João 17 - Tradução Bíblica Pacaas Novos

Ca tomi' mi' caparut con Cote ca

¹ Tomi' tomi' pi' pin iri naparut pain ca tomi' nucun ma' ne, noro pawin ac ca na, tomi' ac con na Cote ca. Te ac con na. Maqui' pin napa' xec nein ca mi' pin ta' ne ta. An hwet pe rain ca hwara' opa ne pain ca awi tamana ne pain ca Panxita' mapa' ca'. Ma' ta an hwet pe tain ca hwara' opa nem pain ca awi tamana nem quem.

² Xi mi' ara mapa' pain ca taramaxicon pe ho' toton oro wari' ta. Ma' ta mi' momon pain ca e' cara to ho' quequem oro wari' co mi' xim cwa' mapa' pane.

³ Oro wari' co e' cara xi' nana ma', na e' na pain ca querec pin' quequem pain ca Iri' Jam iri'o' ma ma'. Om na win Iri' Jam ma ta teterem. Xica' pe ma ta teterem. Na e' na pain ca querec pin' cacapa' pain ca Jeju Cristo ta' ca' quem, pain ca hwet roron oro wari' pain macan' ta mapa' quem.

⁴ An hwet mi' inonon pain ca hwara' opa nem pain ca awi tamana nem pain macan' ca'. Xi om ne ca ara ara pi' pin ara tain ca taramaja ne ca ara ra mapa' ta.

⁵ In hwet ho' xim inem ta Te ac con na. In hwet iri xim ne, an hwet pe mami' ac main tara ca awi tamana ne pain ca Iri' Jam ne ca wara ma' napa' pain ca pe ho' pe ho' wet xim pain cara pane, pain ca om ma' querec ne macan' pane non.

⁶ Oro wari' co tora' ma pain macan' ca', co mi' mapa' cwa', an hwet mi' inonon pain ca hwara' opa nem pain ca Iri' Jam nem ta ac con na. Wara wari' ne momon, mi' ac mapa' cocon na. Tomi' ha' nanain capijam quem.

⁷ Aram aram taxi' pin nenem pain ca mi' pan mapa' pain oro ca ara ne, je pain oro ca tomi' ne ca'.

⁸ Xi tomi' hwet ara toton pain ca tomi' hwet roron mapa' ta. Howa nanapa' quem. Taxi' pin nanapa' pain ca maqui' xim pane. Howa nenem pain ca hwet roron oro wari' ta pan mapa' quem.

⁹ Tomi' mi' inem cocon. Om ca tomi' mi' xim cocon oro wari' co om howa nanapa' ma'. Tomi' mi' inem cocon co mi' mapa' cwa', xi wari' ne ara momon ta.

¹⁰ Oro wari' co wari' ne ma ma', wari' ne inonon quem. Oro wari' co wari' ne ta' cwa', wari' ne momon quem. Oro wari' co mi' mapa' cwa', an hwet pe nanain ca hwara' opa ne pain ca awi tamana ne quem.

¹¹ Om ta pe mami' tain macan' ca' quem. In hwet ho' xim inem. Co taxipa' nanapa' cwa' iri nana ne, to wet pan tatarain macan' pa'ao' non. Awi tamana ma ta Te ac con na. Narain ho' roron pain ca om awi wa, mam' narain ho' roron pain ca hwara' opa nem ma', je ca hwara' opa nem ca mi' mapa' ca'. Narain ho' roron pain oro ca to' i'ina nonon, ma' ta xica' pe ne ximicocon. Win ne ca xica' pe ne ximixi' ca' quem.

¹² Pe ho' pe ho' wet iri inonon ne, narain ho' ac toton na pain oro ca om awi wa pane, mam' narain ho' inonon pain ca hwara' opa nem ca mi' mapa' pane. Querec wet xo' inonon. Om ca pan' ara'am camain' caca. Ma' xica' pe e' na co ma' co mao tarain cote ne xe ta ma pain cara pane, pan' am na co ma'. Ma' ta hwet pin ne ca xirao' pe xine pain capijam con pane ta non.

¹³ Hwet ho' xim inem quem ac con na. Tomi' mi' inem cocon pain ca pe pe wet tain macan' ca'. Ma' ta tomi' querec te tamana caca inonon. Win ne ca tomi' querec te tamana ta' ca'.

¹⁴ Tomi' hwet inonon pain capijam. Je ca noc cocon oro wari' co om howa nanapa' ma'. Xi win ma' ne pan tococwa pain ca wari' nein macan' caca ta. Win ta' ca', pain ca om win ma' ne toton ca' quem.

¹⁵ Om ca tomi' xim pain ca cut ca' roron pain macan' ca' xim. Tomi' e' inem pain ca narain ho' roron con Caxicon Jam co caracat ta xim.

¹⁶ Om ca win ma' ne cocon oro wari' co om howa nanapa'. Win ta' ca', pain ca om win ma' ne toton ca' quem.

¹⁷ Capijam ca iri'o' ca', je tara ca mam' mi' momon pain ca win xumu quequem pain ca taramaja mi' quequem ma'.

¹⁸ Hwet jujun oro wari' pain oro xijein macan' ca' inonon. Win mapa' pane, pain ca hwet roron oro wari' pain macan' ta mapa' pane.

¹⁹ Win xumu inem pain ca taramaja mi' xim pane. Ma' ta quep xiho' toton pain ca win xumu quequem pain ca taramaja mi' quequem inonon. To' win xumu totoron ca hwara' opa nein capijam ca iri'o' ta non.

²⁰ Om ca tomi' mi' e' xim cocon co taxipa' ta' cwa' ac con na. Tomi' mi' inem cocon oro wari' co aram aram howa xim nanapa' pain ca taraju xin cacain ca pijim' nucucun quem.

²¹ Mi' roron pain ca xica' pe ne ximicocon quem. Win ne ca xica' pe ne ximixi' pain ca win cwere xim ca', je pain ca win cwere mapa' quem. Mi' roron pain ca win cwere cacapari' quem. Ma' ta howa pin quequem oro wari' co om querec pin' nenem pain macan' ca'. Howa teterem pain ca tomi' mapa' pane, pain ca hwet roron oro wari' pain macan' ta mapa' pane quem.

²² Mi' mapa' pain ca hwara' opa ne pain ca awi tamana ne pane, mi' tiquin' ac toton pain na quem. Ma' ta xica' pe ne ximicocon inonon. Win ne ca xica' pe ne ximixi' ca' quem.

²³ Win cwere inonon. Win cwere mapa' quem. Ma' ta xica' pe pin ne ximicocon. Ma' ta querec pin' quequem oro wari' co noc nenem ma', ma' ta querec pin' quequem pain ca hwet roron oro wari' pain macan' ta mapa' pane. Ma' ta querec pin' quequem pain ca om noc momon ma' quem. Win ne ca om noc mapa' quem non.

²⁴ Tomi' mi' inem cocon caram cwa' co mi' mapa' cwa' Te ac con na. Param inonon pain ca to ho' cacapa' pain ca pe ne quem. Ma' ta querec cacain ca hwara' opa ne pain ca awi tamana ne ca mi' mapa' ca'. Xi wara tomi' querec te ara mapa' pain ca om tomi' ma' pin querec xine macan' pane ta non.

²⁵ Wum co tama' ara xo' ta Te ac con na. Om ca querec pin' camain' quequem oro wari' co noc nenem. Ane querec pin' xim ne. Querec pin' nenem caram cwa' co mi' mapa' cwa' quem. Querec pin' nenem pain ca hwet roron oro wari' ta mapa' pane.

²⁶ Wara to' querec pin' inonon pain ca hwara' opa nem pain ca Iri' Jam nem. To' querec pin' cara toton pum quem. Ma' ta win cwere toton. Ma' ta om noc xucucun. Win ne ca om noc mapa' ma' quem. Ac i ma' na ca tomi' con Cote ca pain ca tomi' mi' caparut con pane.