca tama' tomi' ha' xin ca param nexi' pane, param ximao na cwerexi'. Taraju paxi' irin ca xirao' nucun Moisés pain ca tomi' caho' capari' pain ca caracat wa ma', ane caracat caracat tiquin' iri' ne. Cote ne pin ac ne na ca caracat nexi'. To' i'ina pin napari' oro ca param ximama' nexi', to' cono' ac capari' na quem.

⁶ Ane witan ca' xin ca xirao' nucun Moisés pain xocori ca' ne. Cono' ca' irin pain ca quep xat capari' pane, cono' ca' irin pain ca tucu pan capari' pane. Taramaja mi' urun Iri' Jam quem. Om ca ac pain cara pane iri' pain ca tomi' ha' e' irin ca xirao' nucun Moisés pane, pain ca tama' tomi' ha' ximama' irin pane, om na. Mam' taramaja mi' irin xocori ca ara je capari' Tamataracon Iri' Jam ca'. Ac i ma' iri' pain ca taramaja mi' xun Iri' Jam ta.

Ca to' querec pin' capari' pain ca caracat nexi' ca xirao' nucun Moisés

⁷ Cain' cain' xixi' quem? Tomi' ximama' ca' xixi' ra? Em' pan na ca xirao' nucun Moisés ta, ac i ma' xixi' ra? Om na, om ca na camain' ne pain ca tomi' ximama' ac i ma' iri' ta. Taraju pa' je e', tomi' pan xije. Mo xi om ne ca xirao' nucun Moisés ma', om xi querec pin' tain ca caracat wa. Mo xi om xirao' caho' capa' pain ca param ximao wa caramaxicon win ma' ta' cwa', mo xi om tomi' ca' capa': Ta param ximao main caramaxicon win ma' ma me ta, mo xi om tomi' ac i ma' capa' ca', om xi querec pin' tain ca param ximao wa ta.

⁸ Hu paxi' napa' ca xirao' nucun Moisés ma', xirao' caho' paxi' napa' pain ca param ximao tain caramaxicon win ma' ta' ma'. Tomi' ac capa' na ca caracat wa ca': Ta param ximao main me ta paxi' nem ca xirao' nucun Moisés ma'. Je i ma' ira, param ximao rain e', ac i ma' na ca tomi' capa' ca caracat wa ca'. To' param ximao ac capa' na pain oro carawa ca om awi quem. Mo xi om ne ca xirao' nucun Moisés ma', mo xi om xirao' caho' capa' pain ca param ximao wa ca', om xi hwara' opa capa' ca caracat wa ca'. Om xi querec pin' tain. Ac ca om ne xira.

⁹ E' paxi' ina pain cara pane, pain ca om taxi' querec tain ca xirao' nucun Moisés pane. Taxi' pin iri inain ne, hu iri napa' ne. Xirao' caho' iri napa' pain ca param ximao wa ne, hwara' opa pin ac capa' na ca caracat wa, ac ca mi' pin ta' na quem.

¹⁰ To' e' xirapa' ca xirao' nucun Moisés ta. Hu iri xirapa' ne, to' e' ac capa' xira. Ane om to' e' capa' ne. To' mi' pin napa', ac je na.

¹¹ Hu paxi' napa' ca xirao' nucun Moisés ma', xirao' caho' paxi' napa' pain ca param ximao wa. Tomi' ac capa' na ca caracat wa ca': Ta param ximao ma me ta paxi' nem ca xirao' nucun Moisés. Je i ma' ira, param ximao ra e', ac i ma' na ca tomi' capa'. Mixein ac capa' na, to' pa' pin ac capa' na quem, ac je na. Ac ca to' pa' pin capa' na ca caracat wa ca'.

¹² Je ca tomi' xuhu' ca': Awi pan na ca xirao' nucun Moisés. Maqui' non Iri' Jam. Awi na oro ca hu capari' ca', maqui' non Iri' Jam. Hu xo' napari', awi na con.

¹³ Cain' cain' xira quem? To' pa' pin napa' carawa ca awi ra? To' pa' pin napa' ca xirao' nucun Moisés ca awi ra? Om na, om ca to' pa' pin camain' capa' ta! To' pa' pan napa' ca caracat wa ta. Mam' to' pa' pin napa' pain carawa ca awi, mam' to' pa' pin napa' pain ca xirao' nucun Moisés ca awi. Ma' ta querec pin' main ca om awi nein ca caracat wa ta napa' Iri' Jam. Je ca hu capari' ca'. Ma' ta querec pin' hwein ca pan tem tamana nein ca caracat wa ta napari'.

Ca noc caracan xijein ca awi wa pain ca caracat wa pain ximixi'

¹⁴ Taxi' irin i ca' quem: Maqui' nain Tamataracon Iri' Jam ca xirao' nucun Moisés. An xiho' non Iri' Jam. Ane om an xiho' ton ne. Wari' ina, ma' napa' cwere. Ac ca quep xat capa' na ca caracat wa. Tomi' ha' inain quem.

¹⁵ Om paxi' na ca hohot capa' ca ara ta' ca'. Ara xo' ta' paxi' ina. Ane om ara xo' ta' ne. Ara e' inain ca noc paxi' ta' ca'.

¹⁶ Je ca tomi' xuhu' ca'. Ara iri inain ca noc ta' ca' ne, ac ca xin ne tain na ca xirao' nucun Moisés ma'. Awi na ta inain, xi noc ara tain ca ara ta' ca'.

¹⁷ Ara iri inain ca noc ta' ca' ne, om ca wata' pan ne co ara nain. Je ca caracat wa pata'. Pe ho' pan napa' ca caracat wa pain xumu ca', ara mi' ac capa' na pain carawa ca noc paxi' ta' ca'.

¹⁸ Taxi' pan xije. Om ca pe ho' camain' capa' ca awi wa, om ca pe ho' camain' capa' ca awi wa pain cwere pain xumu ca'. Ara xo' ta' paxi' ina, ane om ara xo' ta' ne. Om ca ara xo' ac ta'.

¹⁹ Xi ara tain carawa ca awi ca ara ta' paxi' ta' ca'. Ara e' inain ca pan tem wa. Je i ma' ca ara cara ta' ca'.

²⁰ Ara iri inain carawa ca noc ta' ca' ne, om ca wata' pan ne co ara nain. Je ca caracat wa pata'. Pe ho' ara xi' napa' ca caracat wa pain xumu ca'. Ara mi' ac capa' na pain carawa ca noc paxi' ta' ca' quem.

²¹ Je ca tomi' xuhu' ca': Ara xo' ta' paxi' ina, ane querec pin' xije pain ca pe ho' capa' ca param pan tem wa ne. Ac ca pe ho' capa' na xijein topac, ac ca tomi' capa' na: Pan tem ra pan tem ra napa'.

²² Xi om ne ca tomi' querec te ara tain oro capijacon Iri' Jam ca tomi' ha' ra capa' ta. Tomi' querec te paxi' inain pain ca coromicat ne ca'.

²³ Ane querec pin' xije pain ca pe ho' capa' xijein topac pain cwere pain xumu ca' ne. Noc nain capijacon Iri' Jam ca caracat wa ca pe ho' nain ca coromicat ne ca'. Noc xijein, ac ca mixita xijein na. Tao' xat pin napa', ac ca pao' pe capa' na xijein topac ca', ca pe ho' napa' ca', ca caracat ra caracat ra napa' ca'.

²⁴ Ximin ina ta! Ma' co to' witan pin xim napa' cwa' ne ma' ina. Ma' co mi' xim napa' pain ca witan ca' tain cwere ca taramaja mi' nain ca mi' pin wa ca' ne ma' ina.

²⁵ Tomi' querec te tamana inon Iri' Jam ta. Wirico co to' witan pin napa', xi ma' ara ca Taramaxicon nexi' Jeju Cristo ta. Je ca tomi' xuhu' ca': Je cwere ta, ac i ma' ina. Pain ca coromicat ne ca', tomi' ha' inain capijacon Iri' Jam. Pain cwere ca' iri na ne, tomi' ha' ma' inain xijein topac ca caracat ra napa' ca'.