Romanos 11 - Tradução Bíblica Pacaas Novos

Ca ma' paric ca' e' caca oro judeu co tora' ca Iri' Jam

¹ Je ca tomi' xuhu' ca'. Tomi' querec xuhu': Joc in pin nonon oro win judeu ta' Iri' Jam pain ca wari' ne pan cocon ra? Om na, om ca joc in pin camain' cocon ta, xi joc in pin capa' ta. Hwanana ne pan ara xi' inon Israel cara pane, hwanana ne inon Abraão cara pane quem. Oro win ma' ne inonon oro waram winacon Benjamim cwa' quem.

² Iri' Jam ma', om ca noc caparut pain ca wari' nucun urut ca', xi wara tora' qui' ara tococwa oro hwanana nuxut pane ta. Taxi' ara xi' hwein ca xirao' pe xine capijacon Iri' Jam con Elias cara pane, pain ca tomi' mip qui' con Iri' Jam pain ca tomi' em' qui' cocon oro wari' nein Israel pane. Ca' na ca tomi' mip qui' con pane:

³ To' parapa' pin nonon oro profeta nem ta Taramaxicon ne. To' pa horohot pin nanain oro pana ca tom tain' pe xine carawa ca mi' xima quem. Witan xica' pe ina. Witan paxi' ina, pirao' nanapa' quem. To' pa' pin xim nanapa'. Ac i ma' na ca tomi' con Iri' Jam Elias pane.

⁴ Cain' ca tomi' con Iri' Jam quem? Ca' na ca tomi' con pane: An to xo' mi' xije cocon ca 7 mil nucucun oro co om pe torotop mi' nanain caji pacun Baal ma', ca Iri' jam xi' ma caca oro wari' cwa', ac i ma' non.

⁵ Ac i ma' na pain xocori ca' quem. Ma' paric ca' e' nana oro win ma' ta' co tora' ca Iri' Jam ma', xi om ne ca xiram pa' taxipa' ara ca ta.

⁶ Xiram pa' e' tata oro win judeu ta' cwa', mi' e' tata pain ca awi wa pain ca tora' tococwa ma'. Om ca taramaja mi' cacain. Mo xi tomi' ca' tococwa: Querec inain ca ara xo' tamana nuhu' ma', hohot hwe, je i ma' tara ca tora' qui' xuhu' ca', om ca tomi' ac i ma' tococwa. Mo xi om xiram pa' e' tococwa, mo xi mi' e' tococwa pain ca taramaja nucucun ma', om xi mi' e' tococwa pain ca awi wa pain ca tora' tococwa ta.

⁷ Je ca tomi' xuhu' ca': Param paxi' nanain ca hohot wa oro win judeu ta' cwa'. Tomi' ca' xucucun: To' hohot pin xijexi', ma' ta hohot pin xun Iri' Jam cwa', ac i ma' paxi' xucucun. Ane om hohot caca ne, ma' paric ca' e' nana oro win judeu ta' co wara tora' ca ma', co hohot nonon ma'. Oro xucucun ma' iri nana ne, to' ari tata.

⁸ Win ne ca xirao' pe xine pain capijacon Iri' Jam ca'. Ca' na con: To' ara pin nonon Iri' Jam, om ca coromicat ac caca con. Ac ca to' pi'am pin tococwa na. To' om pin nain tococon, ma' ta om querec pin' hwe ma' tata. To' om pin nain taraxicocon, ma' ta om taraju pa' hwe ma' tata quem. Wara ac i ma' tata pain cara pane, ac i ma' ac i ma' wet tata pain xocori ca' quem. Ac i ma' na ca xirao' pe xine pain capijacon Iri' Jam.

⁹ Xirao' pe nain Davi cara pane quem. Ca' na con pane: Tomi' querec te iri nana pain ca hohot urut xi' ma caca ne, awi na pain ca ane ane quep xat tococwa. Awi na pain ca ac ca camara' caca ne pain man ma', je pain ca om witan ca' ac cacain ma'. Awi na pain ca wap tococwa quem.

¹⁰ Awi na pain ca to' om pin xine tococon, ma' ta om querec pin' caca. Awi na pain ca to' xone pin tococwa, mao ac ne ma' tara cocon. Ac i ma' na ca xirao' pe ca Davi cara pane.

Ca cut in toton oro judeu ta ca Iri' Jam

¹¹ Je ca tomi' xuhu' ca'. Tomi' querec xuhu': Pain ca camara' caca oro win judeu ta' cwa', camara' to wet cara ac caca ma' tara ra? Om na, om ca camara' to wet cara camain' caca ta! Noro jujun pain ca caracat nucucun ma'. Caracat pin iri nana ne, tomi' ac tococwa na oro co om judeu nana ma', to' witan pin xuhu' ta pan ac cocon na Iri' Jam. Hehe tatara oro judeu pahu', mana' ac caca tara, jain jain ac cacain tara ca witan pin wa quem na ca tomi' tococwa co om judeu nana ma'.

¹² Caracat pin iri nana oro win judeu ta' cwa' ne, quep xiho' tamana ac tococwa na oro co om judeu nana pain oro xijein macan'. Paric ca' e' pin iri nana oro win judeu ta' cwa' ne, quep xiho' tamana ac tococwa na co om judeu nana ma' quem. Howa howa pi' pin iri tatara oro win judeu ta' cwa' ne, xam' pin iri tatara ne, quep xiho' cara ac tococwa tara co om judeu nana ma' quem. Tiquin' ca' tarain ca quep xiho' tococwa pain xocori ca' quem.

¹³ Tomi' ho' xuhu' pain ca om judeu hwe ma' quem: Apóstolo ra napa' Iri' Jam pane, tomi' hwet rain ca tomi' ta' ta' ca' napa', pijim' hwet roron pain oro co om judeu nana ta napa' pane. Tomi' querec te tamana inon pain ca mi' capa' pain ca taramaja ne ca'. Tama' tomi' ca' inonon oro win ma' ta' cwa' quem: Tomi' napa' Iri' Jam pane, pijim' roron oro co om judeu nana ta napa' pane inonon oro win judeu ta' cwa'.

¹⁴ Am to' hehe pin toton, am to' jain jain pin toton, ac i ma' na ca param ne cocon oro win judeu ta' cwa'. Jain jain xirarain ca witan wa na inonon. Tomi' ca' xirara na inonon quem: Win caca oro co om judeu nana ma', witan pin xi' quem, ac i ma' xirara na inonon. Coromicat ca' inonon: Ma' xirara na inonon oro xucucun co to' witan pin ca Iri' Jam pata' na ca coromicat ne cocon oro win judeu ta' cwa'.

¹⁵ Joc in pin iri nonon oro win judeu ta' Iri' Jam pane ne, taxipa' pin xine ta ac tococwa na oro wari' pain oro xijein macan'. Je ca tomi' xuhu' ca': Om ta awi tamana ne ca tomi' querec te xun pin tococwa oro win judeu ta' cwa' ra? Ac ca to' e' pin tococwa tara co cono' nana ta.

¹⁶ Tomi' xin capam' ca'. Mo ta maxiram' mi' cain capam' wari' ma', mo ta mi' cain' tocwa pain Iri' Jam ma', ac ca mene mene pi' pin cain na quem. Tomi' xin caximain pana ma' quem. Mo ta mene cain caximain pana Iri' Jam ma', mene mene pi' pin nain oro taparain quem.

¹⁷ Panaji oliva ma', an xiho' naparut pain ca judeu urut ca', ac iri' panaji oliva urut. Ac ca jicaracat paric xine na taparaxut, maqui' ac hwe na pain ca om judeu hwe ma', pain ca an xiho' hwein taparain panaji caji oliva ma', an tan pan mi' ac xihwe na pain panaji iri' oliva ma', ca an xiho' naparut ma', jao jao ma' pin ac maparut na quem. Je ca tomi' xuhu' ca': Wahu' pain ca om judeu hwe ma', pain ca an xiho' hwein taparain caji oliva ma', jao jao ma' pin hwein oro iri' taparain panaji oliva. Jao jao ma' pin ac maparut na pain ca judeu urut ca'. Quep xiho' pin nuhu' Iri' Jam quem, xi om ne ca xiram pa' ara cuhu' ta. Win ne ca quep xiho' caparut pain ca judeu urut ca'. Ac ca e' wi maparut na, ac ca toc wi maparut na pain waraqui pana ca maqui' nein caximain ma'.

¹⁸ Je ca tomi' xuhu' ca': Ta xin to hwe me ta, ta tomi' ximama' huhun oro win judeu urut ma', pain ca an xiho' cacain taparain ca jicaracat ma'. Ta awi tiquin' ca' urut pahu' camain' huhun me ta. Om ca xin to ac hwe. Ac taparain pana e' hwe. Om ca wahu' ne co to' e' nain caximain. Caximain pan na ca to' e' nuhu' ta.

¹⁹ Am tomi' in pin ca' xi' hwe ma', pain ca jicaracat pin xine oro wirain iri' taparain ma'. Am tomi' ca' xi' hwe: Wac pit pin nonon oro judeu Iri' Jam, ma' ta an tan pan mi' xim caparut ta, am tomi' ac i ma' xi' hwe ma'.

²⁰ Je paxi' na, ane hohot ne pain ca mam' pe wet hwein i ca' ne: Jicaracat pin tata, wac pit pin tata. Xi howa caca ta. Wahu' iri na ne, hwara' opa hwe, to pin hwein pana, xi om ne ca howa ara hwe ta. Ta xin to hwe me ta. Jin' je, ma' tara xumuhu' me.

²¹ Xi narain ho' cocon oro win judeu ta' Iri' Jam pane ta. Om ca narain ho' cocon oro win judeu ta' co an xiho' nanain iri' taparain pana. Om ta narain ho' cuhu' quem.

²² Je ca tomi' xuhu' ca'. Querec pin' xun Iri' Jam ta. Awi tamana na, quep xiho' taxipa' na, je curucun mao na. Ane wap mip cocon oro caracat ne. Noro jun pain ca wap mip cocon co camara' nana pain ca caracat nucucun ma'. Je ca tomi' xuhu' ca'. Mo ta howa cara hun pain ca awi nucun ma', quep xiho' cara ac cuhu' tara. Mo ta om howa cara hun pain ca awi nucun, wac pit pin ac cuhu' tara quem.

²³ Oro win judeu ta' cwa' iri nana ne, mo ta howa mami' caca ma', cut in mami' ac tococwa tara, ac ca an tan pan mi' mami' tococwa tara pain pana, ac je tara pain ca an to mami' tococwa pain maxicocon. Xi om ne ca hwara' opa pan ara ca ta. Ha' non pain ca an tan pan mi' mami' cocon.

²⁴ Wahu' pain ca om judeu hwe ma', an xiho' hwein taparain panaji caji oliva ma'. Ac ca wac tapiripit pin cuhu' na pain wara panajuhu', wara ca' na panaji iri' oliva ma', an tan pan mi' ac cuhu' na, ac ca an tan mi' cuhu' pain na. Om paxi' na ca an tan pan mi' taxipa' xine caji oliva pain iri' oliva ma', ane an tan pan mi' cuhu' pain ne. Oro win judeu ta' cwa' iri nana ne, an xiho' nanain panaji iri' oliva ma'. Je ca tomi' xuhu' ca': Ha' non Iri' Jam pain ca an tan pan mi' cocon pain iri' panaxicocon, om ca i'ina con. Ha' non pain ca an tan pan mi' mami' cain taparain ca jicaracat ca pane.

Ca xiram pa' xiram pa' pi' pin cocon oro wari' Iri' Jam

²⁵ Je ca tomi' xuhu' ca' xere: Ma' na ca coromicat nucun Iri' Jam ca om taraju pa' wa ira. Taraju pa' ho' jein inuhu'. Ma' ta om coromicat ximama' hwe pain ca awi tamana urut ximama' hwe ma'. Ca' na ca coromicat nucun Iri' Jam ca om an hwet querec ca ira: Oro judeu cwa', co waram winacon Israel nana cwa', om ta ari cara cacapa'. Ari ari ca' tatarapa'. Xam' iri tatara oro co om judeu nana ne, co howa xim nanapa' ma', ari ari om ac cacapa' tara oro judeu cwa', ac i ma' na ca coromicat nucun Iri' Jam.

²⁶ Ac i ma' tara ca to' witan to' witan pi' pin toton oro judeu cwa', co waram winacon Israel nana cwa' na ca coromicat nucun ca joc xim ca ira. Win ne ca xirao' pe xine pain capijacon ca'. Ca' na con: Maqui' tarain Sião iri' wari' ne co to' witan pin ton nonon oro wari'. To' om pin tarain ca pan teretem nucucun waram winacon Jacó.

²⁷ To' om pin tarain ca caracat nucucun. Ac i ma' tara ca ara tain ca wara tomi' an pe xo' toton pane. Ac i ma' na ca xirao' pe xine pain capijacon Iri' Jam pane.

²⁸ Noc nonon Iri' Jam oro win judeu ta' cwa', xi howa je na cacain capijacon ca tomi' hwet napari' con Jeju. Je ca xiram pa' pan xihwe pain ca om judeu hwe ma' quem. Ane param param wet tococwa oro win judeu ta' cwa' ne. Wara tora' to tata, param tata, xi om ne ca tora' to ara tococwa oro hwanana nuxut pane, Abraão con Isaque con Jacó cara pane.

²⁹ Xi coromicat ni ra na ca Iri' Jam ta. Om ca coromicat ni ca' cain ca wara coromicat nucun cocon oro wari' co tora' to ca pane, om ca cut in ra na cain oro caramaxicon ca awi ca wara mi' cocon pain pane.

³⁰ Wahu' pain ca om judeu hwe ma' quem, om ca tomi' ha' hun Iri' Jam pain cara pane, ari hun pane. Ane xiram pa' pin cuhu' pain xocori ca' ne, xi om ne ca ari pan ara caca oro win judeu ta' cwa'.

³¹ Ac i ma' na cocon oro win judeu ta' cwa' quem. Om ca tomi' ha' cocon Iri' Jam pain xocori ca', ari nonon. Ma' ta xiram pa' pin xihwe pain xocori ca' quem nuhu' Iri' Jam. Win ne ca xiram pa' toton oro judeu pain cara pane nuhu'. Ame hwe e', main xiram pa' mami' toton quem na ca tomi' ca ma'.

³² Tomi' ac i ma' tomi' ac i ma' pi' pin napari' Iri' Jam pain ca om tomi' ha' iri' pane, pin hwe ma' pain napari' pane. Ari cara je e', querec pin' jein ca om tomi' ha' nuhu' e' napari', tomi' tomi' pi' pin napari' pane. Ma' ta xiram pa' xiram pa' pi' pin xuhu' ta napari'.

Ca an hwet pe xin ca tomi' querec te nexi' con Iri' Jam

³³ Awi tamana na Iri' Jam ta! Coromicat xo' na pain ca taxi' tamana nucun je pain ca querec pin' tamana nucun quem. Om na wari' co tomi' hwet taxi' nain ca coromicat nucun. Om na wari' co taraju pa' nain ca ara nucun.

³⁴ Ma' tara wari' co taxi' nain ca coromicat nucun Taramaxicon nexi' ra? Om na. Ma' tara wari' co hu taxi' non ra? Om na quem.

³⁵ Ma' tara wari' co mi' cain' non pain carawa, ma' ta pagar mapa' pain ra? Om na quem.

³⁶ Xi wirico ara ca co tomi' ma' tomi' ma' pi' pin nain oro carawa ta. Mam' to' e' nain pain ca hwara' opa nucun. Ma' ta querec pin' mahu' ta napari'. Ma' ta awi tamana na Iri' Jam ta mahu' ta napari'. Amém, iri'o' na ca tomi' ne ta.