Marcos 15 - Tradução Bíblica Pacaas Novos

Ca tomi' querec con Jeju Pilatos

¹ Xec pin iri na ne, pain iri' xo' xec ma', tomi' xo' ac xucucun na oro taramaxicon pain ca Sinédrio caca ma'. Mo nana: Oro taramaxicon nucucun oro sacerdote ma', oro xucucun taramaxicon nuxut pain ca judeu urut ca', oro co ca' na taxipa' nanain ca xirao' nucun Moisés ma' quem, tomi' xo' tomi' xo' pi' pin ac xucucun na. Pao' pe ac cocon na Jeju, an mao ac cocon na, o mi' ac cocon na con taramaxicon Pilatos.

² Wum co iri' taramaxicon nucucun oro judeu cwa' ra na ca tomi' querec con Pilatos. Wata' cwa' ira. Win ne ca tomi' ma ma' ta ac ca na Jeju.

³ Tomi' em' tamana ac cocon na oro taramaxicon nucucun oro sacerdote ma'. Mija na ca caracat ca Jeju cwa' nonon.

⁴ Tomi' querec mami' ac con na Pilatos: Om ca tomi' in pin toton ma ra? Om ca taraju momon pain ca tomi' em' quequem pain ca caracat tamana na ta quequem ca' ra na ca tomi' con ma'.

⁵ Ane tacana pe pan ca Jeju ne, om ca tomi' camain' ca. Wa wa tamana non Pilatos.

⁶ Taramaxicon Pilatos cara pane, pain oro cawaxi' pain xec nein Páscoa pane, pain ca tomi' querec te wi caca oro judeu ma', pa hwet taxipa' non wari' co tao' pe wa. Je curucun pane, pa hwet taxipa' non wari' co tao' pe wa, pa hwet mi' taxipa' tata con oro wari' pane. Pa hwet mi' xut con co param urut cwa' iri nana ne, pa hwet mi' ac tococwa na con. Je curucun taramaxicon pane.

⁷ Pain xocori ca' iri na ne, ma' na wari' co tao' pe wi wa cocon co noc nonon oro romano ma', co to' parapa' pin nonon pain ca mana' mana' mixita qui' tococwa soldado nucucun oro romano pane. Barrabás na wixicon.

⁸ Maqui' ac caca na oro wari'. Mija nana wari'. Pa hwet mi' xut con wari' co tao' pe ma ma', win ma pane nonon Pilatos.

⁹ Param mahu' pain ca pa hwet mi' xuhu' con co cwa' co taramaxicon ne hwe pain ca judeu hwe ma' ra na ca tomi' querec tococwa ma'.

¹⁰ Ma' na ximicon Pilatos. Querec pin' tata oro taramaxicon nucucun oro sacerdote ma', querec pin' tata pain ca noc ximama' pan cocon Jeju ma'. Querec pin' tata oro wari' pain ca tomi' querec te tamana pan cocon quem. Je ca o mi' cacapa' con ta na ca coromicat nucun.

¹¹ Ane wara tomi' cocon oro wari' oro taramaxicon nucucun oro sacerdote ma' ne. Noc urut con Jeju ta jun me nonon. Pa hwet mi' xut con Barrabás jun, tomi' tomi' na pin ac cocon na. Xin ne ac caca na, tomi' ac cocon na Pilatos: Om na, noc urut con Jeju ta, mi' xut con Barrabás ma', pa hwet mi' xut con Barrabás ta na ca tomi' cocon ma'.

¹² Cain' cain' xiton co cwa' quem, co taramaxicon ne hwe pain ca judeu hwe ma' quem ac tococwa na.

¹³ Om na, na e' na pain ca tatatain mi' tocwa pain pana ta nana pain ca merem caca ma'.

¹⁴ Cain' cain' xira pahu'? Para em' na hun ma' quem ac tococwa na. Merem mip merem mip ac caca na. Om na, na e' na pain ca tatatain mi' tocwa pain pana ta nana.

¹⁵ Ma ac ca na Pilatos. Ca' na ca coromicat nucun: Tomi' ha' toton, ma' ta tomi' querec te cacapa' ta na. Je ca pa hwet mi' tococwa con Barrabás ma'. Wap jun Jeju cwa' ta ac tococwa na oro soldado nucun, wap wap ac cocon na. An mao jun ta, tatatain mi' jun pain pana ta ac tococwa na.

Ca tatam' cocon Jeju oro soldado, je pain ca tomi' xirac cocon quem

¹⁶ Oro soldado ma', an corom mao ac cocon na Jeju pain xiricon taramaxicon. Tomi' cut in ac cocon na oro win soldado caca ma' quem.

¹⁷ Pe iri nonon con cote ca wom ma' ne, co ac womicon taramaxicon co paca' awi ma', ton ac cacain na caji macon ca puxu ma', mo' mo' ac cacain na caji waji' ca an xiho' paxi' nain ca to taxipa' caca oro taramaxicon pain winacocon ma', pe ac cocon na pain winacon.

¹⁸ Pe torotop mi' mixein ac cocon na. Awi na taramaxicon nucucun oro judeu cwa' ta nana pain ca tomi' ximama' cocon ma'.

¹⁹ To' ac cocon na pain winacon pain pana, cupa' cupa' ac cocon na quem. Pe torotop mi' ac cocon na, tomi' querec te mixein e' nonon quem.

²⁰ Tatam' tatam' noc pin iri nonon ne, hot ca' ac cocon na con wom co paca' ma', pe mami' ac cocon na con iri' womicon. An hwet mao ac cocon na quem. Ma' ta tatatain mi' xun pain pana ta nonon.

Ca tatatain mi' cocon pain pana Jeju

²¹ Xuruxut mama' iri nanain wana ne, win quima ac cocon na wari' ma'. Simão na wixicon. Wari' nein Cirene na Simão. Cote ca Alexandre con Rufo na Simão ma'. Maqui' nain xitot. Quep ac cocon na oro soldado, an tiquin' rain panaxicon Jeju cwa' nonon.

²² An mao ac cocon na Jeju pain ca tamaja pan ne macan' ma', ca Gólgota caca oro wari' ma'. Maxinain Tacawaji' na ca tomi' mao nein Gólgota.

²³ Wara joc wanan nanain comi uva pain waraqui mirra. Ma' ta. Toc rain ta paxi' nonon. Ane om toc cain ne.

²⁴ Tatatain mi' ac cocon na pain pana. An an xam' xun womicon cwa' ta ac caca na oro soldado ma'. Ma' xi an non co cwa' ne, ma' xi an non co cwa' ne xucucun, ara ac cacain na ca ara taxipa' caca ma', ma' ta taxi' xun wom co an xi' iri' cwa' xucucun.

²⁵ Om ca pawin ca xina ma', pain 9 hora ma', pain ca tatatain mi' cocon pain pana.

²⁶ Xirao' pe ta ca pan tem na ta tocwa pain pana ma'. Tatatain mi' ac cacain na pain tamain panaxicon. Ca' na ca xirao' nein: Taramaxicon nucucun oro judeu ta na ca xirao' nein.

²⁷ Tatatain mi' iri nonon pain panaxicon Jeju ne, ma' 2 ac caca na wari' co tatatain mi' wawa pain pana ma' quem. Iri' caxicon wari' nana, cut noc xa taxipa' nana carawa. Pe nain iri' curucun xucun, pe ac cain na paraxicon xucun ma' quem.

²⁸ Ac i ma' na ca hwet pin ne ca xirao' pe xine pain capijacon Iri' Jam. Ca' na con pane: Ac ca caracat ca na cocon, xi to' pa' wi ara cocon cocon oro caracat ma' na ca xirao' pe xine con pane.

²⁹ Tomi' xirac tomi' xirac nonon oro wari' co xuruxut tiquin' ca' nonon ma'. Nanaquin mixein mi' nonon pain winacocon, tomi' ximama' ac cocon na: Cain' cain' xima quem? Wum co to' pa horohot pin tain nain cote ne xiricon Iri' Jam pane ra? Ma' 3 pin iri tara xec ne, quep mami' pan ac tain tara ta ma pane ira nonon.

³⁰ Je xi to' witan qui' xijem quem? Quiji' ca' ximain panajum ma' quem na ca tomi' ximama' cocon ma'.

³¹ Tomi' xirac nonon, tatam' tatam' nonon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem. Win caca oro wari' ma'. Tomi' ximama' ca' nana: Quep xiho' paxi' nonon oro wari' pane. Ane om ha' con pain ca quep xiho' pan xucun ne.

³² Cristo na ron? Taramaxicon nucucun oro wari' nein Israel na ron? Je xi quiji' ca' cain pana quem? Querec iri xun pain ca quiji' ca' cain ne, howa pin ac xun tara ta na ca tomi' xirac nucucun. Tomi' xirac tomi' xirac nonon co tatatain wi wawa con quem.

Ca mi' pin nucun Jeju

³³ Tocon xina pin iri na ne, xim pin ac ne na. Iri' xim na, xim xim pi' pin na pain oro xijein macan'. Piquirim pin iri na xina ne, pain 3 hora ma', toha pin mami' ac ca na quem.

³⁴ Piquirim pin iri na xina ne, pain 3 hora ma', merem ac ca na Jeju. Merem mip na: Eloí, Eloí, lamá sabactâni na ca merem nucun. Pain ca merem ac i ma' ca ma', ca' na ca tomi' mao nein: Iri' Jam ne, Iri' Jam ne, para paca' mapa' ma' quem, ac i ma' na ca tomi' mao nein.

³⁵ Ma' nana wari' co coco' to nanain i ma', co taraju nanain ca merem nucun ma' quem. Tomi' ac caca na: Taraju jun. Merem non Elias cara pane nana pain ca taraju ec nucucun.

³⁶ Mi' ton pain caji comi uva ca tup ca' e' ac ca na win ma' caca ma', mo hwet ac cain na, xin cam ac cain na caji hoho hoho pain comi uva. Moin' pe ac ne na, an pe ac cain na pain tamain taparain pana. Ma' ta! Toc rain ta ac con na. To wet iri ca ma', querec xi' e' ac ca na. Am maqui' ca Elias con. Am hot ca' ton con pain panaxicon ca', ac i ma' na ca tomi' ximao nucun.

³⁷ Merem ac ca na Jeju, merem mip na. Mi' pin ac ca na.

³⁸ Wein mao ac ca na cote ca wom co wa pe nain cote ne xiricon Iri' Jam ma', co tao' caho' nain iri' ca pe ne panaxicon pain iri' paxicom cain. Wein ac nain ximijacon. Wein quiji' mao nain macan'.

³⁹ Taramaxicon nucucun oro soldado ma', co xat ja' pan non ma', taraju iri non Jeju pain ca merem ca ne. Querec iri non pain ca mi' pin ac i ma' ca ma' ne. Tomi' ac ca na: Wa inon co cwa' me. Iri' Panxica Iri' Jam ca ma' ira na ca tomi' ca ma'.

⁴⁰ Ma' nana oro narima' co noro pira nonon ma'. Mo nana: Maria Madalena ma', Salomé ma', Maria jicon Tiago con cwaji' ca José ma', ma' nana oro xequequem ma' quem.

⁴¹ Wara ja' ja' nonon Jeju pane, pain ca pe qui' cain Galileia pane. Ja' ja' nonon, quep xiho' nonon quem. Mija nana oro xequequem co ja' ja' nonon pain ca maqui' cain Jerusalém ma' quem.

Ca an corom pe xine curucun Jeju pain manain pacun

⁴² Irawin pa' ac cocon na. Xec sábado ta' na cocon, xec xao to wa xin ximixi' nana. Je ca wara an to xo' xin oro carawa nein sábado pain xec ca' caca ma', je curucucun pane.

⁴³ Je ca tomi' ton con Pilatos José ma'. Wari' nein Arimateia na José ma'. Win ma' ne nonon oro taramaxicon nucucun oro judeu co Sinédrio nana ma'. Hwara' opa na cocon oro win ma' ca pain ca Sinédrio caca. Wara taramaxicon pe ho' hap xirapari' Iri' Jam na na quem. Mo hwet ac con na Pilatos, om ca jin' con, mo hwet non. Mi' ne pain curucun Jeju ta ac con na.

⁴⁴ He, mi' pin iri na ron ac ca na Pilatos ma'. Mo tomi' qui' ron taramaxicon nucucun oro soldado ma' ac con na wari' nucun ma', maqui' ac ca na. Mi' pin iri na ron Jeju ma' na ca tomi' querec con ma'.

⁴⁵ Mi' pin na ta ac con na. Ma, an mao rain curucun ta ac con na José quem.

⁴⁶ An ac con na cote ca wom co awi José ma'. An quiji' ca' ac cain na curucun Jeju pain panaxicon, wiric pa' pin ac cain na con cote ca wom. Wara ca' na man ca wara xe' wa pain pacun ma', an corom pe ac cain na. Joc in ac cain na cote ne pacun pain manain ma', tao' pa' pin ac cain na.

⁴⁷ Maria Madalena cam Maria jicon José ma', querec nanain manain pacun ca an corom pe pe xine curucun Jeju ma' quem.