Hebreus 9 - Tradução Bíblica Pacaas Novos

Xirim ca in ac pe tocwa Iri' Jam pain macan'

¹ Je ca tomi' xuhu' ca', pain ca wara tomi' xo' qui' cocon oro hwanana Iri' Jam pane. Tomi' xo' tata pain ca ac i ca' tara ca in ac mahu' ta tococwa, tomi' xo' tata pain xirim ca quep je tococwa quem.

² An xat ac cacain na xirim ca in ac pe xun tocwa Iri' Jam ma', ma' 2 na manain pain tequipain. Maxinain Caramaxicon Iri' Jam nanain manain ca pe in qui' ma'. Je ca pe ne too ca mam' tom pe ne naran. Je ca pe ne pana pain oro capam' ca an toco' xo' mi' tocwa Iri' Jam ma' quem.

³ Wa pe nain ximijain xirim cote ca wom co tao' caho' nain wirain manain pain paxicom cain. Pain xijein cacaracon ma', je ca pe ne Iri' Maxicon Iri' Jam.

⁴ Je ca pe ne pana ca toto pa' xine pain ouro ma', ca mam' tom pe xine incenso ma'. Pe nain i ma' wirain pana quem, iri' panaxicon Iri' Jam ca mam' querec pin' tocwa pain ca tomi' an pe xo' mi' qui' tococwa pain ca tomi' nucun oro hwanana pane quem. Toto pa' ta pain ouro quem, pain tequipain je pain xonein ca hwet pe nein, je pain oro quirinain quem. Pain tequipain ma', je ca pe ne too ca cut ho' to xine capam' ca camara' qui' nain pawin pain mahweri pane. Ouro na too nein. Ma' na pana ca mam' pan xu ca Arão cara pane quem, panaxicon ca orot pin pane. Ma' na pacun ca xirao' pe xine ca wara tomi' xo' nucun Iri' Jam pane quem. Je ca cut ho' to xine pain iri' panaxicon Iri' Jam ma'.

⁵ Ma' 2 na jamicon querubim co pa xat tapaxicocon ma', co coco' to nain cacarain capijain panaxicon Iri' Jam. Pa xat na tapaxicocon, taxo' caho' ac cacain na ca pe pan ne ca hwara' opa nucun Iri' Jam pain capijain panaxicon ma', ca xic am pe xine ca caracat nucucun oro wari' ma'. Om ca ha' capa' pain ca tomi' xi' ca' tomi' xi' ca' xam' xuhu' pain oro coximinain caramajinain xirim ca'.

⁶ Quep awori xo' pin ac i ma' nanain xirim je oro caramajinain ma', taramaja to ac cacain na oro sacerdote. Corom taxipa' nanain manain ca pe in qui' ma', ca Maxinain Caramaxicon Iri' Jam caca ma'.

⁷ Pain wirain manain ma' iri na ne, ca pe in mao ma', pain Iri' Maxicon Iri' Jam ma', corom xica' pe na sacerdote co iri' taramaxicon. Om ca corom ximao ca pain oro xijein xec quem. Maqui' iri na iri' xec pain oro cawaxi' ne, corom ac cain na. Om ca na ne pain ca corom e' cain quem. Na e' na pain ca mam' corom ca pain wic. Mi' ac con pain na Iri' Jam. Ma' ta xic am pin main ca caracat ne ca', ma' ta xic am pin main ca caracat nucucun oro wari' pain ca ara mapi' cacain ca caracat nucucun ma' quem ac con na.

⁸ Ac i ma' na ca taramaja caca oro sacerdote pain cara pane, pain ca taramaja to cacain xiricon Iri' Jam ca pe nain macan' pane. Je ca mam' to' querec pin' capari' Tamataracon Iri' Jam pain i ca' quem. Tomi' xo' ca' napari': Pain ca taramaja to taramaja to wet cacain Maxinain Caramaxicon Iri' Jam ma', ca pe in qui' ma', om ca pa querec ne wanaji Iri' Maxicon cain.

⁹ Xiricon Iri' Jam ca pe nain macan' pane, tomi' joc mam' mi' nain oro ca ara ne pain ca in ac tocwa pain xocori ca'. Oro wari' co in ac nonon ma', pain ca mi' cocon pain carawa nucucun ma', je pain ca tom tain' mi' cocon pain winacocon ma' quem, om ca to' om pin ac xine ca toron ne ximicocon pain ca caracat nucucun ta.

¹⁰ Oro ca ara caca pain ca in ac cocon Iri' Jam ma', ara taxipa' e' nanain ca hu pan tococwa pain carawa ca cao' wa, je pain ca toc wa quem, je pain ca hohoc xo' xucucun quem. Tomi' ha' je e' tata, tomi' ha' tomi' ha' maqui' pa' ac cuhu' tara xec nein ca to' xocori pin tain cain oro ca tomi' xo' xim xuhu' ta nonon ma'.

Ca hwara' opa pan ne quicon Cristo

¹¹ Je ca tomi' xuhu' ca'. Maqui' pin na Cristo co sacerdote co iri' taramaxicon pane, co ara mi' napari' pain oro ca wara tomi' pe mi' capari' Iri' Jam cwa'. Corom pin nain xiricon Iri' Jam ma', ca om em' camain' ma', ca awi tiquin' ca' nain xiricon ca pe nain macan' ca', xi quep cacain wari' ta.

¹² Corom mao iri nain Iri' Maxicon Iri' Jam Cristo ne, pain xiricon pain pawin cain, om ca mam' corom cain quinain bode, om ca mam' corom cain quinain wijimain boi quem, om na. Mam' corom pan nain iri' quicon. Pain ca corom mao cain pane, corom mao na. Om ca corom mao mami' cain quem. To' witan cara ac capari' na quem.

¹³ Je ca tomi' xuhu' ca'. Noro jun wari' co ma' non carawa ca om hohot non Iri' Jam ma'. Cam huco' iri ta pain quinain bode je pain quinain boi ne, pan tatain mi' iri ta pain topacon nein wijimain aramanain boi ca tom pin xine ma' ne, to' hohot ac xine na curucun con Iri' Jam.

¹⁴ Ac i ma' na ca hwara' opa ne quinain oro carawa ma'. Hwara' opa paxi' na quinain oro carawa, ane hwara' opa tamana pan ne quicon Cristo ne. Hwara' opa tiquin' ca' nain quinain carawa, xi om ne ca awi tamana ara ca Cristo ta. Om ca em' camain' ca. Ha' non pain ca mi' pan xucun con Iri' Jam pane, xi quep xiho' pan ara con Tamataracon ca e' cara ta. To' hohot pin napari' quicon. To' om pin nain ca em' nexi' pain ximixi' pain ca coromicat nexi'. To' om pin nain ca toron ne ximixi' pain ca caracat nexi'. Om ca to' i'ina mami' capari' oro ca ara nexi' ca to' cono' pin napari' ca'. Ha' pin ac capari' na pain ca in ac xun Iri' Jam co e' cara quem.

¹⁵ Je ca tomi' an pe xo' cain xocori ca tomi' xo' nucun Iri' Jam Cristo ma'. Ma' ta ha' cuhu' pain ca aram aram cut xin hwein oro ca awi wa ca tomi' pe mi' xihwe ca', ca om pi' ra ha' ca' tata pain ca xo' howa xine qui' tococwa pane. Xi mi' pin pe ara cain maxicocon Cristo pane ta. To' witan ca' ac tococwa na pain oro ca caracat nucucun pain ca om tomi' ha' qui' cacain ca wara tomi' xo' nucun quem.

¹⁶ Tomi' xin documento ca xirao' pe ca waximain carawa ma', pain ca xirao' pe cain wixicocon oro wari' co cut xin nanain caramaxicon pain ca aram aram mi' pin nucun ma'. Mo ta aram aram mi' pin ca waximain carawa ma', mo ta cut pin xin cacain caramaxicon oro wari' co xirao' pe wa wixicocon ma', na e' na pain ca querec pin' cain' tocwa pain ca mi' pin ca waximain carawa. Mi' tiquin' ac tococwa tara pain caramaxicon.

¹⁷ Mo ta e' e' wet ca waximain carawa ma', om ca mi' tiquin' ac xine caramaxicon. Xi mi' tiquin' e' ara xine caramaxicon pain ca aram aram mi' pin nucun ta.

¹⁸ Je ca to' pa' mi' jun pain winahu' Iri' Jam ta tococwa oro hwanana pain ca wara tomi' xo' nucun pane quem. Om iri na ca ao ne quinain winacocon ne, om ca to' hwara' opa ac xine ca wara tomi' xo' nucun ta.

¹⁹ Noro jun Moisés cara pane. Tomi' hwet tomi' hwet pi' pin iri nonon oro wari' pain oro ca ara je cocon Iri' Jam pane ne, cam pe ac cain na quinain wijimain boi je quinain bode ma', joc wanan ac ca na pain com. Cam huco' mi' na pain ca xirao' pe xine oro ca ara je ca Iri' Jam ma', cam huco' mi' ac cocon na oro wari' quem. Mam' cam huco' na pain tenenein ovelha ca toto paca' ma', ca pao' pe xine pain wijimain taparain pana ma', hissopo na wixinain.

²⁰ Tomi' ac tococwa na oro wari': Je i ca' wic ca mam' tomi' an pe xo' nain ca tomi' xo' nucun Iri' Jam ca', pain ca tomi' ha' jein oro ca ara je xuhu' ca' na ca tomi' tococwa pane.

²¹ Cam huco' ac i ma' nain wic pain xiricon Iri' Jam je oro coximinain ca mam' in ac cocon quem.

²² Ac i ma' na ca to' om pin xine ca em' nein oro carawa quem. Oro carawa paxi' na, je wic ca to' om pin nain ca em' nein. Mo ta om ao mao ne wic, om ca xic am pin ac xine ca caracat wa ta na. Tomi' ac i ma' ara xi' na ca xirao' nucun Moisés.

²³ Xiricon Iri' Jam ca pe macan' pane, an xiho' e' nain iri' xiricon ca pe pawin cain. Oro coximinain quem, an xiho' e' nain oro coximinain ca to pawin cain. Na e' na pain ca mam' to' hohot pin xine pain quinain carawa pane quem. Iri' xiricon je coximinain ca to pawin cain iri na ne, na e' na pain ca mam' to' hohot pin xine pain xijein wic ca awi tiquin' ca' nein quinain carawa ma' quem.

²⁴ Je ca tomi' xuhu' con Cristo cwa'. Om ca corom hwet con Iri' Jam pain Iri' Maxicon pain xirim ca quep pan caca wari' pane, ca an xiho' e' nain iri' xiricon pain pawin cain, om na. Corom hwet non pain pawin cain. Je ca pe pan ca pain xocori ca'. Pe ho' non Iri' Jam, tomi' mi' napari' con.

²⁵ Om ca an xiho' con sacerdote co iri' taramaxicon co corom taxipa' nain Iri' Maxicon Iri' Jam pain xiricon pain oro xijein cawaxi' ma'. Om ca an xiho' con sacerdote co iri' taramaxicon pane, pain ca mam' corom cain quinain carawa ma' quem, om na. Om ca mi' ho' mi' ho' pan xucun con Iri' Jam.

²⁶ Mo xi mi' pin ho' mi' pin ho' ca ma', na e' na pain ca jain jain ho' jain jain ho' qui' ca pain ca xo' tomi' ma' qui' xine macan' pain cara pane. Ane om ac i ma' ca ne. Pain ca maqui' cain macan' ca', pain oro xec nein ca pi' pin ta' ne macan' ca', maqui' xica' pe na. Om ca maqui' mami' ca. Ma' ta mam' xic am pin tain ca caracat wa pain ca mi' pin ne ca', pain ca mi' pan xije con Te Iri' Jam ta na pane.

²⁷ Na e' na pain ca cono' cono' xam' xi' iri' pain ca wari' nexi' ca'. Xica' pe tara ca cono' nexi', om ta cono' mami' iri'. Cono' pin iri xi' ne, tomi' xo' ac capari' tara Iri' Jam pain oro carawa ca ara iri' pain ca e' e' wet nexi' ca'.

²⁸ Ac i ma' na Cristo pain ca mi' pin nucun quem. Mi' pan xucun con Iri' Jam, om ca ara mami' cain, om ca mi' pin mami' ca quem. Ma' ta to' om pin tain ca caracat nucucun oro wari' co mija nana ta na. Maqui' mami' tarain macan' quem. Maqui' mami' iri tara ne, om ta to' om mami' cain ca caracat nexi'. To' witan xuhu' pain ca winim' mahu' ta napari'.