Hebreus 8 - Tradução Bíblica Pacaas Novos

Ca ma' capari' sacerdote co iri' taramaxicon cwa', co tomi' mi' napari' con Iri' Jam

¹ Oro ca xirao' mi' xuhu' ca' ne, pain ca tomi' xo' xuhu' cocon oro sacerdote cwa', tomi' mi' inuhu' con sacerdote co iri' taramaxicon. Taraju pa' je e'. Ma' napari' sacerdote co iri' taramaxicon. Xao pe ho' nain iri' cwerein ca mam' xao pe nucun Iri' Jam cwain, co hwara' opa tamana cwain, co pe pawin cwain.

² Taramaja pe nain iri' xirim ca in ac pe tocwa Iri' Jam cwain, ca quep pan ca cain. Om ca quep cain wari', quep pan nain Taramaxicon Iri' Jam.

³ Pain ca tomi' xo' tococwa oro sacerdote co iri' taramaxicon nana ma', wirico Iri' Jam co taramaja mi' xine nonon. Cut mi' xine pain oro carawa ca mi' xim cacapa' oro wari', tom tain' mi' xine pain oro winacocon quem tata. Ac i ma' na con sacerdote nexi' co iri' taramaxicon quem. Na e' na pain ca ma' con carawa ca mi' ton con Iri' Jam quem.

⁴ Mo xi pe cain macan' pain xocori ca', om xi sacerdote co iri' taramaxicon camain' ca, xi wara ma' ara caca oro xucucun sacerdote co ara nanain oro ca taramaja wa ca xirao' mi' ca Moisés cara pane, pain ca cut mi' cocon pain carawa Iri' Jam ma'.

⁵ Taramaja to nanain xiricon Iri' Jam ca pe nain macan' ca', ca an xiho' e' nein xiricon Iri' Jam ca pe nain pawin cain. Je ca hu tocwa Moisés pane quem, pain ca quep tain cain xiricon Iri' Jam ca mam' quep xine pain tapari carawa pane. Hu ca' non Iri' Jam: Ma' tara xumum me. An xiho' an xiho' pi' pin rain oro jaminain coximinain ca an hwet mi' xim pain tamain pacun ca' non.

⁶ Ca taramaja wa ca mi' tocwa Jeju ma' iri na ne, pain ca to' wixicam capari' con Iri' Jam ma', hwara' opa tamana na. Hwara' opa tiquin' ca' nain ca taramaja nucucun oro sacerdote co taramaja to nanain macan' ca'. Win ne ca awi tamana pan ne xocori ca tomi' pe nucun Iri' Jam ca tomi' an pe xo' pan ca Jeju ma' quem. Awi tiquin' ca' nain ca wara tomi' xo' nucun pain ca xirao' nucun Moisés cara pane. Carawa ca tomi' pe capari' Iri' Jam pain xocori ca' quem, awi tiquin' ca' nain carawa ca wara tomi' pe mi' tococwa oro hwanana pane quem.

⁷ Je ca tomi' xuhu' ca'. Om ca quep xiho' cocon oro hwanana wara ca tomi' an pe xo' nucun Iri' Jam. Je ca na e' ne pain ca tomi' an pe xo' mami' capari' pain xocori ca'.

⁸ Ane om hohot pan cocon Iri' Jam ne. Tomi' ac tococwa na: Maqui' ta' iri na oro xec pain ca tomi' an pe xo' mi' toton pain xocori ca tomi' xo' ne oro waram winacon Israel ma', cocon oro waram winacon Judá ma' quem.

⁹ Tomi' xo' iri toton pain xocori ca tomi' xo' ne ne, om ta an xiho' nein ca tomi' xo' ne pain ca tomi' cain' qui' toton hwanana nucucun pain cara pane, pain ca o qui' toton pane, pain ca cut in qui' toton pain macaracocon oro wari' nein Egito pane. Tomi' xo' paxi' inonon pane, ane om howa cara cacapa' pane ne. Je ca in ca' toton ma', ac i ma' na ca tomi' ca Taramaxicon Iri' Jam.

¹⁰ Maqui' iri tara oro xec nein xocori ca tomi' xo' ne ne, pain ca tomi' xo' mami' toton ta' oro waram winacon Israel ma', tomi' ca' ac toton tara ta na Taramaxicon Iri' Jam. An pe xo' mi' xuhu' pain ca coromicat nuhu' oro capija ca tomi' ha' je xuhu' ta. Ac ca xirao' pe mi' xuhu' tara pain xumuhu'. Iri' Jam ne ac mahu' tara, oro wari' ne ac xuhu' tara quem.

¹¹ Om ta hu mami' camain' xujuhu' pain ca je xi querec pin' xun Taramaxicon Iri' Jam quem xujuhu', xi wara querec pin' xim ara mahu' ta. Pain ca om hwara' opa nuhu' ma', pain ca hwara' opa nuhu' ma' quem, querec pin' querec pin' pi' pin ac mahu' tara ta.

¹² Xic am pin tain oro ca pan teretem nuhu'. Om ta mam' pe wet mami' tain oro ca caracat nuhu' ta, ac i ma' na ca tomi' ca Taramaxicon Iri' Jam.

¹³ Pain ca xocori na ta cain ca tomi' xo' mami' nucun ma', taxi' urun pain ca maho' pin cain ca wara tomi' xo' nucun pane. To' om pin nain ca hwara' opa nein. Pan' am pin ta' na quem.