Romanos 1 - Tradução Bíblica Pacaas Novos

¹ Paulo ina pain ca xirao' mi' xuhu' ca'. Wari' nucun Jeju Cristo ina pain ca taramaja mi' e' ton ca' quem. Tora' napa' Iri' Jam pain ca apóstolo ra capa' pane, pain ca tomi' hwet rain capija ca tomi' xim ca', tomi' hwet rain capija ca tomi' hwet nuhu' pain ca to' witan xim cuhu' Jeju ta capa' pane quem.

² Main taraju jein capija con Jeju ta napari' Iri' Jam pain cara pane. Wiricoco oro profeta nucun co xirao' pe nanain pain capijacon pane quem.

³ Pain ca tomi' capari' pain capijacon ca tomi' hwet napari' pain ca to' witan xim capari' ca', tomi' hwet napari' con Panxica. Pain ca wari' nucun Panxica pane, hwanana ne non taramaxicon Davi cara pane.

⁴ Pain ca Iri' Jam nucun pain ca om caracat nucun quem, Panxica Iri' Jam na quem. Wirico Iri' Jam co an hwet pe non pane, pain ca an hwet pe cain ca hwara' opa nucun pain ca to' e' mami' con pane. Taramaxicon nexi' Jeju Cristo cwa' ira!

⁵ Tomi' hwet jein capija naparut Iri' Jam pane, pain ca taramaja mi' jun Jeju ta caparut pane. Awi tamana na ca taramaja mi' tocwa quem, pain ca tomi' hwet xine capijacon ca'! Wirico Jeju co mi' naparut pain ca taramaja mi' urut con ca'. Ma' ta howa cacapa' oro wari' pain oro xijein macan' ta naparut. Ma' ta tomi' ha' cacapa' quem naparut.

⁶ Tomi' nuhu' quem, howa je nuhu', tomi' ha' je nuhu' quem. Wari' nucun Jeju Cristo je ta nuhu' quem.

⁷ Je ca xirao' mi' xirao' mi' pi' pin xuhu' ca', pain ca to hwein Roma ma'. Xirao' mi' inuhu' pain ca om noc cuhu' Iri' Jam pain ca oro wari' ne pin cuhu' ma'. Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Ca tomi' querec te inon Iri' Jam pahu' ta ca Paulo

⁸ Tomi' cain' xuhu' pain i ca' quem: Tomi' querec te inon Iri' Jam ne cwa' pahu'. Wirico Jeju Cristo co mi' napa' pain ca tomi' querec te ton pahu'. Xi om ne ca taraju taraju xam' ara cucuhu' oro wari' pain oro xijein macan'. Howa nonon Jeju ta nunuhu' oro wari' pain oro xijein macan'.

⁹ Taxi' napa' Iri' Jam co taramaja mi' tamana ta' cwa', pain ca tomi' hwet tain capijacon ca tomi' hwet napari' con Panxica cwa'. Taxi' napa' pain ca tama' mam' pe wet xuhu'

¹⁰ pain ca tama' tomi' mi' xuhu' con. Ca' inon pain ca tomi' ton pahu': Mo ta param mapa' pain ca aram aram mo querec toton, mi' ne pain ca mo hwet toton quem inon. Am xiram pa' mapa', mi' ne pain ca aram aram mo querec toton quem inon pahu'.

¹¹ Querec xitoton na inuhu'. Ma' ta quep xiho' xuhu' pain ca tomi' hwet xuhu' pain oro ca awi nucun Iri' Jam ca mi' xim capari' Tamataracon ca' inuhu'. Ma' ta to' hwara' opa xuhu' pain xumuhu' ta inuhu'.

¹² Je ca tomi' xuhu' ca': Querec iri xijexi' ne, tomi' querec te caracan ac xijexi' tara. Mo ta querec pin' mahu' pain ca howa cara ton Jeju cwa', to' hwara' opa ac xuhu' tara. Mo ta querec pin' xuhu' pain ca howa cara hun quem, to' hwara' opa ac mahu' tara quem.

¹³ Je ca tomi' xuhu' ca' xere: Taraju pa' jein i ca': Mija paxi' na ca mo querec xim paxi' xuhu' pane. Ane om ha' capa' pane ne. Tama' mo querec xim paxi' inuhu'. Ma' ta quep xiho' xuhu' inuhu'. Ma' ta horon horon tiquin' hwe con Iri' Jam ta inuhu'. Win ne ca quep xiho' toton oro co om judeu nana cwa', ac i ma' xuhu' quem inuhu'.

¹⁴ Ac ca dever toton ara xi' na oro wari'. Dever dever xam' inonon. Dever inonon co to nanain oro cote ne cidade. Dever inonon co to nanain mi. Dever inonon co xirao' taxi' nana, dever inonon co om xirao' taxi' nana quem.

¹⁵ Je ca pijim' xim xuhu' pain ca to hwein Roma ma'. Param tamana inain. Tomi' hwet xuhu' pain capijacon Iri' Jam ca tomi' hwet nuhu' pain ca to' witan xim cuhu' Jeju ta inuhu'.

Ca hwara' opa nucun Iri' Jam ca tomi' hwet napari' pain ca to' witan xim capari' Jeju

¹⁶ Xi wixipa' ta' pain capijacon Iri' Jam ca tomi' hwet napari' pain ca to' witan xim capari' Jeju ta. Om ca wixipa' ta' pain. Howa inain. Hwara' opa ara xi' na. Iri' ca hwara' opa nucun Iri' Jam ta. Je ca mam' to' witan pin tococwa oro wari' co howa nana. To' witan xuhu' cain' tata oro win judeu ta' cwa', to' witan xuhu' quem ac tococwa na oro win ma' hwe pain ca om judeu hwe ma' quem. To' witan to' witan xam' napari' pain ca howa iri' ca'. Mam' to' witan pin napari' pain capijacon ca tomi' hwet napari' con Jeju cwa'.

¹⁷ Pain ca tomi' xo' capari' pain capijacon con Jeju cwa', je ca an hwet mi' capari' pain ca to' hohot pin capari' Iri' Jam. To' hohot pin napari', xi om ne ca howa ara xun ca'. Xica' pe na ca howa nexi', je ca to' hohot pin capari' ca'. Je ca xirao' pe xine pain capijacon Iri' Jam ca'. Ca' na con: E' cara tara wari' co to' hohot ta' cwa', xi om ne ca howa ara capa' ta, ac i ma' na ca xirao' pe xine pain capijacon Iri' Jam pane.

Ca wap toton cocon oro wari' Iri' Jam pain ca caracat nucucun

¹⁸ Je ca tomi' xo' capari' Iri' Jam cwa': Mana' inonon oro caracat, wap inonon ta na. Wap inonon oro caracat co miri'om nanapa' ma', co pan teretem nana ma' quem na. Wap wap xam' inonon oro wari' co pan teretem nana, co to' i'ina nonon oro win ma' caca pain ca taraju xin paxi' cacain capija ca iri'o' ca' na quem.

¹⁹ Hohot na pain ca wap cocon oro wari' Iri' Jam. Xi querec pin' ara cacain oro ca ara ca ma', ca querec pin' je capari' pain ca wari' nexi' ca'. Wirico ara xi' na co an hwet pe mi' pan xucun ma' cocon.

²⁰ Pain cara pane, pain ca xo' ma' ten qui' xine macan' pane, querec pin' ac tocwa na. Om paxi' na ca querec pan xun. Ane querec pin' xin ca hwara' opa nucun ca om pi' ra ha' ma' ne. Querec pin' irin ca Iri' Jam nucun quem. Ha' napari' pain ca querec pin' xun. Xi om ne oro carawa ca tomi' ma' pin ca ca'. Je ca om tomi' narain ho' ac xucucun oro wari' cwa'.

²¹ Om paxi' na ca pijim' querec tococwa pain capijacon Iri' Jam pane, ane taxi' cocon ne. Taxi' paxi' nonon, ane om in ac jun na caca ne. Om ca Iri' Jam ma ta nonon. Miri'om nonon, om ca tomi' querec te urut pum pain oro carawa ca mi' maparut ca' cocon, om na. Coromicat ximama' e' nana. Om ca coromicat xo' ac caca. Ac ca jitacat ne xim na pain ca coromicat nucucun pain ximicocon.

²² Coromicat xo' urut ta paxi' nana, ane om coromicat xo' caca ne. Tamanain pin nana.

²³ In ac xiroron Iri' Jam co om mi' pin ra ha' ma', tomi' querec te xiroron. Ane noc cocon ne. In ac e' nanain oro caji pacun ca an xiho' non wari' co mi' pin ma'. Tomi' querec te e' nanain oro caji pacun ca an xiho' non me je carawa je oro caji carawa ca ju macan' ma' quem.

²⁴ Je ca pin caca ma' ne cocon Iri' Jam ma'. Mo ta param ximama' hwein oro ca om awi wa ma', je i ma' pahu' ta nonon, quep ximama' ac caca na, mija nana. Wixipa' ara xi' wa pain ca ara caracan xucucun.

²⁵ Howa howa om pin nonon Iri' Jam co iri'o'. Howa e' nanain ca om iri'o' wa. In ac e' nanain oro carawa ca tomi' ma' pin ca Iri' Jam, tomi' querec te nanain, pe torotop mi' nanain quem. In ac pan xiroron Iri' Jam, tomi' querec te pan xiroron, pe torotop mi' pan xiroron Iri' Jam co tomi' ma' pin nain oro carawa. Tomi' hwet cara xirarain ca awi tamana nucun. Amém, iri'o' na ca tomi' ne ta.

²⁶ Pan teretem pin ara xi' nana. Je ca pin caca ma' ne cocon Iri' Jam pane. Ca narima' nequequem ma' quem, pin cacama ne nanam quem. Je i ma' pahu' nanam, ara cara jein oro ca param ximama' nuhu' ta nanam. Wixipa' ara xi' wa pain ca ara nequequem ta. Param param om pin nonon tarama', param caracan ac xequequem na, quep caracan ac xequequem na. Om xi ac i ma' cacama ta!

²⁷ Ac i ma' na ca tarama' nucucun ma' quem. Quep quep om pin nanam narima', param ximama' ac xucucun na pain ca tarama' nucucun, quep caracan ac xucucun na. Wixipa' ara xi' wa. Je ca wap tococwa pane. Xi caracat tamana ara hwe ta tata. Hohot na ca wap tococwa ta.

²⁸ An to pin xun Iri' Jam, om ta mam' pe wet mami' xun ta nana. Je ca pin caca ma' ne tococwa pane. Wirico Iri' Jam pan na co pin caca ma' ne nonon pane. Coromicat pan teretem cara je ta ac tococwa na. Ara cara jein oro ca om awi wa ta ac tococwa na quem.

²⁹ Mija na ca caracat nucucun. Pan teretem tamana nana. Querec param ximama' nanain caramaxicocon oro win ma' caca. Om ca xumu xo' camain' caca. Mija na ca noc mi' xucucun pain oro carawa. To' parapa' caracan xucucun. Tama' mana' caracan xucucun. Mixein xucucun. Tama' coromicat mi' xucucun pain ca pan teretem wa. Tama' tomi' nanain waracocon oro win ma' caca.

³⁰ Tomi' xirac nonon oro win ma' caca. Noc nonon Iri' Jam. Tomi' ximama' nonon oro wari' pain ca tomi' xec xec caca pain ca tama' xin to caca quem. Coromicat nanain oro ca pan teretem wa pain ca ara xin i ca' caca. Om ca tomi' ha' cocon mana cote caca cacam waram jicocon.

³¹ Om ca coromicat xo' caca. Om ca ara cacain ca wara tomi' pe nucucun. Om ca xiram pa' xucucun pain ca nari xucucun. Om ca xiram pa' camain' cocon oro win ma' caca quem.

³² Taxi' paxi' nonon Iri' Jam pain ca tomi' in pin cain ca ara caca ma', pain ca cono' ma' tatara ne tococwa oro wari' co ac i ma' nana ma'. Ane ara ara tiquin' cacain ne. Ara ara tiquin' pan nanain, tomi' querec te tata oro xucucun wari' co ara nanain ma' quem.