Marcos 7 - Tradução Bíblica Pacaas Novos

Ca tomi' in pin tococwa oro fariseu pain ca pijim' ximama' nucucun

¹ Ma' ac caca na oro fariseu cocon oro co ca' na taxipa' nanain ca xirao' nucun Moisés. Maqui' nanain Jerusalém. Hwet ac cocon na Jeju.

² Querec ac tococwa na co taxipa' ca Jeju pain ca cao' ximama' e' caca ma', pain ca om tomi' ha' cocon oro hwanana nucucun pain ca om hohoc xo' mam' cacain micocon. He ac caca na. Em' nana caram ma' ta! Je xi hohoc xo' mam' cacain micocon pain ca cao' xi' nucucun ta nana.

³ Ac i ma' taxipa' nana oro fariseu cocon oro judeu ma'. Cao' xi' iri nana ne, hohoc xo' mam' ac cacain na micocon, ma' ta om em' iri' ta nana. Hohoc xo' iri nanain ne, cao' ac caca na. Ac i ma' na ca tomi' ha' cocon hwanana nucucun co taramaxicon nana pain cara pane, je curucucun mao na.

⁴ Maqui' iri nanain oro xirinain ca cut pe wa carawa ma' ne, hohoc xo' mam' ac xucucun na pain com, cao' cao' ac caca na. Ma' na oro wirain capijacocon hwanana nucucun ca tomi' ha' je cocon oro wari' ma' quem. Hohoc xo' nanain ca mam' toc caca ma', hohoc xo' nanain mam' ji'ao xo' cacain com ma', je oro too mam' hoc cacain carawa ma', je oro ca mam' xao to caca ma' quem. Je curucucun mao na.

⁵ Tomi' querec ac cocon na Jeju oro fariseu cocon oro co ca' na taxipa' nanain ca xirao' nucun Moisés. Para om tomi' ha' caca co taxipa' ma ma'? Para om tomi' ha' cacain oro ca ara je cacapari' oro hwanana nexi' co taramaxicon nana pain cara pane quem? Xi hohoc xo' mam' cacain micocon pain ca cao' xi' nucucun ta na ca tomi' cocon ma'.

⁶ Ac ca iri'o' xi' ca' tara me hwe ra ac tococwa na. Iri'o' na ca xirao' nucun Isaías cara pane, pain ca tomi' hwet cain capijacon Iri' Jam cocon oro hwanana nuhu' pane ta ac tococwa na. Ca' na ca xirao' pe ca pane: Tomi' ca' na Iri' Jam: Tomi' ha' urut pum ta paxi' nanapa' oro wari' cwa'. Ane tomi' capijacocon e' caca ne. Om ca tomi' querec te iri'o' cacapa'. Ac ca to pira ca' cacapa' na pain ximicocon ta.

⁷ In ac paxi' nanapa' pain ca pe torotop mi' cacapa' ca'. Ane om tomi' querec te toton pain ne. Xi tomi' mixein ara caca pain ca tomi' nucucun ta: Om na, oro capijaxut ca ca' na urut pahu' ca', maqui' non Iri' Jam ta nonon oro win ma' caca. Xi maqui' capa' ca pijim' nucucun pain ca ca' na cacain capija ta. Maqui' nonon oro hwanana nucucun ta. Ac i ma' na ca tomi' hwet cain capijacon Iri' Jam Isaías pane, pain ca pan to' cain taraxicocon oro hwanana nuhu' pane na ca tomi' tococwa ma'.

⁸ Miri'om hwein oro capijacon Iri' Jam ca ara je capari' ta. Tomi' ha' e' hwein oro ca tomi' pan nuhu' ta na ca tomi' tococwa ma'.

⁹ Tomi' ac tococwa na: Hohot tara ma' hwein ca an to hwein oro capijacon Iri' Jam ca tomi' ha' je capari', ma' ta tomi' ha' xin capijacocon hwanana nexi' hwe ra ac tococwa na.

¹⁰ Noro jein ca xirao' nucun Moisés ca' ac tococwa na. Tomi' ha' ron cote ma cam jim ta. Quep xiho' raram quem, ac i ma' na ca xirao' mi' capari' Moisés cara pane. Xirao' mi' napari' pain i ca' quem: Wari' co tomi' napat non cote ca cam jicon ma', to' pa' pin ac tocwa tara ta napari'.

¹¹ Wahu' iri na ne, tomi' ca' huhun oro win ma' nuhu' pain ca pijim' huhun ma': Ma' paxi' turuhu' carawa ca mam' quep xiho' xun hun cote hwe cam juhu' ma'. Mo ta tomi' cain' hwehwem: Carawa ne ca', wara tomi' pe mi' inon pain Iri' Jam ta. Om ca mi' ac xuhu' pain, mo ta tomi' ac i ma' hwehwem,

¹² hohot ac ne tara pain ca om quep xiho' hwehwem ta na ca tomi' pan nuhu' pain ca pijim' huhun ma'.

¹³ Ac i ma' na ca miri'om hwein capijacon Iri' Jam ta. Xi om ne ca tomi' ha' e' ara hwein oro ca tomi' pan nuhu' ta. Mija na oro wirain ca tomi' nuhu' ca pan teretem ac i ma' ma' quem. Ac i ma' na ca tomi' tococwa oro fariseu pain ca pijim' ximama' nucucun pane.

¹⁴ Tomi' mami' ac tococwa na oro wari'. Harahap je ta ac tococwa na. Taraju wet taraju wet pi' pin xine ta. Ma' ta taraju pa' hwe quem tata.

¹⁵ Oro carawa ca corom hwet nuhu' pain capijahu' ma', pain ca cao' nuhu' ma', om ca to' em' ac cuhu'. Ca coromicat nuhu' ca maqui' nain xumuhu' ma' iri na ne, je pain ca tomi' ximama' nuhu' ma' quem, je i ma' ca to' em' nuhu' ta. Om ac ne na ca querec hohot cuhu' Iri' Jam.

¹⁶ Mo ta taraju pa' xixi' na hwe ma', je ta taraju wet qui' hwe ta na ca tomi' tococwa ma'.

¹⁷ Corom ca' iri nonon oro wari' Jeju ne, pain ca corom cain xirim ma', tomi' querec pan ac cocon na co taxipa' ca ma'. Cain' cain' ne ca tomi' ma cara ne? Para tomi' joc mam' mi' momon pain carawa ca to' em' nonon ma'? Tomi' xo' xut pain e' nonon.

¹⁸ Cain' cain' xihwe quem? Om ca taraju pa' querec hwe ra ac tococwa na. Om ca taraju pa' hwe ra inuhu'. Carawa ca corom hwet nuhu' pain capijahu' ma', pain ca cao' nuhu' ma', om ca to' em' ac cuhu' ta.

¹⁹ Xi corom hwet cuhu' pain xumuhu' ta. Corom hwet e' nuhu' pain pemenuhu' pain munuhu', ira' pin ac hwein na quem, ac i ma' na pain ca tomi' xo' tococwa ma'. Pain ca tomi' xo' ac i ma' ca ma', je ca to' taraju pa' capari' pain ca om tomi' caho' mami' capari' pain oro carawa ca cao' wa Iri' Jam. Awi awi pi' pin na oro carawa ca cao' wa ta napari'.

²⁰ Tomi' tomi' tiquin' ac tococwa na: Ca coromicat nuhu' ca maqui' nain xumuhu' ma', je i ma' ca to' em' nuhu' ta. Je ca om querec hohot cuhu' Iri' Jam quem.

²¹ Xi maqui' ara nein iri' ca xumu wa oro carawa ca to' em' nain ca wari' wa ta. Mo na: Ca coromicat pan teretem wa ma', ca caracat wa pain ca quep ximama' wa ma', ca cut noc xa wa carawa ma', ca to' pa' wa wari' ma', ca quep tacacama oro manacocon oro wari' ma', je pain ca quep ne cocon xucun tarama' oro narima' ma' quem,

²² ca param ximama' wa ma', ca pan teretem ximama' wa ma', ca mixein wa ma', ca tamanain to wa pain oro ca quep ximama' wa ma', ca noc wa wari' ma', ca tomi' napat wa ma', ca xec xec wa ma', ca om coromicat xo' wa ma'.

²³ Oro ca pan teretem wa ca tomi' xuhu' ca', maqui' nain ca xumu wa. Je i ma' ca to' em' nain ca wari' wa ta na ca tomi' tococwa ma'.

Ca quep xio pin tacama cainacam narima' co om judeu

²⁴ Maji ta ac ca na Jeju ma', mama' ac cacain na oro xijein cidade ca to ja' pan nain Tiro je Sidom. Corom tain xirim ma' ac ca na, corom mao ac cain na. Noc paxi' tata oro wari' pain ca taxi' cocon pain ca pe cain i cain, ane aram aram taxi' pin cocon ne.

²⁵ Pe nain i ma' narima' ma', co taraju nonon oro wari' pain ca maqui' na Jeju ta caca ma'. Corom pe ho' nam cainacam caxicon jam. Je ca maqui' hap cama ma', pe torotop mi' ac con na Jeju quem.

²⁶ Om ca judeu cama narima' ma'. Fenício nana oro win ma' cama, Síria na wixinain macaracam. Tomi' nain capijacocon oro grego quem. Tomi' mip ac con na Jeju: Tomi' mo ca' ram con caxicon jam caina cwa' non.

²⁷ Om na, ame ma e' ac cam na. Cao' cao' ma'am cain' tatara oro hwijima' cwa' e', xi hohot ne pain ca cut ca' toton pain carawa ca cao' wa oro hwijima' ma', pain ca wixicaracao' mi' ton pain oro wixicon oromijac cwa' quem nam.

²⁸ Taxi' paxi' ina quem Taramaxicon ne ac cama na. Ane om narain ho' tocwa pain ca cao' wa oro pawirinain carawa wixicon oromijac ma' ne. Cao' nain oro pawirinain carawa ca cao' pawuru caca oro hwijima' ma', ca cao' pawuru to cacain pana ca mam' cao' to caca ma'. Je xi xiram pa' ac i ma' mapa' pain ca om judeu ta' ca' quem na ca tomi' con ma'.

²⁹ Awi na ca tomi' nem ta ac cam na. Mo in mao ra. Hwet ca' nam caxicon jam cainam ta nam.

³⁰ In mao ac camain na xiricam. Wa' mao iri na ne, wara hwet ca' nam caxicon jam. Terem' pe nain caji wi nequem. Tacana pe pin na quem.

Ca quep xio pin tocwa wari' co om taraxicon, co om capijacon quem

³¹ Maji ta ac ca na Jeju ma', paca' ac cacain na oro xijein cidade ca to ja' pan nain Tiro ma'. Xuruxut tiquin' ca' ac cacain na xijein cidade pain Sidom ma' quem. Aram aram hwet ac cacain na cote ne com pain Galileia ma', je pain oro xijein cidade pain Decápolis ma'.

³² Ma' ac caca na oro wari' co o qui' nonon wari' co om taraxicon, wirico co om capijacon ma' quem. Jain jain nana con, tomi' mip ac cocon na: Quep ron pain mum win ma' nuxut cwa'. Ma' ta xio pin ca pum na ca tomi' cocon ma'.

³³ Hap ra ta ac con na Jeju, wirico, wirico wari' ma' quem, xuruxut to ni ca' ac cocon na oro wari'. Joc corom ac cain na micon pain taraxicon. Cupa' ac cain na micon, quep ac cain na petehwet nucun ma' quem.

³⁴ Noro pawin ac ca na, wereme to ac ca na pain ca xiram pa' con ma'. Efatá ac ca na, je ca tomi' ca pain capijacocon oro judeu. Pain ca Efatá ca ma', taraju ho' ra ta na ca tomi' mao nein ca tomi' nucun.

³⁵ Tomi' iri nain i ma' ne, taraju hap pin ac ca na. Teren teren om pin ac ne na petehwet nucun, tomi' xo' pin ac ca na quem.

³⁶ Ta tomi' hwet huhun oro wari' pain ca quep xio ton co cwa' ta ac tococwa na. Tomi' caho' paxi' tata pain ca tomi' hwet wa ma', ane tomi' hwet cacain ne. Ca tomi' caho' tococwa pain ca tomi' hwet wa ma', ca tomi' hwet tomi' hwet tiquin' pan ac cacain na quem.

³⁷ Wa wa tamana ac cocon na oro wari'. Oro ca ara ca ma', awi tamana na ta nana. To' taraju pin non wari' co om taraxicon ma', to' tomi' pin non wari' co om capijacon ma' quem ta na ca tomi' caca ma'.