Hebreus 6 - Tradução Bíblica Pacaas Novos

¹ Je ca tomi' xuhu' ca'. Hohot na pain ca om noro in hwet noro in hwet e' xin oro capijacon Iri' Jam con Cristo ca wara ca' na qui' urut pahu' pain cara pane. Ca' na ca' na tiquin' xut urut pahu' pain oro xocori capijacon Iri' Jam con Cristo quem, ma' ta horon horon tiquin' hwe pain ca howa nuhu' ta urut pahu'. Wara pijim' ca' ara xi' urut pahu' pane: An to pin jein oro ca ara ximama' ne wara curuhu' ma'. Howa e' jun Iri' Jam ta, ac i ma' na ca wara pijim' urut pahu' pane.

² Wara tomi' xo' urut pahu' pain ca ca' na xine pain oro ca ja' wa com, je pain ca quep tocwa pain winacon wari' ma' quem. Wara tomi' xo' urut pahu' pain ca to' e' mami' xun tococwa co wara cono' nana, je pain ca tomi' xo' xun tococwa pain oro ca ara caca oro wari' pain ca e' e' wet nucucun pane quem.

³ Je ca tomi' xuhu' ca'. Mo ta mi' caparut pain ca ca' na ca' na tiquin' urut pahu' pain oro xocori capijacon Iri' Jam con Cristo cwa', ca' na mi' ac urut pahu' pain tara ta.

⁴ Tomi' xuxun oro wari' co wara taraju pa' paxi' nanain capijacon Iri' Jam ma', xi om ne ca toha mi' ara tococwa pain naran nucun pain ca coromicat nucucun ta. Wara querec pin' paxi' nanain oro ca mi' xim capari' Iri' Jam. Wara meo paxi' nonon Tamataracon quem.

⁵ Wara querec pin' paxi' nanain ca awi tamana nein oro capijacon Iri' Jam ma'. Wara querec pin' paxi' nanain ca hwara' opa nucun ca an hwet pe ta' ca Cristo pain ca aram aram in qui' ta' nucun quem.

⁶ Ane an pe pin cocon Iri' Jam ne. Om ca ha' mami' ne pain ca cwirin' je cwirin' je tococwa ta. Xi an xiho' ara cocon co tatatain mi' nonon pain pana Panxica pane ta. Ac ca tatatain mi' mami' pan cocon na pain pana. Oro wari' co querec nonon pain ca om cwirin' nucucun ma', tomi' xirac tomi' xirac pan ac cocon na quem.

⁷ Noro jein macan' pain xitot ma'. Pan' ho' pan' ho' iri na xowi' ne, tototoc ac nein na com, mi xo' ac ne na oro ca oin' ca waximain, cao' cao' ac cacain na quem. Iri' Jam ma', param mi' nain pain ca awi wa xitot ca ac i ma' ma'.

⁸ Xitot ca om awi camain' ma' iri na ne, pain ca mi e' nein oro caji pi je oro caji nahwarac ma' quem, noc ac xine na. Tomi' noro ta. Aram aram tom pin ac xine tara quem.

⁹ Je ca tomi' xuhu' pain ca tomi' querec te xuhu' ca'. Xirao' mi' ac i ma' paxi' inuhu', ane om toron capa' xumu pahu' ne. Taxi' inuhu' pain ca om an xiho' huhun oro co an to pin nonon Iri' Jam pane. Howa hun Iri' Jam pain ca to' witan pin xim cuhu' ma'.

¹⁰ Om ca pan tem camain' ca Iri' Jam, ara xo' taxipa' na. Om ta ji'am pin cuhu' pain ca taramaja tamana nuhu' ma', om ta ji'am pin cuhu' pain ca an hwet hwein ca tomi' querec te nuhu' pain ca om noc hun ma' quem, xi quep xiho' ara huhun oro win howa hwe ta, quep xiho' quep xiho' wet huhun pain xocori ca' quem.

¹¹ Param param xam' inuhu' pain ca quep xiho' quep xiho' tiquin' huhun quem. Jain jain jujun pain. Quep xiho' quep xiho' maqui' pa' ac cuhu' tara Jeju. Ma' ta om i'ina ne xumuhu' pain ca winim' xin hwein oro ca param mi' cuhu' Iri' Jam ta urut pahu'.

¹² Ma' ta om jam' ne curuhu'. Param inuhu' pain ca an xiho' huhun oro co howa nonon Iri' Jam ma', co winim' cara nonon ma', co cut xin nanain oro ca wara tomi' pe mi' tococwa pain ca howa nucucun je pain ca winim' cara nucucun ta.

Ca om mixein ca Iri' Jam pain ca tomi' an pe xo' cain ca tomi' nucun

¹³ Noro jun Iri' Jam con Abraão cara pane. Tomi' pe mi' iri non pain ca tomi' nucun ne, tomi' ac con na. Ara mi' xim pain ca tomi' pe xim ca' non. Wata' pain ca Iri' Jam ta' ca', ara mi' xim pain ta non, an hwet mi' pan ac con na pain wixicon pain ca tomi' an pe cain ca tomi' nucun quem. Om ca an hwet mi' con pain wixicon xucun wari', xi ma' ca xucun wari' co hwara' opa tiquin' ca' non ta.

¹⁴ Tomi' ac con na: Tomi' iri'o' inem, ara mi' xim pain ca awi wa ta, to' mija toton oro waram winam quem ta na ca tomi' con pane.

¹⁵ Winim' cara ac con na Abraão. Om ca toron ne ximicon. Winim' winim', aram aram ara mi' ac tocwa na pain ca wara tomi' pe mi' tocwa pane.

¹⁶ Ac i ma' ara xi' nana oro wari' co tomi' an pe mi' xucucun pain ca tomi' nucucun ma'. An hwet iri nanain wixicon wari' co hwara' opa tiquin' ca' nonon ma', am an hwet cacain wixicon Iri' Jam ma', tomi' ac xucucun na: Tomi' iri'o' ina ta, ara tain ca wara tomi' pe ne ta. Taraju napa' Iri' Jam ta. Mo ta om ara tain, wap ma' tarapa' ne, ac i ma' na pain ca an hwet cain wixicon Iri' Jam. Tomi' ac i ma' iri xucucun ne, tomi' caracan tomi' caracan om pin ac xucucun na quem.

¹⁷ Ac i ma' na Iri' Jam pane quem. Param napari' pain ca querec pin' xun pain ca om an in tain cain ca wara tomi' an pe xo' nucun ma', pain ca main ara mi' xim xuhu' pain oro ca wara tomi' pe mi' xuhu' ca' capari'. Je ca an hwet pan cain wixicon pain ca tomi' pe mi' capari' pain ca tomi' nucun.

¹⁸ Je ca tomi' xuhu' ca'. Ma' 2 na ca tomi' nucun Iri' Jam ta. Om ca an in camain' cain quem. Tomi' pe mi' napari' pain carawa ca ara mi' xim capari' ma', an hwet ac cain na wixicon pain ca tomi' an pe cain quem. Tomi' iri'o' na quem, om ca mixein ac ca Iri' Jam. Tomi' ac i ma' napari', ma' ta hwara' opa hwe pain ca howa mahu' ma', pain ca wixicam mahu' pain ca winim' hwein xec nein ca ara mi' xim xuhu' pain oro ca wara tomi' an pe mi' xuhu' ca' napari'.

^19-20 Winim' cara iri urun Iri' Jam pain ca mi' xim capari' pain oro ca wara tomi' pe mi' capari' pane ne, to' hwara' opa pan ac capari' na pain ximixi' je tamataraxi' ca'. Om ca tara con ta'a camain' xun, xi om ne ca wara corom hwet ara con Jeju pane ta. Corom hwet non pain iri' ca pe pan ca pain pawin cain, pain iri' maxicon pain xijein cacaracon cote ca wom co wa pe nain xiricon cain. Wara corom hwet ca' napari' con, ma' ta tomi' mi' xuhu' con Te ta napari'. Xi sacerdote co iri' taramaxicon pin ara ca ta. Mao ac ne ma' tara con. Win ne ca sacerdote ca Melquisedeque pane quem.