Romanos 10 - Tradução Bíblica Pacaas Novos

¹ Je ca tomi' xuhu' ca' xere: Param tamana inon Iri' Jam pain ca to' witan pin cocon oro win ma' ne pain ca waram winacon Israel urut ca'. Je ca tomi' ton pain ca tomi' mi' toton con.

² Taxi' paxi' inonon pain ca win xumu tamana cacain oro caramaxicon Iri' Jam. Ara xin paxi' nanain ca param pan nucun quem. Ane om taraju pa' xo' caca ne.

³ Xi querec pin' cacain ca ara pan ca Iri' Jam ma', pain ca to' hohot pin e' capari' pain ca howa xun Jeju cwa'. Howa e' nanain ca ara pan caca ma', pain ca tama' ara xo' xi', ma' ta hohot iri' paxi' caca ma', pain ca to' hohot pan xijexi' con Iri' Jam ta paxi' caca ma'. Om ca howa je na cocon Iri' Jam pain ca to' hohot pan xuhu' ta tococwa ma.

⁴ Xi wirico Cristo ara ca co tomi' ha' tomi' ha' pi' pin nain oro ca xirao' nucun Moisés cara pane ta. Ma' ta to' hohot pin toton oro wari' co howa nanapa' ta na.

Ca to' witan pin toton paxi' cocon oro wari' Iri' Jam

⁵ Je i ca' ca xirao' nucun Moisés pain ca to' hohot pin e' tocwa wari' pain ca tomi' ha' nucun: Wari' co tomi' ha' tomi' ha' pi' pin nain ca xirao' ne ca', e' ac ca tara, to' e' toron ca xirao' ne ta na ca xirao' nucun Moisés pane.

⁶ Ane xirao' pe ca' xine capijacon Iri' Jam ne, pain ca tomi' capari' pain ca to' hohot pin e' tocwa wari' pain ca howa nucun ca'. Ca' na ca tomi' capari': Om ca na ne pain ca coromicat ximama' ca' hwe: Piri' mama' xin pawin cain, o in qui' ac xun tara Cristo. Ma' ta to' hohot capari' Iri' Jam ta, om ca na ne pain coromicat ac i ma' hwe ma', ac i ma' na ca xirao' pe xine pain capijacon Iri' Jam pane.

⁷ Xirao' pe ca' na quem. Ca' napari': Om ca na ne pain ca coromicat ximama' ca' hwe quem: Quiji' mama' xin cote ne man ca om tawiri cain, ca to pan caca orojima' cwain, ma' ta to' e' mami' xun Cristo ta, om ca na ne pain coromicat ac i ma' hwe ma' quem, ac i ma' na ca xirao' pe xine ma'.

⁸ Xi xirao' pe ca' ara xine ta. Ca' napari': Wara ma' nuhu' capijacon Iri' Jam ma'. Ha' pin nuhu' pain ca tomi' hwet hwein, ha' pin nuhu' pain ca coromicat hwein quem, ac i ma' na ca xirao' pe nein. Je ca pijim' hwet urut pahu' ca'. Pijim' hwet urut pahu' pain capijacon Iri' Jam pain ca howa jein urut pahu' ca'.

⁹ Je i ca' ca tomi' capari' capijacon Iri' Jam: Mo ta tomi' hwet huhun oro wari' pain ca howa inon Jeju pain ca iri' Taramaxicon ca cwa' huhun ma'. Mo ta howa hun pain iri' xumuhu' ma', pain ca to' e' mami' con Jeju Iri' Jam ma'. To' witan pin ac cuhu' tara.

¹⁰ Howa iri'o' iri iri' pain iri' ximixi' ne, hohot pin ac xun na Iri' Jam. Tomi' hwet iri irin ca howa nexi' ne, witan pin ac iri' na quem.

¹¹ Je ca xirao' pe xine pain capijacon Iri' Jam ca'. Ca' na con: Oro wari' co howa nonon ma', om ta xat camain' ne ximicocon ta, ac i ma' na ca xirao' pe xine ma'.

^12-13 Pain ca xirao' pe nein ma', tomi' tomi' pi' pin napari'. Tomi' naparut pain ca judeu urut ca', tomi' nuhu' pain ca om judeu hwe ma' quem. Om ca jimama' ca' xijexi'. Xi xica' pe ara ca Cristo co Taramaxicon ne iri' cwa' ta. Ara mi' ara mi' pi' pin napari' pain oro ca awi wa pain ca quep xiho' xut ta xun ca'. Mija na ca ara mi' capari' pain oro ca awi wa ta. Ca' na con: Wari' co quep xiho' ne ta non Taramaxicon nexi' cwa', to' witan pin ac tocwa tara, ac i ma' na ca xirao' pe xine pain capijacon Iri' Jam pane.

¹⁴ Je ca tomi' xuhu' ca': Ma' tara wari' co quep xiho' ne ta ac non pain ca om howa querec con ra? Ma' tara wari' co howa ac non pain ca om taraju querec con ra? Ma' tara wari' co taraju ac na pain ca om pijim' tocwa ra?

¹⁵ Ma' tara ca pijim' ac tocwa wari' pain ca om mo pijim' je e' tococwa co pijim' xi' nana ra? Win ne ca xirao' pe xine pain capijacon Iri' Jam ca'. Ca' na con: Querec awi tamana na caximacocon oro wari' co mo pin nanain capija con Jeju ta, ac i ma' na ca xirao' pe nein.

Ca om howa jein capijacon Iri' Jam con Jeju ha' caca oro judeu

¹⁶ Ane om howa howa pi' pin caca ne. Oro win judeu ta' co taraju nanain capijacon Iri' Jam con Jeju ma', ma' paric ca' e' nana co howa nanain. Om ca howa howa pi' pin cacain. Je ca xirao' pe ca Isaías cara pane. Ca' na ca tomi' nucun pane: Ma' co howa nain ca pijim' nuxut ca' Taramaxicon ne? Ac i ma' na ca xirao' pe ca Isaías cara pane.

¹⁷ Je ca tomi' xuhu' ca': Howa urun Cristo, xi om ne ca ma' ara ca wari' co pijim' mi' napari' con. Oro wari' co taraju nanain ca pijim' tocwa Cristo ma', taraju e' nana pain ca pijim' mi' tococwa pain capijacon Iri' Jam ta.

¹⁸ Ane tomi' querec xim xuhu' pain i ca' ne: Om ca taraju caca oro win judeu ta' ra? Om ca taraju cacain capijacon Iri' Jam con Cristo ra? Taraju caca ca' ira. Je ca xirao' pe xine pain capijacon Iri' Jam ca'. Ca' na con: Ca pijim' nucucun oro wari' ne co pijim' nanain capija ca', taraju taraju pi' pin ta pain oro xijein macan'. Pijim' mama' pi' pin nanain oro xijein macan', ac i ma' na ca xirao' pe xine pain capijacon Iri' Jam pane.

¹⁹ Tomi' querec mami' xuhu' quem: Om ta taraju pa' caca oro win judeu ta' ra? Taraju pa' caca ma' ira. Wara tomi' nonon Moisés cara pane, pain ca xirao' pe qui' cain ca tomi' nucun Iri' Jam pane. Ca' na cocon pane: Mi' xuhu' pain ca noc huhun oro co om wari' ne ta' cwa'. Mi' xuhu' pain ca noc huhun oro co om querec pin' nanapa' cwa', ac i ma' na ca tomi' nucun pane.

²⁰ Xirao' pe ac cain na ca tomi' nucun Iri' Jam Isaías quem. Om ca jin' ca, om ca joc xim cain. Ca' na ca tomi' nucun pane: Mam' nanapa' oro co om pirao' nanapa'. An hwet mi' xije cocon oro co om tomi' querec nanapa' quem, ac i ma' na ca xirao' pe cain pane.

²¹ Xirao' pe ac cain na ca tomi' nucun Iri' Jam cocon oro win judeu ta' ma' quem. Ca' na ca tomi' nucun Iri' Jam: Tama' harahap je, howa xine me paxi' inonon oro wari' ne pain oro xijein xec. Harahap je, howa xine me paxi' inonon. Ane om ha' cacapa' ne. Ari nanapa' quem, ac i ma' na ca tomi' nucun pane.