Hebreus 5 - Tradução Bíblica Pacaas Novos

¹ Tora' iri ta sacerdote co iri' taramaxicon ne, wum ta ac tocwa na wari' ma', co win ma' ne nonon oro wari' ma'. Taramaja mi' ne, quep xiho' roron oro win ma' ma ma', pain ca taramaja mi' mapa' ta pan ac con na Iri' Jam. Wum tara co mi' napa' pain oro carawa nucucun ca mi' xim cacapa' ma', tom tain' mi' ne pain winacocon quem. Ma' ta xic am pin tain ca caracat nucucun ta ac con na quem. Ac i ma' ac i ma' xam' tata oro sacerdote co iri' taramaxicon nana pain ca tora' tococwa pane.

² Sacerdote co iri' taramaxicon ma', ha' non pain ca xiram pa' cocon oro win ma' ca co om taraju pa' nana ma', co xuruxut ximama' nana ma', xi wari' ara ca ta. Ma' non oro ca to' i'ina non quem.

³ Je ca tom tain' mi' taxipa' ne pain carawa ta con Iri' Jam ma'. Ma' ta xic am pin tain ca caracat nem, ma' ta xic am pin tain ca caracat nucucun oro win ma' ma ma' quem non.

⁴ Pain ca tora' tocwa sacerdote co iri' taramaxicon ma', om ca na ne pain ca wata' ta, param inain ta ca ma'. Wirico Iri' Jam pan na co tora' non pain ca sacerdote co iri' taramaxicon pan ra ta con ma'. Win con Arão cara pane, pain ca tora' pan con pain cara pane.

⁵ Ac i ma' na con Cristo pane quem. Om ca tomi' ca' ca: Wata' tara, param inain, sacerdote co iri' taramaxicon pan ta' ta, om ca tomi' xec xec ac i ma' ca pane. Wirico Iri' Jam co mi' non pain. Tomi' ca' non: Panxita' inem, Te pin mapa' pain xec ca'. Ac i ma' na ca tomi' con pane.

⁶ Ma' na wirain ca tomi' nucun ca xirao' an pe xine pain capijacon quem. Ca' na con: Sacerdote cara ra, win ne ca sacerdote ca Melquisedeque pane. Ac i ma' na ca tomi' nucun pane.

⁷ Pain ca pe pe wet cain macan' Jeju pane, tomi' non Cote ca. Merem na, merem mip na pain ca tomi' con ma'. Aca na quem. Xiram pa' ne me Te ac con na. Wum co to' witan taxi' ca' napa' pain ca mi' pin wa ca' ac con na. Ha' ac ca na quem, xi om ne ca xut xo' pan ara ca pain ca win xumu e' cain ca param nucun ta.

⁸ Panxica Iri' Jam paxi' na, ane mam' tomi' ha' taxi' pin con Cote ca pain oro ca to' i'ina non pane ne.

⁹ Pi' pin iri na ca taramaja nucun ca ara ra con Cote ca ne, pain ca hohot pin mapa' ta con ma', ha' pin ac con na pain ca to' witan cara tococwa oro co tomi' ha' nonon.

¹⁰ Xi wara tora' ara con Iri' Jam pane ta. Sacerdote co iri' taramaxicon ra ta non, win ne ca sacerdote ca Melquisedeque cara pane ac con na pane.

Ca om na ne pain ca an pe tocwa Iri' Jam

¹¹ Mija mija wet paxi' na ca tomi' xo' xim xuhu' con Jeju cwa', pain ca an xiho' con Melquisedeque cara pane. Ane i'ina capa' pain ca tomi' xo' xuhu' ne, xi taraju wet hwe ta. Ac ca horoman pin cuhu' na ca taraju wa.

¹² Pain paxi' na ca howa hun Jeju pane. Wahu' pan xirara co ca' na nonon pain capijacon Iri' Jam oro win ma' hwe ta. Ane om ha' cuhu' ne. Na e' na pain ca winim' hun wari' co ca' na mami' nuhu' pain capijacon Iri' Jam ca om i'ina taraju pa' wa. An xiho' huhun oro hwijima' co xo' camara' nana ma', co xoc e' nana catat, co om cao' ac nanain cwerein carawa ta.

¹³ Noro jun wari' co param e' nain leite ma'. An xiho' non pije' co xo' pan'. Om om wet na ximicon. Om ca taraju pa' cain capijacon Iri' Jam pain ca xuruxut xo' je, param e' jein carawa ca hohot napa' ta capari'.

¹⁴ Co ximicon hwanana nana ma' iri na ne, om ca an xiho' cocon hwijima' pain ca param e' cacain leite. Param nanain cwerein carawa, param nanain oro coximinain capijacon Iri' Jam. Taraju pa' nana, coromicat xo' nana. Querec pin' taxipa' nanain ca awi wa, querec pin' taxipa' nanain ca pan tem wa quem.