Romanos 4 - Tradução Bíblica Pacaas Novos

Ca to' hohot con Abraão Iri' Jam, xi om ne ca howa ara mapa' ta non

¹ Je ca tomi' xuhu' ca'. Noro jun hwanana nuxut Abraão cara pane, co hwanana ne urut pain ca judeu urut ca'. Ma' carawa ca ara non quem?

² Om na, taraju pa' je e'. Mo xi tomi' ca' con Abraão Iri' Jam: To' hohot pin inem, xi om ne oro ca ara ara ma ma', pain ca tomi' ha' mapa' ma', mo xi tomi' ac i ma' con, hohot ac ne xira ca xin to pan nucun. Ane om na ne pain xin to ac i ma' con Iri' Jam ne, xi hohot con ta.

³ Cain' ca tomi' ne ca xirao' nucun capijacon Iri' Jam ca' con? Taraju pa' je e'. Howa non Iri' Jam Abraão. Je ca tomi' tocwa ma', tomi' pan non Iri' Jam: To' hohot pin inem, xi om ne ca howa ara mapa' ta non.

⁴ Noro jun wari' co taramaja ma'. Mo ta taramaja ca, cut ac cain na dinheiro. Dinheiro ca cut ca ma', om ca mi' e' tocwa pain, xi taramaja mi' ara cain ta. Dever non pain wari' co taramaja mi' ca ma'.

⁵ Ane om ac i ma' ne con wari' co howa e' non Iri' Jam ne, co om howa nain ca ara ara pan nucun ma'. Tomi' ca' na: Howa inon Iri' Jam. Wirico co to' hohot pin non wari' co caracat pain ca miri'om con ma', ac i ma' na ca tomi' nucun. Tomi' ac tocwa na quem, tomi' non Iri' Jam: To' hohot pin inem, xi om ne ca howa ara mapa' ta non.

⁶ Je ca tomi' ca Davi cara pane quem, tomi' ca' na pane: Param mi' ta pain ca awi wa wari' co tomi' ca' ca Iri' Jam: Om na carawa ca ara ma ca mam' to' hohot quem. To' hohot pan inem, xi om ne ca howa ara mapa' ta, ac i ma' na ca tomi' ca Davi cara pane.

⁷ Je i ca' ca ca tomi' nucun pane: Param mi' tata pain ca awi wa oro wari' pain ca xic am pin xine ca caracat nucucun. Param mi' tata pain ca awi wa oro wari' pain ca ji'am pin xine ca caracat nucucun ma'.

⁸ Param mi' ta pain ca awi wa wari' pain ca om mam' pe wet mami' cain ca caracat nucun wari' Taramaxicon nexi' ta. Ac i ma' na ca tomi' ca Davi cara pane.

⁹ Cain' cain' xira cocon oro wari' co param mi' wawa pain ca awi wa ta ca Davi ma' quem? Xica' to nana co wac xirac xine taparinain ca xirac nucucun co param mi' wawa pain ca awi wa ra? Om ca param mi' tococwa pain ca awi wa co om wac xirac xine taparinain ca xirac nucucun quem ra? Param mi' wawa pain ca awi wa ma' ira! Je ca wara tomi' urut pahu' con Abraão cwa'. Howa non Iri' Jam. Je ca to' hohot tocwa ta.

¹⁰ Cain' cain' ne con Abraão pane quem? Ma' xec ca to' hohot pin tocwa pane quem? To' hohot pin ta pain xec nein ca wac xirac tocwa ra? Om ta to' hohot pin tocwa pain ca om wac xirac querec tocwa ra? Je ca tomi' xuhu' ca', to' hohot pin ta pain ca om wac xirac querec tocwa.

¹¹ Wara howa pin non Iri' Jam pain ca om wac xirac querec tocwa pane. Howa iri non ne, om om, wac xirac pin rain taparinain ca xirac nem ta ac con na Iri' Jam. Ma' ta querec pin' xima pain ca wara to' hohot pin xim ca', pain ca wara howa mapa' ca', pain ca om wac xirac querec xima ma' non. Ma' ta aram aram hwanana ne quequem oro wari' co howa xim nanapa' pa'ao' ta non. Je ca ac ca hwanana ne urun na Abraão. Xi om ne ca howa ara xun Iri' Jam ta. Om paxi' na ca wac xirac xijexi', ane howa xun Iri' Jam ne. Je ca to' hohot pin capari' ca'.

¹² Je ca tomi' xuhu' ca'. Hwanana ne urut con Abraão pain ca judeu urut ca', pain ca wac xirac xujuxut ca', hwanana ne paxi' urut con hwanana nuxut Abraão. Ane om to' hwanana nucun caparut ca wac xirac xujuxut ca' ne, om na. To' hwanana nucun naparut ca an xiho' urut con pain ca wara howa nucun pain ca om wac xirac querec tocwa pane ta.

Ca mi' xun tococwa pain oro ca awi wa oro wari' co howa nonon Iri' Jam

¹³ Wara tomi' pe non Abraão Iri' Jam pane. Main mi' xim pain ca taramaxicon pe ho' momon oro wari' pain oro xijein macan' ca', main mi' toton pain waram winam quem ta non. Xi om ne ca howa ara mapa' ta non. Om ca tomi' ca' con: Mi' xim pain ca taramaxicon pe ho' momon oro wari' pain oro xijein macan' ca', xi tomi' ha' ara main ca xirao' nucun Moisés ta, om ca tomi' ac i ma' camain' con pane. Mi' xim pain, xi om ne ca howa ara mapa' ta non. Xi om ne ca to' hohot pin ara xim, ac i ma' na ca tomi' con pane.

¹⁴ Mo xi ara mi' e' capari' pain ca wara tomi' pe nucun pain ca tomi' ha' e' xin ca xirao' nucun Moisés ma', ac ca om quep xiho' capari' xira ca howa nexi'. Ac ca tomi' pe ximao ca xira Iri' Jam quem.

¹⁵ Xi quep xiho' capari' ca xirao' nucun Moisés pain ca tomi' ha' xin ta. Noro jun wari' co tomi' ha' tain paxi' nain. Ane om tama' tomi' ha' cain ne. Mana' ac tocwa na, mana' pan non Iri' Jam. Wap ac con na quem. Om iri xira ca tomi' caho' tocwa ne, om ac ne xira ca tomi' in pin ca, xi tomi' caho' tocwa pain ta.

¹⁶ Je ca wara tomi' pe con Abraão Iri' Jam pane. Howa iri non ne, wara tomi' pe ac con na. Ma' ta querec pin' mapa' pain ca tomi' iri'o' xim ca', pain ca ara mi' e' xim pain ca wara tomi' pe ne ca' non pane. Ara mi' e' xim pain, xi om ne ca param ara tain pum, ac i ma' na ca wara tomi' pe con pane. Ara mi' e' toton pain waram winam ma' quem, ac i ma' non pane. Je ca tomi' xuhu' ca'. Om ca tomi' e' tococwa waram winacon co judeu nana ma', co tomi' ha' nanain ca xirao' nucun Moisés ma'. Tomi' napari' pain ca an xiho' xun Abraão pain ca howa nucun ma' quem. Hwanana ne hwanana ne pi' pin ara xi' urun Abraão ta.

¹⁷ Win ne ca xirao' pe xine pain capijacon Iri' Jam con Abraão pane. Ca' na con pane: Hwanana ne hwanana ne pi' pin teterem oro xucucun wari' pain oro xijein macan' ta, ac i ma' non pane. Je ca tomi' xuhu' ca'. Hwanana ne hun Abraão ma' ira napari' Iri' Jam co howa ca Abraão cara pane, co to' e' taxi' nonon co cono' nana ma' quem, xi wirico ara ne co tomi' ma' pin taxi' nain oro carawa ca om wara ma' ma'.

¹⁸ Howa cara non Iri' Jam Abraão pane. Winim' non pain ca mi' con pain ca wanxi' wa. Om xi wanxi' ca, ane winim' cara con ne. Howa non. Mi' tarapa' con pije' Iri' Jam ta na. Aram aram hwanana ne ac cacapa' tara oro xucucun wari' pain oro xijein macan'. Win ne ca wara tomi' pe capa' ca' na. Tamana tatara waram winam ta napa' pane na.

¹⁹ Wixicam pin nain ca 100 ne cawaxi' nucun quem. Coromicat paxi' xucun: Mara' pin ina. Om ca wanxi' ac ta'. Mara' pin na narima' ne Sara quem. Om ca wijima ac cama, ac i ma' paxi' na ca coromicat nucun pane. Ane om howa naro ca ne. Howa cara na.

²⁰ Howa cara non Iri' Jam. Om ca tara ta'a camain' con. Howa howa, hwara' opa pin ac ca na. In ac tamana non quem. Awi tamana ma ta Iri' Jam, om ca an in taxi' main capijam, hwara' opa tamana ma, ac i ma' non pain ca tomi' querec te nucun pane.

²¹ Querec pin' non Iri' Jam pain ca om tomi' mixein taxi' nucun quem. Om ca mixein capa' Iri' Jam ta na. Hwara' opa na. Ha' non pain ca ara mi' capa' pain ca tomi' pe capa' ca', ac i ma' non.

²² Je ca tomi' tocwa ma', tomi' pan non Iri' Jam: To' hohot pin inem, xi om ne ca howa ara mapa' ta non pane.

²³ Om ca xica' pe ca Abraão co tomi' wa pain ca xirao' pe xine pain capijacon Iri' Jam ma', pain ca to' hohot pin inem ta tocwa ma'.

²⁴ Om ca xica' pe ca Abraão co tomi' wa ma'. Tomi' napari' quem. To' hohot pin xuhu' ta napari' pain ca howa xun ca'. Tomi' ac i ma' napari' Iri' Jam co to' e' mami' non Taramaxicon nexi' Jeju ta.

²⁵ Je ca tomi' xuhu' ca'. Om ca nain ho' con Jeju Iri' Jam pane. To' pa' pin jun tata co to' pa' pin xun nonon pane. Xi om ne ca caracat nexi' ta. To' e' mami' ac con na quem. Ma' ta to' hohot pin xuhu' ta napari' ta.