Romanos 15 - Tradução Bíblica Pacaas Novos

Ca quep xiho' xijexi' ca', pain ca om ara pan xin ca param nexi'

¹ Wari' pain ca hwara' opa iri' ca', pain ca howa xun Iri' Jam cwa', na e' na pain ca quep xiho' xuxun oro co om hwara' opa nana pain ca howa nucucun ma'. Xiram pa' xuxun. Om ta ara e' xin ca param nexi'.

² Ara xica' pe ara xica' pe xam' xin ca param pan caca xerexi', ma' ta quep xiho' xuxun, ma' ta to' hwara' opa xuxun pain ca howa nucucun quem.

³ Xi ara pan cain ca param nucun Cristo pane ta. Ara nain ca param nucun Cote ca. Tomi' xirac paxi' ta. Je i ma' ira, ara ara ac cain na ca param nucun Cote ca. Win ne ca xirao' pe xine pain capijacon Iri' Jam ca', pain ca tomi' con Iri' Jam Jeju pane. Ca' na con pane: Tomi' xirac iri nenem oro wari' ma' ne, wata' ac ne na co tomi' xirac pan caca ma', ac i ma' na ca tomi' nucun pane.

⁴ Je ca xirao' pe xine oro capijacon Iri' Jam pain cara pane, ma' ta ca' na xuhu' ta napari'. Je capijacon ca mi' napari' pain ca hwara' opa cara wa pain ca to' i'ina capari' oro carawa. To' quereme napari', ma' ta winim' cara mahu' pain ca mi' xim xuhu' pain carawa ca awi ta napari'.

⁵ Wirico Iri' Jam co mi' napari' pain ca hwara' opa wa pain ca to' i'ina capari' oro carawa. Wirico co to' quereme napari' quem. Param inon pain ca mi' cuhu' pain ca an xiho' xujuhu' pain ca coromicat nuhu'. Param inon pain ca mi' cuhu' pain ca an xiho' hun Cristo Jeju quem.

⁶ Ma' ta awi na Iri' Jam awi na Iri' Jam pi' pin hwe ta inuhu'. Ac ca xica' pe ne tara capijahu' pain ca tomi' hwet hwein ca awi nucun. Awi na Iri' Jam ta, awi na Cote ca Taramaxicon nexi' Jeju Cristo ta, ac i ma' tara ca tomi' nuhu' ta.

⁷ Je ca tomi' xuhu' ca': Tomi' querec te xujuhu' me. Win ne ca tomi' querec te capari' Cristo cwa'. Ma' ta awi na Iri' Jam ta caca oro wari' pahu'.

⁸ Mam' pe wet jein i ca': Quiji' hwet roron oro judeu, quep xiho' roron ta non Cristo Iri' Jam pane. Ma' ta querec pin' cacapa' pain ca om mixein ne non. Ma' ta ara tain oro capija ca wara tomi' pe toton oro hwanana nucucun pane non.

⁹ Ma' ta tomi' hwet cacapa' oro co om judeu nana ta non. Awi na Iri' Jam awi na Iri' Jam, xi om ne ca xiram pa' ara capari' ta, ac i ma' tatarapa' ta non. Win ne ca xirao' pe xine ca tomi' nucun Cristo pane, pain ca tomi' con Cote ca pane. Ca' na con pane: Je ta tomi' hwet qui' tain ca awi nem pain ca aram aram pe ho' toton oro co om judeu nana ta. Awi na Iri' Jam awi na Iri' Jam ta ta' pum. Com an hwet pe tain wuxum quem. Ac i ma' na ca tomi' con pane.

¹⁰ Ma' na xijein ca xirao' pe nein ca tomi' nucun ca' quem. Ca' na con: Tomi' inuhu' pain ca om judeu hwe ma'. Tomi' querec te je. Tomi' querec te wi je cocon oro wari' nucun Iri' Jam cwa'. Ac i ma' na ca xirao' pe xine ca tomi' nucun.

¹¹ Ma' na xijein ca' quem. Ca' na ca xirao' pe nein: Tomi' inuhu' pain ca om judeu hwe ma'. Awi na Taramaxicon Iri' Jam, awi na Taramaxicon Iri' Jam pi' pin je. Awi na awi na pi' pin totoron oro xucucun wari' ma' quem. Ac i ma' na ca xirao' pe nein.

¹² Xirao' pe na Isaías pane quem. Ca' na con pane: Main maqui' tara winacon Jessé. Taramaxicon pe ho' totoron oro co om judeu nana ma'. Mi' totoron pain ca howa cocon pain ca winim' cara cocon ta. Ac i ma' na ca xirao' pe ca Isaías pane.

¹³ Wirico Iri' Jam co mi' napari' pain ca howa xun pain ca winim' cara xin oro carawa ca awi ca mi' xim capari' ca'. Param inon pain ca mi' cuhu' pain ca tomi' querec te wa, param inon pain ca mi' cuhu' pain ca om toron ne xumuhu' quem. Xi howa ara hun ta. Param inain Tamataracon pain ca mi' mi' tiquin' cuhu' pain ca winim' cara hun ma'. Mam' mi' turuhu' pain ca winim' cara wa pain ca hwara' opa nein quem.

Ca tomi' xo' tococwa pain ca taramaja mi' tocwa Iri' Jam

¹⁴ Taxi' inuhu' pain ca xuruxut xo' tamana hwe quem xere. Taraju pa' tamana hwe, hu taxi' xujuhu' quem.

¹⁵ Ane ma' ma' wet paxi' ne ca om taraju pa' querec hwein ca ca' na xuhu' pain capijacon Iri' Jam ne. Je ca xirao' mi' xuhu' ca'. Om ca hehe ta' pain ca xirao' mi' xuhu' pain, tomi' mip inuhu' pain. Ma' ta mam' pe wet mami' hwein ca wara ca' na xuhu' pain capijacon Iri' Jam ta inuhu'. Wirico Iri' Jam ara xi' na co mi' e' napa' pain ca taramaja ne ca' pahu',

¹⁶ pain ca taramaja mi' ron Cristo Jeju pain ca pijim' mi' momon con oro co om judeu nana ta capa' pahu' pane. Ara inain ca taramaja nucun wari' co tom tain' mi' taxipa' non pain carawa Iri' Jam ma', pain ca pijim' mi' xuhu' pain capijacon Iri' Jam ca tomi' hwet napari' con Jeju. Pijim' mi' inuhu' pain capijacon Iri' Jam, ma' ta tomi' querec te cuhu' pain ca o mi' xuhu' con inuhu'. Ac carawa ca mi' querec te wa hwe pata', ac ca cut mi' e' xuhu' con tara pain ca o mi' xuhu' con. Mam' to' hohot ara xi' nuhu' pain Tamataracon ta.

¹⁷ Je ca tomi' hwet xuhu' pain ca taramaja ne ca', pain ca taramaja mi' ton Iri' Jam cwa'. Ja' tomi' querec te napa' ca taramaja ne pain ca win cwere ton Cristo Jeju cwa'.

¹⁸ Om ca tomi' hwet xitoton pain ca ara pan ta' na xuhu' ca'. Tomi' hwet e' inuhu' pain ca tomi' wi pan capa' Cristo cwa', tomi' hwet e' inuhu' pain ca ara wi pan capa' quem. Wirico co mi' napa' pain ca pijim' toton oro co om judeu nana ma', ma' ta tomi' ha' pin hun Iri' Jam ta inonon.

¹⁹ An hwet mi' tata pain ca hwara' opa nucun Iri' Jam Cristo pata' quem. Wa wa ac caca na, querec pin' ac cocon na Iri' Jam, xi hwara' opa ara ne Tamataracon ta. Pijim' inain capijacon Iri' Jam ca tomi' hwet napari' con Cristo pain ca to' witan xim cuhu' Cristo ta capari' ca'. Pijim' pe cain' inain Jerusalém pain oro cidade ca to ja' pan nain pane, pijim' mao ac tain na oro xijein macan', pijim' pijim' hwet ac tain na Ilírico pane.

²⁰ Je cwere pane. Hwet toton iri inonon oro wari' pain ca pijim' mi' toton pain capijacon Iri' Jam con Jeju ne, hwet e' inonon oro wari' co om taraju querec nonon, pijim' ac toton na quem. Noc ara xi' inain ca joc in pin toton oro win ma' ne co wara pijim' nana ma', xi wara ma' ara ne ca taramaja nucucun pain ca pijim' nucucun ta. Win caca wari' co quep nanain xirim ma', co wara cut in xo' nanain pacun pain caximain xirim ma'. Mo ta pijim' pe tain ca wara pijim' to caca ma', ac ca quep caho' toton na pain xirim ca wara quep xi' caca ma', pain ca cut toco' xo' cacain caji macan' pain pacun pain caximain ma'.

²¹ Win ne ca xirao' pe xine pain capijacon Iri' Jam ca'. Ca' na con: Oro wari' co om taraju camain' nanain wixicon ma', querec pin' ac cocon tara. Oro wari' co om tomi' hwet wawa con, querec pin' ac cocon tara quem. Ac i ma' na ca xirao' pe xine con.

Ca mo querec xuhu' pain Roma ta ca Paulo

²² Je ca om hwet ac xuhu' pain xocori ca'. Mija paxi' na ca querec xim paxi' xuhu' pane, ane om na capa' pane ne.

²³ Pain xocori ca' iri na ne, ara ara pi' pin inain oro ca taramaja ne pain i ca'. Je ca querec ho' xim xuhu' ca', xi pain ara ne ca querec xim xuhu' ta.

²⁴ Mao tain iri tain Espanha ne, hwet ac xuhu' tara, pe ho' wijimain ac xuhu' tara quem. Tomi' querec te tomi' querec te noc pin iri xijexi' ne, quep xiho' ac mahu' tara pain ca xut tiquin' mao tain ta' Espanha cain.

²⁵ Je paxi' na ca coromicat ne ca', ane mao cain' tain ta' Jerusalém ne. Quep xiho' cain' toton oro wari' nucun Iri' Jam pain Jerusalém cain, pain ca cut mi' toton ta' pain dinheiro inonon.

²⁶ Xi xiram pa' ara tococwa oro wari' nucun Iri' Jam co ximin nana pain Jerusalém cain. Wiricoco oro xerexi' co to nanain Macedônia pain Acaia co xiram pa' nonon. Cut mi' xuxun pain dinheiro e' nana, cut in querec te ac cacain na. Mi' roron pain ta ac cacapa' na quem.

²⁷ Wiricoco pan nana co cut mi' xuxun pain nana, maqui' nain ximicocon. Hohot na quem. Ac ca dever tococwa ara xi' na oro win howa caca co judeu nana ma'. Xi wiricoco ara caca oro judeu co wara quep xiho' pan nonon oro co om judeu nana ma', pain ca mi' tiquin' pan cocon pain oro ca awi wa ca tomi' pe qui' cocon Iri' Jam pane, pain ca to' hwara' opa pin tococwa pain ximicocon ta. Je ca na e' ne pain ca quep xiho' tococwa pain ca ximin nucucun pain ca mi' tococwa pain dinheiro pain xocori ca'.

²⁸ Mi' mi' pi' pin iri toton pain dinheiro ca mi' roron cacapa' ca' ne, hwet ac xuhu' tara. Hwet cain' xuhu', paca' ac xuhu' tara, mao ac tain tara Espanha.

²⁹ Querec iri xuhu' ne, ja' tomi' querec te ac xuhu' tara con Cristo. Ara mi' tamana ac capari' tara pain oro ca awi wa, taxi' inon ta.

Ca tomi' mi' xine con Iri' Jam ca Paulo

³⁰ Je ca tomi' xuhu' ca' xere. Wirico Taramaxicon nexi' co mi' napa' pain ca tomi' xuhu' ca'. Je Tamataracon Iri' Jam ca mi' napari' pain ca om noc xijexi' quem. Hu ca' xim inuhu': Quep xiho' xine pain ca tomi' mi' mahu' con Iri' Jam me. Tomi' tara iri' xumuhu' pain ca tomi' mi' mahu' con.

³¹ Ma' ta narain ho' capa' cocon oro wari' co to nanain Judeia ma', co om howa je na nana ma'. Ma' ta tomi' querec te cacapa' oro wari' nucun Iri' Jam co to nanain Jerusalém quem, pain ca mi' toton ta' pain dinheiro nucucun xerexi' cwa'.

³² Ma' ta ha' capa' pain ca aram aram hwet xuhu' quem. Mo ta param capa' Iri' Jam pain ca querec xim xuhu' ca', aram aram hwet ac xuhu' tara. Tomi' querec te caracan ac xijexi' tara quem.

³³ Tomi' mi' inuhu' con Iri' Jam co mi' napari' pain ca om toron ne ximixi' ca' quem. Param inon pain ca pe ho' pe ho' pi' pin cuhu' quem. Amém, iri'o' na ca tomi' ne ta.