Mateus 20 - Tradução Bíblica Pacaas Novos

Ca pijim' joc mam' mi' caparut cocon wari' co taramaja to nanain totain uva

¹ Pijim' ac caparut na: Carawa ca ara ne pain ca taramaxicon pe ho' toton cocon oro wari' Iri' Jam ma', an xiho' nain carawa ca ara ne con waximain totain uva ma'. Iri' xo' xec pin iri na ne, mo tomi' xo' toton caram ma' co taramaja xi' nana ma' ac ca na, mo hwet ac tococwa na.

² Tomi' xo' ac tococwa na: Mo ta taramaja to xin hwein totain uva ne ma', mi' xica' pe mi' xica' pe xam' ac xuhu' tara pain denário, ac i ma' na ca tomi' xo' tococwa ma'. Ma, mama' ac caca na quem.

³ Om ca pawin homa ca xina, in hwet ac cain na ca xao to to caca oro wari' pain cidade ma'. Querec ac tococwa na caram ma' co to ximama' e' nana ma'.

⁴ Wahu' quem ac tococwa na. Taramaja mama' jein totain uva ne ta. Pagar xo' xuhu' quem ac tococwa na.

⁵ Mama' ac cacain na totacon. Tocon xina pin iri na ne, mo tomi' mami' toton wari' e' ac ca na, tomi' xo' mami' ac tococwa na oro xucucun. Piquirim pin iri na xina ne, mo tomi' toton xucucun ta ac ca na, tomi' xo' ac tococwa na quem.

⁶ Irawin pin ta' iri na ne, in mao mami' ac cain na ca cut in to xucucun ma'. Mam' ac tococwa na oro xucucun co to to wet nanain i ma'. Cain' cain' xira pahu' quem ac tococwa na. Pain iri' xo' xec cara ne ca to ximama' e' hwe ma'. Je xi taramaja hwe quem ac tococwa na.

⁷ Xi ma' ca wari' co taramaja je naparut ta ac cocon na. Je xi mo taramaja mama' hwein tota cain quem ac tococwa na. Mama' ac caca na quem.

⁸ Irawin pin iri na ne, tomi' ac con na co querec wet taxipa' nain caramaxicon. Harahap je roron co taramaja to nanain tota ma'. Pagar roron pain ca taramaja nucucun. Pagar cain' roron co xo' tomi' ta' pain irawin ca' ne, pagar ac momon tara oro xucucun, aram aram hwet ac momon tara co wara tomi' cain' ta' pain xo' xec cara ne, pagar pi' pin ac momon tara quem na ca tomi' con ma'.

⁹ Caram ma' co xo' taramaja nanain irawin ma', an xica' an xica' xam' ac cacain na denário.

¹⁰ Hwet iri tata co wara taramaja nanain iri' xo' xec cara ne, coromicat ac caca na: Mi' hwara' tarapari' pain denário ta nana. Ane om mi' hwara' tococwa pain ne. An xica' an xica' xam' nanain denário quem.

¹¹ An pin iri nanain ne, tomi' mana' pin ac cocon na taramaxicon.

¹² Caram cwa' co taramaja e' nanain irawin cara ne, taramaja wijimain e' nana. Warut iri na ne, taramaja qui' urut pain iri' xo' xec cara ne. Taramaja tamana urut. Nahwere' tamana urut pain ca xain caparut xina quem. Para an an ari ne ca pagar maparut ma' quem na ca tomi' querec cocon pain ca mana' nucucun.

¹³ Tomi' ac ca na waximain xitot ma', tomi' non win ma' caca co mana' nana ma'. Tomi' xim inem win ma' ne. Om ca mixein xim. Tomi' xo' inem pain xo' xec cara ne, xin ne ac mapa' na pain ca mi' xica' pe xim pain denário pain ca taramaja nem pain xec ca' xim ne ira.

¹⁴ An rain denário nem ta. In mao rain xurum quem. Denário ca mi' toton caram cwa' co xo' taramaja nanain irawin cara ne, wata' ara xi' na co mi' toton pain na. An an ari tarain inain ca xica' pe nein denário ca mi' xim ca' quem.

¹⁵ Om ca hohot ne pain ca ara pan tain ca param ne pain dinheiro ne ra? Cain' cain' xima quem? Ac ca noc mi' momon na pain ca xiram pa' toton ca'. Ac i ma' na waximain totain uva cocon oro co taramaja mi' nonon ma'.

¹⁶ Je ca tomi' xuhu' ca' ac caparut na. Co om hwara' opa nana pain xocori ca', ame hwe e', main hwara' opa pin tatara. Co hwara' opa nana pain xocori ca' iri nana ne, ame hwe e'. Main hwara' opa hwara' opa om pin tatara quem na ca tomi' caparut.

Ca tomi' pe mami' cain ca mi' pin ta' nucun je pain ca e' mami' ta' nucun quem

¹⁷ Maji pain Jerusalém ta ac caparut na Jeju, xuruxut mama' ac urut na quem. Xuruxut xuruxut, tomi' ac caparut na pain ca taxipa' urut con ca', pain ca ma' 12 urut ca'. Harahap je, xuruxut ni ca' xuxun oro wari' cwa' naparut, tomi' ac caparut na:

¹⁸ Taraju wet xine e'. Mama' xin irin Jerusalém ta. Tan' mama' iri xi' ne, quep ac cacapa' tara co noc nanapa'. Wata' pain ca Iri' Wari' ta' ca', quep ac cacapa' tara, o mi' ac cacapa' tara cocon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma'. Em' ma, na e' na pain ca to' pa' pin xima ta ac cacapa' tara.

¹⁹ O mi' ac cacapa' tara cocon co om judeu nana ma' quem. Tatam' tatarapa', tomi' xirac ac cacapa' tara, wap ac cacapa' tara quem. Tatatain mi' ac cacapa' tara pain pana, wa wa mi' pin pe ac tain tara. Ma' 3 pin iri tara xec pain ca mi' pin ne ne, e' mami' ac ta' tara ta naparut.

Ca tomi' ton con Jeju jicocon mana panxica Zebedeu

²⁰ Tomi' ton Jeju ta ac cama na jicocon mana panxica Zebedeu ma', Tiago con João ma', co taxipa' nonon Jeju ma'. Harahap je e' ac tococwa na humaxicam, xuruxut hwet ac cocon na Jeju. Pe torotop mi' ac con na. Jeju, tomi' xim inem ira ac con na.

²¹ Ma' carawa ca param ma quem ac cam na. Tomi' pe mi' ne pain ca tomi' nem cocon humaju cwa', co 2 nana cwa' ac con na. Maqui' iri tara xec nein ca taramaxicon pin ta' ma ne, mi' ac momon tara pain ca xao to ho' quequem pain iri' cwerem je pain parajum ma' quem na ca tomi' con ma'.

²² Xi taxi' hwein carawa ca wajim' mahu' ta ac tococwa na. Jain jain tamana ta' pain ca quep em' xim cacapa' oro wari' ta. Ha' turuhu' pain ca jain jain xiho' ac i ma' mahu' quem na ca tomi' tococwa ma'. Ha' naparut ta nonon.

²³ Je i ma' ira, an xiho' xim mahu' pain ca jain jain ta' ne ca' ira. An xiho' xim mahu' pain ca quep em' xim cacapa' oro wari' quem ac tococwa na. An xiho' ac i ma' xim paxi' mahu', ane om wata' ne co tora' pan toton nonon oro wari' co xao to ho' xim nanapa' ne. Wirico pan na Te co wara tora' an to xo' nonon wari' co xao to ho' xim nanapa' ta na ca tomi' tococwa ma'.

²⁴ Warut pain ca taxipa' urut con Jeju cwa', pain ca ma' 10 urut ca', taraju iri urut pain i ma' cocon mana panxica Zebedeu ma' ne, mana' ac urut cocon na. Om ca taraju hohot caparut ca tomi' nucucun.

²⁵ Harahap pi' pin je ta, tomi' xim inuhu' ta ac caparut na Jeju. Hwara' opa nana oro taramaxicon nucucun oro tatirim ma', tomi' ha' xut ximama' nonon oro wari' nucucun. Om ca xiram pa' camain' cocon pain ca taramaxicon hwara' opa to ho' cocon ma' quem. Wara taxi' hwein i ma'.

²⁶ Ane om na ne pain ca an xiho' huhun ne. Jimama' je. Mo ta param hwein ca taramaxicon wa ma', om ta xec xec hwe, taramaja mi' pan jujun oro win ma' hwe ma'.

²⁷ Mo ta param huhun oro win ma' nuhu' pain ca querec pin' cucuhu' pain ca hwara' opa nuhu' ma', na e' na pain ca taramaja mi' huhun. Win ca wari' co taramaja mi' e' non taramaxicon nucun ma', ac i ma' je pain ca taramaja mi' e' huhun oro win ma' hwe ta.

²⁸ Win ta' ca', pain ca Iri' Wari' ta' ca'. Om ca maqui' ta' pain ca taramaja mi' xine xuhu', om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' caparut ca'.

Ca quep ma' pin xine tococon wari'

²⁹ Xuruxut mama' ac urut na, paca' ac urut pain na Jericó. Mija nana wari' co ja' ja' nanaparut. Om ca paric camain' caca.

³⁰ Ma' 2 ac caca na co xao to to nanain cacarain wana ma'. Om na tococon. Taraju ac caca na: Maqui' na Jeju ta, maqui' na Jeju ta nana oro wari'. Taraju iri tata ne, merem ac caca na: Taramaxicon nuxut nana, Winacon Davi nana, xiram pa' xut ta na ca merem nucucun.

³¹ Tomi' in pin ac cocon na oro wari' co ja' ja' nonon ma' quem. Merem maho' je ta paxi' tata, ane om ha' caca ne. Merem merem tiquin' nana, merem mip nana. Taramaxicon nuxut. Winacon Davi. Xiram pa' xut ta na ca merem nucucun.

³² Xat ac ca na Jeju. Harahap je ac tococwa na. Ma' i ma' pahu' quem? Ma' carawa ca ara mi' xine mahu' quem tata.

³³ Om na, querec xixi' na urut ta Taramaxicon ac cocon na.

³⁴ Xiram pa' ac cocon na Jeju. Quep ac cain na tococon, querec mami' hap ac caca na. Ja' ja' ac cocon na Jeju.