João 19 - Tradução Bíblica Pacaas Novos

¹ Wap jun Jeju cwa' ta ac cocon na oro soldado Pilatos ma'.

² Ton nanain caji macon ca puxu ma', mo' ac cacain na, mo' mo' an xiho' nanain caji waji' ca to taxipa' caca oro taramaxicon pain winacocon ma', pe ac cocon na pain winacon. Pe nonon con cote ca wom co ac womicon taramaxicon co paca' awi ma' quem.

³ Wixicam wixicam ac cocon na, tomi' ximama' ac cocon na. Awi na taramaxicon nucucun oro judeu cwa' nana pain ca tomi' ximama' cocon ma', wap wap ac cocon na pain tocon quem.

⁴ Hwet mao mami' ac ca na Pilatos, tomi' ac tococwa na oro taramaxicon nucucun oro sacerdote ma'. Taraju wet xine e'. An hwet mi' ho' xuhu' con. Ma' ta taxi' mahu' pain ca om mam' camain' tain ca pan tem wa con ta tata.

⁵ Hwet qui' ac ca na Jeju. Pe cara nain caji macon ca puxu pain winacon. Pe cara non cote ca wom co ac womicon taramaxicon co paca' awi ma' quem. Noro jun wari' cwa' ta ac ca na Pilatos.

⁶ Querec iri nonon Jeju oro taramaxicon nucucun oro sacerdote cocon oro guarda co querec wet nanain cote ne xiricon Iri' Jam ma' ne, merem ac caca na: Na e' na pain ca tatatain mi' tocwa pain pana ta. Na e' na pain ca tatatain mi' tocwa pain pana ta na ca merem nucucun. Wahu' pan tatara co tatatain mi' nonon pain pana ta ac ca na Pilatos. Om ca mam' tain ca pan tem wa con ta na ca tomi' tococwa ma'.

⁷ Je i ma' ira ac caca na oro taramaxicon nuxut pain ca judeu urut ca'. Na e' na pain ca mi' pin ca, xi Panxica Iri' Jam ina ta ara ca ta. Wari' co tomi' ximao ac i ma' ma', mi' pin tara ta na ca xirao' nucun Moisés ta nana pain ca merem cocon Pilatos.

⁸ Taraju iri nain i ma' Pilatos ne, jin' tamana ac ca na. Wara jin' paxi' na, jin' tamana pin ac ca na.

⁹ Corom mao mami' ac cain na xiricon, tomi' querec ac con na Jeju. Main ca maqui' ma quem ac con na. Ane tacana pe pan ca Jeju ne. Om ca tomi' camain' ca.

¹⁰ Je xi tomi' mapa' quem ac con na Pilatos. Om ca querec pin' mapa' pain ca taramaxicon ta' ca' ra? Na napa' pain ca om pin jun toton oro soldado ne pum, na napa' pain ca tatatain mi' jun pain pana toton pum quem non.

¹¹ Mo xi om mi' quem pain ca taramaxicon wa Te Iri' Jam ma', om xi na camain' quem pain ca ara mi' mapa' pain ca param nem ta ac con na. Je ca tomi' xim ca' taramaxicon ac con na. Co ma' co o mi' jun con Pilatos napa' pum, wirico co caracat tamana pan. Caracat tiquin' ca' nem ta non.

¹² Taraju iri nain i ma' Pilatos ma' ne, jain jain ac ca na, om pin xiton Jeju na paxi' na ira. Ane merem cara caca oro taramaxicon nuxut pain ca judeu urut ma' ne. Mo ta om pin mon co ma ma', om ca win ma' ne mami' mon taramaxicon nexi' co pe nain Roma ta. Xi ari ara con taramaxicon wari' co tomi' ximao ac i ma' ta, pain ca taramaxicon ina ta ca ma' na ca tomi' cocon ma'.

¹³ Taraju iri nain ca tomi' nucucun oro wari' Pilatos ma' ne, o hwet qui' ac con na Jeju, xao pe ac cain na ca mam' xao pe nucun ma', ca tomi' querec pe cocon wari' co pan teretem nana ma'. Gabatá urut pain ca xao pe pe ca ma', je i ma' wixinain pain capijaxut pain ca judeu urut ca', pain aramaico ca'. Wana ca xao taparapa' xine pacun nein na ca tomi' mao ne wixinain quem.

¹⁴ Wixicam pin na xec nein Páscoa. Om ca pira camain' ne, wara ara xo' xin nanain oro carawa nein oro win ma' nuxut. Pawin pin na xina quem. Noro jun taramaxicon nuhu' cwa' ta ac cocon na oro win judeu urut Pilatos ma'.

¹⁵ Ane merem caca ne: To' pa' pin ron. To' pa' pin ron. Tatatain mi' ron pain pana ta na ca merem nucucun. Cain' cain' xihwe quem? Taramaxicon ne hun ma' ira! Param mahu' pain ca tatatain mi' jun pain pana toton oro soldado ne cwa' ra? Om na, om ca taramaxicon ne urut con ta. Ma' xica' pe na taramaxicon pain Roma ta. Wirico co taramaxicon ne urut ta nonon Pilatos oro taramaxicon nucucun oro sacerdote.

¹⁶ Ma ac tococwa na. An mao jun ta, tatatain mi' jun pain pana ta ac tococwa na oro soldado nucun. An mao ac cocon na oro soldado nucun Pilatos.

Ca tatatain mi' cocon pain pana Jeju

¹⁷ Hwerehwet ca' ac cacain na cidade. Wirico pan na Jeju co an tiquin' nain panaxicon. Xuruxut xuruxut hwet ac cacain na ca tamaja pan ne macan' ma', ca Maxinain Tacawaji' caca oro romano ma'. Gólgota urut pain wixinain pain aramaico.

¹⁸ Je ca tatatain pe cocon pain pana. Ma' 2 ac caca na co tatatain mi' wawa pain pana quem. Pe nain iri' curucun xucun ma', pe ac cain na paraxicon xucun ma', ximija pe ac ca na Jeju ma' quem.

¹⁹ Pilatos ma', wara tomi' xo' nonon oro soldado nucun ira: Xirao' pe jein wixicon pain pana ma', tatatain mi' ac hwein tara pain tamain panaxicon pain winacon quem. Ca' tara ca xirao' nein pahu': Jeju co maqui' nain Nazaré. Taramaxicon nucucun oro judeu ta tara ca xirao' nein pahu' ta nonon. Ara ac cacain na.

²⁰ Mija nana wari' co noro nanain ma', xi pira ca' nein cidade ca tatatain pe tocwa Jeju ta. Pe xipana na. Ca xirao' nucucun pain wijimain pana ma', xirao' nanain pain capijaxut pain ca judeu urut ca', je pain capijacocon oro romano, je pain capijacocon oro grego quem.

²¹ Mo hwet ac cocon na Pilatos oro taramaxicon nucucun oro sacerdote. Tomi' ac cocon na: Om xi taramaxicon nucucun oro judeu ne ca xirao' nein cocon ta. Ca' xirarain con: Taramaxicon nucucun oro judeu ina ta na, ac i ma' xirarain con ta nonon.

²² Je i ma' ta ac ca na Pilatos. Je ca xirao' je toton ca'. Om ta an in tain ta na.

²³ Tatatain mi' iri nonon pain pana oro soldado ne, cut in ac cocon na womicon. An an xam' xun ta ac caca na, an xica' an xica' xam' ac cocon na. Ma' 4 nana oro soldado co an nonon ma'. Ma' na iri' curucun womicon ma' quem. Om ca oc tocwa, ten cote ca e' nonon con.

²⁴ Om ta i' xun iri' curucun cwa' ac caca na. Ara e' xin ca ara taxipa' iri', ma' ta taxi' xun co an ton non ma' nana, ara ac cacain na. Ac i ma' na ca hwet pin ne ca xirao' pe xine capijacon Iri' Jam pane. Ca' na ca xirao' nein con: An an xam' nonon womu. Ara ac cacain na ca ara taxipa' caca ma'. Ma' ta taxi' xun wari' co an ton non ta ac caca na con iri' curucun womu quem, ac i ma' na ca xirao' pe xine pain capijacon Iri' Jam pane. Je ca ara caca oro soldado ma'.

²⁵ Coco' ja' pan nanain panaxicon Jeju oro narima' ma'. Mo nana: Jicon ma'. Xequem jicon, coxa' cama jicon ma'. Maria manacon Clopas ma'. Maria Madalena ma' quem.

²⁶ Querec nam jicon Jeju ma'. Querec napa' pain ca pe ja' pan tam quem. Iri' win ma' ne napa' Jeju. Querec iri naparut ne, tomi' ac cam na jicon: Cawiji ron ta nam pata'.

²⁷ Na' ram quem ac capa' na quem. Ma ac ton na, an mao ac tam na pain xuru. Pe ho' ne pain xuru ca' ac tam na, pe ho' ac capa' na quem.

Ca mi' pin nucun Jeju

²⁸ Taxi' pin ac xucun na Jeju pain ca ara awori pi' pin cain ca ara ra con Cote ca pane. Ma' xica' pe na ca xirao' pe xine capijacon Iri' Jam ca om hwet querec con. Je ca tomi' ca' ca: Toc xita' com na ina me na.

²⁹ Pe nain i ma' too ca ji'ao pe xine caji comi uva ca tup ma' quem. Moin' na. An ac cacain na caji hoho hoho ma', xin cam ac cacain na pain caji comi uva ma', moin' pe ac ne na. An pe ac cacain na pain tamain taparain pana ma', ca hissopo urut ma'. An piri' mi' ac cocon na pain capijacon.

³⁰ Toc pin iri nain ne, tomi' ac ca na: Ara awori pi' pin inain ca taramaja ne ta Te ac ca na. Maram quiji' mao ac ne na winacon. Mi' inem pain tamatara ca' Te. Querec wet rain ta non, mi' ac con pain na.

Ca xucun' tape cain quiricon Jeju soldado

³¹ Mi' pin iri na Jeju ne, wara wixicam pin nain xec nein ca wara ara xo' xin urut pain carawa nein Páscoa. Xec sábado ta' na quem. Tomi' querec te paxi' urut pain oro xec nein sábado ma', ane tomi' querec te tamana urut pain xec nein sábado ca jao jao ma' nain xec nein Páscoa ne. Oro taramaxicon nuxut pain ca judeu urut ma', noc nanain ca warawa cara nein pana curucucun orojima' pain sábado ma'. Je ca tomi' cocon Pilatos ma': Tomi' roron oro soldado nem ta. To' caracat pin jein aracocon co tatatain mi' wawa pain pana, ma' ta cono' hap caca ta roron. Cut quiji' ca' ac huhun tara pain pana ta roron. Ac i ma' na ca tomi' cocon ma'.

³² Mo hwet cain' ac tococwa na co tatatain wi wawa con Jeju ma', to' caracat pin ac cacain na aracon xucun ma', to' caracat pin ac cacain na aracon xucun ma' quem.

³³ Hwet iri nonon Jeju ne, querec pin' ac cocon na pain ca wara mi' pin nucun. Je ca om to' caracat pin cacain aracon ma'.

³⁴ Soldado ma', win ma' caca oro xucucun soldado ma', xucun' tape e' nain quiricon Jeju. Ao hap ac ne na wic je com quem.

³⁵ Querec inain ca mi' pin nucun quem. Iri'o' na ca xirao' ne ca'. Om ca mixein ta', iri'o' na ca xirao' ne ca'. Je ca xirao' mi' xuhu' ca' pain. Ma' ta howa cara hun quem inuhu'.

³⁶ Om ca to' caracat xine aracon Jeju. Xica' pe na ca xucun' tape e' tocwa pain quiricon. Ma' ta hwet pin ne ca xirao' pe xine capijacon Iri' Jam pane. Ca' na ca xirao' pe nein con: Om ca to' caracat camain' xine aracon. Ac i ma' na ca xirao' pe nein con.

³⁷ Ma' na wirain ca xirao' pe nein capijacon Iri' Jam ca tomi' ca' quem: Noro totoron co xucun' tape pin caca pain quit. Ac i ma' na wirain ca xirao' pe xine capijacon Iri' Jam con Jeju.

Ca an corom pe xine curucun Jeju pain manain pacun

³⁸ Tomi' ac con na Pilatos José. Wari' nein Arimateia na José ma'. Howa paxi' non Jeju José pane, ane om tomi' hwet cain ca howa nucun ne, xi jin' ara cocon oro taramaxicon nuxut pain ca judeu urut ta. Tomi' ac con na Pilatos José: Mi' ne pain curucun Jeju ta non. Ma, an mao rain ta ac con na. Mo hwet ac cain na, an quiji' ca' ac cain na pain pana.

³⁹ Nicodemos ma', co hwet towa non Jeju pain cara pane, ja' ja' non José. Cut nain waraqui pana ca hu xain tamana ma', je aloés pain mirra ma'. Mija na con. Xite na. Ac ca 34 ne na quilo nein.

⁴⁰ An mao ac cacain na curucun Jeju. An ac cocon na wom co awi. I' xi' ac cocon na, cam ja' ac cocon na pain waraqui pana ma', wiric pa' ac cacain na curucun Jeju con. Je curuxut pain ca judeu urut ca', pain ca an corom to xun pain manain pacun urut cocon wari' co cono' nana ma'.

⁴¹ To nain i ma' oro panaji memem. Pe ja' pan nain ca tatatain pe tocwa Jeju. Je ca pe ne manain pacun ca an corom pe xun tocwa wari' co mi' pin quem. Iri' xocori, om ca an corom pe querec tocwa pain wari' co mi' pin.

⁴² Iri' xec nein ca ara xo' xine oro carawa nein ca tomi' querec te nuxut ma'. Xec sábado ta' na. Je ca an corom pe hap cacain curucun pain manain pacun ca to ne oro panaji memem ma'. Xi pe xipana ara ne ta.