Romanos 12 - Tradução Bíblica Pacaas Novos

Ca xuruxut nexi' pain ca win xumu xun Iri' Jam

¹ Je ca tomi' xuhu' ca' xere, tomi' ca' inuhu' pain ca hu xim xuhu' ca'. Xi om ne ca xiram pa' ara capari' Iri' Jam ta. Win xumu jun, ac ca mi' hun tara pain curuhu' ma'. Win ne ca tom tain' mi' tocwa pain cwerein carawa ma', ac je paxi' tara pain ca mi' hun pain curuhu'. Om e' tara pain ca mi' hun pain ca cono' nein. Mi' jun pain ca e' nein, mene rain curuxut jun. Ara xite jein quem, ma' ta hohot hun. Mi' iri jun pain curuhu' ma' ne, in ac xo' ac hun tara pain ca coromicat nuhu' pain xumuhu' ma'.

² Ta an xiho' huhun oro wari' co pan teretem nana ma' me ta. To' jimama' xut pain iri' xumuxut ca' me jun Iri' Jam. To' xocori pin rain iri' ca coromicat nuxut ca' me jun. Ma' ta ha' cuhu' pain ca querec pin' hwein oro ca param nucun ca an pe mi' capari' ca', ma' ta ara hwein quem. Param ara xi' nain oro ca awi wa Iri' Jam ta. Param nain carawa ca hohot non. Om ca param ni ca' cain oro ca param nucun

Ca mi' capari' pain ca ara taxi' xin oro ca param nucun Iri' Jam

³ Je ca tomi' xuhu' ca': Hu xim inuhu', hu hu pi' pin xim inuhu', xi om ne ca hu roron ara capa' Iri' Jam pahu'. Ta coromicat mi' xujuhu' pain ca awi ina, taxi' tamana ina wa me. Coromicat xo' je, querec pin' jein ca taramaja taxi' wa ca mi' cuhu' Iri' Jam ma', pain ca taramaja mi' taxi' hun ma'. Win ne ca mi' pan cuhu' pain ca howa hun ma' quem.

⁴ Tomi' xin cwerexi' ca'. Ma' xica' pe paxi' na cwerexi'. Ane mija ne oro coximixi' ne. Om ca an an ari xijein ca taramaja nein oro wirain coximixi'. Ni na oro ca taramaja nein.

⁵ Ac i ma' iri' pain ca win cwere xun Cristo quem. Mija paxi' iri', ane xica' pe ne cwerexi' con Cristo ne. Xi om ne ca win cwere ara xun ta. Jao jao ma' pin xijexi' pain ca coximinain curucun Cristo iri' ca'.

⁶ Pain ca ara taxi' ni ara taxi' ni pi' pin xin oro xijein ca taramaja wa ca', wirico Iri' Jam co mi' napari' pain ca ara taxi' xin. Mo ta mi' capari' pain ca tomi' hwet taxi' xin oro xocori capijacon ca', na e' na pain ca tomi' hwet xo' xin. Na e' na pain ca an an ari nein ca howa nexi' quem.

⁷ Mo ta mi' capari' pain ca quep xiho' taxi' xuxun oro win ma' nexi' cwa', na e' na pain ca quep xiho' xo' xuxun quem. Mo ta mi' capari' pain ca ca' na taxi' xin capijacon ca', na e' na pain ca ca' na xo' xin.

⁸ Mo ta mi' capari' pain ca hu taxi' xuxun oro win ma' nexi' pain ca hwara' opa je xuxun ca', na e' na pain ca hu xo' xuxun. Mo ta mi' capari' pain ca cut mi' taxi' xuxun pain caramajixi' oro win ma' nexi' cwa', na e' na pain ca mi' querec te xuxun pain. Mo ta mi' capari' pain ca taramaxicon taxi' wa, na e' na pain ca taramaxicon xo' xi'. Mo ta mi' capari' pain ca xiram pa' taxi' xuxun oro win ma' nexi' cwa', na e' na pain ca xiram pa' xuxun pain ca tomi' querec te nexi' quem.

⁹ Ta noc camain' huhun oro win ma' nuhu' me ta. Tomi' querec te iri jujun ne, tomi' querec te iri'o' ac huhun tara. Ta tomi' querec te e' ne capijahu' me ta. Noc jein oro ca pan teretem wa quem. Win xumu jein oro ca awi wa.

¹⁰ Tomi' querec te xujuhu'. Win ne ca xere xujuhu' tara pain ca howa hun Iri' Jam ma'. Awi tiquin' ca' napa' co cwa' ta, ac i ma' tara ca coromicat nuhu'.

¹¹ Win xumu jein ca taramaja nuhu' ma', jain jain jein. Om ta jam' camain' ne curuhu'. Taramaja mi' jun Taramaxicon nexi', tomi' querec te je pain ca taramaja mi' hun ma'.

¹² Tomi' querec te je. Xi ma' ara ne carawa ca awi ca mi' xim capari' Iri' Jam ta. Jain jain iri hwe pain ca to' i'ina cuhu' carawa ma' ne, ta naro hwe me ta. Hwara' opa cara je. Tama' tomi' jun Iri' Jam quem.

¹³ Mo ta om cocon carawa oro win howa hwe ma', xiram pa' jujun, quep xiho' jujun pain caramajuhu'. Tomi' querec te jujun co maqui' nanain xijein xirim. Cao' to ho' xine, pi'am to jein xuru ta jujun.

¹⁴ Mo ta quep em' cucuhu' oro wari' pain ca howa hun Iri' Jam ma', tomi' mi' jujun con. Ara mi' roron pain ca awi wa quem Te Iri' Jam, ac i ma' tara ca tomi' mi' huhun con. Ta tomi' noro huhun me ta. Tomi' mi' e' jujun con Iri' Jam. Ara mi' jujun pain ca awi wa me roron.

¹⁵ Tomi' querec te wi jujun oro wari' co tomi' querec te nana ma'. Awaran wi jujun co awaran nana ma' quem.

¹⁶ Ta tomi' querec te paxica' camain' xujuhu' me, je je ari tara ca coromicat nuhu' pain ca tomi' querec te xujuhu' ta. Ta tomi' xec xec hwe me ta. Quep xiho' xujuhu', ac ca taramaja mi' e' xujuhu' tara pain ca quep xiho' xujuhu' ma'. Ta tomi' ximama' hwe pain ca taxi' tamana ina ta hwe me.

¹⁷ Mo ta quep em' cuhu' wari' ma', ta win mapa' ne hun me. Xuruxut xo' je, ara e' jein ca awi na ta caca oro wari' ma'.

¹⁸ Tomi' querec te jujun oro wari'. Mo ta mana' in pin cucuhu', je i ma' ira, tomi' querec te pan jujun. Tomi' querec te tomi' querec te xam' jujun.

¹⁹ Je ca tomi' xuhu' pain ca tomi' querec te xuhu' ca'. Ta win caca ne camain' huhun oro wari' me ta. Win caca ne pan totoron Iri' Jam ta je, coromicat ac i ma' je. Xi xirao' pe ara xine pain capijacon Iri' Jam ta. Ca' na con: Wata' tara co win caca ne pan nonon co pan teretem nana ma'. Main cut in mi' pan toton pain ca ara pan teretem caca ta, ac i ma' na ca tomi' nucun.

²⁰ Je ca tomi' xuhu' ca': Ta win caca ne huhun me ta. Ara jein ca xirao' pe xine capijacon Iri' Jam. Ca' je: Mo ta ma' ca wari' co noc nuhu' ma'. Mo ta pe' ca, mo ta cao' ta' ca quem, mi' jun pain carawa ca cao' wa. Mo ta toc ta' ca, mi' jun pain ca toc wa quem. Mo ta ac i ma' hun, wixipa' ac cuhu' tara. Ac i ma' na ca xirao' pe xine pain capijacon Iri' Jam.

²¹ Je ca tomi' xuhu' ca': Ta to' quiji' pin cuhu' ca pan tem wa me ta. Mam' to' quiji' pin pan jein pain ca awi wa ta.