Marcos 16 - Tradução Bíblica Pacaas Novos

Ca e' mami' ca Jeju

¹ Corom pin iri na xina pain sábado ma' ne, pain xec nein ca xao to wa e' cacain ximicocon oro wari' ma', cut ac cacamain na incenso. Ma' ta ji'ao mi' xin pain curucun ta nana. Mo nana: Maria Madalena ma', Salomé ma', Maria jicon Tiago ma' quem.

² Iri' xo' xec pain domingo ma' iri na cacam ne, toha pin iri na xina cacam ne, mama' xin manain pacun ca an corom pe pe cacain curucun ta ac cacama na.

³ Xuruxut xuruxut tomi' ac xequequem na: Ma' wari' xira co joc mi' napari' pain pacun ca tao' pa' caho' nain manain ma' quem na ca tomi' xequequem ma'.

⁴ Xuruxut xuruxut noro ho' nana. Querec nanain ca wara joc panajao' pin xine pacun ma'. Iri' cote ne pacun ta.

⁵ Corom mama' ac cacama na, querec ac cocon na co xo' hwara' ma'. Xao pe nain i ma', pain iri' cwerequequem ma'. Towo' na womicon. Jaxicao' pin nanam. Mija na ca jin' cacama ta.

⁶ Ta jin' mahu' me ta ac cacam na. Pirao' paxi' hun Jeju co maqui' nain Nazaré pane, co tatatain mi' wa pain pana pane. E' mami' na ta. Om pin nain i ca'. Noro je. Je i ca' ca an terem' pe cacain curucun pane na ca tomi' cacam ma'.

⁷ Mama' je ta ac cacam na. Tomi' jujun co taxipa' ca ma', tomi' jun Pedro ma' quem. Wara mao nain Galileia cain. Mama' je quem, je i cain tara ca querec pe hun ta jujun. Win ne ca wara tomi' pe cuhu' pane ta jujun ta na ca tomi' cacam ma'.

⁸ Jin' tamana nana, mija na ca cocoroc cacama. Hwerehwet mama' ac cacama na, jein ca' ac cacamain na manain pacun. Om ca tomi' hwet cocon pain oro wari' quem, xi jin' tamana ara cacama ta.

Ca hwet pa' cam Maria Madalena Jeju

⁹ E' mami' iri na Jeju ne, pain iri' xo' xec pain domingo pane, hwet pa' cain' ac cam na Maria Madalena ma', co wara quep xio ca pane, pain ca tomi' jein ca' cam cocon oro caxicon jam co ma' 7 nana pane.

¹⁰ Mo tomi' hwet toton co taxipa' ca e' ac cama na, mo hwet ac tococwa na. Tomi' xaxa' nana co taxipa' ca ma'. Awaran tamana nana. Tomi' hwet ac tococwa na pain ca hwet pa' cam Jeju.

¹¹ Taraju iri nanam pain ca e' na ta cama ma' ne, pain ca querec inon ta cama ma'. Taraju paxi' nanam, ane om howa cacam ne.

Ca hwet pa' tococwa co howa nonon ma', pain ca xuruxut 2 cacain wanaji xitot ma'

¹² Om om, hwet pa' ac tococwa na win ma' caca co taxipa' ca ma', co xuruxut mama' nanain wanaji xitot ma'. Ma' 2 nana. Jimao nonon, ac xucun wari' nonon.

¹³ Querec pin' iri nonon ne, jein in hwet ac cocon na oro win ma' caca, tomi' hwet ac cocon na. Om ca howa cacain ca tomi' nucucun quem.

Ca hwet pa' tococwa co taxipa' ca ma'

¹⁴ Aram aram hwet pa' ac tococwa na co taxipa' ca ma' quem, co ma' 11 nana ma'. Hwet pa' tata pain ca cao' nucucun. Tomi' mip ac tococwa na. Xi howa cacam co querec nonon pain ca e' mami' nucun ta. Para om howa hwe ma' quem? Om ca howa je na hwe ra tata.

¹⁵ Mama' jein oro xijein macan' ta ac tococwa na. Pijim' hwet pijim' hwet xam' jujun pain capija pain ca to' witan toton ta' oro wari' ta na ca tomi' tococwa ma'.

¹⁶ Tomi' ac tococwa na: Wari' co howa ma', co ja' com ma' quem, to' witan ca' ac tocwa tara pain ca caracat nucun. Wari' co om howa ma' iri na ne, em' ma ta ac tocwa tara, wap tamana ac tocwa tara ta.

¹⁷ Oro wari' co howa nanapa' ma', ara ac cacain tara oro ca to' querec pin' nonon oro wari' pain ca pe ho' cocon ca hwara' opa nucun Iri' Jam. An hwet iri tatarain wuxu ne, tomi' jein pin ac cocon tara oro caxicon jam. Tomi' ac cacain tara xijein ca capija wa ca om wara tomi' taxi' caca quem.

¹⁸ Mo ta quep mapi' cocon em', om ta huru caxi tococwa. Mo ta toc cacain cominain ca mam' aramao wa, om ta toc xirac tococwa quem. Mo ta quep cocon pain micocon co caxi nana ma', xio pin ac caca tara quem na ca tomi' tococwa ma'.

Ca in mao cain pawin Jeju

¹⁹ Taramaxicon nexi' Jeju ma', tomi' ac i ma' iri nonon co taxipa' ca ma' ne, an piri' mao ac tocwa na pain pawin. Xao pe ho' pin ac cain na iri' curucun Iri' Jam.

²⁰ Pijim' mama' ac cacain na oro xijein macan' co taxipa' ca ma' quem. Quep xiho' tamana nonon Taramaxicon nexi'. Mi' nonon pain ca ara cacain oro ca om ara taxi' ne ca wari' wa ma'. Ac i ma' na ca to' querec pin' tococwa pain ca pijim' iri'o' nucucun pane. Je i ma'.