João 5 - Tradução Bíblica Pacaas Novos

Ca quep xio pin con wari' co carama pe Jeju

¹ Om ca pain homa ne, mao ac cain na Jerusalém Jeju. Xi ma' pe ara nein i cain ca tomi' querec te nuxut pain ca judeu urut ca'.

² Ma' pe nain Jerusalém ca ja' pe wa com. Ac wijimain xuterem' paxi' na. Pe ja' pan nain cote ne man ca corom hwet ac wa oro xirim pain cidade ma'. Manain ca Corom Corom ac ne Ovelha na wixinain. Ma' 5 na xirim ca to to mam' pin nain ca ja' pe wa com ma'. Om ca tao' caho' xine oro xirim. Betesda urut pain wixinain ca ja' pe wa com pain aramaico ma', je i ma' wixinain capijaxut pain ca judeu urut ca'.

³ Je ca toco' to caca co caxi nana ma'. Mija nana. Ma' nana co om tococon. Ma' nana co caji at nana. Ma' nana co carama to nana. (Winim' nanain ca meo ne com ma'.

⁴ Ma' ara xi' na xec nein ca aram aram quiji' qui' ca jam co taramaja mi' non Iri' Jam ma', meo meo ac cain na com, je curucun pane. Co corom cain' nain com pain ca xo' meo nein ma', xio pin ac ca na. Caxi tamana paxi' na, xio pin ac ca na ta.)

⁵ Ma' na wari' co terem' pe nain i ma' quem. Carama pe na. Ma' 38 na cawaxi' pain ca carama pe ca.

⁶ Querec pan ac con na Jeju. Querec non pain ca terem' pe cain i ma'. Pain cara pane ca caxi ca co ma' ta ac cocon na oro wari' ma'. Tomi' pan ac con na Jeju: Param main ca xio wa quem non.

⁷ Xi ma' capa' wari' co quep xiho' napa' ta taramaxicon ac ca na. Meo iri xira com ca' ne, ma' ac ca xira co an quiji' mi' napa' pain. Ane om capa' wari' co quep xiho' napa' ne. Corom ta' paxi' ina, corom ca' corom ca' nanapa' xucucun co caxi nana ma' na ca tomi' ca ma'.

⁸ Tequi' pe ra ta ac con na Jeju. An rain witam ca mam' terem' pe ma ma'. Xut ra ta ac con na.

⁹ Xio hap pin ac ca na. An ac cain na witacon ca mam' terem' pe ca ma', xut ac ca na quem. Sábado na xec nein ca quep xio pin con wari' Jeju ma'. Xao to wa taxipa' urut pain xumuxut pain sábado pain ca judeu urut ca'.

¹⁰ Je ca tomi' cocon co ma' co quep xio wa oro taramaxicon ma': Sábado na xec ca'. Om ca na ne pain ca an main witam pain xec ca' nonon.

¹¹ Ane tomi' pan cocon caram ma' ma' ne: Om na, tomi' napa' co quep xio pin napa' ne. An mao rain witam ca mam' terem' pe ma ma' napa'. Xut ra ta napa', ac i ma' na ca tomi' cocon ma'.

¹² Tomi' querec pan ac cocon na oro taramaxicon: Ma' co tomi' nem pain ca an rain witam ca mam' terem' pe ma ma' ta nem? Ma' co xut ra ta nem quem?

¹³ Om ca taxi' ton ta ac ca na. Xi wara xut xut pan' am ara ca pain iri' tococon wari' Jeju ma' ta.

¹⁴ Om om, mam' mami' ac con na Jeju. Mam' pe non pain ca tao' caho' nein xiricon Iri' Jam. Taraju wet ne e' ac con na. Xio pin ma. Ta caracat mami' ma me. Ma' ta om quep quem iri' ca om awi wa. Jain jain paxi' ma pain ca caxi nem cara ne. Mo ta quep quem iri' ca om awi wa, jain jain tamana ac ma tara na ca tomi' con ma'.

¹⁵ Hwet mao ac ca na. Tomi' toton oro taramaxicon ma' e' ac ca na, hwet ac tococwa na, tomi' ac tococwa na: Wirico Jeju co quep xio pin napa' ta tata.

¹⁶ Je ca quep em' xun Jeju ta cocon ma'. Xi om ne ca quep xio pin ara con wari' pain sábado ca', pain xec nein ca xao pe wa ne ca xumu wa ta nana.

¹⁷ Ane tomi' pan cocon Jeju ne: Om ca taramaja maho' ca Te. Ac i ma' ina quem, om ca taramaja maho' ta' ta nonon.

¹⁸ Mana' tamana pin ac cocon na. To' pa' pin xun ta nonon. Om ca mana' e' cocon pain ca om tomi' ha' nucun pain ca taramaja cain sábado ma'. Mana' nonon pain ca Te inon Iri' Jam ta ca ma'. Iri' Jam ina xi' ma na ron, ac i ma' na ca tomi' nucucun pain ca mana' nucucun ma'.

Ca wirico Te Iri' Jam na co mi' napa' pain ca hwara' opa ne cocon oro taramaxicon Jeju

¹⁹ Tomi' ac cocon na oro taramaxicon Jeju: Wata' pain ca Panxica Iri' Jam ta' ca', om na carawa ca ara taxi' ta' pain ca param pan ne. Tomi' iri'o' inuhu' ta. Querec iri inon Te pain ca ara cain ma' ne, je ca ara ta' ca'. Oro carawa ca ara ca Te cwa', je ca ara ta' quem.

²⁰ Xi noc camain' capa' Te pain ca Panxita' capa' ca'. An hwet mi' napa' pain carawa ca ara ca. Ame hwe e', main an hwet mi' tarapa' pain oro xijein carawa ca hwara' opa tiquin' ca' nain oro ca ara ne ca wara querec hwe cara ne. Wa wa ac hwein tara quem.

²¹ Noro jun Te pain ca to' e' mami' cocon co cono' nana ma'. Ac i ma' ina quem. Oro wari' co param ta' ma', to' e' inonon ta.

²² Te ma', om ca an xiho' con juiz co tomi' querec non wari' pain carawa ca ara ca ma', je pain ca wum co em' ta con ma', om na. Tomi' pan napa' pain ca Panxita' capa' ca'. Wum tara co an xiho' non juiz ta napa'. Wum tara co tomi' querec non wari' pain carawa ca ara ca ma', wum tara co em' ma ta non ta napa'.

²³ Ma' ta in ac in ac pi' pin quequem oro wari' ta arain napa'. Win ne ca in ac cacapa' ca' napa'. Oro wari' co om in ac nanapa' pain ca Panxica Iri' Jam ta' ca', om ca in ac cocon Te co hwet roron oro wari' ta napa' quem.

²⁴ Je ca tomi' xuhu' ca', tomi' iri'o' inuhu' ta ac tococwa na. Oro wari' co taraju wet nanain capija ca', oro wari' co howa nonon Te pain ca hwet roron oro wari' ta capa' ca', ma' ac cocon na ca om pi' ra ha' ne ca e' wa pain pawin cain. Om ta wap tococwa pain ca caracat nucucun. Wara witan ca' nanain ca cono' wa. Wara ma' nonon ca om pi' ra ha' ne ca e' wa pain pawin cain.

²⁵ Maqui' pin na xec nein ca tomi' toton ta' oro wari' co om howa querec nanapa' ma', co ac ca cono' caca na pain ca om howa cacapa' ma'. Taraju iri tatarapa' pain ca tomi' toton ta' ne. Mo ta howa pin cacapa', e' cara ac caca tara. Tomi' iri'o' inuhu' ta.

²⁶ Wirico Te co mi' nain ca e' wa. Ac i ma' ina quem, pain ca Panxita' capa' ca'. Mi' inain ca e' wa quem. Xi om ne ca mi' rain ca e' wa ta ara capa' ta.

²⁷ Ac juiz ra cocon oro wari' ta napa', tomi' querec roron pain oro carawa ca ara caca napa'. Am em' caca, am om em' caca, taxi' pin ac momon tara ta napa' quem. Xi wata' ara ne co Iri' Wari' cwa' ta na ca tomi' tococwa ma'.

²⁸ Ta wa ina me mahu' pain ca tomi' ne ca' me ac tococwa na. Main maqui' ta' ara xi' na xec nein ca taraju taraju pi' pin xin cacain ca tomi' ne oro wari' co wara cono' nana ma'.

²⁹ Hwerehwet ca' ac cacain tara oro manain pacun ca cut corom to tococwa ma'. Caram ma' co ara xo' nana pain ca e' e' wet caca pane, e' mami' ac caca tara, om ta pi' ra ha' ne ca e' nucucun quem. Caram ma' co pan teretem nana pain ca e' e' wet caca pane iri tatara ne, e' mami' ac caca tara, tomi' ac toton tara pain ca caracat nucucun: Em' hwe ta, mama' jein cote ne xe, mon to wet cara ac hwein tara i cain ta toton.

³⁰ Om na carawa ca ara taxi' ta' pain ca param pan ne. Tomi' querec iri inonon oro wari' pain ca ac juiz ta' cocon ne, pain ca tomi' querec toton pain carawa ca ara caca ma', pain ca wum co em' ta toton ma', tomi' ha' e' inain ca tomi' nucun Te pain ca tomi' querec roron capa' ma'. Tomi' xo' e' inonon pain ca em' hwe, mama' jein cote ne xe ta toton. Xi win xumu tain ca param pan ne ta. Win xumu e' inain ca param pan nucun Te co hwet roron oro wari' ta napa' cwa' na ca tomi' cocon oro taramaxicon Jeju pane.

³¹ Mo xi xica' pe ta' pain ca tomi' hwet xuhu' pain oro ca taramaja ne ca', om xi na ne pain ca howa ac mahu' ta ac tococwa na oro taramaxicon.

³² Ane ma' ca Te co tomi' hwet napa' pahu' ne. Taxi' inon pain ca om tomi' ximao ca, taxi' inon pain ca tomi' iri'o' ca quem tata.

³³ Wahu' ma', tomi' huhun oro win ma' nuhu' pane, tomi' querec jun João ta huhun pane ac tococwa na. Tomi' hwet ac capa' na pahu'. Iri'o' na ca tomi' cuhu' quem.

³⁴ Om paxi' na ca ma' xirapa' na ton wari' co tomi' hwet napa' pahu', om na. Ane tomi' e' xuhu' con João cara pane ne. Ma' ta to' witan cuhu' Te ta inuhu'.

³⁵ João cara pane, ac naran na. Ac ca toha ca na pain ca pijim' ca pane. Win ne ca toha ne naran ca tom ma', ac i ma' na ca toha mi' cuhu' pain xumuhu' pane. Tomi' querec te paxi' hwein ca pijim' nucun pain ca an xiho' cain naran pane quem tata.

³⁶ Ane ma' capa' xijein carawa ca to' querec pin' napa' pahu' ne, hwara' opa tiquin' ca' nain ca tomi' ca João pane, pain ca to' querec pin' capa' pahu' ac tococwa na. Oro carawa ca ara ta' ca', ca ara rain capa' Te cwa', je ca to' querec pin' napa' pahu'. Querec iri hwein oro carawa ca ara ta' ca' ne, querec pin' ac mahu' na pain ca hwet roron oro wari' ta capa' Te cwa' pahu'.

³⁷ Te ma', co hwet roron oro wari' ta napa' pane, tomi' hwet pan napa' pahu' quem. Om ca taraju camain' hwein iri' ca tomi' nucun, om ca querec pin' hun quem.

³⁸ Om ca pe ho' cuhu' capijacon pain xumuhu' ma' quem. Xi howa mahu' pain ca hwet roron ta capa' pahu' ta.

³⁹ Noro tamana paxi' hwein capijacon Iri' Jam ca xirao' pe xine ma'. Coromicat ac hwe na: Mo ta noro xin capijacon Iri' Jam ca', mam' ac xin tara ca om pi' ra ha' ne ca e' wa pain pawin ta paxi' na ca coromicat nuhu' ma'. Je capijacon Iri' Jam ca tomi' hwet pan napa' quem.

⁴⁰ Ane om howa mahu' ne. Howa xine me paxi' inuhu'. Ma' ta mi' xuhu' pain ca e' wa ta inuhu'. Ane noc mahu' ne. Om ca howa je na hwe ta tata.

⁴¹ Om ca ma' xirapa' na ton wari' co wa wa napa' quem ac tococwa na.

⁴² Xi querec pin' ara xuhu' ta. Taxi' inuhu' pain ca om noc urut pum ta hun Iri' Jam pain xumuhu'. Om ca tomi' iri'o' hwe pain ca om ca noc urut pum ta hun ma'.

⁴³ Hwet paxi' inuhu', xi om ne ca hwet roron ta ara capa' Te pahu'. Ane noc mahu' ne. Hwet iri nuhu' wari' pain ca param pan nucun ne, tomi' querec te ac hun na.

⁴⁴ Cain' cain' xihwe quem? Ma' na ca howa ac hwe ra? Xi param e' ara huhun oro wari' pain ca in ac cucuhu' ma'. Je xi in ac tarapari' ta hun Iri' Jam co xica' xat cwa' quem?

⁴⁵ Wirico tara Jeju co tomi' hwet non pain ca pan teretem nexi' Iri' Jam ma' mahu' ra? Ta coromicat ac i ma' mahu' me ta. Xi wata' ne co tomi' hwet ton non pahu' ta. Moisés cara pane, co howa urut hwe ma', wirico tara co tomi' hwet ton non pain ca pan teretem nuhu'.

⁴⁶ Mo xi howa iri'o' hwein ca xirao' nucun Moisés cara pane, howa ac mahu' xira pain ca tomi' xuhu' pain xocori ca' quem. Xi om ne ca xirao' pe ara capa' ta.

⁴⁷ Ane om howa hwein ca xirao' nucun ne. Je ca om howa ac hwein ca tomi' ne ca' quem. Ac i ma' na ca tomi' cocon oro taramaxicon Jeju pane.