Lucas 14 - Tradução Bíblica Pacaas Novos

Ca quep xio pin tocwa wari' pain sábado

¹ Xijein sábado pin iri na ne, pain ca xao to wa taxipa' cacain ximicocon oro wari' ma', tomi' ac con na Jeju fariseu ma', co hwara' opa ma'. Hap ra, cao' pe ho' ne pain xuru ca' non, hwet ac con na. Oro win ma' ca fariseu ma', ja' noro nonon Jeju pain oro ca tomi' nucun je pain oro ca ara nucun quem.

² Pe ho' ja' pan ac con na Jeju wari' co caxi. Mom ximao na curucun.

³ Jeju ma', tomi' querec ac cocon na oro fariseu cocon oro co ca' na taxipa' nanain ca xirao' nucun Moisés. Hohot tara pain ca quep xio wa pain sábado ra? Tomi' caho' napari' pain i ma' ca xirao' nucun Moisés ra? Ac i ma' paxi' na ca tomi' querec tococwa ma'.

⁴ Ane tacana to caca ne. Om ca tomi' caca. Je ca quep con pain micon co ma' co caxi ma', quep xio pin ac con na, in mao rain xurum ta ac con na quem.

⁵ Tomi' querec ac tococwa na: Mo ta ma' ca win ma' nuhu' co pan' mao nain manain com panxica pain sábado ma', am boi nucun ma', mo ta pan' mao nein manain com boi nucun pain sábado ma', om ta an piri' hap cain ra? Om ta an piri' hap ca' con pain manain com panxica co pan' mao nain ra? An piri' hap ca' toron pain ta na ca tomi' tococwa ma'.

⁶ Hehe ac caca na. Om ca tomi' ac caca.

⁷ Querec iri nonon oro co harahap je wawa Jeju ne, querec pin' tata pain ca param e' cacain ca xao to xo' wa pain pana ca mam' cao' to wa cocon oro taramaxicon pain ca cao' xi' caca ma', pijim' joc mam' mi' ac tococwa na con wari' co hap ra wa pain ca cao' querec te wa ma'. Pijim' ca' tata:

⁸ Je ca tomi' xuhu' ca', tomi' inem pain ca tomi' quem wari' ma', pain ca hap ra, cao' querec te wi xijexi' con co ma' co an tam nam narima' ma'. Om ca na ne pain ca xao pe ho' hap momon oro wari' co hwara' opa nana ma'. Am hap ra ta tocwa xucun wari' co hwara' opa tiquin' ca' nem quem.

⁹ Mo ta xao pe ho' hap momon co hwara' opa nana ma', mo ta corom ca xucun co hwara' opa tiquin' ca' nem quem, mo ta tomi' ca' quem waximain ca cao' querec te wa ma': Om na, cam paca' ron co cwa' co hwara' opa tamana cwa', xao pe ho' pan roron caram ma' co om hwara' opa homa nana ma' quem, mo ta tomi' ac i ma' quem, wixipa' ac ma tara, xao pe ho' pin ac momon tara co om hwara' opa homa nana ma' quem.

¹⁰ Je ca tomi' xim ca', hap ra, cao' querec te xi' iri xima ne, xao pe ho' pan ac momon tara co om hwara' opa homa nana ma'. Am tomi' ca' quem co hap ra nem ma', tomi' ac quem tara: Om na win ma' ne. Xao pe ho' roron caram cwa' co hwara' opa nana cwa' terem. Querec pin' ac quequem tara oro wari' co harahap je wawa ma', querec pin' teterem pain ca hwara' opa nem.

¹¹ Je ca tomi' xuhu' ca' ac tococwa na. Oro wari' co xec xec nana ma', pain ca hwara' opa na xi' ma caca ma', to' wixipa' to' wixipa' pi' pin ac tococwa tara. Wari' co om xec xec ma' iri na ne, pain ca om ca hwara' opa ta' pan xucun ma', to' hwara' opa pin ac tocwa tara quem na ca tomi' tococwa ma'.

¹² Tomi' ac ca na Jeju, tomi' non waximain xirim ma', co hap ra, cao' pe ho' ne pain xuru ca' non ma', tomi' ca' non: Harahap je, cao' querec te wi xijexi' ta iri roron oro wari' ma' ne, ta harahap je momon iri' win ma' ma me. Ta harahap je momon oro xerem cocon oro ca nari nem me, ta harahap je momon oro win ma' ma co caramaju nana ma' me. Mo ta harahap je momon, win maparut pane ac quequem tara, hap ra, cao' querec te xi' ta ac quequem tara, ac ca pagar in hwet quequem tara pain ca dever quequem pain ca harahap je momon pain cara pane.

¹³ Harahap je, cao' querec te wi xijexi' e' iri roron oro wari' ne, tomi' cain' roron co om nonon carawa ma', co caji at nana ma', co xuruxut xirac nana ma', co om tococon ma' quem.

¹⁴ Param mi' ac quem tara pain ca awi wa Iri' Jam ma', xi ha' cocon pain ca pagar in hwet ac quequem co ximin nana ma'. Om ca win maparut pain ca harahap je maparut pane ac quequem. Pagar in hwet pan terem Iri' Jam ma', pagar in hwet pan terem pain xec nein ca to' e' mami' toton cocon oro wari' co hohot nonon ma' na ca tomi' con ma'.

Ca pijim' joc mam' mi' tococwa con wari' co cao' querec te wi xijexi' e' nonon oro wari'

¹⁵ Wari' co cao' pe ho' nonon pain pana ca mam' cao' to caca ma', taraju iri non Jeju pain ca tomi' ac i ma' ca ma' ne, tomi' ac con na: Param mi' tata pain ca awi wa oro wari' co cao' to ho' xun nonon Iri' Jam pain pana ca mam' cao' pe nucun ma', co cao' querec te xi' e' ca pain ca taramaxicon pe nucun ta non.

¹⁶ Tomi' ac ca na Jeju: Pijim' joc mam' mi' xuhu' con wari' co cao' querec te wi xijexi' nonon oro wari' ta non. Ca' na ca pijim' nucun: Ma' na wari' pane. Cao' querec te wi xijexi' cocon oro win ma' ne ta ac ca na, ara ac cacain na carawa ca cao' wa. Harahap je, cao' querec te wi xijexi' e' ac tococwa na oro wari'. Mija nana wari' co harahap je ca ma'.

¹⁷ Awori pin iri na oro carawa nein ca tomi' querec te nucucun ne, tomi' ac con na wari' nucun ma', co taramaja mi' e' non ma': Mo tomi' roron oro wari' co wara tomi' ta' pane, pain ca cao' querec te wi xijexi' e' toton pane non. Harahap je, xi awori pin ara ne oro carawa ca cao' xi' iri' ta roron ta na ca tomi' con ma'.

¹⁸ Mao ac ca na, tomi' hwet ac tococwa na pain ca tomi' nucun taramaxicon nucun. Tomi' hwet paxi' tata pain, ane hehe caca ne. Ma' na xijein carawa ca ara ta' ta' ca', to' i'ina napa', om ca ha' capa' pain ca cao' pe ho' ton ta nana, tomi' ac i ma' tomi' ac i ma' xam' nana. Tomi' ca' na xucun: Om ca ha' capa', xi xo' an ara tain xitot ta, na e' na pain ca mo querec tain. Tomi' ron me, ta mana' mapa' pain ca om cao' pe ho' ac xim me nem ta ron, tomi' toto ac i ma' non ma'.

¹⁹ Ma' ac ca na xucun co tomi' ca' non quem: Om ca ha' capa', xi xo' cut 10 ara tain boi ta, am taramaja xo' ne, na e' napa' pain ca mo querec tain pain ca taramaja nein ta. Tomi' ron me, ta mana' mapa' pain ca om cao' pe ho' ac xim me nem ta ron, tomi' toto ac i ma' non quem.

²⁰ Xucun ma' iri na ne, tomi' ac con na: Om ca ha' capa', xi xo' an ara tam narima' pain xocori ca'. Je ca om cao' pe ho' ac ton ta non.

²¹ In hwet ac con na taramaxicon wari' nucun ma', co taramaja mi' e' non ma'. Tomi' hwet ac con na pain ca tomi' nucucun oro wari' ma', co wara tomi' paxi' wawa ma'. Mana' ac ca na waximain xirim ma', co taramaxicon ma'. Tomi' ac con na wari' nucun: Mao hap rain oro wana pain cidade nexi' ca', mao rain oro wijimain wana ma', o qui' ac momon tara co ximin nana. O qui' roron co om nonon carawa ma', co caji at nana ma', co om tococon ma', co xuruxut xirac nana ma' quem na ca tomi' con ma'.

²² Mao ac ca na, o qui' ac tococwa na. Tomi' ac con na taramaxicon nucun: O qui' paxi' inonon ta. Win ne ca tomi' mapa' ne non. Ane ma' ma' wet ne ca xao pe ho' ac xine pana ca mam' cao' to wa ne non.

²³ Tomi' ac ca na taramaxicon, tomi' non wari' nucun: Paca' rain cidade nexi' ca', pirao' pirao' ac momon tara oro wari' pain oro wana ma', oro cote ne wana ca mao nain oro xijein cidade ma', je pain oro wijimain wana ma' quem, tomi' mip ac momon tara: Na e' na pain ca corom hwein xiricon taramaxicon ne ta ac momon tara. Ma' ta mija ca wari' pain xuru ta na.

²⁴ Je ca tomi' xuhu' ca' ac tococwa na co wara corom nana ma'. Oro wari' co wara tomi' ta' pane, pain ca harahap je, cao' querec te wi xijexi' ta ta' pane, om ta cao' camain' cacain carawa nein ca tomi' querec te nexi' ca'. Om ta ma' xica' pe camain' ca co cao' tain nain ta na taramaxicon na ca tomi' ca Jeju pain ca pijim' cocon oro wari' ma'.

Ca i'ina paxi' ne pain ca taxipa' xun Jeju

²⁵ Mija nana wari' co ja' ja' nonon Jeju ma'. Om ca paric camain' caca. Tucu in hwet ac tococwa na, tomi' ac tococwa na:

²⁶ Mo ta ja' ja' xim capa' wari' ma', mo ta tomi' querec te tamana cocon oro ca nari nucun ma', mo ta om tomi' querec te tiquin' ca' capa' con cote ca cam jicon ma', cam manacon ma', cacam mana panxica cacam oro xurucun ma' quem. Mo ta om tomi' querec te tiquin' ca' capa' pain oro ca param pan nucun ma' quem, om ca taxipa' ac capa' ta.

²⁷ Mo ta ja' ja' xim capa' wari' ma', mo ta xiram pa' cain curucun pain ca jin' cain ca mi' pin wa pain ca taxipa' capa' ma', om ca taxipa' ac capa' na ca tomi' tococwa ma'.

²⁸ Am ma' ca win ma' nuhu' co quep tain nain cote ne xirim ca mao pawin ac tococwa na. Om ta noro cain' cain dinheiro nucun quem? Noro cain' tarain. Xao pe tara, noro noro ac cain tara dinheiro nucun. Am ha' capa' pain ca quep xam' pin tain xirim, am om ha' capa', ca' tara.

²⁹ Mo ta om noro cain' cain dinheiro nucun ma', mo ta cut in xo' e' cain oro pacun ca to' teren nain xiricon pain caximain ma', mo ta om ha' con pain ca quep xam' pin cain quem, tatam' tatam' pi' pin ac cocon tara oro wari' co querec nanain xiricon pain ca om quep xam' pin ac cain ma'.

³⁰ Tomi' ac cocon tara: Quep tain paxi' nain xirim ron wari' cwa'. Je xi quep xam' pin cain quem totoron.

³¹ Am ma' ca taramaxicon co mixita ton non xucun taramaxicon co mana' non ac tococwa na. Om ta noro cain' tococwa oro soldado nucun pain ca mija nucucun quem? Noro cain' totoron. Xao pe tara, noro noro ac cocon tara, coromicat pan ac ca tara: Ma' 10.000 e' nanapa' oro soldado ne co quep xiho' xim nanapa' cwa'. Ha' tarapa' pain ca to' quiji' pin ton taramaxicon cwain, pain ca ma' 20.000 cocon oro soldado nucun co quep xiho' toton nonon quem? Ac i ma' tara ca coromicat nucun.

³² Mo ta querec pin' pan xucun pain ca om ha' con pain ca to' quiji' pin con xucun taramaxicon cwain, tomi' ac tococwa tara oro wari' nucun: Mo xuruxut cam' jun taramaxicon cwain, pain ca maqui' maqui' wet cacain pira cain, tomi' toto ac hun tara: Mana' mana' om xi' ta aji'. Maho' xin ca mixita wa ta jun ac tococwa tara. Ac i ma' tara ca tomi' xo' xucucun.

³³ Je ca tomi' xuhu' ca', tomi' tomi' xam' inuhu' ta ac tococwa na. Mo ta taxipa' xim mahu', na e' na pain ca noro cain' hwein oro carawa ca to' i'ina xim nuhu' pain. Mo ta om an to pin hwein oro carawa ca win xumu hwe ma', om ca ha' ne pain ca taxipa' mahu' ta na ca tomi' tococwa ma'.

³⁴ Noro jein sal ma' ac tococwa na. Awi na sal, to' wita awi nain oro carawa ca cao' wa. Mo ta wita wita om ne, mo ta camain' pin ne. Cain' xi wita mami' ac ne quem?

³⁵ Sal ca camain' pin ma', om ca to' wita mami' nein carawa ca cao' iri', om ca to' awi nein macan' quem. Wixicao' pin e' xin ta na ca tomi' tococwa ma'. Je ca tomi' xuhu' ca' ac tococwa na. Mo ta taraju pa' xixi' na hwe ma', je ta taraju wet qui' hwe ta na ca tococwa ma'.