Romanos 2 - Tradução Bíblica Pacaas Novos

Ca na e' ne pain ca wap tococwa oro wari' pain ca caracat nucucun

^1-2 Je ca tomi' xuhu' ca'. Taxi' urun Iri' Jam pain ca wap mip cocon oro wari' co pan teretem ac i ma' nana ma'. Na e' na pain ca wap cocon quem. Je ca tomi' xuhu' ca', tomi' inem pain ca tomi' em' momon oro xucucun wari' co pan teretem nana ma'. Tomi' em' iri momon pain ca pan teretem nucucun ne, tomi' em' pan ac xijem na quem, xi an xiho' ara momon pain ca pan teretem nucucun ta. Om ca nain ho' ac xijem pain ca pan tem nem ta.

³ Wum pain ca tomi' em' momon ma', tomi' em' paxi' momon oro wari' co pan teretem nana ma'. Ane pan tem pan ma quem ne. An xiho' momon. Cain' cain' xima quem? Cain' cain' ne ca coromicat nem ma' quem? Om ta wap capa' pain ca pan tem ne ca' ma' mon Iri' Jam ra?

⁴ Wa inem me. Ac ca coromicat ca' ma na: Xiram pa' tamana napa' Iri' Jam ta. Winim' cara napa'. Om ta wap hap capa', ac i ma' tara ca coromicat pan tem nem ra? Cain' cain' xima quem? Winim' cara paxi' nem. Je xi querec pin' mon pain ca awi nucun pain ca om wap hap quem ma' quem? Xiram pa' e' nem. Ma' ta cwirin' pin ma ta nem.

⁵ Ane opain ne xumum ne. Om ca cwirin' ra na ma. To' hwara' pin main ca mana' nucun Iri' Jam pain ca wap xim quem ma'. Ame ma e', maqui' iri tara xec nein ca an hwet pin tain cain ca mana' nucun ma' ne, wap ac cocon tara oro wari' co pan teretem nana ma'. Tomi' an hwet xo' ac cain tara oro ca pan teretem nucucun.

⁶ Tomi' tomi' xam' ac cocon tara oro wari': Win hwe pane, win ne ca ara ara hwe pane ac cocon tara, mi' ac cocon tara pain ca taramaja mi' caca ma'.

⁷ Oro wari' co tama' ara nanain oro ca awi wa pain ca win xumu cacain ca tomi' querec te nucun Iri' Jam ma', coromicat ca' ac caca na: Tomi' querec te tarapari' Iri' Jam ta. Hohot hwe tarapari', to' e' cara xuhu' tarapari' ta nana. Wiricoco tatara co mi' wawa pain ca e' cara wa.

⁸ Co tama' win xumu e' nanain ca param pan nucucun ma' iri nana ne, pain ca om tomi' ha' cacain capijacon Iri' Jam ca iri'o' ma', je pain ca param e' cacain ca pan teretem wa ma', wiricoco tatara co mana' tamana ca Iri' Jam. Wiricoco tatara co wap tamana ca quem.

⁹ To' jain jain totoron Iri' Jam. To' i'ina to' i'ina xam' totoron oro wari' co pan teretem nana. Wap cain' totoron oro judeu cwa', wap ac cocon tara oro co om judeu nana ma' quem.

¹⁰ Ane tomi' querec te toton cocon oro wari' co tama' ara nanain ca awi wa ne. Hohot hwe ta totoron. Tomi' querec te inuhu' ta totoron. Mi' xuhu' pain ca om toron ne xumuhu' ta totoron. Tomi' cain' ac i ma' totoron oro win judeu ta', tomi' ac i ma' ac cuhu' tara pain ca om judeu hwe ma' quem.

¹¹ Om ara xi' na ca tomi' querec te paxica' ca Iri' Jam ta. Ac wiricoco ac wiricoco pi' pin nonon oro wari' ta.

Ca wap xun tococwa oro wari' co caracat nana ma', oro co om judeu nana ma', wiricoco oro judeu ma' quem

¹² Je ca tomi' xuhu' cocon oro wari' co caracat nana ma'. Oro co om judeu nana ma', om ca taxi' cacain ca xirao' nucun Moisés. Caracat iri nana ne, pan' ara'am ac caca na. Om paxi' na ca taxi' cacain ca xirao' nucun Moisés. Je i ma' ira, wap ac tococwa tara. Co judeu nana ma' iri nana ne, co ma' nonon ca xirao' nucun Moisés ma', caracat iri nana ne, em' hwe ta ac tococwa na. Xi tomi' ha' hwein ca xirao' nucun Moisés ta tata.

¹³ Xi hohot caca oro wari' co taraju e' nanain ca xirao' nucun Moisés ta. Om ca hohot cocon Iri' Jam. Hohot e' nonon oro wari' co tomi' ha' nanain ca xirao' nucun Moisés.

¹⁴ Ma' na xijein quem, cocon oro co om judeu nana ma'. Om paxi' na ca taxi' cacain ca xirao' nucun Moisés. Tomi' ha' ximama' iri nanain ne, pain ca taxi' ximama' ne ximicocon pain ca coromicat nucucun ma', tomi' ha' ximama' iri nanain ne, je ximicocon pain ca coromicat nucucun ca tomi' ha' je nonon ma'. Om paxi' nonon ca xirao' nucun Moisés, ane maqui' nein ximicocon ca tomi' ha' nucucun ne.

¹⁵ Ac ca ma' cocon na ca xirao' nucun Moisés pain ximicocon, ac ca wara taxi' ximama' cacain na oro ca tomi' nein. Xi om ne ca tomi' ha' ximama' ara cacain ta. Coromicat pan ne ximicocon ma' ira. Tomi' ca' xucucun pain ximicocon pain ca coromicat nucucun: Pan tem ina ta xucucun pain ca querec pin' cacain ca pan teretem nucucun. Om ca pan tem ta', ara xo' ina, ac i ma' xucucun pain ca tomi' caho' pan xucucun quem.

¹⁶ Ac i ma' tara pain xec nein ca tomi' ton con Jeju Cristo Iri' Jam quem. Tomi' an hwet to rain oro ca pan teretem nucucun oro wari' ma', pain ca coromicat nucucun ca joc xim caca ma', ac i ma' tara ca tomi' ton con Jeju Cristo Iri' Jam. Je ca tomi' ne capijacon Iri' Jam ca tomi' hwet napari' con Jeju ca'. Je ca pijim' ta' ca' quem.

Ca na e' ne pain ca wap tococwa oro judeu co om tomi' ha' nanain ca xirao' nucun Moisés

¹⁷ Je ca tomi' xuhu' ca', tomi' inem pain ca judeu ma ma'. Cain' cain' xima quem? Hohot ina, xi judeu ara ta' ta ma. To' witan pin napa' ca xirao' nucun Moisés ta ma. Wari' ne napa' Iri' Jam quem ma, ac i ma' na ca tomi' xec xec nem pain ca coromicat pan tem nem ma'.

¹⁸ Taxi' inain ca param nucun Iri' Jam ta ma. Querec pin' inain oro ca awi wa, querec pin' inain oro ca om awi wa quem, xi om ne ca ca' na ara cacapa' pain ca xirao' nucun Moisés ta ma.

¹⁹ Ca' na taxi' inonon xi' ma momon oro wari' co om taxi' nanain ca xirao' nucun Moisés quem. Cain' cain' xima quem? Ac ca coc papan o mama' toton momon na oro wari' co om tococon. Ac ca joc xec mi' toton pain naran ta momon na oro wari' co to nanain ca jitacat nein quem, ac i ma' na ca coromicat pan tem nem.

²⁰ Hu taxi' inonon xi' ma momon oro wari' co om coromicat xo' nana ma'. Ca' na taxi' inonon xi' ma momon oro wari' co ac hwijima' nana pain ca om ac ximicon hwanana caca ma' quem. Taraju pa' taraju pa' pi' pin ina xi' ma ma, iri'o' iri'o' pi' pin na xi' ma main oro ca tomi' nem. Xi taxi' ara tain ca xirao' nucun Moisés ta na ca coromicat pan tem nem ta.

²¹ Je ca tomi' xim ca': Hu paxi' momon oro wari'. Je xi hu qui' xijem quem? Ta an noc xa ma me ta paxi' momon. Je xi om an noc xa qui' ma quem?

²² Ta quep hwem xequem narima' me ta paxi' momon. Je xi om quep qui' mam xequem narima' ma' quem? Noc paxi' main oro caji pacun ca Iri' Jam xi' ma caca oro co om judeu nana ma'. Je xi om jain jain qui' main quem, pain ca an noc xa main coximinain oro xirinain ca tomi' querec te to cacain quem?

²³ Ma' napa' ca xirao' nucun Moisés ta paxi' ma pain ca tomi' xec xec nem ma'. Je xi tomi' ha' qui' main quem? Cain' cain' xima? To' ara pin momon oro wari', tomi' xirac ac cocon na Iri' Jam pum.

²⁴ Je ca xirao' pe xine pain capijacon Iri' Jam pum: Tomi' xirac nanain wixicon Iri' Jam oro co om judeu nana ma' pum, ac i ma' na ca xirao' pe nein.

²⁵ Ac i ca' na ca coromicat nem ma' quem: Quep xiho' napa' ca wac xirac cacain taparinain ca xirac nucucun, je ca tomi' querec te capa' Iri' Jam ta ma, ac i ma' na ca coromicat pan tem nem ma' quem. Cain' cain' xima quem? Mo ta tomi' ha' main ca xirao' nucun Moisés ma', je i ma' tara ca quep xiho' qui' quem ca wac xirac xima ma'. Mo ta om tomi' ha' main quem, om ca quep xiho' quem ca wac xirac xima ma'. Ac ca om wac xirac xima na.

²⁶ Mo ta tomi' ha' cacain ca xirao' nucun Moisés oro co om judeu nana ma' quem, co om wac xirac wawa pain taparinain ca xirac nucucun ma' quem, hohot totoron Iri' Jam ta. Tomi' ca' totoron Iri' Jam, ac ca wac xirac xihwe na, xi om ne ca tomi' ha' ara hwein ca xirao' nucun Moisés ma', ac i ma' tara ca tomi' cocon.

²⁷ Noro ron wari' co om judeu ma', co om wac xirac wa pain taparinain ca xirac nucun ma'. Mo ta tomi' ha' cain ca xirao' nucun Moisés ma', to' querec pin' ac quem tara pain ca pan tem nem ma'. Xi tomi' ha' ma ta. Taxi' paxi' main ca xirao' nucun Moisés ma'. Wac xirac paxi' main taparinain ca xirac nem ma'. Ane om tomi' ha' ma ne.

²⁸ Je ca tomi' xim ca': Om ca judeu ca wari' co judeu e' na pain curucun ma', co wac xirac e' wa pain taparinain ca xirac nucun ma'.

²⁹ Om ca judeu ca wari' co tomi' ha' e' nain ca xirao' nucun Moisés ta. Judeu na wari' co iri' judeu pain iri' ximicon ma', co ac ca wac xirac xine na pain iri' ca coromicat nucun. Je Tamataracon Iri' Jam ca wac xirac non ma'. Wari' co wac xirac ac i ma' wa, wirico co hohot napa' ta ca Iri' Jam. Om na wari' co hohot na ta non.