Lucas 23 - Tradução Bíblica Pacaas Novos

¹ Maji ta ac caca na oro taramaxicon co cut in to xucucun pain i ma', an mao ac cocon na Jeju. O mi' nonon con taramaxicon Pilatos.

² Tomi' em' ac cocon na: Tomi' querec urut con wari' cwa'. Taxi' pin urut con pain ca ja' teretem cocon oro win ma' nuxut cwa' quem. Ta tomi' ha' hun taramaxicon nucucun oro romano me, ta pagar hun pain oro imposto me ta nonon. Wata' co Cristo ta, iri' taramaxicon ina ta nonon, ac i ma' na ca tomi' em' cocon ma'.

³ Tomi' querec ac con na Jeju Pilatos. Wum co iri' taramaxicon nucucun oro judeu cwa' ra non. Wata' cwa' ira. Win ne ca tomi' ma ma' ta ac ca na.

⁴ Om ca mam' tain ca pan tem wa con co cwa' ta ac tococwa na oro taramaxicon nucucun oro sacerdote cocon oro xucucun wari' ma' quem.

⁵ Om na ta ac caca na, tomi' mip nonon: Pijim' iri tata oro win ma' nuxut co to nanain Judeia cwa' ne, ta tomi' ha' mami' hun taramaxicon nucucun oro romano me ta tata, ja' teretem ja' teretem ac tococwa na. Pijim' pe cain' nain Galileia cain, mao ac ne ma' na con, aram aram pijim' pe ac cain i ca' na quem na ca tomi' cocon ma'.

⁶ Taraju iri nain i ma' Pilatos ne, pain ca pijim' pe cain' nain Galileia cain caca ma', tomi' querec ac tococwa na: Wari' nein Galileia na ron nonon.

⁷ E'e', wari' nein Galileia ta nonon. Na ra ac ca na Pilatos. Taramaxicon pe nain Galileia Herodes pane. Ane pe pan cain Jerusalém pain oro xec ca quep cocon Jeju ne. Taxi' pin iri non Jeju Pilatos ma' ne, pain ca maqui' cain Galileia ma', tomi' ac tococwa na caram ma' co tomi' em' nonon ma': An mi' jun con Herodes ta na ca tomi' tococwa ma'.

⁸ Querec iri non Jeju Herodes ne, tomi' querec te tamana ac ca na. Xi om ne ca wara pain ara ne pain ca querec xiton Jeju na ca ma'. Wara taraju tata oro wari' pain ca tomi' hwet cacain oro ca ara nucun pane. Je ca coromicat ca' ca ma': Am querec ton pain ca ara cain ca om ara taxi' ne ca wari' wa ta na.

⁹ Tomi' querec tamana paxi' non pain oro ca tomi' querec ximao wa ma', ane tacana pe pan ca Jeju ne. Om ca tomi' camain' ca.

¹⁰ Oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma', co coco' to nanain i ma', tomi' mana' nana pain ca tomi' em' cocon Jeju.

¹¹ Tatam' ac con na Jeju Herodes cocon oro soldado nucun ma'. Tatam' tatam' nonon, tomi' xirac nonon quem. Mixein mixein nonon pain ca pe cocon con cote ca wom co awi tamana ma', co ac womicon taramaxicon ma'. O mi' mami' jun con Pilatos cwain ta ac tococwa na.

¹² Wara noc caracan paxi' xucucun Herodes con Pilatos pain cara pane. Pain xec nein ca o mi' mami' jun con xucucun ma', je win tomi' querec te pin xucucun. Noc noc om pin xucucun.

¹³ Pilatos ma', tomi' cut in ac cocon na oro taramaxicon nucucun oro sacerdote cocon oro xucucun taramaxicon cocon oro wari' ma' quem,

¹⁴ tomi' ac cocon na: O mi' iri mahu' con wari' cwa' ne, tomi' em' ac hun na. Ja' teretem nonon oro wari' ta hun. Ta tomi' ha' hun taramaxicon nucucun oro romano nonon ta hun. Ta pagar hun pain oro imposto me nonon ta hun. Taraju paxi' mahu' pain ca tomi' querec ton pain ca ara nucun quem, ane om mam' camain' tain ca pan tem wa con ne. Je xi om tomi' em' hun quem?

¹⁵ Om ca mam' cain Herodes con quem, om ca mam' cain ca pan tem wa con. Xi o mi' mami' ara capa' con ta. Je ca tomi' xuhu' ca': Om ca pan tem ca, om ca na ne pain ca mi' pin ma' tara ne hun ta.

¹⁶ Je ca tomi' ca' ton toton oro soldado ne cwa': Wap jun pain caji macon ca ma' arain too pain tamain ta toton. Wap iri jun ne, pa hwet pin ac hun tara ta toton na ca tomi' tococwa ma'.

¹⁷ (Pilatos ma', pain oro xec nein ca tomi' querec te nucucun oro judeu pain Páscoa pane, pa hwet taxipa' non wari' co tao' pe wa. Na e' na pain ca pa hwet mi' tococwa con oro wari' pain xocori ca' quem.)

¹⁸ Pa hwet pin totoron ta iri tata oro soldado nucun ne, merem merem pi' pin ac caca na oro wari'. Om na ta! To' pa' pin totoron oro soldado nem ta. Pa hwet mi' pan xut con Barrabás ta na ca merem caca ma'.

¹⁹ (Barrabás ma', wara tao' pe ta pain xirinain ca tao' to tao' to to wa pane, xi om ne ca quep xiho' ara tococwa co noc nonon oro romano. To' pa' pin non wari' pain ca mana' mana' mixita qui' tococwa soldado nucucun oro romano pane.)

²⁰ Pa hwet ton paxi' non Jeju Pilatos ma'. Je ca tomi' mami' tococwa oro wari' ma'.

²¹ Ane merem merem tiquin' caca ne. Om na, na e' na pain ca tatatain mi' tocwa pain pana ta, na e' na pain ca tatatain mi' tocwa pain pana ta nana.

²² Tomi' mami' ac tococwa na, je win 3 pin ne ca tomi' tococwa ma'. Cain' cain' xira pahu'? Para em' na hun quem? Om ca mam' tain ca pan tem wa con. Om ca na ne pain ca mi' pin ma' tara ne hun ta. Wap jun e' toton oro soldado ne cwa', pa hwet pin ac ton tara ta tata.

²³ Ane tomi' mip cocon ne, merem mip merem mip nonon. Tatatain mi' totoron pain pana ta, mija na ca merem ac i ma' cocon ma'. Aram aram ha' ac tococwa na quem.

²⁴ Na ra, je i ma' pahu', win ne ca param hwe ma' ac tococwa na.

²⁵ Pa hwet pin ac con na co pa hwet mi' xut con caca ma', co wara tao' pe wa ma', pain ca quep xiho' cocon co noc nonon oro romano ma', je pain ca to' pa' pin con wari' pane quem. Pa hwet pin iri non co ma' ne, an mao jun Jeju ta ac tococwa na soldado nucun ma'. Ara mi' jun pain ca param nucucun oro wari' cwa' ac tococwa na.

Ca tatatain mi' cocon pain pana Jeju

²⁶ An mao ac cocon na Jeju oro soldado ma'. Pain ca xuruxut xuruxut wet nucucun ma', quep ac cocon na wari' ma'. Simão na wixicon. Wari' nein Cirene na Simão. Maqui' nain xitot. Quep iri nonon ne, an pe ac cacain na panaxicon Jeju pain waracon. An tiquin' rain ta, ja' ja' ron Jeju cwa' nonon.

²⁷ Mija nana wari' co ja' ja' nonon ma'. Ma' nana oro narima' co ja' ja' nonon quem, awaran tamana nana con Jeju.

²⁸ Tucu in hwet ac tacacama na: Wa inuhu' me oro narima' nein Jerusalém ac tacacama na. Ta awaran mahu' me. Awaran pan e' xujuhu', awaran pan e' jejem humajuhu' quem.

²⁹ Xi maqui' ta' ara ne xec nein ca jain jain tamana xi' caca oro wari'. Tomi' ac xujuhu' tara: Tomi' querec te pan nana oro narima' co om nam' nana ma', co om wijima camain' nana ma', co om nanam pije' co xoc catat ma' quem, ac i ma' tara ca tomi' xujuhu'.

³⁰ Merem ac caca tara oro wari': Camara' hwet ma' tarapari' oro pacun je oro ca tamaja pan ne macan' ne. Xin xam' corom ma' tarapari' ne tatara.

³¹ Oro wari' cwa', quep em' nanapa' pain ca awi ta' ca', pain ca an xiho' tain pana ca tum toto tenenein ma'. Om ta quep em' mip tococwa oro wari' co pan teretem nana ma' quem, co an xiho' nanain pana ca wara mi' pin ma' quem? Quep em' xun tata. Je ta awaran e' pan xujuhu' ta xuhu' ca' na ca tomi' tacacama oro narima' co awaran nonon ma'.

³² O mama' 2 nonon co pan teretem nana ma'. Tatatain mi' xuxun pain pana nana quem.

³³ Xuruxut xuruxut hwet iri nanain ca tamaja pan ne macan' ma' ne, ca Maxinain Tacawaji' caca oro romano ma', je ca tatatain pe cocon pain pana Jeju. Wirico Jeju, wiricoco co pan teretem nana ma' quem, je ca tatatain to cocon pain pana. Tatatain pe nonon pain iri' curucun Jeju xucun, tatatain pe ac cocon na pain paraxicon xucun ma' quem.

³⁴ Tomi' ac con na Cote ca Jeju: Xic am pin rain ca caracat nucucun caram cwa' quem Te. Xi ma' ne ximicocon ta. Hohot tara ma' nana pain ca tatatain mi' cacapa' pain pana ca' non. An an xam' xun womicon cwa' ta ac caca na oro soldado ma' quem. Ma' xi an non co cwa' ne, ma' xi an non co cwa' ne xucucun, ara ara ac cacain na ca ara taxipa' caca ma', taxi' ac xucucun na con wom co an xi' caca ma'.

³⁵ Noro nana oro wari' co coco' to nanain i ma' quem. Oro taramaxicon ma' quem, tatam' nonon Jeju, tomi' xirac ca' nonon: Quep xiho' nonon oro wari' pane. Mo xi Cristo ca, mo xi wara tora' iri'o' con Iri' Jam pane, je i ma' xira ca quep xiho' pan xucun quem na ca tomi' xirac cocon ma'.

³⁶ Wixicam nonon oro soldado ma' quem. Tatam' tatam' nonon, tomi' xirac ac cocon na quem. Mam' pe mi' nonon pain caji comi uva ca tup,

³⁷ tomi' ac cocon na: To' witan pan xijem. Win ne ca taramaxicon nucucun oro judeu ina ta ma ma' quem nonon.

³⁸ Ma' na pana ca tatatain mi' caca pain tamain panaxicon pain tamacon ma'. Xirao' pe ta i ca', pain: Wirico co cwa' co taramaxicon nucucun oro judeu ta na ca xirao' nein.

³⁹ Tomi' xirac non xucun co tatatain wi wa con Jeju ma' quem. Om ca Cristo ma ra? Je xi quep xiho' pan xijem quem? Je xi quep xiho' maparut ma' quem? Ac i ma' paxi' na ca tomi' xirac con ma'.

⁴⁰ Ane tomi' in pin pan con win ma' ca co win pan tem ca ma' ne: Para tomi' xirac mon quem? Om ca jin' mon Iri' Jam ra? Win ne ca tatatain wi xima con.

⁴¹ Hohot paxi' na pain ca tatatain mi' cacapari' pain pana ca', xi pan teretem tamana ara iri' ta. Ane om pan tem camain' ca co cwa' ne na ca tomi' con win ma' ca ma'.

⁴² Xiram pa' ne me Jeju ac ca na. Mam' pe wet ne pain ca aram aram taramaxicon pin ta' ma ma' non.

⁴³ Wara pe ho' ne pain pawin cain, pain xec ca', tomi' iri'o' inem ta ac con na Jeju.

Ca mi' pin nucun Jeju

^44-45 Wara tocon xina pin ta' na, xim pin ac ne na quem. Iri' xim na, xim xim pi' pin na pain oro xijein macan'. Piquirim pin iri na xina ne, pain 3 hora ma', toha pin mami' ac ca na. Wein mao ac ca na cote ca wom co wa pe nain cote ne xiricon Iri' Jam ma', co tao' caho' nain iri' ca pe ne panaxicon pain iri' paxicom cain. Wein ac nain ximijacon.

⁴⁶ Merem ac ca na Jeju, merem mip na: Mi' inem pain tamatara ca' Te. Querec wet rain ta non. Tomi' ac i ma' iri na ne, mi' pin ac ca na.

⁴⁷ Taramaxicon nucucun oro soldado ma', querec iri nain oro ca ara ne con Jeju ma' ne, tomi' ac ca na: Wa inon co cwa' me. Iri' wari' ca ma' ira na ca tomi' ca pain ca tomi' querec te con Iri' Jam.

⁴⁸ Oro wari' co cut in nana ma', pain ca querec xuxun pain ca tatatain mi' tococwa pain pana caca ma', querec iri nanain carawa ca ara non Jeju ne, wap wap ac cacain na quimacocon pain ca tomi' xaxa' tamana nucucun. In mama' ac caca na.

⁴⁹ Oro wari' co win ma' ne nonon Jeju ma' iri nana ne, oro narima' co wara ja' ja' qui' nonon pain Galileia ma' quem, coco' pira coco' pira pi' pin nana. Noro noro nanain oro carawa ca ara non ma'.

Ca an corom pe xine curucun Jeju pain manain pacun

^50-51 Ma' na wari' ma'. José na wixicon. Wari' nein Arimateia na José ma'. Pe nain Judeia Arimateia ma' quem. Awi na José. Iri' wari' na. Wara taramaxicon pe ho' hap xirapari' Iri' Jam na na. Win ma' ne paxi' nonon oro taramaxicon co cut in taxipa' xucucun ma', ane om xin ne cocon pain ca tomi' xo' xucucun pain ca to' pa' pin totoron Jeju ta caca ne.

⁵² Mo hwet ac con na Pilatos, mi' ne pain curucun Jeju ta ac con na. Ma, an mao rain ta ac con na.

⁵³ An quiji' ca' ac cain na curucun pain pana, wiric pa' pin ac cain na con cote ca wom co awi. Wara ca' na man ca wara xe' wa pain pacun ma', an corom pe ac cain na. Iri' xocori na manain pacun ma', om ca an corom pe querec tocwa pain wari' co mi' pin.

⁵⁴ Maqui' pin na xec nein ca ara xo' xine oro carawa nein ca tomi' querec te nucucun oro judeu ma'. Xo' um pin ta' na quem, wara sábado pin ta' na.

⁵⁵ Ja' ja' ac cocon na José oro narima' co wara ja' ja' qui' nonon Jeju pain Galileia pane. Querec nanain manain pacun ma'. Querec nonon José pain ca an corom pe cain curucun Jeju ma' quem.

⁵⁶ In mama' ac cacamain na xirim ca to pan cacama pain Jerusalém ma', ara xo' ac cacamain na oro waraqui pana ca hu xain tamana ma' quem. Tacana to ac cacama na pain sábado ma', pain ca xao to wa cacamain ximicacam ma'. Win ne ca tomi' capari' Iri' Jam pain ca xirao' nucun Moisés cara pane nana.