Hebreus 7 - Tradução Bíblica Pacaas Novos

Melquisedeque co sacerdote pane

¹ Melquisedeque cara pane, wirico co taramaxicon pe ho' nonon oro wari' co to nanain Salém. Sacerdote na quem, taramaja mi' non Iri' Jam co Iri' Taramaxicon pan. In qui' iri na Abraão cocon oro wari' nucun pane ne, pain ca mixita qui' cocon oro taramaxicon pain ca to' quiji' qui' cocon pane, xut hwet pan ac con na Melquisedeque, tomi' mi' ac con na con Iri' Jam. Xiram pa' ron, ara mi' ron pain oro ca awi wa ta non.

² Abraão ma' iri na ne, mi' ac con na pain dízimo nein carawa ca cut ca' cocon pain oro taramaxicon ira. Ma' na ca tomi' mao ne wixicon Melquisedeque pane. Co taramaxicon xo' ta na ca tomi' mao ne wixicon. Wixinain cidade ca taramaxicon pe ca ma' iri na ne, je Salém ma', ma' na ca tomi' mao nein quem. Ca om toron ne ca xumu wa ta na ca tomi' mao ne Salém ma' quem. Je ca Taramaxicon co mi' nain ca om toron ne ca xumu wa ta na ca tomi' mao nein wixicon Melquisedeque pane.

³ Om ca taxi' tocwa cote ca cam jicon, om ca taxi' tococwa mana cojeo' ca quem. Om ca taxi' xine xec nein ca pan' qui' nucun, om ca taxi' xine xec nein ca mi' pin nucun quem. Sacerdote cara na. Je ca an xiho' paxi' con Panxica Iri' Jam pane.

⁴ Querec pin' xin ca hwara' opa nucun Melquisedeque cara pane. Taramaxicon na, hwara' opa tamana na pane. Je ca mi' pan con pain carawa hwanana nexi' Abraão cara pane. Mi' non pain dízimo nein oro carawa ca cut in ca' cocon pain oro taramaxicon co mixita ca pane.

⁵ Ma' na ca xirao' nucun Moisés pain ca mi' xun tococwa pain dízimo oro waram winacon Levi co sacerdote nana pane. Xirao' mi' ca' tata: Mi' tuturuhu' pain dízimo nucucun oro win ma' nuhu' ta tata. Ca nari nuhu' paxi' tatara, xi om ne ca hwanana ne hwanana ne pi' pin ara hun Abraão cara pane ta tata.

⁶ Melquisedeque ma' iri na ne, om paxi' na ca hwanana ne con Levi cara pane, ane cut cain dízimo nucun Abraão ne. Tomi' mi' ac con na con Iri' Jam. Xiram pa' ron, ara mi' ron pain oro ca awi wa ta non. Wirico Abraão pan, co wara tomi' pe mi' ca pain ca tomi' nucun Iri' Jam pane, wirico co tomi' mi' wa con Iri' Jam.

⁷ Taxi' irin i ca', pain ca om hwara' opa homa ca wari' co tomi' mi' wa con Iri' Jam ma'. Hwara' opa pan na wari' co tomi' mi' non con.

⁸ Ma' na i ca' quem, cocon oro sacerdote co hwanana ne nonon Levi cara pane. Mi' tata pain dízimo nucucun oro win ma' caca ma', aram aram cono' pin ac caca na quem. Melquisedeque cara pane iri na ne, co mi' wa pain dízimo quem, e' cara na ta na ca xirao' pe xine pain capijacon Iri' Jam.

⁹ Ma' na i ca' con Levi cara pane quem. Cut paxi' nain dízimo nucucun oro wari' pane, ane ac ca mi' pan con ne pain dízimo Melquisedeque quem ne. Mi' iri non pain dízimo Melquisedeque Abraão pane ne, ac ca mi' wi pan con pain na Levi quem, ac je na.

¹⁰ Xi om om wet ara ca Levi pane ta. Xut hwet iri non Abraão Melquisedeque pane ne, om ca pan' querec ca Levi ira. Ac ca pe ho' pe ho' wet cain na curucun hwanana nucun Abraão pane ira. Je ca ac ca mi' wi con na pain dízimo Levi pane, pain ca mi' con pain dízimo Melquisedeque Abraão pane quem.

¹¹ Je ca tomi' xuhu' ca'. Mi' iri tata pain ca xirao' nucun Moisés oro wari' pane ne, mi' ac tococwa na pain ca taramaja nucucun oro waram winacon Levi co sacerdote nana quem. Mo xi to' witan taxi' capari' ca taramaja nucucun ma', je xi om mi' mami' capari' con xucun sacerdote co an xiho' non Melquisedeque quem? Je xi om mi' capari' con xucun co jimao ca' non Arão quem?

¹² Om na, taraju pa' xi' e'. An in iri ta ca tomi' xo' xine ca tora' ac xine oro ca ara je tococwa oro sacerdote ne, na e' na pain ca an in xine oro ca xirao' nein quem.

¹³ Je ca tomi' xuhu' ca'. Xucun sacerdote co tomi' mi' wa cwa', pain ca an xiho' con Melquisedeque cwa', om ca hwanana ne con Levi cara pane. Hwanana ne non xucun hwanana co om sacerdote camain' nana oro waram winacon pane.

¹⁴ Xi taxi' ara xun Taramaxicon nexi' Jeju cwa', taxi' urun pain ca hwanana ne con Judá cara pane. Om ca tomi' camain' tococwa oro waram winacon Judá pain ca sacerdote je tococwa pane, om ca xirao' camain' cain i ma' Moisés cara pane.

¹⁵ Pain ca tomi' ac i ma' iri' ca', taraju pa' xo' iri', xi ma' pin ara ca xucun sacerdote co an xiho' non Melquisedeque ta.

¹⁶ Xucun sacerdote co tomi' mi' iri' cwa', om ca sacerdote ra tocwa pain ca tomi' ha' xine oro ca xirao' nucun Moisés cocon oro sacerdote ta tocwa ma', om na. Sacerdote pin na, xi om ne ca hwara' opa nucun pain ca e' cara nucun.

¹⁷ Je ca xirao' an pe xine con, pain capijacon Iri' Jam quem: Sacerdote cara ra, win ne ca sacerdote ca Melquisedeque pane ta. Ac i ma' na ca xirao' pe nein.

¹⁸ Je ca tomi' xuhu' ca'. Je i ma' ca to' om pin xine ca xirao' nucun Moisés cocon oro sacerdote. Xi hwara' opa ne pain ca quep xiho' cocon pain ca to' hohot tococwa con Iri' Jam.

¹⁹ Om ca to' hohot ac capari' con Iri' Jam ca xirao' nucun Moisés. Je ca mi' capari' pain xijein ca coromicat xo' nucun ma', pain ca mi' capari' con Jeju cwa', co awi tiquin' ca' nain ca xirao' nucun Moisés. Wirico co mi' napari' pain ca wixicam pin xun Iri' Jam.

²⁰ Sacerdote pin ra ta iri non Jeju Iri' Jam pane ne, tomi' an pe mi' non pain ca tomi' nucun quem, tomi' mip non. Wata' co sacerdote pin ra ta xim ca', om ta an in tain ca tomi' ne pum ta non. Om ca ac i ma' tococwa oro waram winacon Levi pain ca sacerdote je tococwa pane.

²¹ Ane tomi' mip con Jeju ne. Sacerdote pin ra ta iri non ne, tomi' ca' ac con na: Tomi' an pe mi' inem pain ca tomi' ne ca'. Wata' pain ca Iri' Taramaxicon ta, om ta an in tain ca tomi' ne ta. Sacerdote cara ra ta. Ac i ma' na ca tomi' mip con pane.

²² Je ca taxi' xun Jeju pain ca tomi' an pe xo' xim capari' pain xocori ca tomi' xo' nucun Iri' Jam cwa', ca awi tiquin' ca' nain ca xirao' nucun Moisés ma'.

²³ Je ca tomi' xuhu' ca'. Mija nana oro sacerdote pain cara pane. Om ca sacerdote cara caca, xi om ne ca cono' ho' cono' ho' caca ta. Ma' iri na xucun ma' ne, taramaja taramaja ac ca na, mi' pin ac ca na, ja' corom mao ac con na xucun ma' quem. Je curucucun mao na pain ca ja' corom mama' xucucun pane.

²⁴ Ane sacerdote cara ca Jeju ne, xi e' cara ara ca ta.

²⁵ Je ca ha' con pain ca to' witan cara capari' pain ca to' wixicam pin capari' con Iri' Jam. To' witan cara napari', xi e' cara pan ara ca ta. Ma' ta tomi' mi' xuhu' con Te ta napari'.

²⁶ Wirico Jeju co sacerdote co iri' taramaxicon ta. Wirico co hohot ma', pain ca quep xiho' capari' pain ca ximin nexi' ca'. Awi tamana na pain ca om caracat camain' nucun. Om ca pan tem camain' ca. Om ca ma' camain' con carawa ca ja' tomi' em' tocwa pain ca caracat wa. Pe ni ca' nonon oro caracat. Mi' non pain ca taramaxicon hwara' opa wa Cote ca, taramaxicon pe tiquin' ca' nain iri' pawin cain.

²⁷ Om ca an xiho' cocon oro xucucun sacerdote co iri' taramaxicon nana pane, om ca cuc cuc tocwa pain ca tama' tom tain' mi' ne pain carawa pain oro xijein xec ta con Iri' Jam. Oro xucucun sacerdote co iri' taramaxicon nana pane, tom tain' mi' nonon pain carawa pain oro xijein xec, ma' ta xic am pin main ca caracat nuxut ta nonon, tom tain' mi' ac cocon na pain carawa, ma' ta xic am pin main ca caracat nucucun oro wari' cwa' ta nonon quem. Jeju ma' iri na ne, mi' pan xucun con Iri' Jam pain ca om nain ho' xucun pain ca mi' pin wa pane. Pain ca mi' pin nucun pane, mi' pin na. Om ta mi' pin mami' ca quem.

²⁸ Je ca tomi' xuhu' ca'. Pain ca xirao' nucun Moisés ma', tomi' xo' tata pain ca tora' tococwa oro sacerdote co iri' taramaxicon nana pane. Wari' nana co tora' wawa, ma' taxipa' na oro ca to' i'ina nonon. Pain pin iri na ne, aram aram tomi' mip pan ac ca na Iri' Jam ma', pain ca tomi' an pe cain ca tomi' nucun con Panxica pane. Wirico Panxica co sacerdote co iri' taramaxicon. Hohot cara tara, om ta caracat camain' ca ta.