Mateus 9 - Tradução Bíblica Pacaas Novos

Ca quep xio pin con co carama pe Jeju

¹ In mama' xi' ta ac ca na Jeju, piton to ac cacain na mam' horoho wa ma', pan horoho in mama' ac cacain na xijein cacarain cain, mama' ac cacain na cidade nucun Jeju.

² Maqui' ac caca na wari' co an mamam' nonon co carama pe ma'. Terem' pe nain witacon. Querec pin' iri tata pain ca howa cocon ne, tomi' ac con na co carama pe ma'. Hwara' opa ra e' arain. Xic am pin inain ca caracat nem ta na ca tomi' con ma'.

³ To nanain i ma' oro co ca' na taxipa' nanain ca xirao' nucun Moisés. Coromicat ximama' ac caca na: Cain' cain' xira con ne? Iri' Jam ina xi' ma na ron, ac i ma' na ca coromicat ximama' nucucun.

⁴ Ane taxi' cocon Jeju ne, taxi' pan nonon pain ca coromicat nucucun. Tomi' ac tococwa na: Para coromicat ac i ma' hwe pain xumuhu' ma' quem? Om ca awi camain' ne ca coromicat nuhu' ta.

⁵ I'ina xirapa' pain ca xic am tain ca caracat nem ton co carama pe cwa' ra? I'ina xirapa' pain ca tequi' pe ra ta, xut ra ta ton ra? Cain' xi i'ina ac capa' quem?

⁶ Je ca tomi' xuhu' ca' ac tococwa na. Tomi' ton. Ma' ta taxi' mahu' pain ca mi' capa' pain ca hwara' opa wa Iri' Jam ta. Tomi' napa' pain ca Iri' Wari' ta' ca', xic am pin rain ca caracat nucucun oro wari' co to nanain oro xijein macan' ta napa'. Tomi' ac con na co carama pe: Tequi' pe ra. An rain witam ca mam' terem' pe ma ma'. Mao rain xurum ta na ca tomi' con ma'.

⁷ Tequi' pe ac ca na, mao ac cain na xiricon.

⁸ Querec iri nanain i ma' oro wari' ma' ne, wa wa pin ac caca na, in ac tamana ac cocon na Iri' Jam quem. Awi na Iri' Jam ta, mi' non pain ca hwara' opa wa wari' cwa', pain ca quep xio ron co carama pe cwa' ta con ca' na ca tomi' caca ma'.

Ca ja' ja' ne capa' pain ca Mateus ta' ca'

⁹ Mao ta' ta ac ca na Jeju, xut mao ac ca na. Xut xut, querec ac capa' na pain ca Mateus ta' ca'. Xao pe pe inain ca taramaja pe ta' ma', pain ca cut in tain oro imposto nucucun oro wari' ma'. Ja' ja' ne e' ac capa' na. Tequi' pe ac ta' na, ja' ja' ac ton na quem.

¹⁰ Cao' pe ac cain na xuru Jeju cocon co taxipa' ca ma' quem. Mija nana co cut in taxipa' nanain oro imposto ma', mija nana oro xucucun co hwet taxipa' wixicocon pain ca pan teretem nucucun ma' quem. Xao to ho' nanaparut pain pana ca mam' cao' pe wa ma'.

¹¹ Querec iri nanaparut oro fariseu ma' ne, pain ca cao' to ho' urut cocon oro caracat ma', tomi' querec ac cacaparut pain ca taxipa' urut con Jeju. Cain' cain' xira co ma' co ca' na nuhu' pain capijacon Iri' Jam ma' quem? Para cao' pe ho' cocon co cut in taxipa' nanain oro imposto ca pagar je cacapari' oro taramaxicon quem? Para cao' pe ho' cocon oro caracat ma' quem na ca tomi' cacaparut ma'.

¹² Taraju nonon Jeju ma' quem. Tomi' ac cocon na: Om ca cwirin' je toton oro wari' co awi urut xi' ma nana ma'. Cwirin' je e' inonon co querec pin' pan xucucun pain ca caracat nucucun. Win ne ca om aramao xio tococwa oro wari' co om caxi nana ma'. Aramao xio e' tata co caxi nana ma'.

¹³ Je ca tomi' xuhu' ca': Na e' na pain ca taraju pa' hwein capijacon Iri' Jam ca'. Je i ca' ca tomi' nucun: Param inuhu' pain ca xiram pa' huhun oro wari'. Noc inuhu' pain ca tom tain' mi' e' mahu' pain carawa nuhu' ta. Ac i ma' na ca tomi' cuhu' Iri' Jam pain capijacon ca' tata. Je ca tomi' xuhu' ca' ac tococwa na. Om ca cwirin' je toton co wara xuruxut xo' nana ma'. Cwirin' je e' inonon oro caracat cwa', je ca maqui' ta' ca' na ca tomi' tococwa ma'.

Ca om na ne pain ca joc wanan xine ca pijim' nucun Jeju pain wara ca pijim' nucucun oro hwanana

¹⁴ Maqui' ac caca na co taxipa' ca João ma', co ja' taxipa' com ma', tomi' ac cocon na Jeju: An to taxipa' urut pain ca cao' wa, ma' ta tomi' xun Iri' Jam urut. Ac i ma' nana oro fariseu ma' quem. Para om ac i ma' caca co taxipa' ma ma' quem nonon.

¹⁵ Om na, noro jujun oro wari' co tomi' querec te xucucun pain ca an tam narima' ca win ma' nucucun ma' ac tococwa na. Ma' tara ca tomi' xaxa' ac caca pain ca pe ho' pe ho' wet cocon win ma' nucucun co an tam nam narima' ra? Om ca an to ac cacain, xi tomi' querec te ara caca ta. Ame hwe e', main maqui' tara oro xec nein ca an ca' tococwa con, an to pin ac cacain tara ca cao' wa con ac i ma' na ca tomi' tococwa ma'.

¹⁶ Noro jun wari' co oc xo' ton non wara wom co wein ma' quem ac tococwa na. Om ca oc tacan mi' con con xocoricon pawiricon wom. Mo ta oc tacan mi' con con xocoricon pawiricon wom ma', wixicon pin ac ca tara pain ca aram aram hohoc ton con quem, cote ne pin ac ne tara ca wein nucun.

¹⁷ Ac i ma' na con wari' co ji'ao an pe xo' tain nain comi uva ca om mana' querec ma' quem. Om ca ji'ao an pe xo' cain pain wara tapari carawa. Mo ta ji'ao an pe xo' cain xocori comi uva ca om mana' querec pain wara tapari carawa ma', wein mao ac ne tara tapari carawa pain ca aram aram mana' ta' ne ca moin' nein ma', ao mao ac ne tara comi. Em' pin ac ne tara tapari carawa ma' quem. Je ca ji'ao an pe xo' e' xine xocori comi uva pain xocori tapari carawa ma'. Om ac ne na ca waraju xine comi uva je tapari carawa quem na ca tomi' tococwa ma'.

Ca quep xio pin cam narima' Jeju, je pain ca to' e' mami' cam pije' quem

¹⁸ Tomi' tomi' wet nonon oro wari' Jeju ma', maqui' ac ca na co win ma' ne nonon co querec wet nonon oro win judeu caca pain xirim ca cut in to xucucun ma'. Pe torotop mi' ac con na Jeju. Tomi' ac con na: Mi' pin na panxita' ta, xo' mi' pin na. Hap ra ta, quep ram pain mum ma', ma' ta e' mami' cama ta na ca tomi' con ma'.

¹⁹ Ma ac ca na, hwet ac con na, warut pain ca taxipa' urut con ca' quem, hwet pi' pin urut con.

²⁰ Xuruxut xuruxut, maqui' ac cama na narima' co ao tamana ma' quem. Ma' 12 na cawaxi' pain ca ao tamana cama. Hwet ac con na Jeju pain waracon, quep ac camain na cacaracon womicon.

²¹ Coromicat ca' ara xi' na pain ximicam: Mo ta quep e' tain cacaracon womicon cwa', xio pin ac ta' tara ta na ca coromicat nequem.

²² Quep iri non ne, xat tucu in pan ac ca na, querec ac cam na. Hwara' opa ra e' arain ac cam na. Xio pin ma, xi om ne ca howa ara mapa' pain ca quep xio taxi' ta' ca' ac cam na. Xio hap pin ac cama na quem.

²³ Xut mao ac ca na Jeju quem. Hwet pin iri nain xiricon co ma' co querec wet nonon oro win judeu ca pain ca cut in xucucun ma' ne, corom iri na ne, querec ac tococwa na wari' co awaran nanam pije'. Mija nana. Teretem tamana nana. Mija na ca tomi' xaxa' caca, je ca on cacain xiwiwio' ma' quem. Tomi' ac tococwa na:

²⁴ Hwerehwet mama' pi' pin je ta. Om ca mi' pin cama pije' ta. Pi'am e' na, ac i ma' na ca tomi' tococwa ma'. Tatam' tatam' pi' pin ac cocon na, tomi' ximama' nonon quem.

²⁵ Hwerehwet mama' iri nana ne, corom mao ac cain na man ca terem' pe cama pije' ma'. Quep ac cam na pain micam, tequi' pe ac cama na quem.

²⁶ Tomi' hwet tomi' hwet xam' ac cacain na oro wari' pain oro xijein cidade ma' quem.

Ca quep xio pin tococwa co om tococon, je pain ca quep xio pin tocwa xucun co om capijacon quem

²⁷ Mao ta' ta iri na Jeju ne, ja' ja' ac cocon na caram ma' co om tococon. Ma' 2 nana. Merem ac caca na: Xiram pa' xut ta Winacon Davi na ca merem nucucun ma'.

²⁸ Corom mao iri nain xirim Jeju ne, xuruxut hwet ac cocon na co om tococon ma'. Tomi' querec ac tococwa na: Howa mahu' quem? Ha' non pain ca quep xio capari' mahu' ra, howa ac i ma' mahu' ra na ca tomi' querec tococwa ma'? E'e', howa urut pum ta Taramaxicon nuxut ac cocon na.

²⁹ Quep ac cain na tococon, tomi' ac cocon na: Quep xio xuhu'. Win ne ca howa mahu' ma' nonon.

³⁰ Querec mami' ac caca na quem. Tomi' mip ac tococwa na: Ta tomi' hwet huhun pain oro wari' me ta tata.

³¹ Tomi' ac i ma' paxi' tata, ane om tomi' ha' caca ne. Mama' iri nana ne, tomi' hwet tomi' hwet xam' ac cocon pain na oro wari' pain oro xijein cidade ma'.

³² Mama' iri nana ne, maqui' ac caca na xucucun ma'. O mi' nonon con Jeju co corom pe ho' non caxicon jam. Om na capijacon quem.

³³ Tomi' mo pin iri ta caxicon jam ne, tomi' pin ac ca na. Wa wa ac caca na oro wari' ma' quem. Om ca querec camain' tocwa wari' co an xiho' non co cwa' ta, pain ca tomi' mo pin con caxicon jam pain Israel pane nana.

³⁴ Ane tomi' ximama' cocon oro fariseu ma' ne. Wirico taramaxicon nucucun oro caxicon jam co mi' non pain ca hwara' opa nucun. Wirico co mi' non pain ca tomi' jein pin cocon oro caxicon jam ta nonon.

Ca xiram pa' cocon oro wari' Jeju

³⁵ Maji ta ac ca na Jeju ma', mama' ac urut pain na oro xijein cidade, je pain oro ca paric to ne xirim ma' quem. Ca' na pe ac cain na oro xirim ca cut in to xujuxut pain ca judeu urut ma'. Pijim' mi' tata pain capijacon Iri' Jam pain ca taramaxicon pe ho' ton cocon ma'. Quep xio ac tococwa na oro wari' pain oro xijein ca caxi nucucun quem.

³⁶ Querec iri tata oro wari' ne, xiram pa' ac tococwa na, xi ximin ara caca ta. Mija na carawa ca to' i'ina nonon. Om na wari' co quep xiho' nonon quem. An xiho' nanain ovelha ca om ma' camain' wari' co querec wet nain.

³⁷ Tomi' ac caparut na pain ca taxipa' urut con ca'. Noro jujun oro wari' cwa'. Taraju xin paxi' nanain capijacon Iri' Jam. An xiho' paxi' nanain cote ne trigo ca paca' pin ma'. Ane ma' paric ca' e' caca wari' co cat xin nanain ne, je pain ca pijim' mi' xun cocon pain capijacon Iri' Jam ma' quem.

³⁸ Je ca tomi' xuhu' ca' ac caparut na. Tomi' jun Iri' Jam co ac waximain xitot ma'. Tomi' ca' jun: Tomi' roron oro wari' nem co taramaja mi' nenem ma', pijim' mi' jujun pain capija oro wari' ta roron. Ac ca taramaja mama' cacain totam ma' tara, ac ca cat cacain cote ne trigo ma' tara pain ca pijim' cacain capijam ta, ac i ma' tara ca tomi' hun Iri' Jam ta na ca tomi' caparut ca'.