Lucas 22 - Tradução Bíblica Pacaas Novos

Ca tomi' xo' xucucun pain ca to' pa' pin xun cocon Jeju

¹ Wixicam pin ac ne na ca tomi' querec te xucucun oro judeu ma', pain ca cao' e' cacain capam' ca om joc wanan wa pain ca to' memerem nein ma'. Páscoa ta nanain oro ca tomi' querec te xucucun.

² Oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma', tomi' xo' ac xucucun na. Cain' cain' xuxun Jeju quem? Cain' xi to' pa' pin ac xun quem, ac i ma' paxi' xucucun. Ane jin' tococwa oro wari' ne.

Ca quep xiho' xuhu' pain ca quep xun hun Jeju ta cocon oro taramaxicon nucucun oro sacerdote Judas

³ Corom hwet ac con na Judas Caxicon Jam. Iscariotes na xijein wixicon Judas. To' 12 nonon co taxipa' ca Jeju ma'.

⁴ Hwet ac tococwa na oro taramaxicon nucucun oro sacerdote cocon oro taramaxicon nucucun oro guarda co querec wet nanain cote ne xiricon Iri' Jam, tomi' xo' ac tococwa na: Cain' cain' xita' con Jeju pahu' quem? Quep xiho' xuhu', tomi' mi' xuhu' con ta tata.

⁵ Tomi' querec te tamana ac caca na pain ca quep xiho' xuhu' con tococwa ma'. Mi' xut pum pain dinheiro con ta ac cocon na.

⁶ Awi na ta ac tococwa na, noro noro ac con na. Om iri totoron oro wari' ne, tomi' mi' ac toton con tara ta, ac i ma' na ca tomi' pan xucun.

Ca toc wi cacain comi memem con Jeju

⁷ Maqui' pin ac ne na xec nein ca cao' e' cacain capam' ca om joc wanan wa pain ca to' memerem nein ma', pain ca na e' ne pain ca to' pa' pin xin cacain wijimain carneiro ca to' mam' pe wet nonon pain ca witan ca' cacain Egito oro hwanana pane.

⁸ Tomi' xo' ac con na Pedro con João: Ara xo' jein carawa nein ca cao' querec te xi' iri' pain Páscoa ta tata.

⁹ Main ca ara to jein maparut pain quem ac cocon na.

¹⁰ Tomi' xo' ac tococwa na: Taraju wet je e'. Hwet iri jein cidade ne, mam' ac hun tara wari' co an nain caji tapaxi' pain com. Ja' ja' corom mao ac hun tara pain xirim.

¹¹ Tomi' ac hun tara waximain xirim ma': Tomi' nem Taramaxicon nuxut co ca' na taxipa' capijacon Iri' Jam ta: Main man ca cao' querec te to xin urut pain carawa nein Páscoa quem nem. Cao' querec te ta' cocon co taxipa' ta' cwa' nem ta ac hun tara.

¹² Main i ca', piri' mama' xi' ta ac cuhu' tara. Querec jein ta ac cuhu' tara pain cote ne manain xiricon ma', ca wara awori to ne oro coximinain ma'. Wara ara an to xo' jein pain i cain ta ac tococwa na.

¹³ Ma ac caca na, mama' ac cacain na cidade. Mam' ac cocon na wari' co tomi' ca Jeju, mam' nanain manain xirim ca tomi' ca quem. Ara an to xo' ac cacain na carawa ca cao' querec te xi' caca pain Páscoa quem.

¹⁴ Xo' um pin iri na ne, pain iri' hora nein ca an pe xo' caca ma', cao' xi' ta ac caca na Jeju cocon oro apóstolo nucun ma', xao to ho' ac xucucun na pain pana ca mam' cao' to caca ma'.

¹⁵ Tomi' ac tococwa na: Param tamana inain ca cao' to ho' xijexi' pain carawa nein Páscoa ca' inuhu' pane. Cao' wi xitoton na inuhu' pain ca om maqui' querec capa' ca jain jain wa pain ca quep em' xim cacapa' pain ca to' pa' pin xim cacapa' quem.

¹⁶ Xi cao' mami' tain ta' pain xocori ca', tomi' iri'o' inuhu'. Cao' mami' e' tain pain pawin cain, pain ca taramaxicon pe ho' pin toton cocon oro wari' Iri' Jam cwain, pain ca aram aram hwet pin ta' ne iri' ca tomi' mao nein ca wara tomi' pe nucun pane, pain ca to' witan pin toton cocon oro wari' co howa nanapa' ta ca pane, je i ma' tara ca win cao' mami' tain ta' pain pawin cain na ca tomi' tococwa ma'.

¹⁷ An iri nain ca mam' toc wa ca ji'ao pe xine comi memem ma' ne, tomi' ac con na Iri' Jam: Tomi' querec te urut pum pain ca mi' maparut pain comi memem ca' quem Te non, tomi' ac tococwa na: Ma' ta. Toc toc xam' jein ta tata.

¹⁸ Om ta toc mami' tain comi memem ta ac tococwa na. Tomi' iri'o' inuhu', om ta toc mami' tain comi memem. Om om, maqui' pa' ac capa' tara xec nein ca taramaxicon pe ho' toton cocon oro wari' Iri' Jam ta. Je tara ca win toc mami' tain ta' ta ac tococwa na.

¹⁹ An iri nain capam' ne, tomi' ac con na Iri' Jam: Tomi' querec te urut pum pain ca mi' maparut pain capam' ca' quem Te non, jicat caracan ac cain na, mi' ac tococwa pain na. Capam' ca', an xiho' nain cwere ta ac tococwa na. Om ca narain ho' xuhu' pain. Cao' jein, tama' ara cara jein, ma' ta mam' pe wet mahu' pain ca mi' pin caho' xim xuhu' ca' inuhu' ta ac tococwa na.

²⁰ Ac i ma' na pain comi memem quem. Cao' cao' pi' pin iri nana ne, an ac cain na ca mam' toc wa ca ji'ao pe xine comi memem, tomi' ac tococwa na: Comi memem ca ji'ao pe xine pain ca mam' toc wa ca', an xiho' nain cocu. Je ca to' querec pin' cuhu' pain xocori ca tomi' an pe xo' mi' cuhu' Iri' Jam cwa', pain ca to' witan xim cuhu' ca'. Ao mao iri tara cocu pain ca mi' pin caho' xim xuhu' ca' ne, je win ara pin tain cain ca tomi' pe nucun ta na ca tomi' tococwa ma'.

²¹ Taraju wet je e' ac tococwa na. Ma' na win ma' nexi' co quep xiho' toton nonon co quep xim nanapa' ta. Cao' pe ho' napari' ta na ca tomi' tococwa.

²² Mi' pin ta' paxi' ina pain ca Iri' Wari' ta' ca'. Win ne ca wara coromicat an pe xo' cain Iri' Jam pata'. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ne, co quep xim nanapa' ma'. Ximin tara ta na ca tomi' tococwa ma'.

²³ Cain' cain' xira con ne ac xucucun na. Ma' xira win ma' nexi' co quep xiho' toton nonon quem xucucun.

Wari' co hwara' opa tiquin' ca' nonon oro win ma' ca ma'

²⁴ Tomi' caracan ac xucucun na co taxipa' ca Jeju: Cain' ca coromicat mi' cacapari' oro wari' ma' quem? Wata' co hwara' opa tiquin' ca' pahu', coromicat mi' nanapa' pain ca hwara' opa tiquin' ca' xuhu' ra xucucun. Om na, wata' ta, coromicat mi' nanapa' pain ca hwara' opa tiquin' ca' xuhu' ta ac ca na xucun. Wata' pan ta ac ca na xucun ma' quem.

²⁵ Tomi' pan ac cocon na Jeju: Oro taramaxicon nucucun oro tatirim ma', tomi' ha' xut ximama' nonon oro wari' nucucun. Quep xiho' urut pahu' ta ximama' nonon pain ca taramaxicon to ho' cocon ma' quem.

²⁶ Ane om na ne pain ca an xiho' huhun ne. Jimama' je. Co hwara' opa ma', om ta xec xec ca. An xiho' toron co om hwara' opa camain' ma'. Co taramaxicon ta' ma' pahu', an xiho' toron co taramaja mi' e' non win ma' ca ma'.

²⁷ Je ca tomi' xuhu' ca' ac tococwa na. Ma' wari' co hwara' opa ma' quem? Hwara' opa na co xao pe pe nain pana ca mam' cao' pe wa ra? Hwara' opa na co mi' non pain carawa ca cao' wa ra? Om na, hwara' opa pan na co xao pe pe nain pana ca mam' cao' pe wa, wirico pan na co hwara' opa tiquin' pan. Ane om ac i ma' pan ta' ne. Hwara' opa tiquin' pan paxi' ina pahu', ane an xiho' ton wari' co taramaja mi' e' non xucun wari' ne. Win ca wari' co xat pe ho' non win ma' ca pain ca mi' con pain carawa ca cao' wa ta na ca tomi' tococwa ma'.

²⁸ Wahu' ma', pain ca tama' jao jao ma' mahu' pain oro ca to' i'ina napa' pane, om ca an pe camain' mahu'.

²⁹ Je ca mi' xim xuhu' pain ca taramaxicon wa. Win ne ca mi' capa' pain ca taramaxicon wa Te quem.

³⁰ Cao' querec te to ho' ac xijexi' tara pain ca taramaxicon pe ta' ta' cain. Xao to ac hwein tara ca mam' xao pe nucun taramaxicon, tomi' querec tomi' querec ac huhun tara pain oro ca ara nucucun waram winacocon mana panxica Israel cara pane, co ma' 12 nana cara pane na ca tomi' tococwa ma'.

³¹ Simão Simão, taraju wet ne e' ac ca na Jeju. Param nuhu' Caxicon Jam. To' i'ina xuhu', am ja' camara' xuhu' ta nuhu'. Tomi' non Te Iri' Jam quem, ta narain ho' mapa' cocon me ta non pahu'.

³² Ane tomi' mi' xim con Te quem ne Simão. Ma' ta om pan' ma con, ma' ta hwara' opa cara ma pain ca howa nem inon pum. Cwirin' pin iri rain ca caracat nem ne, to' hwara' opa ac momon tara pain ca howa nucucun xerem cwa' quem na ca tomi' con Simão Jeju ma'.

³³ Om na, om ta an pe camain' xim ta ac ca na Simão ma', co Pedro ma'. Mo ta quep wi xim cacapa' pum, mo ta to' pa' wi xim cacapa' pum quem, je i ma' tara, om ta an pe camain' xim ta non.

³⁴ Om na ta Pedro ac ca na Jeju. Taraju wet ne e': Tomi' toton momon oro wari' ta. Om ta aca querec ca me pain xec ca', wara tomi' ac momon tara: Om ca querec pin' ton ta ac momon tara pata', ma' 3 tara ca tomi' ac i ma' toton ma quem. Tomi' iri'o' inem ta Pedro na ca tomi' con ma'.

³⁵ Cain' cain' ne quem? Tomi' querec xuhu' ta ac tococwa na. Pijim' mama' jein pira iri inuhu' pane ne, tomi' ac xuhu' na: Ta cut hwein dinheiro me ta, ta cut hwein caji coco ca mam' cut wa carawa me ta, ta cut tocwan hwein caji caxim quem me ta, ac i ma' na ca tomi' xuhu' pane. Je ca tomi' querec xuhu' ca': Ma' na xec pain ca ximin hwe pane quem? Om ca tama' ma' cuhu' ca param hwe quem ra tata. Ma' naparut ta, om ca ximin camain' urut pane ac caca na.

³⁶ Ane tomi' ni xuhu' pain xocori ca' ne ac tococwa na. Mo ta ma' cuhu' dinheiro, cut ac hwein tara. Mo ta ma' cuhu' caji coco ca mam' cut wa carawa ma' quem, cut ac hwein tara. Mo ta om cuhu' cote ne quit, vender ac hun tara to' om capin' nuhu', mam' an ac hwein tara cote ne quit quem.

³⁷ Xi na ara ne pain ca hwet pin ne ca xirao' pe xine capijacon Iri' Jam ta. Ca' na ca xirao' pe nein: Ac ca caracat ca na cocon, xi to' pa' wi ara cocon cocon oro caracat ta na ca xirao' pe nein. Je ca tomi' xuhu' ca' ac tococwa na. Na e' na pain ca hwet pin ne ca xirao' pe nein pata'. Hwet pin ta' na ca xirao' pe nein pata' na ca tomi' tococwa ma'.

³⁸ Tomi' ac cocon na co taxipa' ca ma': Noro ra Taramaxicon nuxut. Ma' 2 naparut cote ne quit ca' nonon. Je i ma' ira, tomi' ximama' maho' je ta ac tococwa na.

Ca pe cain Getsêmani Jeju

³⁹ Paca' ac cain na Jerusalém Jeju, mao ac cain na Pacun Nein Oliveira. Je curucun pane. Ja' ja' nonon co taxipa' ca quem.

⁴⁰ Hwet pin iri nanain ne, tomi' ac tococwa na. Momon tomi' jun Iri' Jam, ma' ta om ja' camara' xihwe pain ca tomi' querec cuhu' Caxicon Jam ta tata.

⁴¹ Xut wijimain ca' ac tococwa na, pe torotop pe ac ca na, tomi' ac con na Cote ca:

⁴² Te ac con na. Mo ta nain ho' xim mapa' pain ca jain jain ta' ne ca', pain ca mi' pin ta' ne ca' quem Te. Tara pum, nain ho' ne pain me paxi' inem. Ane param e' tain ca param nem ne. Noc inain ca param ne ca' na ca tomi' con Cote ca.

⁴³ Hwet pa' ac con na jam co taramaja mi' non Cote ca. Maqui' nain pawin. To' hwara' opa ac con na quem.

⁴⁴ Jain jain tamana na pain ca toron ne ximicon. Wara tomi' tamana non Cote ca. Je win tomi' mip con quem. Nahwere' tamana na pain ca tomi' con ma'. Ac wic na ca nahwere' nucun, ao mao nain macan'.

⁴⁵ Pi' pin iri na ca tomi' con Cote ca ne, tequi' pe ac ca na, in hwet ac cocon na co taxipa' ca ma'. Wara pi'am nana, xi jam' ca' ara cacain ca tomi' xaxa' nucucun ta.

⁴⁶ Je xi om pi'am hwe quem ac tococwa na. Tequi' to je e'. Momon tomi' jun Iri' Jam, ma' ta om ja' camara' xihwe pain ca tomi' querec cuhu' Caxicon Jam ta tata.

Ca quep cocon Jeju

⁴⁷ Tomi' tomi' wet na Jeju, maqui' ac caca na oro wari'. Mija nana wari' co maqui' nana. Judas ma', co to' 12 nonon co taxipa' ca Jeju ma', wirico co o qui' nonon. Hwet pan ac con na Jeju Judas. Maqui' ina ta ac con na, xup ac con na.

⁴⁸ Cain' cain' xima quem Judas ac con na. Xup mapa' pain ca Iri' Wari' ta' ca' ra? Ac i ma' na ca tomi' mi' mapa' cocon co quep xim nanapa' cwa' ra na ca tomi' con ma'.

⁴⁹ Caram ma' co to to mam' nonon ma', querec pin' iri nonon oro wari' pain ca quep xun cocon ne, tomi' ac cocon na Jeju: Cain' cain' xut quem Taramaxicon nuxut? Mam' to' in pin xut cocon pain cote ne quit nuxut ca' quem na ca tomi' querec cocon ma'.

⁵⁰ Coc xicot ac cain na cote ne quit win ma' caca ma', wara ca' na co taramaja mi' e' non sacerdote co iri' taramaxicon ma', ton tapit pin ac cain na taraxicon ma', pain iri' curucun ma'.

⁵¹ Om na, maho' je ta ac ca na Jeju. Quep pan ac cain na taraxicon, to' xio pin ac con na quem.

⁵² Cain' cain' xihwe quem ac tococwa na co quep xun nonon ma', wiricoco oro taramaxicon nucucun oro sacerdote cocon oro taramaxicon nucucun oro guarda co querec wet nanain cote ne xiricon Iri' Jam ma', cocon oro xucucun taramaxicon nucucun oro judeu ma' quem. Tomi' ac tococwa na: Para cut hwein cote ne quit je pana mam' wap wa ma' quem? Ac ca an noc xa taxipa' ta' carawa na pahu' ra na ca tomi' tococwa ma'.

⁵³ Wara pe ho' paxi' inuhu' pain oro xijein xec pane, pain cote ne xiricon Iri' Jam pane. Je xi quep qui' mahu' pain i cain pane? Je i ma' pahu' ta ac tococwa na. Maqui' pin na iri' hora nuhu' ma', pain ca ara xim mahu' pain ca param nuhu' ma'. Maqui' pin na iri' hora nucun Caxicon Jam co taramaxicon pe ho' nonon oro caracat ta na ca tomi' tococwa ma'.

Ca tomi' ximao ca Pedro pain ca om ca querec pin' ton Jeju ta ca

⁵⁴ Quep ac cocon na Jeju, an mao ac cocon na pain xiricon sacerdote co iri' taramaxicon. Pedro ma' iri na ne, ja' tequi' pira ca' nonon quem.

⁵⁵ Hwet pin iri nanain xiricon taramaxicon ne, caraho' ac cacain na xe pain ca tao' caho' nein ma'. Xao to xao to mam' ac cacain na. Xao pe ho' nonon Pedro ma' quem.

⁵⁶ Querec ac con na Pedro xojam' co taramaja pe nain i ma'. Querec non pain ca xao pe ho' cain xe. Noro tamana non. Pe ho' non Jeju co cwa' ta ac cama na.

⁵⁷ Om na ta narima'! Om ca querec pin' ton ta ac ca na.

⁵⁸ Om om, querec ac con na xucun ma'. Wari' nucun Jeju na co ma' ta ac con na. Om na ta! Om ca wari' ne ton ta ac ca na Pedro.

⁵⁹ Om ca pain homa ne, ac ca xica' pe ne na hora nein con, tomi' ac ca na xucun ma' quem. Pe ho' con Jeju co cwa' ira, xi wari' nein Galileia ara ca ta, ac i ma' na ca tomi' ca ma'.

⁶⁰ Om na ta, om ca taxi' tain ca tomi' nem ta ac ca na Pedro. Tomi' tomi' wet na, aca ac ca na me quem.

⁶¹ Tucu in hwet pan ac con na Taramaxicon nexi' ma'. Noro ac con na. Querec iri non Jeju Pedro ne, mam' pe wet ac cain na ca tomi' nucun pane: Om ta aca querec ca me pain xim ca', tomi' ac momon tara: Om ca querec pin' ton ta ac momon tara pata', 3 tara ca tomi' ac i ma' momon ma' quem non pane.

⁶² Hwet mao iri na ne, aca tamana ac ca na.

Ca o mi' cocon con oro taramaxicon co hwara' opa tamana nana

⁶³ Oro guarda co querec wet xo' nonon Jeju ma', tatam' tatam' ac cocon na, tomi' xirac nonon, wap wap ac cocon na quem.

⁶⁴ Tatep pa' nanain tocon, tomi' querec ac cocon na: Ma' co wap nem cwa' quem? Tomi' hwet rain wixicon co wap nem cwa' ta ac cocon na.

⁶⁵ Mija na ca tomi' xirac cocon quem.

⁶⁶ Xec pin iri na ne, cut in ac xucucun na oro taramaxicon ma', pain ca Sinédrio caca ma'. Ma' nana oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem, cut in ac xucucun na. O mi' ac cocon na con Jeju.

⁶⁷ Tomi' ac cocon na: Wum co Cristo cwa' ra? Tomi' xo' xut e' nonon. Mo xi Cristo ina ta xuhu', om xi howa mahu' ta ac tococwa na.

⁶⁸ Mo xi tomi' querec pan xuhu' quem, mo xi cain' ca coromicat mi' mahu' quem xuhu', hehe ac ximahu' xira quem.

⁶⁹ Je i ma' ira ac tococwa na. Ane tomi' ca' xim xuhu' ne: Wata' pain ca Iri' Wari' ta' ca', wara xao pe ho' pin ton pain iri' curucun Iri' Jam co hwara' opa pan ta na ca tomi' tococwa ma'.

⁷⁰ Je ca tomi' urut pum ca' ac cocon na, tomi' tomi' pi' pin nonon: Wum co Panxica Iri' Jam ra nonon. Wata' cwa' ira. Win ne ca tomi' pan hwe ma' ac ca na Jeju.

⁷¹ Je xi om tomi' hwet jein ca em' nucun co cwa' mami' xuxun oro wari' cwa' quem ac caca na. Taraju pin iri urun pain ca tomi' ximao nucun ma', pain ca wata' cwa' ira pan ca ma' na ca tomi' caca ma'.