Romanos 16 - Tradução Bíblica Pacaas Novos

Ca tomi' querec te jem Febe cwa' tococwa

¹ Tomi' xim inuhu' cam cowere' Febe cwa'. Quep xiho' nonon oro xerexi' co cut in xucucun pain Cencreia.

² Tomi' querec te jem. Wari' nucun Taramaxicon nexi' ara xi' na. Ac ca tomi' querec te xujuhu' pain ca xere xujuhu' ma' tara pain ca tomi' querec te hwem me. Quep xiho' jem quem. Mo ta ma' ne carawa ca om nam, mi' ac hwem pain tara. Mija ara xi' na oro wari' co quep xiho' cama pane, quep xiho' napa' pane quem.

Ca mam' pe wet nuhu' Paulo ta jejem co xirao' ta' wixicacam cwa' ca Paulo

³ Tomi' jem Priscila con Áquila pata' pain ca mam' pe wet tatam ca'. Taramaja wi nanapa' pain ca taramaja mi' urut con Cristo Jeju.

⁴ Narain ho' nanapa' pane quem. Om ca narain ho' pan xequequem, to' parapa' ma' tatarapari' ne nana pain ca quep xiho' cacapa' pane. Je ca tomi' querec te tamana tatam ca'. Om ca xica' pe ta' co tomi' querec te nanam quem, tomi' querec te tomi' querec te pi' pin nanam oro xerexi' co om judeu nana cwa', co cut in xucucun pain ca howa cocon Jeju cwa' quem.

⁵ Tomi' jujun oro xerexi' ma'. Mam' pe wet nuhu' Paulo ta jujun pain ca cut in to xucucun pain xiricacam pain ca howa cocon Jeju ma' quem. Tomi' jun Epêneto ma', co tomi' querec te ta' ma'. Mam' pe wet nem Paulo ta jun. Wirico Epêneto co howa cain' non Cristo pain macarain Ásia pain cara pane.

⁶ Tomi' jem Maria ma', co quep xiho' tamana nuhu' ma'. Mam' pe wet nem Paulo ta jem.

⁷ Tomi' jujun Andrônico con Júnias ma', co nari ta' ma'. Mam' pe wet nuhu' Paulo ta jujun. Tao' to wi nanapa' pain xirinain ca tao' to tao' to to wa pane. Querec pin' tata, awi tamana nana ta tata pain ca taramaja nucucun pain ca oro apóstolo caca ma'. Wara howa ca' nanapa' con Cristo quem.

⁸ Tomi' jun Amplíato ma', co tomi' querec te tamana ta' pain ca win cwere wi urut con Taramaxicon nexi' quem. Mam' pe wet nem Paulo ta jun.

⁹ Tomi' jun Urbano ma' quem, co taramaja wi naparut pain ca taramaja mi' urut con Cristo ca'. Mam' pe wet nem Paulo ta jun. Estáquis ma' quem, co tomi' querec te ta' ma' quem, mam' pe wet nem Paulo ta jun quem.

¹⁰ Tomi' jun Apeles ma' quem, co querec pin' wa pain ca howa iri'o' con Cristo ma'. Mam' pe wet nem Paulo ta jun. Oro wari' co to ho' nonon Aristóbulo ma', pain xiricon ma' quem, mam' pe wet nuhu' Paulo ta jujun.

¹¹ Tomi' jun Herodião ma', co nari ta' ma' quem. Mam' pe wet nem Paulo ta jun. Tomi' jujun oro wari' co to ho' nonon Narciso pain xiricon ma', co howa nonon Taramaxicon nexi' ma' quem. Mam' pe wet nuhu' Paulo ta jujun.

¹² Tomi' jejem Trifena cam Trifosa ma', co taramaja mi' tamana nonon Taramaxicon nexi' ma' quem. Mam' pe wet nuhu' Paulo ta jejem. Wiricam Pérside ma' quem, co tomi' querec te iri' ma', co taramaja mi' tamana non Taramaxicon nexi' ma', mam' pe wet nem Paulo ta jem quem.

¹³ Tomi' jun Rufo ma', co tora' ca Taramaxicon nexi' ma' quem. Mam' pe wet nem Paulo ta jun. Jicon ma' quem, co ac ca na' ta' ma' quem, mam' pe wet nem Paulo ta jem quem.

¹⁴ Tomi' jujun caram ma' quem, Asíncrito, Flegonte, Hermes, Pátrobas, Hermas, cocon oro xerexi' co cut in wi nana ma' cocon. Mam' pe wet nuhu' Paulo ta jujun.

¹⁵ Tomi' jejem caram ma' quem, Filólogo cam Júlia, wirico Nereu cam coxa' ca ma' quem, tomi' jem Olimpas ma' quem, tomi' jujun oro wari' nucun Iri' Jam co cut in wi nana cacam. Mam' pe wet nuhu' Paulo ta jejem quem.

¹⁶ An hwet mi' xujuhu' pain ca tomi' querec te xujuhu' ma'. Mam' pe wet urut pahu' mam' pe wet urut pahu' pi' pin nunuhu' oro xerexi' co cut in xucucun pain ca howa cocon Cristo cwa'.

Ca hu mam' tococwa cocon oro co ja' teretem nonon

¹⁷ Tomi' ca' inuhu' pain ca hu xim xuhu' ca' xere. Ma' tara xumuhu' cocon oro wari' co ja' teretem nunuhu' pain ca ja' coromicat ni xujuhu' ma'. Querec jujun oro wari' co ja' caracat nunuhu' pain ca ja' howa pan teretem pin xim cucuhu' ma' quem. Ma' tara xumuhu' cocon oro wari' co tomi' in pin nanain capijacon Iri' Jam ca ca' na xihwe pane quem. Mo mo to ca' jujun ta.

¹⁸ Xi taramaja mi' cocon Taramaxicon nexi' Cristo oro wari' co ac i ma' nana ta. Taramaja mi' e' nanain carawa ca cao' wa, taramaja mi' e' nanain pemenecucun, taramaja mi' e' nanain ca param pan teretem caca ma'. Tomi' awi paxi' nonon oro wari', ane tomi' xin to e' cocon ne. Ac i ma' na ca mixein cocon oro wari' co om querec pin' nanain ca pan tem wa ma'.

¹⁹ Taxi' ara xi' nunuhu' oro xerexi' pain oro xijein cidade, taxi' taxi' pi' pin nunuhu' pain ca tomi' ha' taxipa' hwe ma' quem. Je ca tomi' querec te xuhu' ca'. Param inuhu' pain ca coromicat xo' hwe pain ca ara taxi' hwein ca awi wa. Noc inuhu' pain ca coromicat pan teretem hwe pain ca ara taxi' hwein ca om awi wa quem.

²⁰ Iri' Jam co mi' napari' pain ca om toron ne ximixi' ca', to' quiji' pin ho' toron Caxicon Jam. Om ta om om ca, to' quiji' pin ho' toron quem. Mi' turuhu' pain ca hwara' opa tiquin' ca' hun quem. Ac ca xom hun tara pain ca hwara' opa tiquin' ca' xun hwe ma'. Param inon Taramaxicon nexi' Jeju pain ca xiram pa' cuhu' ma', pain ca mi' e' cuhu' pain ca param pan nucun ta.

Ca mam' pe wet urut pahu' ta caca oro win ma' ca Paulo

²¹ Mam' pe wet inonon ta nuhu' Timóteo cwa', co taramaja wi napa' cwa'. Ac i ma' nana oro ca nari ne cwa' quem, Lúcio cwa', Jasom cwa', Sosípatro cwa'. Mam' pe wet urut cocon ta nunuhu' quem.

²² Mam' pe wet inuhu' quem, pain ca Tércio ta' ca'. Wata' co xirao' nain ca tomi' nucun Paulo pain ca xirao' mi' xuhu' ca'. Mam' pe wet inuhu' pain ca howa wi xun Taramaxicon nexi' quem.

²³ Mam' pe wet inonon ta nuhu' Gaio cwa'. Pi'am pe inain xiricon Gaio cwa'. Cut in to xucucun pain xiricon oro xerexi' co howa nonon Jeju quem. Mam' pe wet inonon ta nuhu' Erasto cwa', co querec wet nain dinheiro nein cidade ca' quem. Mam' pe wet inonon ta nuhu' coxari' Quarto cwa' quem.

²⁴ (Param inon Taramaxicon nexi' Jeju Cristo pain ca xiram pa' xiram pa' pi' pin cuhu' ma', pain ca mi' e' cuhu' pain ca param pan nucun ta. Amém, iri'o' na ca tomi' ne ta.)

Ca pi' pin ne ca xirao' nucun Paulo

²⁵ Tomi' querec te xun Iri' Jam co hwara' opa tamana ta. Ha' non pain ca to' hwara' opa cuhu' quem. Je ca xirao' pe xine pain capijacon ca tomi' hwet napari' con Jeju pain ca to' witan xim capari' ca'. Je ca pijim' taxipa' ta' ca', pain ca pijim' hwet xuhu' con Jeju Cristo. Om paxi' na ca taraju pa' xine ca coromicat xo' nucun con Jeju pane, om ca taraju pa' xine pain ca xo' ma' qui' ne oro carawa cara pane.

²⁶ Ane an hwet pe pin cain ca coromicat nucun con Jeju Cristo pain xocori ca' ne. Wara xirao' pe nanain oro profeta cara pane. Iri' Jam co e' cara ma', co om mi' pin ra na ma', wirico co tomi' naparut quem, pain ca pijim' mi' pijim' mi' pi' pin jujun pain capija oro wari' pain oro xijein macan' ta caparut. Ma' ta howa cacain, ma' ta tomi' ha' cacain capija quem naparut.

²⁷ Na e' na pain ca tomi' querec te xun Iri' Jam ta. Xica' pe na Iri' Jam co Iri' Jam cwa', co coromicat xo' cwa'. Na e' na pain ca tomi' querec te cara xun pain ca awi nucun ta. Xi ma' ara capari' Jeju Cristo ta. Amém, iri'o' na ca tomi' ne ta. Je i ca' ca xirao' ne ca'.