Romanos 6 - Tradução Bíblica Pacaas Novos

Ca cono' ca' xin ca caracat wa, ca e' pin ac iri' ne pain ca win cwere xun Cristo quem

¹ Cain' cain' xixi' quem? Caracat cara xixi', ma' ta hwara' tiquin' ne xixin ca xiram pa' capari' Iri' Jam ra?

² Om na, om ca na camain' ne pain ca caracat cara iri' ta. Ma' tara ca caracat cara ac iri' ra? Om na ta. Cono' ca' ara xi' irin ca caracat wa ta.

³ Om ca taraju pa' hwe pain ca cut corom to capari' con Cristo Iri' Jam ra? Taraju wet je e'. Pain ca cut corom to capari' con Cristo cwa', pain ca win cwere pin xun ca', cono' wi urun.

⁴ Je ca ac i ma' cacapari' con pain ca ja' cacapari' pain com pane. Ma' ta ma' cuhu' xocori ca e' wa ta napari'. Win ne ca to' e' mami' con Cristo Cotere' pane, pain ca to' e' mami' con pain ca hwara' opa tamana nucun pane.

⁵ Je ca tomi' xuhu' ca': Win cwere urun, xi om ne ca jao jao ma' ara xun pain ca mi' pin nucun ta. Je ca taxi' xin i ca' quem, pain ca win cwere xun pain ca e' mami' nucun quem. Main an xiho' xun pain ca aram aram e' mami' nexi' ta.

⁶ Taxi' ara xi' irin i ca' quem: Pain ca tatatain mi' tocwa pain pana Cristo pane, tatatain wi ac xine na wara cwerexi' con. Ma' ta to' om pin xine ca hwara' opa nein wara curuhu' ca caracat taxipa' ma' napari' Iri' Jam. Ma' ta tomi' ha' tomi' ha' om pin hwein ca param ximama' nuhu' pain ca caracat nuhu' ta napari'.

⁷ Xi witan ca' ara cain ca caracat wa wari' co mi' pin ta. Om ca hwara' opa mami' con ca caracat wa.

⁸ Je ca tomi' xuhu' ca': Wara cono' wi urun Cristo. Je ca howa xin ca e' wi xun quem.

⁹ Taxi' ara xi' urun pain ca e' mami' nucun pane. Om ta mi' pin mami' ca quem. Om ca hwara' opa mami' con ca mi' pin wa.

¹⁰ Pain ca mi' pin nucun pane, mi' pin na. Om ta mi' pin mami' ca, xi to' quiji' pin ara cain ca caracat wa ta. Pain ca e' nucun ma', win xumu non Iri' Jam quem.

¹¹ Coromicat mi' xijexi' pain ca cono' ca' xin ca caracat wa ca'. Coromicat mi' xijexi' pain ca e' mami' iri' quem, pain ca win xumu pin xun Iri' Jam quem. Xi om ne ca win cwere pin ara xun Cristo Jeju ta.

¹² Je ca tomi' xuhu' ca': Ta hwara' opa pe ho' cuhu' ca caracat wa pain curuhu' me ta. Ta hwara' opa hwara' opa to' i'ina pin cuhu' pain ca tomi' ha' pin hwein oro ca param ximama' nuhu' me ta.

¹³ Narain ho' jein oro coximinain curuhu', ta mi' hwein pain ca caracat wa me, ta mam' pan teretem hwein me. Mi' pan xujuhu' con Iri' Jam ta. Ac wari' co witan ca' nanain ca cono' wa ta ara xi' hwe. To' e' mami' nuhu' Iri' Jam quem. Mi' jun pain oro coximinain curuhu', mam' ara xo' jein.

¹⁴ Om ta hwara' opa mami' cuhu' ca caracat wa. Xi tomi' mami' cuhu' Iri' Jam pain ca tomi' ha' jein ca xirao' nucun Moisés, ma' ta hohot mahu' ma' cuhu' ta. Tomi' ca' pin nuhu': Howa e' xine pain ca quep xiho' xuhu' ca', pain ca xiram pa' e' xuhu' pain ca to' hohot pin xuhu' ca' nuhu'.

Ca wari' nucun Iri' Jam pin iri' pain ca taramaja mi' e' xun ca'

¹⁵ Cain' cain' xixi' quem? Hohot na pain ca tomi' ximama' xin i ca' ra? Tomi' ca' xixi' ra? Momon caracat xixi', xi tomi' mami' capari' Iri' Jam pain ca tomi' ha' jein ca xirao' nucun Moisés, ma' ta hohot mahu' ma' capari'. Tomi' ca' pin ara xi' napari': Howa e' xine pain ca quep xiho' xuhu' ca', pain ca xiram pa' e' xuhu' pain ca to' hohot pin xuhu' ca' napari', ac i ma' xira ca tomi' xixi' ra? Om na ta, om ca na camain' ne ca tomi' ac i ma' iri' ta.

¹⁶ Taxi' ara xi' hwein i ca' quem, pain ca taramaja mi' e' hun wari' ma'. Mo ta tomi' ca' hun wari': Taramaja mi' e' xim, om ta pagar mapa' pain ca taramaja ne ca', wari' ne e' ne, tomi' ha' cara xim ta, mo ta tomi' ac i ma' hun wari' ma', taramaxicon ne ac hun na, wari' ne pin ac cuhu' na, xi tomi' ha' ara hun ta. Je ca tomi' xuhu' ca': Mo ta taramaja mi' e' hwein ca caracat wa, mo ta tomi' ha' e' hwein, wari' ne pin ac cuhu' na, cono' pin ac hwe na quem. Mo ta taramaja mi' e' hwein ca tomi' ha' wa, mo ta tomi' ha' hun Iri' Jam quem, wari' ne pin ac cuhu' na, xuruxut xo' ac hwe na quem.

¹⁷ Je ca tomi' xuhu' ca', tomi' querec te tamana urut con Iri' Jam cwa' pahu', xi tomi' ha' pin ara hun pain xocori ca' ta. Taramaja mi' e' paxi' hwein ca caracat wa pain ca tama' tomi' ha' hwein pain cara pane. Ane tomi' ha' pin hwein capijacon Iri' Jam ca iri'o' pain xocori ca' ne. Tomi' ha' na iri' xumuhu' quem, tomi' ha' pin hun Iri' Jam pain oro caramaxicon ca ca' na xihwe ma'.

¹⁸ Witan ca' hwein ca caracat wa, xi om ne ca to' witan ara cuhu' Iri' Jam ta. Wari' ne pin nuhu'. Ma' ta taramaja mi' e' hwein ca awi wa pain ca tama' tomi' ha' mahu', je pain ca tama' ara xo' hwe nuhu' ma'.

¹⁹ Tomi' joc mam' mi' e' inuhu' con wari' co taramaja mi' e' non taramaxicon nucun ma'. Xi taraju pa' ho' taraju pa' ho' hwe ta inuhu'. Taraju wet je e'. Pain ca quep ximama' nuhu' pane, pain oro ca pan teretem nuhu' pane, ac ca taramaja mi' e' hwein na oro ca pan teretem wa, tomi' ha' e' hwein oro ca caracat wa pane. Je ca tomi' xuhu' ca': Win ne ca tomi' ha' hwein oro ca pan teretem wa pane, tomi' ha' ho' jun Iri' Jam pain xocori ca' quem. Taramaja mi' e' jein ca awi wa. Wari' nucun Iri' Jam je.

²⁰ Pain ca taramaja mi' e' hwein ca caracat wa pane, om ca taramaja mi' ac hwein ca awi wa. Om ca tomi' ha' ac hun Iri' Jam pane.

²¹ Cain' ca quep xiho' cuhu' oro ca pan teretem nuhu' pane quem? Xi quep xiho' cuhu' pane ta. Wixipa' pin hwein pain xocori ca'. Je ca tomi' xuhu' ca'. Oro ca pan teretem wa ca', to' cono' e' nain ca wari' wa ta.

²² Ane to' witan pin cuhu' Iri' Jam pain xocori ca' ne. Witan ca' hwein ca caracat wa. Wari' nucun Iri' Jam pin hwe, taramaja mi' e' hun Iri' Jam. Mi' ac cuhu' na pain ca awi wa pain ca iri' wari' ne pin cuhu' ca', ac i ma' na ca quep xiho' cuhu'. Aram aram mi' ac cuhu' tara pain ca om pi' ra ha' ne ca e' wa quem.

²³ Je ca tomi' xuhu' ca': Wari' co taramaja mi' nain ca caracat wa ma', aram aram mi' pin ac ca tara, ac i ma' tara ca pagar tocwa pain ca caracat wa. Ane jimao ca Iri' Jam ne. Mi' e' napari' pain ca om pi' ra ha' ne ca e' wa. Om ca pagar xine pain capari'. Mi' e' napari' pain. Xi om ne ca win cwere ara xun Taramaxicon nexi' Cristo Jeju ta.