Lucas 13 - Tradução Bíblica Pacaas Novos

Ca cwirin' jein ca caracat nuhu' ta cocon oro wari' Jeju

¹ Pijim' pijim' wet iri na Jeju ne, ma' ac caca na co tomi' hwet nonon cocon wari' nein Galileia ma', co to' parapa' pin wawa pain ca mama' cacain cote ne xiricon Iri' Jam pain Jerusalém ma'. Tom tain' tatarain carawa nexi' oro sacerdote ta paxi' nana. Ane to' parapa' pan tococwa ne. Wirico taramaxicon Pilatos co to' parapa' jujun ta nonon oro wari' nucun pane.

² Tomi' pan ac cocon na Jeju: Cain' cain' ne ca coromicat nuhu' cocon quem? Caracat tiquin' ca' totoron oro win ma' caca ma' huhun ra? Je ca to' parapa' ac i ma' tococwa ta, ac i ma' na ca coromicat mao huhun ra?

³ Om na ta, tomi' iri'o' inuhu'. Mo ta om cwirin' pin hwein ca caracat nuhu' ma', cono' cono' pi' pin ac hwe tara quem.

⁴ Cain' cain' ne ca coromicat nuhu' cocon wari' cara pane, co ma' 18 nana pane, co cono' nana pain ca pa caracat corom pin qui' cocon xirim ca mao pawin pane? Caracat tiquin' ca' totoron oro xucucun wari' co to nanain Jerusalém ma' huhun ra?

⁵ Om na ta, tomi' iri'o' inuhu'. Mo ta om cwirin' pin hwein ca caracat nuhu' ma', cono' cono' pi' pin ac hwe tara quem na ca tomi' tococwa ma'.

⁶ Tomi' joc mam' mi' ac tococwa na pain panajinain figo ca om ma' winain ma'. Ca' na ca pijim' nucun: Ma' na wari' co oin' pe nain totacon panaji figo. Cat ta' figo ta ac ca na, noro noro ac cain na quem. Noro paxi' nain, ane om mi ne ne. Om ca mam' camain' cain.

⁷ Je ca tomi' con wari' nucun co querec wet nain totacon: Ma' 3 pin na cawaxi' pain ca noro noro tain panaji figo ca', pain ca cat ta' figo ta ta' ca'. Om ca mi ne, om ca mam' camain' tain figo pain. Ta' cat pin rain! Om ca na ne pain ca to' i'ina cara nein oro wirain panaji memem pain ca horon xo' ne ta na ca tomi' con ma'.

⁸ Om na ta taramaxicon ne ac ca na wari' nucun. To wet iri ne ma' rain, xijein cawaxi' pa' tarain ta. Xe' morojam' tain caximain, aramao ac tain tara pain moji boi.

⁹ Am mi ta' ne pain xijein cawaxi'. Mo ta om mi ne, ta' cat pin ac xin tara ta non. Ac i ma' na ca pijim' joc mam' mi' tococwa pain panaji figo ca om mi winain pane.

Ca quep xio pin tacama narima' pain sábado

¹⁰ Maqui' iri na xec nein ca xao to wa taxipa' cacain ximicocon oro judeu ma' ne, pain sábado ma', ca' na toton pain capijacon Iri' Jam oro wari' cwa' ta ac ca na Jeju ma', ca' na pe ac cocon na pain xirim ca cut in to xucucun ma'.

¹¹ Pe nain i ma' narima' co corom pe ho' nam caxicon jam ma'. To' caxi nam. Wara pain na ca caxi cama con, ma' 18 pin na cawaxi' pain ca to' caxi cam pane. Xone na, om ca xut tequi' pe ac cama.

¹² Querec iri nam Jeju ne, hap ra ac cam na, tomi' ac cam na: Om pin nem ca caxi nem ta. Xio pin ma ta nam.

¹³ Quep ac cam na pain micon, tequi' pe xo' hap ac cama na. Awi na Iri' Jam awi na Iri' Jam pan ac cama na quem.

¹⁴ Mana' ac ca na co querec wet nonon oro win judeu ca pain xirim ca cut in to xucucun ma'. Mana' non Jeju. Xi om ne ca quep xio pin ara cam narima' pain sábado ta. Je ca tomi' tococwa oro wari': Ma' 6 napari' xec pain ca taramaja je capari' Iri' Jam. Je i ma' tara oro xec ca maqui' hwe pain ca quep xio taraparut ta hun Jeju cwa'. Ta quep xio taraparut ta hun pain sábado me ta tata.

¹⁵ Tomi' ac ca na Taramaxicon nexi': Wa inuhu' pain ca ac ca iri'o' xi' ca' tara me hwe ma'! Win hwe pain ca wara pao' to hwein boi nuhu' je burro nuhu' pain ca cao' to ne ma'. Toc tara com iri hwein pain sábado ne, om ca tacom' horohot hwein ra? Om ca o hwerehwet hwein, om ca o mi' hwein pain com ra? Ac i ma' ac i ma' xam' hwe ta.

¹⁶ Je ca tomi' xuhu' ca' ac tococwa na. Na e' na pain ca quep xio pin tacama narima' cwa', co hwanana ne non Abraão cara pane. Ac ca pao' pe cam na Caxicon Jam pane. Wara pain pin na cam, ma' 18 pin na cawaxi' pain ca pao' pe cam pane. Om ca na ne pain ca tacom' ca' tacama con Caxicon Jam pain sábado ca' ra? Na ne ma' ira! Ac i ma' na ca tomi' tococwa ma'.

¹⁷ Tomi' ac i ma' iri na ne, wixipa' wixipa' pi' pin ac caca na co tomi' in pin nonon ma'. Oro wari' ma' iri nana ne, wa wa nanain oro ca ara ca ma'. Tomi' querec te nana pain.

Ca pijim' joc mam' mi' tococwa pain wijimain tocwi mostarda

¹⁸ Tomi' querec ac tococwa na: Ma' carawa ca ara ne pain ca taramaxicon pe ho' cocon oro wari' Iri' Jam quem? Ma' carawa ca an xiho' nain quem?

¹⁹ Carawa ca ara ne ma', pain ca taramaxicon pe ho' cocon oro wari' Iri' Jam ma', an xiho' nain carawa ca ara nain wijimain tocwi mostarda ma', ca oin' pe cain totacon wari' ma'. Ca hwara' hwara' ne ma', ca hwara' hwara' ne ma', hwara' pin ac ne na, aram aram cote ne pana pin ac ne na. Quep pe ac nein na xirinain pain oro taparain me quem.

Ca pijim' joc mam' mi' tococwa pain ca to' memerem nein capam'

²⁰ Tomi' querec mami' ac tococwa na: Ma' carawa ca ara ne pain ca taramaxicon pe ho' cocon oro wari' Iri' Jam quem?

²¹ An xiho' nain carawa ca ara ne pain ca an camain ca to' memerem nein capam' narima' ma'. Maxoc hwara' iri nain trigo ne, joc wanan ac camain na ca to' memerem nein capam'. Ara pi' pin iri nain oro ca ara nein ne, an pe ac camain na, memerem pin ac ne na quem na ca pijim' tococwa ma'.

Wijimain manain xirim

²² Tiquin' mao ac ca na Jeju ma'. Pain ca xut xumu cain Jerusalém ma', mao ac cain oro xijein cidade, hwet hwet ac tococwa na oro wari' co to nanain oro ca paric to ne xirim ma' quem.

²³ Ma' ac ca na wari' co tomi' querec ca' non: Taramaxicon ac con na: Cain' xi ma' caca oro wari' co to' witan xi' wawa quem? Paric to tatara ra na ca tomi' querec con ma'. Tomi' ac tococwa na:

²⁴ Ca taramaxicon pe ca Iri' Jam ma', an xiho' nain xirim ca corom ac xine pain wijimain man. Je ca tomi' xuhu' ca': Win xumu jein ca taramaxicon pe ca Iri' Jam. Jain jain je pain ca corom ac hwe pain wijimain manain xiricon. Xi iri'o' ara ne ca tomi' xim xuhu' ca': Main mija paxi' tatara oro wari' co corom xin nanain. Ane om ha' xun tococwa pain ca corom xi' wa ne.

²⁵ An xiho' nain waximain xirim Iri' Jam quem. Tao' pa' tain iri tarain xiricon ne, hwet to ca' ac hwein tara, tataca ac hwein tara manain. Pa xut, corom xi' urut ta taramaxicon ac hun tara. Om na, om ca querec pin' camain' xuhu' ta ac cuhu' tara.

²⁶ Cain' cain' xima quem ac hun tara. Cao' to ho' urut pum pane, toc to ho' urut pum pane quem, pijim' maparut pain cidade nuxut quem ac hun tara.

²⁷ Om na, om ca querec pin' camain' xuhu' ta ac cuhu' tara. In ca' in ca' pi' pin xine ta oro caracat co pan teretem nana ta, ac i ma' tara ca tomi' cuhu' ta.

²⁸ Tomi' ac tococwa tara: Querec pira iri jun Abraão con Isaque con Jacó cocon oro profeta cara pane ne, querec pira iri jujun pain ca corom to cacain ca taramaxicon pe ca Iri' Jam ne, awaran tamana ac hwe tara, cacacao' ac hwein tara xuhu' pain ca jain jain tamana nuhu' quem. Xi narain ho' xun ara xihwe pain ca corom to wa ta. Hwet to cara ac hwe ma' tara ta.

²⁹ Mija tatara oro xucucun wari' co maqui' nanain oro xijein macan' pain pira. Cao' querec te xi', xao to ho' ac xucucun tara pain pana ca mam' cao' to wa pain ca taramaxicon pe ca Iri' Jam.

³⁰ Je ca tomi' xuhu' ca', tomi' iri'o' inuhu' ta: Ma' mija nana co om hwara' opa nana pain xocori ca'. Ame hwe e', aram aram hwara' opa pan ac caca tara ta. Oro co hwara' opa nana pain xocori ca' iri nana ne, ame hwe e'. Aram aram hwara' opa hwara' opa om pin ac caca tara quem na ca tomi' tococwa ma'.

Ca tomi' xaxa' ca Jeju pain ca xiram pa' tococwa oro wari' co to nanain Jerusalém

³¹ Pi' pi' iri na ca tomi' ca Jeju na, ma' ac caca na oro fariseu co hwet nonon ma'. Mao ra ta. Xi to' pa' pin xim ara quem taramaxicon Herodes ma' ta nonon.

³² Om na, mo tomi' jun taramaxicon co an xiho' nain caji carawa nein mi ca mixein taxipa' cwain. Tomi' ca' jun: Ca' na ca tomi' quem Jeju ta jun: Tomi' jein pin inonon oro caxicon jam, quep xio pin inonon oro wari' quem, ac i ma' na ca taramaja ta' pain xocori ca'. Taramaja tiquin' ac i ma' ta' quem. Pi' pin iri tara ca taramaja ne ne, maho' ac tain tara ta, ac i ma' na ca tomi' quem Jeju ta jun ta tata.

³³ Ane na e' ne pain ca xut cara tain wanaji Jerusalém ne ta ac tococwa na. Om ta pain homa ne, wa' mao ac ta' tara. Xi hohot ne pain ca mi' pin pe cain oro xijein cidade profeta ta. Na e' na pain ca mi' pin pe ta' pain Jerusalém ta! Ac i ma' na ca tomi' tococwa ma'.

³⁴ Tomi' xaxa' ina pahu' ac tococwa na oro wari' nein Jerusalém. Wahu' paxi' nana co to' parapa' nonon oro profeta pane. Wahu' paxi' nana co to' to' cono' pin nonon pain pacun oro wari' co mam' cuhu' Iri' Jam pane quem. Ane xiram pa' xuhu' ne. Om ca noc camain' xuhu'. Tama' cut in xuxuhu' na paxi' inuhu'. Tama' querec wet xuxuhu' na paxi' inuhu'. Win con jicon me pain ca cut corom to con oro wixicon pain tapaxicon ma', ac i ma' xuhu' paxi' inuhu' ta. Ane noc mahu' ne.

³⁵ Paca' pin turuhu' Iri' Jam ta, paca' pin tarain cote ne xiricon ca' pahu'. Om ta pe mami' cain. Om ta querec mami' mahu' quem, tomi' iri'o' inuhu'. Ame hwe e', main maqui' tara xec nein ca tomi' ca' xim mahu': Tomi' querec te xun co ma' co mam' maqui' nain ca hwara' opa nucun Iri' Jam ta, ac i ma' tara ca tomi' xim mahu'. Je i ma' tara xec nein ca querec mami' xim mahu' ta na ca tomi' tococwa oro wari' nein Jerusalém pane.