Romanos 14 - Tradução Bíblica Pacaas Novos

Co hwara' opa nana pain ca howa nucucun, cocon co om hwara' opa nana pain ca howa nucucun quem

¹ Tomi' querec te jujun oro win howa hwe co i'ina ximicocon ma', pain ca ein cacain oro carawa jimao ma'. Howa paxi' nana. Om e' na ca taraju pa' homa caca. Om ca hwara' opa caca. Je i ma' ira, tomi' querec te e' jujun ta. Ta tomi' mana' huhun pain ca om taraju pa' nucucun me ta.

² Noro jujun co howa ni ca' xucucun ma'. Ma' nana co hohot na pain ca cao' cao' pi' pin xin oro carawa ta nana. Oro xucucun ma' iri nana ne, co om hwara' opa nana pain ca howa nucucun ma', co om taraju pa' homa nana ma', om ca hohot ne pain ca cao' cao' pi' pin xin oro carawa, hohot e' na pain ca cao' e' xin oro caji tan ta, ac i ma' na ca howa nucucun.

³ Wahu' pain ca cao' cao' pi' pin hwein oro carawa ma', ta noc huhun co om cao' nanain me ta. Wahu' pain ca om cao' hwein oro carawa ma' iri na ne, ta tomi' ximama' huhun co cao' nanain me ta. Xi hohot mahu' ara cocon Iri' Jam ta.

⁴ Cain' cain' xihwe quem? Tomi' xin ca ara pan ca wari' cwa', pain ca taramaja mi' con xucun wari' ma'. Om ca na ne pain ca tomi' ximama' xun co taramaja mi' non xucun wari'. Taxi' pan toron taramaxicon nucun co taramaja mi' ca ma'. Am hohot con, am om hohot con, taxi' pan toron. Hohot ma ta toron Taramaxicon nexi' quem, xi om ne ca ha' ara con pain ca mam' quep xiho' con pain ca hwara' opa nucun ta.

⁵ Noro jun wari' co coromicat ca' nain xec nein ca xao to wa ne ca xumu wa ca' quem. Ma' na xec ca awi tiquin' ca' nain oro xijein xec, ac i ma' na ca coromicat nucun. Xucun ma' iri na ne, coromicat ni ac ca na quem. Om na, an an ari xijein oro xec ta, ac i ma' na ca coromicat nucun quem. Je i ma' ira. Je ca tomi' xuhu' ca': Na e' na pain ca coromicat xo' xi' pain ca hohot na ca coromicat ne pi' pin xi' pain iri' ximixi' ta. Taxi' taxi' xam' xin ca howa iri' ca'.

⁶ Wari' co coromicat ni ma', pain ca ma' na xec ca awi tiquin' ca' nain oro xijein xec ta ca ma', mam' pe wet non Taramaxicon nexi' pain ca coromicat nucun. Wari' co cao' nain cwerein carawa ma' quem, mam' pe wet non Taramaxicon nexi' pain ca cao' nucun quem, xi om ne ca tomi' querec te ara con pain. Wari' co om cao' nain cwerein carawa ma' quem, mam' pe wet non Taramaxicon nexi' pain ca om cao' nucun, tomi' querec te ac con pain na quem.

⁷ Xi tama' ara e' xin ca param nexi' ta. Om ca ara xin ca param nexi' pain ca e' e' wet nexi', om ca ara xin ca param nexi' pain ca cono' nexi' quem.

⁸ Pain ca e' e' wet nexi' ca', wari' ne napari' Taramaxicon nexi', ara ac xin na ca param pan nucun. Cono' pin xi' iri iri' ne, wari' ne napari' quem, je ca param nucun ca ara napari' quem. Je ca tomi' xuhu' ca': Mo ta e' iri', mo ta cono' iri', wari' ne napari' Taramaxicon nexi' ta.

⁹ Je ca mi' pin ca Cristo pane. Je ca e' mami' ca quem. Ma' ta Taramaxicon ne cacapa' co wara cono' nana, ma' ta Taramaxicon ne cacapa' co e' e' wet nana ta napari'.

¹⁰ Je ca tomi' xuhu' ca': Wum pain ca om cao' main cwerein carawa ma', para tomi' ximao momon xerem co cao' nanain quem? Wum pain ca cao' main oro cwerein carawa ma' quem, para tomi' ximao momon xerem co om cao' nanain quem? Cain' cain' xihwe quem? Main maqui' ta' ara xi' na xec nein ca coco' quima hwet coco' quima hwet pi' pin xun Iri' Jam ta. Tomi' xo' ac capari' tara pain oro carawa ca ara iri' pain ca to to wet xin macan' ca'.

¹¹ Je ca xirao' pe xine pain capijacon Iri' Jam cwa', pain ca xirao' xine ca tomi' nucun Taramaxicon nexi'. Ca' na con: Pe torotop mi' tatarapa' oro wari' ta. Om ca mixein ta', pe torotop mi' pe torotop mi' pi' pin tatarapa' ta. Awi na Iri' Jam awi na Iri' Jam pi' pin tatarapa' ta. Ac i ma' na ca xirao' pe xine ca tomi' nucun Taramaxicon nexi'.

¹² Je ca tomi' xuhu' ca': Tomi' xo' iri tarapari' Iri' Jam pain oro carawa ca ara iri' pain macan' ca' ne. Tomi' tomi' pi' pin ac xun tara pain iri' menexi'. Ca' na ca ara ta' pane, ca' na ca pan tem ta' pane, xic xic pi' pin xin con, ac i ma' tara pain ca tomi' hwet tomi' hwet pi' pin xun pain iri' menexi' ca ara pan iri' pain ca e' e' wet nexi'.

Ca om ha' ne pain ca to' caracat xijexi'

¹³ Je ca tomi' xuhu' ca'. Om ta tomi' ximama' mami' xijexi'. Coromicat xo' xi', na e' na pain ca om ara cup xuxun xerexi' cwa', om ta ja' camara' pin xuxun.

¹⁴ Tomi' ca' inuhu' pain ca win cwere ton Taramaxicon nexi' Jeju cwa'. Om na carawa ca cao' wa ca om awi cwerein, taxi' ina ta. Om ca tara ta'a camain' ta' pain. Tara con wari' co coromicat ni ma'. Mo ta coromicat ni ca' ca: Om ca hohot ne carawa ma', om ca awi ne ma' tara ca coromicat ni nucun ma'. Je i ma' ira, om pan na ca hohot con pain ca cao' cain ma', xi awi na ta cain ta.

¹⁵ Mo ta cao' irin oro carawa ma', mo ta ja' tomi' xaxa' xuxun xerexi' pain carawa ca cao' iri', ac ca om ara xite xuxun na, ac ca noc xuxun na quem. Noc xuxun ma' ira. Om ta ja' em' xuxun oro wari' co mi' pin caho' ca Cristo ta. Om ta mam' to' em' xuxun pain carawa ca cao' iri' ta.

¹⁶ Om ta mam' ara cup xuxun oro wari' pain carawa ca ara iri'. Hohot paxi' tara ca ara iri'. Mo ta om ca awi ne ta cacain oro wari' ma', om ac ne tara ca ara xin. Ma' ta om tomi' napat cacapari' pain ca ara xin carawa ca awi paxi' ta.

¹⁷ Xi tomi' xeo pa' capari' Iri' Jam pain carawa ca cao' wa pain ca taramaxicon pe ho' capari' ta. Om ca tomi' xeo pa' capari' pain carawa ca toc iri' quem, om na. Ma' na xijein carawa ca tomi' capari': To' hohot pin nuhu' Tamatara ta napari'. Mi' nuhu' pain ca om toron ne xumuhu' Tamatara ta napari'. Ja' tomi' querec te nuhu' Tamatara ta napari' quem, je i ma' ca tomi' capari' Iri' Jam.

¹⁸ Mo ta tomi' ha' ac i ma' xun Cristo, hohot ac xun tara Iri' Jam. Hohot hwe ta ac cacapari' tara oro wari' quem.

¹⁹ Je ca tomi' ca' xuhu' ca': Win xumu xin oro carawa ca mi' napari' pain ca om toron ne ximixi'. Win xumu xin oro carawa ca to' hwara' opa napari' pain ca howa xun Iri' Jam quem.

²⁰ Om ta ara em' pin xin ca taramaja nucun Iri' Jam pain ximixi', om ta mam' ara em' pin xin pain carawa ca cao' iri' ta. Hohot paxi' na oro carawa. Om e' na ca hohot ne pain ca mam' ja' camara' pin xuxun oro win ma' nexi' pain carawa ca cao' iri'.

²¹ Mo ta mam' ja' camara' pin xuxun xerexi' pain carawa ca cao' iri' ca', awi na pain ca om cao' xin. Mo ta mam' ja' camara' pin xuxun pain comi uva ca mana' ca toc iri' quem, awi na pain ca om toc xin. Mo ta mam' ja' camara' pin xuxun pain oro carawa ca ara xi' iri' ma' quem, awi na pain ca om ara xin.

²² Na e' na pain ca coromicat ca' xi': Mo ta hohot na pain ca cao' xin i ca', hohot na pain ca toc xin i ca' quem iri', mo ta coromicat ac i ma' iri', joc xim xin ta. Mo ta coromicat ni iri' quem, mo ta om ca hohot ne pain ca cao' xin i ca', om ca hohot ne pain ca toc xin i ca' quem iri', joc xim xin quem. Om ta tomi' hwet xin ca coromicat nexi'. Xica' pe tara Iri' Jam co taxi' nain pari'. Mo ta hohot na pain ca ara xin i ca' ma' tara ca coromicat nexi' ca'. Mo ta ara xin, mo ta om em' ma ta capari' ca coromicat nexi' ca', param mi' ac capari' tara pain ca awi wa Iri' Jam ta.

²³ Mo ta i'ina ne ximixi' ca', mo ta coromicat ca' iri', om paxi' na ca hohot ne pain ca cao' xin, ac i ca' paxi' tara ca coromicat nexi'. Mo ta cao' ma' xin ne iri', em' pin ac iri' tara. Xi wara hohot na ta iri' pain ca coromicat nexi' ta. Mo ta ara ma' xin ne irin carawa ca om hohot na ta iri' ma', caracat ac iri' tara quem.