Romanos 3 - Tradução Bíblica Pacaas Novos

Ca ja' tomi' querec te toton cocon oro judeu Iri' Jam. Ane hohot cara ara ne ca wap toton cocon pain ca caracat nucucun ne

¹ Je ca tomi' xuhu' ca'. Om ca quep xiho' caparut ca judeu nuxut ra? Om ca quep xiho' caparut ca wac xirac xine taparinain ca xirac nuxut quem ra?

² Quep xiho' naparut ta! Quep xiho' tamana naparut ca judeu nuxut ca', xi wiricoco hwanana nuxut ara caca co tomi' ca Iri' Jam pane, pain ca querec wet jein capija ta tococwa pane.

³ Ma' paxi' nana oro judeu co om howa nana cwa'. Cain' cain' xirara quem? Pain ca om howa nucucun ma', an in tarain capijacon ca wara tomi' pe pan caparut Iri' Jam pain ca ja' tomi' querec te xuhu' ta caparut pane ra?

⁴ Om na ta, om ca an in camain' cain capijacon. Ara cara nain, iri'o' cara na Iri' Jam quem. Wiricoco oro wari' pan nana co tama' mixein nana ma'. Win ne ca tomi' ca Davi cara pane, pain ca tomi' con Iri' Jam pane. Ca' non pane: Querec pin' teterem oro wari' pain ca tomi' iri'o' nem ma'. Tomi' em' paxi' teterem. Ame ma e', main na ra teterem pain ca tomi' nem ta, ac i ma' na ca tomi' con Iri' Jam Davi pane.

⁵ Mo xi tomi' ca' xixi': Om na, mam' querec pin' ta ca tama' ara xo' nucun Iri' Jam pain ca pan teretem nexi' ta, mo xi tomi' ac i ma' caca. Cain' cain' xira quem? Mo xi ac i ma' ne, hohot ac ne xira pain ca tomi' ximama' xin i ca' quem, pain ca pan tem a xira Iri' Jam pain ca wap capari' ca' xi'. Cain' cain' xita' quem? An xiho' a xitain ca wari' wa pain ca tomi' ximao ne ta!

⁶ Om na, om ca tomi' ac xin i ma' ta. Mo xi ac i ma' ne con, om xi wap ac tococwa oro wari' ma' quem.

⁷ Mo xi tomi' ca' ca wari' ma' quem: Om na, mixein iri ina ne, je ca an hwet pe tain ca iri'o' nucun Iri' Jam ta. Querec pin' ac tocwa na pain ca awi nucun pain ca hwara' opa nucun pata'. Je xi om wap cara qui' capa' quem, am ac i ma' ne ca tomi' ximao nucun ma'.

⁸ Cain' cain' xira quem? Mo xi iri'o' ne ca tomi' ximao ac i ma' ca ma', je xi tomi' ximama' ca' xi' quem: Pan teretem xi', ma' ta awi na ta tocwa Iri' Jam ta, ac i ma' xixi'. Ma' ara xi' nana wari' co tomi' ac i ma' na ta nanapa' pain ca tomi' ximama' nucucun ma'. Na e' na pain ca wap tococwa pain ca pan teretem nucucun Iri' Jam ta.

Ca caracat caracat pi' pin iri'

⁹ Cain' cain' urut quem, pain ca judeu urut ca'? Awi tiquin' ca' urut pahu' pain ca om judeu hwe ma' ra? Om na ta. Hwara' opa pe ho' hwara' opa pe ho' xam' ara xi' napari' ca caracat nexi' ta. Ca judeu urut ca', ca om judeu hwe ma' quem, hwara' opa pe ho' hwara' opa pe ho' xam' napari' ca caracat wa, wara tomi' xo' ac i ma' inuhu' ta.

¹⁰ Win ne ca xirao' pe xine pain capijacon Iri' Jam quem. Ca' na: Om na wari' co hohot non Iri' Jam. Om ca ma' camain' ca wari' co hohot non.

¹¹ Om na wari' co taraju pa'. Om na wari' co win xumu non Iri' Jam.

¹² Xuruxut ni xuruxut ni pi' pin ca' nanain wanaxicon Iri' Jam oro wari'. Pan teretem pan teretem pi' pin nana. Om na wari' co ara xo', om ca ma' xica' pe camain' ca wari' co ara xo'.

¹³ Om ca awi camain' ne capijacocon. Tomi' xirac tamana nana. Ac ca cunu cunu qui' ne curucun jima na pain ca pa xat ne manain pacun ca an corom pe tocwa ma', ac i ma' na ca cunu ne ca tomi' xirac nucucun. Tama' tomi' mixein nana. Oro ca tomi' xirac nucucun ma', ac ca huru huru qui' ca caxicon em' co huru cono' napari' ma' na.

¹⁴ Tama' tomi' noro nana pain ca mana' tamana nucucun.

¹⁵ To' parapa' hap nonon oro win ma' caca ma' quem.

¹⁶ Ja' em' pin nonon oro win ma' caca, ja' ximin nonon quem.

¹⁷ Om ca tomi' querec te taxi' cocon oro win ma' caca. Mana' cara xucucun, toron cara na ximicocon quem.

¹⁸ Om ca in ac taxi' cocon Iri' Jam, om ca tomi' ha' taxi' cocon quem. Ac i ma' na ca xirao' pe xine pain capijacon Iri' Jam pain ca caracat caracat pi' pin caca oro wari' ta capari' ca'.

¹⁹ Je ca tomi' xuhu' ca'. Oro ca tomi' nucun Iri' Jam cwa', pain ca xirao' nucun Moisés ma', tomi' tata oro judeu, tomi' tomi' pi' pin napari' quem. Ma' ta tomi' narain ho' tomi' narain ho' om pin xujuhu' pain ca pan teretem nuhu' ta napari', ma' ta hehe pin hwe ta napari'. Ma' ta querec pin' xujuhu' pain ca om hohot mahu' ma', pain ca wap xim xuhu' ca' napari' quem.

²⁰ Je ca tomi' xuhu' ca': Om ca ma' camain' ca wari' co tomi' ca' ca Iri' Jam cwa': To' hohot pin inem, xi om ne ca tomi' ha' ara main ca xirao' nucun Moisés ca', om ca ma' camain' ca wari' co tomi' ac i ma' wa. Mam' to' querec pin' e' napari' pain ca caracat nexi' ca xirao' nucun Moisés ta.

Ca to' hohot pin capari' Iri' Jam pain ca howa xun Jeju

²¹ Ane om ac i ma' ne pain xocori ca' ne. An hwet mi' ho' napari' pain ca coromicat nucun Iri' Jam ca', pain ca to' hohot pin xuhu' ta capari' ca'. Om ca tomi' mami' capari' pain ca tomi' ha' jein ca xirao' nucun Moisés ma', ma' ta to' hohot pin xuhu' ta capari', om ca tomi' ac i ma' mami' capari'. Ca coromicat nucun ca an hwet mi' capari' pain xocori ca', xirao' pe nain Moisés cocon oro profeta cara pane quem. Ca' na ca coromicat nucun:

²² Wata' tara co to' hohot pin nuhu' ta napari' Iri' Jam. Xi om ne ca howa ara hun Jeju Cristo ta napari'. Tomi' ca' napari': Wari' co howa non panxita' Jeju Cristo cwa', to' hohot pin ton ta napari'. Oro wari' co howa nonon Jeju Cristo cwa', to' hohot to' hohot pi' pin toton ta napari'. Xi jimama' ca' xujuhu' ta napari'. Ac wiricoco pi' pin mahu' ta napari' Iri' Jam.

²³ Caracat caracat pi' pin ara xi' iri'. Om ca an xiho' camain' xun Iri' Jam pain ca awi nucun ma', pain ca hwara' opa nucun pain ca om caracat nucun ma'.

²⁴ To' hohot e' napari'. Om ca pagar xine pain capari'. Xi xiram pa' ara capari' pain ca quep xiho' capari' ta. To' hohot pin e' napari', xi om ne ca to' witan pin ara capari' Cristo Jeju ta.

^25-26 Pain cara pane, om ca wap hap cocon oro hwanana Iri' Jam pane. Mana' paxi' nain ca caracat nucucun pane, ane winim' cocon ne. Om ca wap hap cocon. Xiram pa' e' nonon pain ca miri'om paxi' cain ca caracat nucucun pane. Pain xocori ca' iri na ne, an hwet mi' ac capari' na pain ca ara xo' nucun pain ca mam' capari' con Jeju Cristo co mi' pin caho' napari' cwa'. Tomi' ca' non: Mi' pin pe rain maxicocon oro wari' ta non. Mo ta howa quequem pain ca mi' pin pe main maxicocon ma', pain ca ao mao ne cocum ma', to' hohot pin ac toton tara, xic am pin ac tain tara ca caracat nucucun ta non pari'. Ac i ma' na ca querec pin' xun pain ca om miri'om mami' cain ca caracat wa pain ca ara xo' ca pain ca wap capari' pain ca caracat nexi' ca'.

²⁷ Cain' cain' xixi' quem? Ma' na ca tomi' xec xec ac iri' pain ca to' hohot pin capari' Iri' Jam cwa' ra? Om na ta, om ca tomi' xec xec ac iri'. Tomi' xec xec xixin ca tomi' ha' xin ca xirao' nucun Moisés ca' ra? Om na quem, xi to' hohot pin capari' ca tomi' ha' nexi' ta. To' hohot pin e' napari' ca howa nexi'.

²⁸ Je ca tomi' xuhu' ca': To' hohot pin napari' Iri' Jam, xi om ne ca howa ara xun Jeju ta. Om ca tomi' ca' capari' quem: To' hohot pin inuhu', xi tomi' ha' ara hwein ca xirao' nucun Moisés ta, om ca tomi' ac i ma' capari'. To' hohot pin inuhu', xi howa ara hwe ta napari'.

²⁹ Cain' cain' xira quem? Xica' to urut pain ca judeu urut ca', pain ca Iri' Jam ne urut con Iri' Jam ra? Om ca Iri' Jam ne hun pain ca om judeu hwe ma' quem? Iri' Jam ne hun ma' ira!

³⁰ Xi xica' pe ara ca Iri' Jam co tomi' napari' ca', pain ca to' hohot pin inuhu', xi howa ara hun panxita' Jeju ta capari' ca'. Tomi' ac i ma' naparut pain ca judeu urut ca', tomi' ac i ma' nuhu' pain ca om judeu hwe ma' quem.

³¹ Tomi' querec xuhu' pain i ca' quem: Howa iri urun Jeju ne, je ca joc in pin xin ca xirao' nucun Moisés ra? Om na, om ca joc in pin camain' xin ta. Howa iri urun Jeju ne, querec pin' ac irin na ca hwet hwet pi' pin ne oro ca xirao' nucun Moisés ca xirao' pe ca pane.