Lucas 21 - Tradução Bíblica Pacaas Novos

Narima' co mi' ca' nam taxicam ma', co mi' non pain wijimain dinheiro nequem Iri' Jam pane

¹ Noro xaxa' ac ca na Jeju ma', querec ac tococwa na co caramaju nana ma', pain ca cut ho' cacain dinheiro nucucun pain pana ca cut ho' to xine dinheiro ca mi' xin cacain cote ne xiricon Iri' Jam oro wari' ma'.

² Querec ac cam na narima' co mi' ca' nam taxicam ma' quem. Ximin na, om nam carawa. Cut ho' 2 ac camain na wijimain moeda pain panaji dinheiro ma'.

³ Tomi' ac ca na Jeju: Noro jem narima' ma', co mi' ca' nam taxicam ma'. Wijimain paxi' na dinheiro ca cut ho' cama ma', ane querec hwara' con Iri' Jam ne. Ac ca hwara' tiquin' ca' nein na oro cote ne dinheiro ca cut ho' caca oro xucucun wari' ma'. Tomi' iri'o' inuhu' ta.

⁴ Oro xucucun wari' ma', mi' hwara' paxi' nanain dinheiro nucucun, ane pe ho' cara cocon oro wirain ne. Narima' co mi' ca' nam taxicam ma' iri na ne, om paxi' nam carawa, ane mi' mi' pi' pin camain wijimain dinheiro ca pe ho' nam ne. Om pin nam dinheiro ca mam' cut cama carawa ca cao' cama na ca tomi' tococwa ma'.

Oro ca hwet pa' ton nonon oro wari' pain ca aram aram in qui' ta' ca Jeju

⁵ Ma' ac caca na co taxipa' ca ma', co in ac nanain cote ne xiricon Iri' Jam ma'. Awi tamana na xin ne nana. Mam' quep awi nanain pain iri' cote ne pacun ca'. Oro too nein ca mi' cocon Iri' Jam ma' quem, awi tamana na ta paxi' nanain. Ane tomi' ca' pan cocon Jeju ne:

⁶ Oro ca querec hwe ca', ame hwe e', main maqui' tara oro xec pain ca to' pa horohot pi' pin xin xine oro xirim ca'. Om ta to wet xica' pe camain' ne oro pacun nein. To' pa horohot pi' pin ac xine tara ta na ca tomi' tococwa ma'.

⁷ Taramaxicon co ca' na taxipa' capijacon Iri' Jam ac cocon na: Ma' xec ca hwet pin ta' ne oro ca tomi' ma ca' ne? Cain' xi querec pin' ac urut pain ca wixicam pin ne xec pain ca hwet pin ta' ne ca tomi' nem ma' quem na ca tomi' querec cocon ma'.

⁸ Om na, ma' tara xumuhu' me ac tococwa na. Ta howa huhun oro wari' co mixein xim nunuhu' pain oro carawa ca maqui' ta' ma' me. Xi mija xi' ara caca oro wari' co wata' ta nana pain ca an hwet cacain wuxu ca'. Tomi' ca' tatara oro xucucun quem: Wixicam pin na oro xec pain ca pi' pin ta' ne macan' ta tatara. Ta howa huhun me ta ac tococwa na.

⁹ Ta jin' hwe pain ca aram aram taraju huhun oro wari' pain ca to' parapa' caracan xucucun me, je pain ca mana' caracan xucucun ma' quem. Na e' na pain ca mana' ac i ma' cain' caca oro wari', je curucucun mao tara. Ane om pi' pin hap ta' ne macan' ne, ame hwe e'.

¹⁰ Tomi' ac tococwa na: To' parapa' caracan ac xucucun tara oro wari', oro taramaxicon nucucun ma' quem, mana' caracan ac xucucun tara.

¹¹ Jain jain tamana tatara oro wari' pain oro xijein macan'. Cocoroc tamana tara macan', om pin tara carawa ca cao' wa, mija tara ca caxi tamana wa quem. Hwerehwet qui' tara pain nanawin ca om awi camain' ca to' querec pin' ton nonon oro wari' pain ca maqui' ta' ne ca om awi camain' ne. To' jin' tamana totoron.

¹² Ac i ma' paxi' tara ca hwet pa' tococwa pain oro ca om awi wa oro wari' ma', ane om hwet pa' hap xun tococwa pain ne. Pain ca om hwet pa' querec tococwa pain, quep cain' ac cucuhu' tara, quep em' ac cucuhu' tara quem. Cut mama' ac cucuhu' tara pain oro xirim ca cut in to xucucun ma', tao' to ac cucuhu' tara pain xirinain ca tao' to tao' to to wa ma' quem. Cut mi' ac cucuhu' tara cocon oro xucucun taramaxicon, tomi' querec ac cucuhu' tara pain oro ca ara hwe quem. Ara ac i ma' tuturuhu', xi om ne ca howa ara mahu' ta.

¹³ Je i ma' ira, na e' na pain ca tomi' hwet huhun pain capija ta.

¹⁴ Je ca tomi' xuhu' ca' ac tococwa na. Hwara' opa je pain iri' xumuhu' ma', wara an to xo' jein ca coromicat nuhu'. Ta toron ne xumuhu' me. Ta cain' xi tomi' narain ho' xijexi' ne hwe me.

¹⁵ Xi wata' pan ara ne co tomi' xim nuhu' pain ca tomi' xo' wa pain ca tomi' querec xim cucuhu' co noc nunuhu' ta. Om ta tomi' in pin ac cucuhu'. Hehe e' tatara pahu'.

¹⁶ Ma' tatara wari' co quep xiho' toton nonon oro taramaxicon pain ca quep xun cucuhu' ma'. Mana cote hwe cocon xuruhu' cocon oro ca nari nuhu' cocon oro win ma' nuhu' tatara quem, cut mi' tuturuhu' cocon oro taramaxicon. Ma' tatara oro win ma' nuhu' co to' parapa' xi' wawa quem.

¹⁷ Noc noc pi' pin tuturuhu', xi om ne ca howa ara mahu' ta.

¹⁸ Ac i ma' paxi' tuturuhu', ane om pan' ara'am camain' xi' hwe ne.

¹⁹ Mo ta howa cara mahu', to' witan ac xihwe tara ta na ca tomi' tococwa ma'.

²⁰ Querec iri jujun oro tatirim pain ca coco' coco' mam' pin cacain Jerusalém ne, taxi' pin ac hwe tara pain ca wixicam pin ne xec pain ca to' pa horohot to' pa horohot pi' pin xin xine oro xirinain ac tococwa na.

²¹ Oro wari' co to nanain oro cidade pain Judeia ma', jein mama' ac cacain tara oro pacun. Co to nanain Jerusalém ma', paca' tatarain ta. Co hwet to ca' nanain pain ca to cacain xitot ma' quem, om ta corom mami' cacain quem.

²² Xi wap xun ara tococwa oro wari' nein Jerusalém ta. Je i ma' tara oro xec nein ta. Win ne ca xirao' to xine pain capijacon Iri' Jam pane, hwet pin ho' tara con ta.

²³ Oro narima' co nam' nana pain oro xec pain ca jein mama' xi' cacama ma', wiricacam co ma' nanam wixicacam hwijima' ma' quem, jajain tamana tatara. I'ina tamana tataram pain ca jein mama' wa. Jajain jajain pi' pin tatara oro wari' co to nanain oro xijein cidade pain Judeia ma', pain ca wap toton cocon Iri' Jam.

²⁴ Ma' tatara co to' parapa' pin xun wawa pain cote ne quit, ma' tatara oro xucucun co quep xun wawa, cut mama' ac tococwa tara pain oro xijein macan' ma' quem. To' quiji' pin ac tococwa tara oro wari' nein Jerusalém. Oro tatirim co om judeu nana ma', wiricoco pan tatara co to' quiji' pin nonon. To' quiji' to' quiji' maqui' pa' ac cocon tara xec ca wara coromicat an pe xo' mi' cocon pain Iri' Jam pane.

²⁵ Hwerehwet qui' tara oro carawa ca to' querec pin' ton nonon oro wari' pain ca maqui' ta' ne ca om awi camain' wa ta ac tococwa na. Hwerehwet qui' tara con xina con panawo' con oro pijo' ma'. Oro wari' pain oro xijein macan' ma' quem, jain jain tamana tatara pain ca ximin nucucun. I'ina tamana tara ximicocon pain ca jein mama' xi' caca pain ca iriman mip ne hotowa pain cote ne com pain ca mana' nein ma', je pain ca wap tamana nein ma' quem.

²⁶ Jin' tamana tatara oro wari', cocoroc cocoroc, ac ca cono' caca tara pain ca jin' nucucun. Mija tara ca toron ne ximicocon pain oro carawa ca om awi ca maqui' ta' ma' quem. Cocoroc cocoroc pi' pin tara oro coximinain pawin quem.

²⁷ Querec ac cacapa' tara oro wari' pain ca maqui' tain pawin. Wata' pain ca Iri' Wari' ta' ca', maqui' ta' pain tajain nanawin. Mam' maqui' tain ca hwara' opa ne pain ca toc meremem tamana ne.

²⁸ Je ca tomi' xuhu' ca' ac tococwa na. Hwet pin ta' iri tara oro i cara ca tomi' ta' ne, om ta na ne pain ca jin' hwe. Hwara' opa je. Tomi' querec te je quem. Xi om ne ca wixicam pin ta' ara ne xec pain ca to' witan pin xim xihwe ta na ca tomi' tococwa ma'.

²⁹ Pijim' joc mam' mi' ac tococwa na pain panaji figo: Noro jein panaji figo ma', noro jein oro xijein pana ma' quem ac tococwa na.

³⁰ Hwerehwet pin iri na xocori tarajain tenenein ne, taxi' pin ac hwein na ca wixicam pin ne oro xec pain ca xain toto ca xina.

³¹ Ac i ma' tara pain ca in qui' ta' ne quem. Querec iri jein ca hwet pin ne oro ca tomi' hwet xuhu' ca' ne, taxi' ac hwein tara ca wixicam pin ne xec pain ca taramaxicon pe ho' ton cocon oro wari' Iri' Jam.

³² Om ta cono' cono' pi' pin querec caca oro wari' co e' e' wet nana pain xocori ca', hwet pa' ac cocon tara oro ca tomi' hwet xuhu' ca'. Tomi' iri'o' inuhu' ta.

³³ Main om pin tara pawin pain macan' ca'. Oro ca tomi' ne ca' iri na ne, om ta pan' ara'am camain' ne ta. To wet cara tara ta na ca tomi' tococwa ma'.

³⁴ Ma' tara xumuhu' me ac tococwa na. Ta win xumu e' hwein oro ca tamanain to wa pain ca toc ximama' wa ca mana' nein tocwa me. Ta toron ximama' ne xumuhu' pain oro ca to' i'ina nuhu' quem me. Mo ta xuruxut ximama' ac i ma' hwe, mo ta om winim' xo' mahu', ane ane hwet pa' ac cuhu' tara xec nein ca in qui' ta' ne.

³⁵ Win ne ca maqui' pa' cain wijimain me wajo ma', ac i ma' tara ca maqui' pa' toton oro wari' pain oro xijein macan'. Om ta jein ca' ac cacapa' ta. Xi hwet pa' hwet pa' pi' pin ton ara toton oro wari' pain oro xijein macan' ta.

³⁶ Je ca tomi' xuhu' ca' ac tococwa na. Ma' tara xumuhu' me. Tama' tomi' jun Iri' Jam quem. Ma' ta na cuhu' pain ca witan ca' hwein oro ca om awi ca maqui' ta' ma' quem. Ma' ta om wixipa' hwe pain ca aram aram coco' quima hwet xim mahu' pain ca Iri' Wari' ta' ca' quem na ca tomi' tococwa ma'.

³⁷ Jeju ma', pijim' pe taxipa' nain ca tao' caho' nein cote ne xiricon Iri' Jam pain oro xijein xec pane. Je ca ca' na to taxipa' tococwa pain capijacon Iri' Jam oro wari' pane. Irawin pin iri na ne, maji ta ac tococwa na co taxipa' ca ma', mama' ac cacain na pacun ma', Pacun Nein Oliveira ma'. Je ca pi'am to taxipa' caca ma'.

³⁸ Xec pin iri na ne, pain iri' xo' xec ma', mama' mama' pi' pin ac cacain na ca tao' caho' nein cote ne xiricon Iri' Jam oro wari' ma'. Ma' ta taraju xun pain ca ca' na cain capijacon Iri' Jam ta nana.