Mateus 4 - Tradução Bíblica Pacaas Novos

Ca tomi' querec con pain ca caracat wa Jeju Caxicon Jam

¹ An mao ac con na Jeju Tamataracon Iri' Jam. An mao non pain cote ne mahweri. Ma' ta tomi' querec quem Caxicon Jam ta non.

² Mon to wet ac cain na i cain. Om ca cao' ca. Noc nain ca cao' wa. Ma' ta tomi' ton Te ta na. Ma' 40 na xec, ma' 40 na xim pain ca om cao' ca pane quem. Pe' pin ac ca na.

³ Hwet ac con na Caxicon Jam ma', co tomi' querec taxipa' pain ca caracat wa ma'. Tomi' ac con na: Ara capam' pin ximain oro pacun ca' quem. Win ne ca Panxica Iri' Jam ina ma ma' na ca tomi' querec con ma'.

⁴ Om na ta ac con na Jeju. Ac i ca' na ca xirao' pe xine pain capijacon Iri' Jam: Om ca xica' pe ne capam' ca to' e' nain ca wari' wa ma'. Tomi' ha' iri tarain oro capija wari' ne, je ca to' e' non ta na ca xirao' nein con ta. Ac i ma' na ca tomi' in pin con Caxicon Jam.

⁵ An mao ac con na pain Jerusalém ma'. Wara ca' na xonein cote ne xiricon Iri' Jam ma', pain iri' tamain ma', an xat pe ac con na.

⁶ Tomi' ac con na: To' jao cun mao rain macan' cain. Win ne ca Panxica Iri' Jam ina ma ma'. Xi xirao' pe ara xine pain capijacon ma' pum: Querec wet jun ta totoron oro jam co taramaja mi' nonon pum. Quep cam' teterem pain micocon. Ma' ta om wein mao ne caximacon pain pacun ta totoron pum. Ac i ma' na ca xirao' pe xine pum ta non.

⁷ Om na ta ac con na Jeju. Ac i ca' na ca xirao' pe xine pain capijacon Iri' Jam quem. Ta tomi' querec mon Taramaxicon co Iri' Jam ne ma cwa' me ta. Ac i ma' na ca tomi' con ma'.

⁸ An mao ac con na pain iri' cote ne pacun ca mao tamana pawin. An mao non pain iri' tamain. An hwet mi' ac con na pain ca awi nein oro xijein macan' pain pira. Tomi' ac con na:

⁹ Mo ta pe torotop mi' querec te mapa' pain ca taramaxicon ne mapa' ca', mi' mi' pi' pin ac xim tara pain oro macan' ca querec pira ma cain. Ac i ma' na ca tomi' con ma' quem.

¹⁰ In ca' ne ta Caxicon Jam ac con na Jeju. Xi xirao' pe ara xine pain capijacon Iri' Jam ta: Pe torotop mi' querec te e' ron Taramaxicon co Iri' Jam ne ma ta. Xica' pe tara co ma' co tomi' ha' wa pain ca taramaja mi' tocwa ta na ca xirao' nein con ta. Ac i ma' na ca tomi' in pin con Caxicon Jam Jeju.

¹¹ Paca' ac con na Jeju Caxicon Jam. Maqui' ac caca na oro jam co taramaja mi' nonon Iri' Jam ma' quem. Quep xiho' ac cocon na Jeju.

Ca taramaja pe pin tain Galileia ta ca Jeju

¹² Taxi' pin iri non João Jeju ne, pain ca tao' pe pin tocwa ma', in mao ac cain na Galileia.

¹³ Wa' mao paxi' nain Nazaré ma', ane om mon to wet cain i cain ne. Pe pin tain Cafarnaum ta ac ca na. Cafarnaum ca pe ja' pan nain cote ne com pain Galileia ma', ca pe ja' pan nain oro xijein cidade pain Zebulom je Naftali ma', je ca pe pan ta' ca Jeju quem.

¹⁴ Ma' ta hwet pin ne capijacon Iri' Jam ca xirao' pe ca profeta Isaías cara pane. Ca' na ca xirao' pe nucun pane:

¹⁵ Je ca tomi' toton oro co om judeu nana ma', co to nanain Galileia ma', co to nanain macarain Zebulom je Naftali ma', co to nanain wanaji cote ne com ma', pain xijein cacarain Jordão ma'.

¹⁶ To paxi' nanain ca jitacat nein xim ira, ane querec cacain cote ne naran ne. Jin' paxi' nanain ca cono' wa ira, ane toha pin cocon naran ne. Ac i ma' na ca xirao' pe ca profeta Isaías pane.

¹⁷ In mao iri nain Galileia Jeju ne, pijim' pin ac ca na, je win pijim' pin ca pane. Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na ca pijim' nucun.

Ca ja' ja' xine tococwa co taxipa' ca

¹⁸ Xut ac cain na cacarain cote ne com pain Galileia ma'. Querec ac tococwa na caram ma' co ma' 2 nana ma'. Simão co Pedro na xijein wixicon ma'. André na wixicon coxa' ca ma' quem. Xin mi' nana pain com caji wi ca mam' pa' caca hwam. Xi pa' taxipa' ara caca hwam ma', vender vender ac cocon na quem, je i ma' ca taramaja nucucun pane.

¹⁹ Tomi' ac tococwa na: Harahap je, ja' ja' xine. Ca' na ac xuhu' tara pain ca cut in wa wari'. Win ne ca cut in taxipa' hun hwam cwa', ac i ma' jujun oro wari' quem. Ma' ta howa cacapa' pahu' ta inuhu' na ca tomi' tococwa ma'.

²⁰ Ma ac caca na, an to hap pin ac cacain na ca mam' pa' caca hwam. Ja' ja' ac cocon na Jeju.

²¹ Xut tiquin' mao ac ca na, querec ac tococwa na xucucun ma', Tiago con coxa' ca João ma' quem. Mana panxica Zebedeu nana. To ho' nonon cote caca pain mam' horoho nucucun. Ara xo' nanain ca mam' pa' caca hwam ma'. Tomi' ac tococwa na: Harahap je, ja' ja' xine tata.

²² Ma ac caca na, om ca hehe caca. Paca' hap nonon cote caca, paca' nanain mam' horoho nucucun ma', ja' ja' ac cocon na Jeju.

Ca pijim' mao cain Galileia Jeju, ca quep xio mija tococwa oro wari' quem

²³ Jeju ma', xut mao ac cain na oro xijein cidade pain Galileia ma'. Ca' na pe nain oro xirim ca cut in xucucun oro win judeu urut quem. Pijim' mi' tata pain capijacon Iri' Jam ma', pain ca taramaxicon pe ho' pin xim cuhu' Iri' Jam ta tococwa ma'. Quep xio ac tococwa na oro wari' pain oro xijein ca caxi nucucun quem.

²⁴ Taraju ac caca na oro wari' co to nanain pira pain oro xijein cidade pain Síria ma' quem. Quep xio nonon oro wari' Jeju ta na ca taraju nucucun. Je ca cut qui' cut qui' pi' pin tococwa oro wari' co caxi nana ma', co jain jain nana pain oro ca caxi tamana nucucun ma'. Mo nana: Co corom to ho' nonon caxicon jam ma', co pa' taxipa' nonon tamanain ma', co carama to nana ma', quep xio quep xio pi' pin ac tococwa na.

²⁵ Mija nana wari' co ja' ja' nonon quem. Maqui' nanain oro xijein cidade pain Galileia, maqui' nanain oro xijein cidade pain Decápolis quem. Maqui' nanain Jerusalém, maqui' nanain oro xijein cidade pain Judeia, je pain oro xijein cidade pain xijein cacarain Jordão ma' quem.