Marcos 10 - Tradução Bíblica Pacaas Novos

Ca tomi' xo' tococwa pain ca an pe tacama narima'

¹ Maji ta ac ca na Jeju, mama' ac cacain na oro xijein cidade ca to nain Judeia ma', pain xijein cacarain Jordão ma'. Maqui' mami' nana oro wari' ma', hwet ac cocon na, ca' na ac tococwa na pain capijacon Iri' Jam quem. Je curucun pane.

² Ma' ac caca na oro fariseu co xuruxut hwet nonon quem. Tomi' querec xun ta nana. Am tomi' xo' ca, am om tomi' xo' ca quem nonon. Je ca tomi' querec cocon ma': Hohot na pain ca an pe wa narima' ra? Om ca narain ho' capari' pain Iri' Jam ra? Ac i ma' na ca tomi' querec cocon Jeju.

³ Cain' ca tomi' ha' je cuhu' Moisés cara pane quem ac tococwa na.

⁴ Hohot na ta napari' pane ac cocon na. Ca' na ca tomi' ha' je capari' pane: Wari' co an pe pin tam nam manacon ma', xirao' mi' ac cam tara pain documento. An pe pin inem ta tara ca xirao' nucun pain documento. Mao ra ta ac cam tara quem, ac i ma' na ca tomi' capari' Moisés pane ta nonon.

⁵ Ac i ma' paxi' na ca xirao' mi' cuhu' pane ac tococwa na. Xi opain ara ne xumuhu' ta nuhu'.

⁶ Ane om ac i ma' ne pain cara pane ne, pain ca xo' quep qui' con wari' Iri' Jam pane. Ca' na ca xirao' pe xine con: Quep iri non wari' Iri' Jam pain cara pane ne, quep ac con na tarama', quep ac cam na narima' quem.

⁷ Je ca xirao' pe xine i ca' quem: Tarama' ma', pe ho' pe ho' om pin toron cote ca cam jicon. Pe ho' pin ac cam tara manacon.

⁸ Ac ca xica' pe pin ne tara cwerequequem ta na ca xirao' pe xine pane. Je ca tomi' xuhu' ca' ac tococwa na. An pin iri nam narima' tarama' ma' ne, xica' pe pin ac ne na cwerequequem. Om ca tocwan mami' ne cwerequequem.

⁹ Je ca om na camain' ne pain ca to ni ca' xequequem tarama' cam manacon ta. Xi wirico ara ca Iri' Jam co mi' nanam pain ca an xequequem ta na ca tomi' tococwa oro fariseu ma'.

¹⁰ In mama' iri nanain xirim ne, tomi' querec mami' ac cocon na co taxipa' ca ma'. Cain' cain' xira con wari' co an pe pin nam manacon quem nonon.

¹¹ Om na, wari' co an pe pin nam manacon ma', mo ta an pin cam xequem narima' ma', caracat ac ca na pain ca ara cup pin cam wara manacon.

¹² Narima' co an pe pin non tarama' nequem ma' quem, mo ta an pin con xucun tarama' ma', caracat ac cama tara quem na ca tomi' xo' tococwa ma'.

Ca na e' ne pain ca an xiho' xuxun oro hwijima' pain ca om xec xec querec nucucun

¹³ Ma' ac cacama na co o qui' nanam humaxicacam. O mi' nanam con Jeju. Ma' ta quep mamam pain winacacam pain ca tomi' mi' mamam con Iri' Jam ta nonon. Ane tomi' in pin cacam co taxipa' ca ne. Ta cut mi' hun cacam humajuhu' me ta nanam.

¹⁴ Querec iri nonon co taxipa' ca Jeju ne, pain ca tomi' in pin cacam ma', om ca hohot con. Mana' ac tococwa na. Ta narain ho' hwehwem pain ca hwet cacapa' hwijima' cwa' me ta. Ta tomi' in pin hwehwem me ta. Oro wari' co an xiho' nanam pain ca om xec xec nequequem ma', pain ca howa cacapa' ma', wiricoco tatara co taramaxicon pe ho' ca Iri' Jam ta.

¹⁵ Je ca tomi' xuhu' ca', tomi' iri'o' inuhu': Mo ta om an xiho' hwehwem hwijima' pain ca tomi' querec te cocon Iri' Jam pain ca taramaxicon pe ho' xuhu' ta cocon ma', om ta hwet camain' hun pain ca taramaxicon pe ca pain pawin cain ta na ca tomi' tococwa ma'.

¹⁶ Pe horoman tapan' ac tacacama na hwijima', quep ac tacacama na pain winacacam. Param inon Iri' Jam pain ca ara mi' cuhu' pain oro ca awi wa ta hwijima' na ca tomi' tacacama ma'.

Ca to' i'ina capari' oro caramajixi' pain ca xin ne xun Iri' Jam pain ca taramaxicon pe ho' xim capari'

¹⁷ Mama' xi' urut ta iri na Jeju ne, xuruxut xuruxut, mo qui' ac ca na wari' ma'. Pe torotop mi' non, tomi' querec ac con na: Taramaxicon co awi, co ca' na taxipa' capijacon Iri' Jam ac con na. Cain' cain' xita' quem? Param inain ca e' cara pe ho' ton Iri' Jam ta non.

¹⁸ Para awi ma mapa' quem ac con na. Om na wari' co awi. Xica' pe na Iri' Jam co awi.

¹⁹ Taxi' ara xi' main oro capijacon Iri' Jam ca tomi' ha' je capari' pane. Ca' na con: Ta to' pa' mon wari' me ta. Ta quep mam manacon win ma' ma me ta. Ta an noc xa ma me ta. Ta tomi' mixein mi' mon pain ca em' wa win ma' ma me ta. Ta mixein mon win ma' ma me ta. Tomi' ha' ron cote ma cam jim ta, ac i ma' na ca tomi' ha' je capari' ta na ca tomi' xo' con ma'.

²⁰ Om na, tama' tomi' ha' tomi' ha' pi' pin inain i ma' ta Taramaxicon co ca' na taxipa' capijacon Iri' Jam. Tomi' ha' qui' inain pain ca pije' ne pane ac con na.

²¹ Noro ac con na Jeju. Xiram pa' non. Ma' xica' pe na carawa ca om ara querec ma ma' ac con na. Mo vender vender pi' pin rain oro caramajum. Cut iri rain dinheiro nein ne, cut mi' ac momon pain tara co om nonon carawa. Caramaju pe ac main tara pawin cain. Cut mi' pi' pin iri roron pain dinheiro nem ne, in hwet ac mapa' tara, ja' ja' ac mapa' tara ta non.

²² Hehe ac ca na. Om ca taraju hohot con ca tomi' nucun Jeju. In ca' ac con na, tomi' xaxa' mao ac ca na, xi caramaju tamana ara ca ta.

²³ Noro in noro in ac ca na Jeju. Tomi' ac tococwa na co taxipa' ca ma': Oro wari' co caramaju nana ma', i'ina tamana nonon pain ca xin ne cocon Iri' Jam pain ca taramaxicon pe ho' toton cocon ta na ca tomi' tococwa ma'.

²⁴ Cain' cain' xira con ne nana co taxipa' ca ma'. Wa wa nanain ca tomi' nucun. Tomi' mami' ac tococwa na: Oro wari' co howa nanain caramaxicocon ma', i'ina tamana nonon pain ca xin ne cocon Iri' Jam pain ca taramaxicon pe ho' toton cocon ta hwijima' ac tococwa na.

²⁵ Win ne camelo ma'. Cote ne carawa na camelo. Ha' xirain pain ca corom nein wijimain manain ca mam' oc tocwa wom ra? Om xi ha' nein. I'ina xirain, om xi corom ac nein. Ac i ma' na con wari' co caramaju ma' quem. I'ina tamana non pain ca xin ne con Iri' Jam pain ca taramaxicon pe ho' ton con ta na ca tomi' tococwa ma'.

²⁶ Cain' cain' xira con ne ac caca na co taxipa' ca ma'. Wa wa tamana nonon. Cain' xi witan ac wa quem xucucun.

²⁷ Noro ac tococwa na. Om na, wari' ma', om ca to' witan pan ac xucun. Iri' Jam ma' iri na ne, ha' non pain ca to' witan cocon oro wari'. Ha' ha' pi' pin non oro carawa ta na ca tomi' tococwa ma'.

²⁸ Tomi' ac con na Pedro. Win urut ca'. An to an to pi' pin urut pain oro caramajuxut ta. Ma' ta ja' ja' xim urut pum ta non.

²⁹ Om na, je ca tomi' xuhu' ca', tomi' iri'o' inuhu' ta ac tococwa na. Wari' co paca' nain xiricon cocon xurucun cam jicon con cote ca cocon mana panxica ma', je totacon ma' quem, wari' co ara ac i ma' ma', pain ca taramaja mi' xim capa' pain ca pijim' hwet toton cocon oro wari' pain ca to' witan ton toton ca',

³⁰ wara cut tamana tarain carawa ca awi pain xocori ca'. Mija tara carawa ca awi ca cut ta' ca ma', mija tiquin' ca' tarain carawa ca paca' ca. Moin' tamana tara con. Mija toron xirim cocon xurucun cacam waram jicon cocon mana panxica je totacon quem. Ma' paxi' tatara wari' co ja' tequi' quep em' nonon pain ca taramaja mi' capa' ma' quem. Je i ma' ira, aram aram mi' ac tocwa tara pain ca om pi' ra ha' ne ca e' wa quem.

³¹ Je ca tomi' xuhu' ca': Oro co hwara' opa nana pain xocori ca', ame hwe e'. Mija ac caca tara co hwara' opa hwara' opa om pin nana. Oro co om hwara' opa nana pain xocori ca' iri na ne, ame hwe e'. Hwara' opa pin ac caca tara quem na ca tomi' xo' tococwa co taxipa' ca ma'.

Ca tomi' pe mami' cain ca mi' pin ta' nucun, je pain ca e' mami' ta' nucun quem

³² Maji pain Jerusalém ta ac caca na, xuruxut mama' ac caca na. O na Jeju ma', ja' tequi' ac cocon na oro win ma' ca ma'. Wa wa nonon co taxipa' ca ma', xi mao tain Jerusalém ta ara ca ta. Oro wari' co ja' ja' nonon ma' iri na ne, jin' nana quem. Xuruxut xuruxut, tomi' mami' ac tococwa na co taxipa' ca ma', co ma' 12 nana ma'. Harahap je, xuruxut ni ca' xuxun oro wari' cwa' tata, tomi' hwet ac tococwa na pain carawa ca ara ton non ma'.

³³ Taraju wet xine e'. Mama' xin irin Jerusalém ta. Tan' mama' iri xi' ne, quep ac cacapa' tara co noc nanapa'. Wata' pain ca Iri' Wari' ta' ca', quep ac cacapa' tara, o mi' ac cacapa' tara cocon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma'. Em' ma, na e' na pain ca to' pa' pin xima ta ac cacapa' tara. O mi' ac cacapa' tara cocon co om judeu nana ma' quem.

³⁴ Tatam' ac cacapa' tara, tomi' xirac ac cacapa' tara, cupa' ac cacapa' tara, wap ac cacapa' tara, to' pa' pin ac cacapa' tara quem. Ma' 3 pin iri tara xec pain ca mi' pin ne ne, e' mami' ac ta' tara ta tata.

Ca tomi' xun Jeju ta ca Tiago con João

³⁵ Tomi' xun Jeju ta ac ca na Tiago con João ma', mana panxica Zebedeu ma'. Xuruxut hwet ac cocon na. Tomi' xim urut pum Taramaxicon co ca' na taxipa' capijacon Iri' Jam ac cocon na. Ma' na carawa ca param urut. Ara mi' xut pain urut pum na ca tomi' cocon ma'.

³⁶ Ma' carawa ca ara mi' xut pain mahu' ma' quem ac tococwa na.

³⁷ Om na, maqui' iri tara xec nein ca taramaxicon pin ta' ma ne, mi' ac maparut tara pain ca xao to ho' xut pum pain iri' cwerem je pain parajum ma' quem na ca tomi' cocon ma'.

³⁸ Xi taxi' hwein carawa ca wajim' mahu' ta ac tococwa na. Jain jain tamana ta' pain ca quep em' xim cacapa' oro wari' je pain ca to' pa' pin xim cacapa' quem. Ha' turuhu' pain ca jain jain xiho' ac i ma' mahu' quem na ca tomi' tococwa ma'.

³⁹ Ha' naparut ta nonon. Je i ma' ira, an xiho' xim mahu' pain ca jain jain ta' ne ca' ira. An xiho' xim mahu' pain ca quep em' xim cacapa' oro wari', je pain ca to' pa' pin xim cacapa' quem.

⁴⁰ An xiho' ac i ma' xim paxi' mahu', ane om wata' ne co tora' pan toton nonon oro wari' co xao to ho' xim nanapa' pain iri' cwere je paraju ne. Wara tora' an to xo' tata co xao to ho' nanapa' ta na ca tomi' tococwa ma'.

⁴¹ Oro xucucun co taxipa' ca ma', co ma' 10 nana ma', taraju iri nanain i ma' con Tiago con João ma' ne, mana' ac cocon na. Om ca taraju hohot cocon ca tomi' nucucun.

⁴² Harahap pi' pin je ta, tomi' xim inuhu' ta ac cocon na Jeju. Oro taramaxicon co querec pin' wawa pain ca taramaxicon to ho' cocon oro tatirim ma', tomi' ha' xut ximama' nonon oro wari' nucucun. Hwara' opa nana. Om ca xiram pa' camain' cocon pain ca taramaxicon hwara' opa to ho' cocon ma' quem. Wara taxi' hwein i ma'.

⁴³ Ane om na ne pain ca an xiho' huhun ne. Jimama' je. Mo ta param hwein ca taramaxicon wa ma', om ta xec xec hwe, taramaja mi' pan jujun oro win ma' hwe ma'.

⁴⁴ Mo ta param huhun oro win ma' nuhu' pain ca querec pin' cucuhu' pain ca hwara' opa nuhu' ma', na e' na pain ca taramaja mi' taramaja mi' pi' pin huhun. Win ca wari' co taramaja mi' e' non taramaxicon nucun ma', ac i ma' je pain ca taramaja mi' e' huhun oro win ma' hwe ta.

⁴⁵ Win ta' ca'. Wata' paxi' na co Iri' Wari' cwa'. Ane om maqui' ta' pain ca taramaja mi' xine xuhu' ne, om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' tococwa ma'.

Ca quep ma' pin cain tocon Bartimeu Jeju

⁴⁶ Hwet ac cain na Jericó Jeju cocon co taxipa' ca ma'. Tiquin' mama' xi' iri nana ne, ja' ja' ac cocon na oro wari'. Mija nana wari' ta. Om ca paric camain' caca. Xuruxut xuruxut. Ma' pain i ma', wara xao pe pe nain cacarain wana Bartimeu panxica Timeu ma'. Om na tocon. Mi' ne taxipa' nonon pain dinheiro oro wari'.

⁴⁷ Taraju ac tococwa na oro wari' ma'. Maqui' na Jeju ma', co wari' nein Nazaré ma' na ca merem nucucun. Merem pan ac ca na quem: Jeju, Winacon Davi. Xiram pa' ne ta Jeju na ca merem nucun.

⁴⁸ Mija nana co tomi' in pin nonon ma'. Merem maho' ra ta paxi' nonon, ane om ha' ca ne. Merem merem tiquin' na, merem mip na: Winacon Davi. Xiram pa' ne ta Winacon Davi na ca merem nucun.

⁴⁹ Xat ac ca na Jeju. Hap ra ta jun ta ac tococwa na. Tomi' ac cocon na: Hwara' opa ra e'. Tequi' pe ra ta. Hap ra nem Jeju ta nonon.

⁵⁰ Xin an pe ac con na to' om capin' nucun ma', tequi' pe hap ac ca na, xut hwet ac con na.

⁵¹ Ma' carawa ca ara mi' ne mapa' ma' quem ac con na Jeju. Om na, querec mami' xita' na ina ta Taramaxicon co ca' na taxipa' capijacon Iri' Jam ac con na.

⁵² Mao ra ta ac con na. Xio pin ma, xi om ne ca howa ara mapa' ta non. Querec mami' hap ac ca na, ja' ja' ac con na Jeju.