Judas 1 - Tradução Bíblica Pacaas Novos

¹ Judas ina pain ca xirao' mi' xuhu' ca'. Taramaja mi' inon Jeju Cristo. Aji' inon Tiago quem. Xirao' mi' inuhu' pain ca howa xine cuhu' Cotere' Iri' Jam, je pain ca om noc camain' cuhu', je pain ca querec wet xo' cuhu' Jeju Cristo ma' quem.

² Param inon Cotere' Iri' Jam pain ca xiram pa' tamana cuhu' ma'. Param inon pain ca mi' hwara' cuhu' pain ca om toron ne xumuhu', je pain ca mi' hwara' cuhu' pain ca querec pin' hun pain ca om noc camain' cuhu' ma' quem.

Oro co caracat nana pain ca miri'om cocon Iri' Jam

^3-4 Je ca tomi' xuhu' pain ca tomi' querec te xuhu' ca'. Jain jain paxi' ina pain ca xirao' mi' xuhu' pain ca to' witan to' witan pi' pin capari' Iri' Jam cwa'. Ane coromicat ni pin ta' pain xocori ca' ne. Xi ma' pin ara caca co corom hwet taparu nunuhu' pain ca cut in xujuhu' ma', co wara tomi' mi' wawa pain ca wap wa pain cara pane. Joc xim nanain ca howa pan teretem nucucun. Caracat nana pain ca miri'om cocon Iri' Jam ma', pain ca ca' na ni ca' cacain capijacon ma'. Tomi' ca' nunuhu': Hohot na pain ca quep ximama' iri'. Om ta wap capari' Iri' Jam, xi om ne ca xiram pa' ara capari' ta nana. Noc nonon Jeju Cristo co xica' taramaja mi' iri' cwa', co Taramaxicon ne iri' cwa' quem. Je ca tomi' xuhu' ca'. Jain jain pin ina pain ca xirao' mi' xim xuhu' pain i ca' quem, pain ca hu ca' xim xuhu' ca'. Ari mip jujun oro co tomi' ni pin nanain capijacon Iri' Jam ca iri'o' ma', ca howa pan iri' ca', ca mi' capari' pain ca wari' ne capari' ca'. Mao ac ne ma' na con. Om ca mi' mami' capari' pain xijein capijacon quem.

⁵ Wara taxi' paxi' hwein oro ca xirao' mi' xim xuhu' ca', ane to' mam' pe wet xim xuhu' pain i ca' ne. Taxi' hun Taramaxicon Iri' Jam pain ca to' witan cocon oro wari' nein Israel pane. To' witan ca' paxi' tata pain Egito pane, ane wap tococwa co om howa je na nonon ne, aram aram cono' pin ac caca na quem.

⁶ Mam' pe wet jujun oro jam co taramaja mi' nonon Iri' Jam pane quem. Taramaja mi' paxi' nonon, hwara' opa paxi' nana pane ira. Ane om ara xo' cara pan cacain ca taramaja nucucun ne. An to pin nanain, an to pin nanain ca to pan caca pain pawin cain quem. Je ca tao' to pin cocon Iri' Jam quem. Tao' to to nonon pain ca jitacat nein xim cain. Pao' to mip nonon pain arain too ca om em' ra na ma'. To wet iri caca ma' ac tococwa na, winim' e' jein iri' xec nein ca wap xim xuhu' ta ac tococwa na.

⁷ Pan teretem ac i ma' nana oro wari' co to nanain Sodoma je Gomorra je oro xijein cidade ca to ja' pan nain pane quem. Mija na ca quep ximama' caca, ara taxipa' nanain ca om hohot camain' ma', je pain ca quep caracan xucucun pain ca tarama' nucucun ma' quem. Je ca wap tococwa ma', mam' wap tata pain xe ca om pi' ra ha' ma'. Tomi' ac tococwa na oro wari': Ma' tara xumuhu' me. Ac i ma' inonon oro wari' co pan teretem nana ta ac tococwa na.

⁸ Oro wari' co corom hwet nunuhu' ma', pan teretem ac i ma' nana quem. Tomi' ca' nana: Om na, tohwein' ina, tomi' napa' pain ca tohwein' ne Iri' Jam ta nana, ara ximama' ac caca na, to' em' pin ac xucucun na pain ca caracat nucucun. Om ca tomi' ha' jun Iri' Jam na caca, tomi' napat nonon oro jam co hwara' opa nana cwain, co to nanain pawin cain quem.

⁹ Om xi tomi' napat cocon quem, xi tomi' napat con Caxicon Jam Miguel co taramaxicon pe ho' nonon oro jam co taramaja mi' nonon Iri' Jam pane ta. Mi' pin iri na Moisés cara pane ne, tomi' caracan ac xucucun na Caxicon Jam con Miguel. Pe ho' pan tarapa' curucun Moisés cwa' ne iri na Caxicon Jam ne, om na ta pan ac ca na Miguel. Om ca tomi' napat xiton na con, om na. Tomi' e' non: Pan to' pan tarain tarajum Taramaxicon Iri' Jam ta non.

¹⁰ Oro wari' co caracat nana pain ca miri'om cocon Iri' Jam ma' iri nana ne, tomi' napat ximama' ac cacain na oro ca om taraju pa' pan caca ma'. Ma' paxi' na oro carawa ca taraju pa' paxi' caca pain ca an xiho' cacain oro carawa nein mi ca om ximi ma'. Je i ma' ca mam' to' em' pan xucucun ta.

¹¹ Wa inonon me! Ximin nana. Wap tamana totoron Iri' Jam ta. Xi an xiho' ara cocon Caim cara pane, an xiho' nonon pain ca xut pan tem nucun. Param tamana nanain dinheiro. Win ca Balaão cara pane, co mixein nonon oro wari' pane. Ac ca ja' ja' cocon na pain ca pan tem nucun. To' om pin ac tococwa tara. Win ne ca to' om pin tococwa Corá cocon oro win ma' ca pane quem.

¹² Caram ma' co caracat nana pain ca miri'om cocon Iri' Jam ma', to' i'ina nunuhu' pain ca cao' querec te wi xijexi' pain ca xere xijexi' ca' hwe ma'. Win ne ca to' i'ina cuhu' oro pacun ca om hwet pe pain iri' cwerein com ma', pain ca to' mapi' irin, ac i ma' na ca to' i'ina cucuhu' pain ca cao' querec te wi xujuhu' ma'. Om ca wixipa' camain' caca pain ca xocomu caca pain ca wata' ta wata' ta caca pain ca warao' nucucun pain ca cao' xi' caca quem. Om ca quep xiho' camain' cucuhu', quep xiho' e' xucucun. Win ne tajain nanawin ca jitacat paxi' ma', pain ca pan' ta' paxi' ne xowi' ma'. Ane om pan' ne ne, xi om ne ca nuru om pin ara nein hotowa ta. Ac i ma' na ca om quep xiho' cucuhu' ma'. Win ne oro panaji memem ca om mi ma' quem. Wara maqui' paxi' na oro xec nein ca xac xin xine ma', ane om ne winain ne. Wara cono' na, wara horohot pin ta. Taparain, panaji, caximain, horohot pi' pin ta. Ac i ma' nana caram ma' quem, ac ca wara cono' pin caca na.

¹³ An xiho' nanain cote ne com ma', pain ca wap tamana ne com pain camana' ma'. Wap iri na ne, an to pin ac nein na oro homirinain pain ca toroto nein pain cacarain com pain namaji. Ac i ma' nana caram ma' quem, xi om ne oro ca pan teretem nucucun ta. Wixipa' xirara. An xiho' nonon oro pijo' co ac ni ca' nain wanaxicon quem. Wara coromicat an pe mi' tata pain ca jitacat tamana nein xim ta. To cara ac cacain i cain tara ta.

¹⁴ Adão cara pane, wanxi' ac ca na, wanxi' ac caca na waram winacon quem. Aram aram to' 7 pa' ac cocon na Enoque co wara tomi' pe nain carawa ca hwet pa' xun tococwa oro co caracat nana pain ca miri'om cocon Iri' Jam. Tomi' ca' tata pane: Taraju wet je e'! Maqui' ta' tara Taramaxicon nexi'. Maqui' wi tara cocon oro jam co taramaja mi' nonon ma', co mija tamana nana ma', co mija tiquin' ca' nanain ca 1.000 nucucun ma'.

¹⁵ Ma' ta tomi' xo' tomi' xo' pi' pin xun tococwa oro wari' pain oro carawa ca ara caca pane. Maqui' tara, ma' ta em' hwe, mama' jein cote ne xe ta ac tococwa tara oro co caracat nana pain ca miri'om cocon Iri' Jam pane, je pain oro ca pan teretem nucucun, je pain oro ca tomi' napat nucucun pain ca tomi' napat cocon Iri' Jam pane. Ac i ma' na ca wara tomi' pe nucun Enoque cocon oro co caracat nana pain ca miri'om cocon Iri' Jam.

¹⁶ Xi tomi' wijimi taxipa' ara caca ta. Tama' tomi' em' xucucun. Ara taxipa' nanain ca param pan nucucun ca om awi. Tomi' xec xec taxipa' nana, tomi' ximama' nonon oro wari' pain ca awi hwe awi hwe cocon, ma' ta ara mi' maparut pain ca param pan nuxut ta tata.

Ca hwara' opa je pain ca howa nuhu' ta tococwa

¹⁷ Ane tomi' xim xuhu' pain i ca' ne, tomi' inuhu' pain ca tomi' querec te xuhu' ca'. Mam' pe wet jein ca wara tomi' caca oro apóstolo co tomi' hwet nanain capijacon Taramaxicon nexi' Jeju Cristo pain cara pane.

¹⁸ Tomi' ca' nunuhu' pane: Wixicam pin iri tara oro xec nein ca in qui' ta' ca Jeju Cristo ne, ma' ac caca tara oro wari' co tatam' tatam' tomi' xirac nonon Iri' Jam cocon oro wari' nucun. Ara e' tatarain ca param pan nucucun pain ca miri'om cocon Iri' Jam.

¹⁹ Wiricoco co to' i'ina nunuhu', mi' nunuhu' pain ca coromicat ni ca' xujuhu'. Xuruxut pan teretem nana pain ca win xumu e' cacain ca coromicat ne ca wari' wa ca'. Om nonon Tamataracon Iri' Jam quem.

²⁰ Ane tomi' ca' xuhu' pain ca tomi' querec te xuhu' ca' ne. To' hwara' opa xujuhu' pain ca howa cara hwein oro ca ca' na xihwe ca maqui' non Iri' Jam. Tomi' xun Iri' Jam iri je ne, mam' tomi' ac hun tara pain ca hwara' opa nein Tamataracon.

²¹ Tama' mam' pe wet jun Iri' Jam pain ca om noc cuhu' ma'. Winim' cara jein xec nein ca mi' xim cuhu' pain ca om pi' ra ha' ne ca e' wa Taramaxicon nexi' Jeju Cristo quem. Mi' turuhu' pain, xi xiram pa' ara cuhu' ta.

²² Ma' iri tatara co tara ta'a tara ta'a wet nana pain ca howa nucucun ne, xiram pa' ac huhun tara.

²³ Ma' iri tatara oro xucucun co wixicaracao' mi' xun wawa pain cote ne xe ne, quep xiho' ac huhun tara, ac ca cut ca' huhun tara pain xe. Ma' iri tatara oro xucucun co pan teretem nana ne, xiram pa' ac huhun tara quem. Ma' tara xumuhu' cocon me, ma' ta om camara' wi huhun pain ca pan teretem nucucun. Noc jein ca caracat nucucun, querec querec ac homiricon wom jein ca caracat nucucun.

Ca awi na Iri' Jam ta ca pain ca pi' pin ne ca xirao' nucun

^24-25 Xica' pe na Iri' Jam co Iri' Jam ma', co mam' to' witan napari' con Taramaxicon nexi' Jeju Cristo. Hwara' opa na. Ha' non pain ca narain ho' cuhu' pain ca camara' wa pain ca caracat wa ta. Ha' non pain ca to' om pin cain oro ca to' em' nuhu' ma', je pain ca ja' tomi' querec te tamana cuhu' pain ca aram aram coco' quima hwet xine pain ca awi tamana ne ta cuhu' ma'. Na e' na pain ca tomi' querec te xun pain ca awi tamana nucun ma', je pain ca iri' Taramaxicon nucun ma', je pain ca hwara' opa tamana nucun ma', je pain ca taramaxicon hwara' opa tamana pan ca quem. Wara ac i ma' na pain cara pane, pain ca om quep querec cain oro carawa pane, ac i ma' ac i ma' wet na pain xocori ca', ac i ma' ac i ma' cara tara ta. Amém, iri'o' na ca tomi' ne ta. Je i ca' ca xirao' ne ca'.