Lucas 9 - Tradução Bíblica Pacaas Novos

Ca tomi' xo' tococwa oro apóstolo pain ca taramaja xi' nucucun

¹ Tomi' cut in ac tococwa na co taxipa' ca ma', co ma' 12 nana ma'. Mi' inuhu' pain ca tomi' jein pin huhun oro caxicon jam, je pain ca quep xio pin huhun oro wari' co caxi nana ta ac tococwa na.

² Pijim' mi' jujun pain ca taramaxicon pe ho' toton cocon oro wari' Iri' Jam ta. Quep xio pin jujun co caxi nana quem ac tococwa na.

³ Tomi' xo' mam' ac tococwa na. Ta cut hwein oro caramajuhu' me. Pana ca mam' pan xu wa ma', je caji coco ca mam' cut wa carawa ma', je carawa ca cao' wa ma', je dinheiro ma', ta cut hwein me ta. Ta cut tocwan hun wom quem me.

⁴ Mo ta hwet hun wari' pain xiricon ma', mo ta pi'am to ho' xine pain xuru ca' cuhu' ma', to ho' ac hun tara. Om ta paca' hun, mon to wet mon to wet maqui' pa' ac cuhu' tara xec pain ca hwet xun huhun xucucun wari' pain xijein cidade.

⁵ Mo ta om tomi' querec te cucuhu' oro wari' pain ca hwet huhun pain cidade nucucun ma', wap camara' ac hwein tara ximirinain macaracocon pain caximahu' pain ca paca' xun huhun ma'. Ma' ta querec pin' xujuhu' pain ca pan teretem nuhu' pain ca noc hwein ca taraju wa ca pijim' nuxut ca' ac huhun tara. Ac i ma' na ca tomi' xo' tococwa pane.

⁶ Mama' ac caca na, hwet ac cocon na oro wari' co to nanain oro ca paric to ne xirim ma', pijim' mi' ac cocon na pain ca taramaxicon pe ho' xim capari' Iri' Jam, quep xio quep xio ac cocon na co caxi nana ma' quem.

⁷ Taramaxicon Herodes ma', taraju ac cain na ca tomi' nucucun oro wari' pain ca tomi' hwet cacain oro ca ara ca Jeju. I'ina ac ne na ximicon. Cain' cain' xira con ne na, xi ma' ara caca wari' co tomi' ca' nana ma': Om na, wari' co taraju hwe ma', wirico João cara pane, e' mami' tara João cara pane ta nana.

⁸ Tomi' ca' nana oro xucucun ma' quem: Om na, wirico Elias cara pane, am wirico co in qui' nain macan' ca' nana. Oro xucucun ma' iri nana ne, om na, xucun profeta tara, wirico tara co e' mami' pain xocori ca' quem nana.

⁹ Ane cain' cain' xira quem ca Herodes ne. Ton tapit pin jein winacon João ta inonon oro wari' ne pane. Co cwa' quem, co taraju ta' pain ca ara cain oro ca om ara taxi' ne ca wari' wa ca', cain' ca wari' ca quem na ca tomi' querec pan xucun ma'. Querec xiton na ina ta na quem.

Ca tomi' hwara' pin cain capam' con hwam Jeju

¹⁰ In hwet iri nonon Jeju oro apóstolo ma' ne, tomi' hwet ac cocon na pain oro ca ara caca ma'. Harahap je ta ac tococwa na, mama' ac cacain na Betsaida ma', je i ma' wixinain cidade ca mama' caca ma'. Mama' xica' to nana, om na wari' co ja' ja' nonon.

¹¹ Ane taxi' pin cocon oro wari' ne. Maji cocon ta ac caca na, ja' ja' ac cocon na quem. Hwet iri nonon ne, tomi' querec te pan ac tococwa na. Tomi' hwet ac tococwa na con Iri' Jam pain ca taramaxicon pe ho' xim capari' ca'. Quep xio pin ac tococwa na co caxi nana ma' quem.

¹² Corom mao pin iri na xina ne, mo tomi' xun Jeju ta ac caca na co taxipa' ca ma', xuruxut hwet ac cocon na. Mama' je ximomon oro wari' cwa' ac cocon na. Ma' ta mama' cacain oro xitot, je pain oro ca paric to ne xirim ma'. Mam' ac cacain tara carawa ca cao' wa, mam' ac cacain tara ca pi'am to wa quem. Om ara xi' na wari' pain i ca', om nain i ca' xirim ca cut pe xine carawa ca cao' wa quem na ca tomi' cocon ma'.

¹³ Om na, mi' pan jujun pain carawa ca cao' wa ta ac tococwa na. Cain' cain' xuxut quem ac cocon na. Ma' 5 e' naparut wijimain capam' ca', ma' 2 e' naparut hwam cwa' quem. Mo cut mi' pan jujun pain carawa ca cao' wa oro wari' cwa' maparut ra? Ac i ma' na ca tomi' cocon ma'.

¹⁴ (Ac ca ma' 5.000 caca na ca tarama' nucucun co to nanain i ma'.) Om na, xao to ni xao to ni xam' je ta jujun oro wari' ta ac tococwa na. Ma' 50 ma' 50 xam' tatara pain ca xao to wi xujuhu' ta jujun quem tata.

¹⁵ Ara ac cacain na co taxipa' ca ma', xao to xao to pi' pin ac caca na oro wari'.

¹⁶ Cut ac cain na capam' ca ma' 5 ma', wirico hwam co ma' 2 ma' quem. Cut iri nain ne, noro pawin ac ca na, tomi' ac con na Iri' Jam. Tomi' querec te urut pum pain ca mi' maparut pain capam' con hwam cwa' quem Te non, jicaracat ac cain na, cut mi' ac tococwa pain na co taxipa' ca ma'. Maxiram' mi' jujun pain oro wari' ta ac tococwa na.

¹⁷ Cao' cao' xam' ac caca na. Ma'am ca' nanain, ma'am ma'am pi' pin nana. Pan cut xin pawirinain ta ac caca na co taxipa' ca ma', cut ho' cut ho' ac cacain na pain coco. Moin' 12 na cotain cocon.

Ca tomi' hwet pin cain iri' wixicon Jeju Pedro

¹⁸ Maqui' ac ne na xec nein ca tomi' con Cote ca Jeju ma'. Xica' pe na, ma' e' nana co taxipa' ca co to ho' nonon ma'. Om nonon xucun wari'. Tomi' querec ac tococwa na: Om ta cain' ca wari' ca ne cacapa' oro wari' ra? Cain' ca coromicat mi' cacapa' pain ca Iri' Wari' ta' ca' quem na ca tomi' tococwa ma'.

¹⁹ Om na, ma' nana co João co ja' taxipa' com cara pane xi' ma nenem ac cocon na. Ma' nana oro xucucun co profeta Elias cara pane xi' ma nenem. Oro xucucun ma' iri nana ne, om na, xucun profeta cara pane xi' ma nenem, wirico tara co e' mami' ta nenem ta na ca tomi' cocon ma'.

²⁰ Wahu' quem? Cain' ca coromicat mi' pan mahu' ma' quem ac tococwa na. Wum co Cristo ta ac con na Pedro.

²¹ Tomi' mip ac tococwa na: Ta tomi' hwet mahu' cocon oro wari' pain xocori ca' me, ta tomi' hwet huhun pain ca Cristo ta' ca' me tata.

²² Tomi' ac tococwa na: Na e' na pain ca jain jain tamana ta' ta' ca'. Wata' pain ca Iri' Wari' ta' ca', jain jain tamana ta'. Noc tatarapa' oro taramaxicon nexi' pain ca judeu iri' ca'. Noc tatarapa' oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem. To' pa' pin tatarapa' quem. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' tococwa ma'.

²³ Tomi' tomi' pi' pin ac tococwa na oro wari'. Wari' co ja' ja' xim napa' ma', miri'om ac cain tara ca param nucun. Miri'om tarain ca param nucun pain oro xijein xec. Om ta xiram pa' camain' cain curucun pain ca jin' cain ca mi' pin wa. Ac ca an tiquin' pan cain tara panaxicon ca mam' tatatain mi' xun tocwa ma'. Ja' ja' ac capa' tara ta.

²⁴ Xi e' cara pe tain cain pawin wari' co win xumu e' nain ca param pan nucun pain macan' ta. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', wirico tara co e' cara pe tain nain pawin ta.

²⁵ Je ca tomi' xuhu' ca' ac tococwa na. Mo ta ma' ma' xam' capari' oro carawa pain macan' ca', mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta.

²⁶ Mo ta ma' ca wari' co wixipa' napa' ma', pain ca noc capa' pain ca wari' ne ton ca', pain ca noc cain ca tomi' ne ca' quem, to' wixipa' ac capa' tara pain ca Iri' Wari' ta' ca'. To' wixipa' tarapa' pain ca mam' maqui' tain ca hwara' opa ne, je pain ca mam' maqui' tain ca hwara' opa nucun Te cocon oro jam co taramaja mi' nonon ta.

²⁷ Wahu' pain ca to ho' mahu' ca', ma' tatara co querec pin' xun nonon Iri' Jam pain ca taramaxicon pe ho' xim cuhu' ta. Om ta cono' querec caca, wara querec tatarain ca taramaxicon hwara' opa nucun, ame hwe e'. Tomi' iri'o' inuhu' ta na ca tomi' tococwa ma'.

Ca jimao pin ne tocon Jeju

²⁸ Om ca pain homa ne, ac ca ma' 8 pin ne na xec pain ca wara tomi' xo' tococwa co taxipa' ca pain ca mi' pin ta' nucun ma', tomi' ton Iri' Jam ta ac ca na. Maji ta ac con na Pedro con João con Tiago ma', piri' mama' ac cacain na pacun.

²⁹ Tomi' ac con na Iri' Jam, tomi' tomi', jimao pin ac ne na tocon. Towo' tamana pin ac ca na womicon quem. Toc meremem na, an xiho' non comerem pain ca coc wein ca pain pawin ma'.

³⁰ Hwerehwet qui' ac caca na wari' ma', pijim' ac cocon na Jeju. Wirico Moisés con Elias cara pane.

³¹ Toc meremem nana quem. Tomi' tomi' nonon Jeju pain ca mi' pin ta' nucun, je pain ca hwet pin ta' ne ca param nucun Cote ca pain ca mi' pin pe tain cain Jerusalém ma'.

³² Pi'am mip na Pedro cocon win ma' ca ma'. Mamiram pin iri nana ne, querec ac cocon na Jeju ma', pain ca toc meremem ca ma'. Querec nonon caram ma' co coco' to ho' nonon ma' quem, Moisés con Elias ma'.

³³ In mama' xi' iri nana ne, tomi' ac con na Jeju Pedro. Awi na pain ca to xin i ca' quem Taramaxicon co ca' na taxipa' capijacon Iri' Jam. Quep 3 xut pain wijimain xirim. Mene rain wirain. Mene tarain wirain Moisés ma'. Mene tarain wirain Elias ma' quem na ca tomi' nucun. (Tomi' ximao na Pedro, xi coromicat xo' ca ta.)

³⁴ Tomi' tomi' wet na Pedro ma', hwet qui' ac ne na tajain nanawin, tatep pa' ac tococwa na quem. Tatep pa' iri tata ne, jin' pin ac caca na.

³⁵ Taraju ac cacain na ca tomi' wa ma', ca maqui' nain nanawin ma'. Mon cwa' Panxita' co tora' ta' cwa'. Taraju wet jun ta na ca tomi' nucun.

³⁶ Tomi' ac i ma' iri na Iri' Jam ne, ma' xica' pe pin ac ca na Jeju. Co taxipa' ca ma', pain ca querec cacain i ma' con Jeju con Moisés con Elias ma', om ca ji'am pin cacain. Tama' coromicat e' nanain. Om ca tomi' hwet cocon pain oro wari'.

Ca quep xio pin con pije' co pa' taxipa' tamanain

³⁷ Xec pin iri na ne, quiji' ca' ac cacain na pacun ma'. Mija nana oro wari' co xuruxut cam' nonon ma'. Om ca paric camain' caca.

³⁸ Merem mip ac ca na wari' co xat pe ho' nonon oro wari' ma'. Quep xiho' ne con panxita' cwa' Taramaxicon co ca' na taxipa' capijacon Iri' Jam ac ca na. Xica' pe napa' panxita' cwa', om napa' xucun.

³⁹ Corom pe ho' non caxicon jam. Quep mip ho' quep mip ho' non, ane ane u ac ca na, pa' ac con na tamanain, toroto ac ne na morocacon pain capijacon. Om ca an pe hap con. Quep xirac to' jam' pin iri non ne, aram aram an pe wijimain ac con na quem.

⁴⁰ Tomi' mo pin jun caxicon jam nucun paxi' inonon co taxipa' ma cwa'. Ane om ha' cocon ne na ca tomi' con ma'.

⁴¹ Wa inuhu' me ac ca na Jeju. Wahu' pain ca wari' nuhu' pain oro xec nexi' ca', om ca howa camain' mahu'. Caracat tamana hwe ta. Pain pin paxi' na ca pe ho' xuhu' ca'. Je xi howa mahu' quem? Cain' cain' xita' quem? Ha' tara pain ca winim' cara xuhu' pain ca howa xim mahu' ra? Je i ma' ira, an qui' ron panxima ta ac con na cote ca.

⁴² Pain ca hwet ton ca pije' ma', xin mi' non pain macan' caxicon jam nucun. Pa' ac con na tamanain. Ane tomi' in pin pan con caxicon jam Jeju ne. Hwet ca' ron ta non, quep xio pin ac con na pije' ma'. Mon cwa' panxima cwa' ta ac con na cote ca quem.

⁴³ Wa wa wa wa pi' pin ac caca na oro wari' pain ca querec pin' cacain ca hwara' opa tamana nucun Iri' Jam. Wa wa wa wa pi' pin nonon Jeju pain ca querec cacain oro ca ara ca ma' quem. Je ca tomi' ca' tococwa co taxipa' ca ma':

⁴⁴ Taraju wet xine pain ca tomi' xim xuhu' ca' tata. Iri' Wari' paxi' ina. Ane ma' ca wari' co tomi' mi' xim napa' cocon oro co noc nanapa' ne. O mi' ac cacapa' tara cocon oro co to' pa' pin xun nanapa' ma', ac i ma' paxi' na ca tomi' tococwa ma'.

⁴⁵ Ane om taraju pa' cacain ca tomi' nucun ne. Cain' cain' xira con ne? Para tomi' ac i ma' capari' pain ca mi' pin ta' nucun quem na ca tomi' xucucun. Joc xim ara xi' tata pain ca tomi' mao nein ca tomi' nucun ma'. Wirico Iri' Jam co joc xim pan nonon pain. Je ca om taraju pa' caca ma'. Hehe nana pain ca tomi' querec cocon pain ca tomi' nucun.

Wari' co hwara' opa tiquin' ca' nonon oro win ma' ca ma'

⁴⁶ Tomi' caracan ac xucucun na co taxipa' ca ma'. Wata' co hwara' opa tiquin' ca' nuhu' ta xucucun. Om na, wata' ta, hwara' opa tiquin' ca' inuhu' ta ac ca na xucun. Wata' pan ta ac ca na xucun ma' quem.

⁴⁷ Jeju ma', taxi' nain ca coromicat nucucun ma'. Je ca hap ra con pije' co pe nain i ma'. Hap ra non, an xat ac con na pain quiricon.

⁴⁸ Noro jun pije' cwa', co om hwara' opa cwa' ac tococwa na co taxipa' ca ma'. Wari' co tomi' querec te non pain ca om hwara' opa nucun ca', coromicat ca' iri na ne: Tomi' querec te inem, xi om ne ca howa ara ton Jeju ma', mo ta coromicat ac i ma' ca pain ca tomi' querec te inem con ma', ac ca tomi' querec te capa' na. Tomi' querec te iri napa' ne, tomi' querec te non co cwain co hwet roron oro wari' napa' ma' quem na ca tomi' tococwa ma'. Je ca tomi' xuhu' ca' ac tococwa na. Wari' co om xec xec ma' pahu', co om hwara' opa pan ina ta pahu', wirico tara co hwara' opa pan pahu' ta na ca tomi' tococwa ma'.

⁴⁹ Tomi' ac con na Jeju João: Taramaxicon co ca' na taxipa' capijacon Iri' Jam. Querec urut con wari' co tomi' jein pin nonon oro caxicon jam. Wirico Jeju co tomi' jein pin roron ta napa' cocon ta na. Tomi' in pin paxi' urut con, xi win ma' ne capari' ta na ca tomi' con ma'.

⁵⁰ Ta tomi' in pin hun me ta ac tococwa na. Xi quep xiho' ara capari' wari' co om ari napari' ta na ca tomi' tococwa ma'.

Ca noc urut pum ta cocon Jeju oro wari' nein Samaria

⁵¹ Wixicam pin iri na oro xec nein ca in mao tain cain pawin Jeju ne, tomi' pan ac ca na: Maji ta. Na e' na pain ca mao tain Jerusalém ta na, mama' ac caca na.

⁵² Ma' nana co taxipa' ca co wara mama' je ca quem. Tomi' xo' jujun pain ca maqui' ta' pa'ao' ta' ca' ac tococwa na. Mama' ac caca na, tan' mama' ac cacain na ca paric to ne xirim pain Samaria. Noro ac cacain na xirim ca pi'am to xi' caca, noro nanain carawa ca cao' xi' caca ma' quem.

⁵³ Ane noc cocon Jeju oro wari' co to nanain i ma' ne. Noc urut con Jeju pain ca pi'am pe ho' caparut ta nana. Xi querec pin' ara cocon pain ca mao tain cain Jerusalém ta.

⁵⁴ Taraju iri na Tiago con João ne pain ca noc urut con Jeju pain ca pi'am pe ho' caparut ca' caca ma', tomi' querec ac cocon na Jeju: To' camara' qui' jein pain pawin xe maparut ra? Ac i ma' tara ca to' parapa' pin jujun maparut ra nonon.

⁵⁵ Ane tucu in hwet pan cocon Jeju ne. Tomi' in pin ac cocon na. Je xi querec pin' hwein Tamataracon Iri' Jam ca xiram pa' jujun oro wari' ta nuhu' ma'? Xi maqui' ta' pain ca to' parapa' pin toton ta' oro wari' cwa' ta. Wata' pain ca Iri' Wari' ta' ca', maqui' ina, ma' ta to' witan toton oro wari' ta ina na ca tomi' tococwa pain ca tomi' in pin tococwa ma'.

⁵⁶ Xuruxut mama' ac cacain na xijein ca paric to ne xirim quem.

Oro wari' co ja' ja' xun paxi' nonon Jeju

⁵⁷ Xuruxut mama' ac caca na. Pain ca xuruxut xuruxut wet caca ma', tomi' pan ac con na Jeju wari' ma'. Ja' ja' cara xim pain oro ca mao ta' ma ma' na ca tomi' con ma'.

⁵⁸ Tomi' ac con na Jeju: Noro rain oro carawa pain mi ma'. Ma' ma' xam' nain ca pi'am to nein. Noro rain oro me ma' quem. Ma' ma' xam' nain xirinain quem. Wata' iri na ne, pain ca Iri' Wari' ta' ca', om napa' xirim ca pe xo' ta' ca' na ca tomi' con ma'.

⁵⁹ Ma' ac ca na xucun co ja' ja' ne pan ca Jeju. Ane hehe ca ne. Ame ma e' Taramaxicon ne. In hwet cain' ton te ta. Mi' pin iri tara ne, an corom pe pin iri tain curucun pain manain pacun ne, ja' ja' ac xim tara. Ma ma? Ac i ma' na ca tomi' con ma'.

⁶⁰ Om na ta ac con na Jeju. Oro win ma' ma co om howa nanapa' ma', co an xiho' nonon co cono' nana ma', wiricoco pan tatara co cut corom to pan nonon co cono' nana ta. Wum iri na ne, hwet roron oro wari' ta. Pijim' hwet roron pain ca taramaxicon pe ho' toton cocon Iri' Jam ta na ca tomi' con ma'.

⁶¹ Ma' ac ca na xucun co tomi' ca' non Jeju: Ja' ja' xim paxi' inem ta Taramaxicon ne. Ane na e' ne pain ca in hwet cain' ton te cam na' cacam xere ne. Mao ina, ja' ja' ton Jeju ta tatam pum. Ma ma? Ac i ma' na ca tomi' con ma'.

⁶² Om na ta ac con na Jeju. Noro ron wari' co tota ma' ac con na Jeju. Mo ta tota ta' ca, mo ta an pe an pe cain ca taramaja nucun pain ca noro in cain waracon quem, om ca taramaja xo' ac ca. Ac i ma' na con wari' co ja' ja' xim paxi' napa' ma', co in hwet nain waracon ma' quem. Om ca taramaja xo' ac ca pain ca pijim' hwet cocon pain capijacon Iri' Jam oro wari' pain ca taramaxicon pe ho' toton cocon ma' quem na ca tomi' con Jeju ma'.