Lucas 20 - Tradução Bíblica Pacaas Novos

Ca tomi' querec cocon Jeju pain ca ma' co mi' nem pain ca ara main oro ca ara ma ma' quem cocon

¹ Maqui' ac ne na xec pain ca pe cain ca tao' caho' nein cote ne xiricon Iri' Jam Jeju. Ca' na nonon pain capijacon Iri' Jam oro wari'. Pijim' mi' nonon pain capijacon Iri' Jam ca tomi' hwet nonon pain ca to' witan toton cocon quem. Xuruxut hwet pan ac cocon na oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés cocon oro xucucun taramaxicon nucucun oro judeu ma' quem.

² Tomi' querec ac cocon na: Ma' co mi' nem pain ca ara main oro ca ara ma ma' quem? Ma' co ara rain nem pain quem na ca tomi' querec cocon ma'.

³ Om na, ma' na ca tomi' querec xim xuhu' ira. Tomi' xine ta ac tococwa na.

⁴ Tomi' querec xuhu' con João cara pane, co ja' taxipa' nonon pain com oro wari' pane. Ma' co ja' roron pain com oro wari' non quem? Mi' non pain Iri' Jam ra? Mi' non pain wari' ra na ca tomi' querec tococwa ma'.

⁵ Cain' xi tomi' xun quem ac xucucun na. Mo ta mi' non pain Iri' Jam xun, tomi' querec mami' ac capari' tara, para om howa hun quem tarapari'.

⁶ Mo ta mi' non pain wari' xun. Cain' cain' xixi' quem? To' to' cono' pi' pin tatarapari' pain pacun oro wari' cwa'. Xi om ne ca iri' profeta na João ta ara caca ta nana.

⁷ Je ca tomi' cocon Jeju: Om ca taxi' urut pain wixicon co mi' non pain ca ja' cocon pain com oro wari' pane ta nana.

⁸ Je i ma' ira, om ta tomi' hwet tain wixicon co ara rain napa' pain ca ara ta' ca' quem na ca tomi' tococwa ma'.

Ca pijim' joc mam' mi' tococwa cocon co taramaja to nanain totain uva

⁹ Pijim' joc mam' mi' ac tococwa na cocon oro co taramaja to nanain totain uva: Ma' na wari' pane. Oin' ac cain na totain uva. Tomi' xo' ac tococwa na co taramaja to taxipa' nanain xitot. Taramaja to jein totain uva ne ca' ac tococwa na. Paca' iri tara memem ne, mene ac hwein tara xijein cacarain ma', mene ac tain tara xijein cacarain ca' quem, ac i ma' tara ca pagar xuhu' pain ca taramaja nuhu' ta ac tococwa na. Mao tain pira ina ta ac tococwa na, mao ac ca na, mon to wet ac cain na i cain.

¹⁰ Maqui' pin iri na oro xec nein ca paca' pin ne memem ma' ne, tomi' ac ca na waximain xitot ma', tomi' non co taramaja mi' e' non pain ca pe pan ca ma'. Hwet roron co taramaja to nanain totain uva ne cain, cut ac main tara memem ne cocon ta na ca tomi' con ma'. Ma ac ca na, mao ac ca na quem. Ane om ha' cocon caram ma' co taramaja to nanain xitot ne. To' nonon, in mao ra ta ac cocon na quem. Om ca mi' cocon pain memem nucun waximain xitot.

¹¹ Tomi' ac con na xucun co taramaja mi' e' non pain ca pe pan ca ma': Hwet roron co taramaja to nanain totain uva ne cain, cut ac main tara memem ne cocon ta non. Ma, mao ac ca na. Ane om ha' cocon co ma' quem ne. To' nonon, quep xirac tamana nonon. In mao ra ta ac cocon na quem. Om ca mi' cocon pain memem nucun waximain xitot ma'.

¹² Hwet roron ta ac con na xucun ma' quem. Je win 3 pin caca co hwet roron ta ca ma'. Ane om ha' cocon co ma' quem ne. To' tamana nonon, mija na nonacon cocon. Xin hwet ca' ac cocon na pain totain uva.

¹³ Cain' cain' xita' ne ac xucun na waximain xitot ma'. Coromicat pan ac ca na, tomi' ton panxita' cwa', co om noc camain' ta' cwa'. Hwet roron quem arain, cut pan rain memem ne cocon ta ton. Am tomi' ha' cocon quem paxi' na ca coromicat nucun cote ca ira.

¹⁴ Ane om tomi' ha' caca co taramaja to nanain xitot ma' ne. Querec iri nonon panxica ne, pain ca xut qui' nucun ma', tomi' xo' ac xucucun na: Wirico co ma' panxica waximain xitot ta xucucun. Mi' pin iri tara cote ca ne, mene pin ac cain tara totain uva ca' xucucun. To' pa' pin xun ta ac xucucun na. Menexi' pin ac ne tara totain uva ca' xucucun. Ma ac xucucun na.

¹⁵ Xin hwet ca' ac cocon na pain xitot, to' pa' pin ac cocon na quem. Ac i ma' nana co taramaja to nanain totain uva pane na ca pijim' nucun Jeju. Tomi' querec ac tococwa na: Cain' cain' ta' ca waximain xitot quem?

¹⁶ Taraju wet xine e': Hwet pan totoron co taramaja to nanain totacon ma', to' parapa' pin ac cocon tara, noro ac cocon tara oro xucucun co taramaja to nanain totain uva nucun quem na ca tomi' tococwa ma'. Oro wari' ma', co taraju nonon pain ca pijim' nucun ma', tomi' ac caca na: Cain' cain' xira waximain xitot ne? Om ca ha' camain' ne pain ca ara wa i ma' ta nana.

¹⁷ Noro pan ac cocon na Jeju. Om ca noro ni ca' tococwa, noro tata. Tomi' querec ac tococwa na: Cain' ca tomi' mao ne ca xirao' pe xine pain capijacon Iri' Jam quem? Ca' na ca xirao' pe xine: Pacun ca noc pin caca wari' co quep xin paxi' nanain xirim ma', aram aram iri' pacun ca to' teren nain xirim pin na. Ac i ma' na ca xirao' pe xine pain capijacon Iri' Jam pane.

¹⁸ Je ca tomi' xuhu' ca' ac tococwa na. Oro wari' co noc pin nanain pacun ca aram aram to' teren nain xirim ca', ac ca camara' hwet cacain tara. To' caracat pin ac tococwa tara. Ac ca camara' hwet tococwa tara quem. Xao niri pin ac tococwa tara ta na ca tomi' tococwa ma'.

¹⁹ He, tomi' napari' ron ac caca na oro co ca' na taxipa' nanain ca xirao' nucun Moisés ma', cocon oro taramaxicon nucucun oro sacerdote ma' quem, pain ca taraju cocon pain ca pijim' joc mam' mi' cocon cocon co to' pa' pin nonon panxica waximain totain uva ma'. Je ca quep xun paxi' cocon ma', ane jin' cocon oro wari' ne.

²⁰ Ja' noro xun pain oro ca ara nucun ta ac caca na, pagar ac tococwa na wari' ma'. Mo hwet jun ta, ac ca iri'o' hwe tara pain ca tomi' querec hun me ac tococwa na. Mo ta tomi' pan tem ca, ha' ac capari' tara pain ca tomi' em' xun con taramaxicon co hwara' opa ta nonon.

²¹ Ma ac caca na, hwet ac cocon na Jeju. Tomi' ac cocon na: Tomi' xim urut pum taramaxicon co ca' na taxipa' capijacon Iri' Jam. Taxi' urut pum pain ca tomi' xo' taxipa' ma ma'. Ca' na xo' taxipa' main capijacon Iri' Jam quem. Om ca tomi' querec te paxica' momon oro wari'. Ca' na xo' maparut pain capijacon Iri' Jam ca an hwet mi' napari' pain ca xuruxut xo' wa pain ca tomi' ha' je capari' quem.

²² Je ca tomi' querec xim urut pum ca' ac cocon na. Hohot na pain ca pagar tocwa pain imposto taramaxicon nucucun oro romano ra? Om ca hohot ne ra? Ac i ma' na ca tomi' querec ximama' cocon ma'.

²³ Querec pin' tata pain ca mixein nucucun quem. Tomi' ac tococwa na:

²⁴ Mi' xine pain denário ta tata, mi' ac cocon pain na. Tomi' querec ac tococwa na: Ma' jamicon co cwa', pain moeda ca'? Ma' wixicon co cwa' ca xirao' pe xine pain quem na ca tomi' querec tococwa ma'.

²⁵ Jamicon taramaxicon nucucun oro romano ta. Wixicon quem nonon. Je ca tomi' xuhu' ca' ac tococwa na. Carawa ca mene ca taramaxicon nucucun oro romano ma', mi' ac hun pain tara. Carawa ca mene ca Iri' Jam ma' iri na ne, mi' ac hun pain tara quem na ca tomi' tococwa ma'.

²⁶ Tocojin' paxi' nonon. Am taraju caca oro wari' pain ca tomi' pan tem ca ma' paxi' nana. Ane om ha' cocon ne. Wa wa e' nonon pain ca tomi' xo' nucun. Tacana to ac caca na, om ca tomi' mami' caca quem.

Ca tomi' querec cocon pain ca e' mami' xi' caca co wara cono' nana ma'

²⁷ Ma' ac caca na oro saduceu co xuruxut hwet nonon Jeju. Howa ca' nana oro saduceu: Om ca e' mami' xi' caca oro wari' co wara cono' nana ta nana. Tomi' ac cocon na Jeju:

²⁸ Tomi' xim urut pum ta taramaxicon co ca' na taxipa' capijacon Iri' Jam ac cocon na. Ca' na ca xirao' mi' capari' Moisés cara pane: Mo ta mi' pin ca wari' ma', mo ta om wanxi' mi' cam manacon ma', na e' na pain ca an cam coxa' ca. Ma' ta wijima cama con ta taram. Pije' co aram aram wanxi' mi' cam ma', ac ca wanxi' con tara cwaji' ca co wara mi' pin ta, ac i ma' na ca xirao' mi' capari' Moisés pane.

²⁹ Je ca tomi' querec xim urut pum quem ac cocon na. Ma' na wari' co ma' 6 nana xurucun. Co pan' cain' pane, an ac cam na narima', aram aram mi' pin ac ca na. Om ca wanxi' ca.

³⁰ Co ja' corom mao non co pan' cain' ma', an ac cam na manacon cwaji' ca, aram aram mi' pin ac ca na. Om ca wanxi' ca quem.

³¹ Ac i ma' na co ja' corom mao non co ma' quem, ac i ma' ac i ma' pi' pin nana quem. An an xam' nanam manacon cwaji' caca co pan' cain' pane, aram aram cono' cono' pi' pin ac caca na. Om ca wanxi' camain' caca.

³² Aram aram mi' pin ac cama na narima' ma' quem.

³³ Je ca tomi' querec xim urut pum ca' quem ac cocon na. Maqui' iri tara xec pain ca e' mami' xi' caca co wara cono' nana ma' ne. Mon xira co narima' ne tam nam quem? Ma' 7 ara xi' nana co an nanam pane na ca tomi' querec cocon ma'.

³⁴ Tomi' ac tococwa na: Oro wari' pain oro xec nein ca e' e' wet nexi' pain macan' ca', cut taxipa' nana narima'. Ca narima' nequequem ma' quem, cut taxipa' nana tarama' quem.

³⁵ Ane om ac i ma' ne pain ca aram aram e' mami' xi' caca co wara cono' nana ne. Oro wari' co querec hohot ca Iri' Jam ma', pain ca hohot na pain ca to ho' mahu' pain pawin ca' ca ma', om ta cut caca narima'. Ca narima' nequequem ma', om ta cut cacama tarama' quem.

³⁶ Om ta cono' mami' ac cacama quem, xi an xiho' ara cocon oro jam co taramaja mi' nonon Iri' Jam ta. Mana panxica Iri' Jam nana, xi om ne ca to' e' mami' ara tococwa ta.

³⁷ Taxi' irin i ca' quem, pain ca iri'o' ne ca e' mami' xi' caca co wara cono' nana ma' quem. Xi xirao' mi' ara capari' pain Moisés cara pane, pain ca pijim' qui' cain wijimain pana ca wiran ximao pane. Wara pain paxi' na ca cono' caca Abraão con Isaque con Jacó cara pane, ane xirao' mi' con Iri' Jam Moisés pane ne: Iri' Jam ne non Iri' Jam Abraão cwa', Iri' Jam ne non Iri' Jam Isaque cwa', Iri' Jam ne non Iri' Jam Jacó cwa' quem. Iri' Jam ne Iri' Jam ne wet nonon ta na ca xirao' mi' con Iri' Jam Moisés pane.

³⁸ Je ca taxi' xuxun pain ca e' e' wet nucucun quem. Xi Iri' Jam ne cocon Iri' Jam oro wari' co wara cono' nana ta. Iri' Jam ne e' nonon co e' nana ta. Ac i ma' na ca tomi' tococwa ma'.

³⁹ Ma' nana oro co ca' na taxipa' nanain ca xirao' nucun Moisés ma' quem. Tomi' ca' nonon: Awi na ca tomi' nem ta taramaxicon co ca' na taxipa' capijacon Iri' Jam nonon.

⁴⁰ Om pin ac caca na wari' co tomi' querec ximama' nonon ma', xi hehe ara cocon ta.

Ca tomi' querec tococwa pain ca ma' co iri' hwanana ne ca Cristo co wara tomi' pe ca Iri' Jam pane tococwa

⁴¹ Jeju ma', tomi' ac cocon na co taraju nonon ma': Tomi' querec xuhu' con Cristo cwa'. Para winacon Davi cocon Cristo oro wari' quem?

⁴² Xi tomi' ac i ca' ara ca Davi pane ta, pain ca tomi' mi' con Cristo pane. Ca' na ca xirao' pe cain ca tomi' nucun pain Oro Tamara' pain capijacon Iri' Jam pane: Tomi' non Taramaxicon ne Iri' Jam co iri' Taramaxicon ma': Xao pe ho' ne pain iri' cwere ca'.

⁴³ Aram aram maqui' pa' ac quem tara xec nein ca to' quiji' pin toton ta' co noc nenem ma'. Taramaxicon pe ho' cara ac momon tara ta, ac i ma' na ca tomi' xucucun Iri' Jam con Cristo pane ta na ca xirao' nucun Davi pane.

⁴⁴ Je ca tomi' xuhu' ca' ac tococwa na. Taramaxicon ne non Cristo Davi cara pane. Cain' cain' xira quem? Ma' tara ca wina ac con quem ra na ca tomi' tococwa ma'.

Ca om na ne pain ca an xiho' tococwa co ac ca iri'o' xi' ca' tara me nana ma'

⁴⁵ Pain ca taraju taraju wet cocon Jeju oro wari' ma', tomi' ac tococwa na co taxipa' ca ma':

⁴⁶ Ma' tara xumuhu' me, ta an xiho' huhun oro co ca' na taxipa' nanain ca xirao' nucun Moisés ma'. In ac tatarapari' oro wari' ta nana. Je ca to taxipa' cocon wom co awi tamana, mam' xuruxut in mam' xuruxut in nonon quem. Tomi' querec te xo' tatarapari' oro wari' co xao to to nanain ximijain cidade ta nana. Param nanain ca xao to xo' wa cocon oro taramaxicon pain oro xirim ca cut in to xucucun ma', param nanain ca xao to xo' wa cocon oro taramaxicon pain ca cao' querec te wi nucucun quem.

⁴⁷ Mixein nanam oro narima' co cono' ca' nanam waram taxicacam, cut noc xa ac cacain na oro caramaxicacam. Cote ne ac ne na ca tomi' nucucun pain ca tomi' cocon Iri' Jam ma' quem. Ma' ta awi nana ta cacapari' oro wari' ta nana. Ac ca iri'o' xi' ca' tara me nana. Wap tamana pan totoron Iri' Jam ta. Om ta wap homa tococwa oro xucucun co pan teretem nana ma'. Caram ma' iri nana ne, wap tamana pan ac tococwa tara ta na ca tomi' tococwa ma'.