Hebreus 4 - Tradução Bíblica Pacaas Novos

Ca mi' xim capari' pain ca xao to wa xin ximixi' Iri' Jam

¹ Wara tomi' pe mi' napari' pain capijacon Iri' Jam pane, pain ca mi' xuhu' pain ca xao to wa hwein xumuhu' ta capari' pane. Tomi' tomi' wet napari' quem. Je ca na e' ne pain ca ma' ne ximixi' ca'. Ma' ta om ma' camain' ca win ma' nexi' co om ha' non pain ca xao pe wa ne ximicon ma', pain ca am mi' xim capa' pain ca xao pe wa ne xumu Iri' Jam cwa', am om mi' xim capa' pain ca ma'.

² Taraju ara xi' irin capijacon Iri' Jam pain ca to' witan xuhu' ta capari' quem. Win caca oro hwanana nexi' pane. Taraju paxi' nanain, ane om howa cacain ne. Je ca om ja' tomi' querec te ac tococwa pain oro ca taraju cacain pane.

³ Wari' iri na ne, pain ca howa iri' ca', ha' napari' pain ca xao to wa xin ximixi' con Iri' Jam. Je ca tomi' ca Iri' Jam pane: Je ca mana' tamana toton ca'. Tomi' pe mi' ac toton na pain capija ca': Om ta tan' mama' hwein macan' ca mi' xim paxi' xuhu' pane, om ta mi' camain' xuhu' pain ca xao to wa hwein xumuhu' ta inonon. Ac i ma' paxi' na ca tomi' tococwa oro hwanana nexi' pane, ane wara coromicat an pe mi' tococwa pain ca xao' to wa xin cacain ximicocon pain cara pane ne, pain ca xo' tomi' ma' tomi' ma' pi' pin qui' cain oro carawa pane.

⁴ Ma' ara xi' na ca xirao' an pe xine pain capijacon pane: Ma' 7 pin iri na xec pane ne, xao pe wa pin ac cain na ximicon Iri' Jam, xi om ne ca ara ara pi' pin ara cain oro ca taramaja nucun pane ta. Xirao' an pe ac i ma' ta pain capijacon pane.

⁵ Tomi' mi' nain ca xao to wa xine ca xumu wa ca wara noro iri' ca' quem: Om ta mi' camain' xuhu' pain ca xao to wa hwein xumuhu' ta inonon. Ac i ma' na ca tomi' tococwa pane.

⁶ Je ca tomi' xuhu' ca'. Oro hwanana nexi' cara pane, co taraju cain' nanain capijacon Iri' Jam pain ca to' witan xuhu' ta tococwa pane, om ca mi' tococwa pain ca xao to wa cacain ximicocon, xi tomi' ha' je na caca ta. Ane ma' ma' wet caca oro xucucun wari' co mi' xun wawa pain ca xao to wa cacain ximicocon ne.

⁷ Je ca aram aram tomi' mi' cain xijein xec nucun Iri' Jam pane. Om iri na ca howa cocon oro hwanana nexi' pain ca ari qui' cocon pane ne, pain pin iri na ne, aram aram tomi' ac tocwa na Davi cara pane. Xirao' an pe rain ca tomi' ne pain xijein xec ne ta ac tocwa na. Wara noro irin ca xirao' an pe nucun ca'. Ca' na con: Mo ta taraju hun Iri' Jam pain ca tomi' cuhu' pain xec ca', tomi' ha' ac hun tara, ta opain ne xumuhu' me. Ac i ma' na ca xirao' an pe xine capijacon pain xijein xec nucun Iri' Jam pane.

⁸ Mo xi wara mi' tococwa pain ca xao to wa cacain ximicocon pain ca o mama' qui' cocon pain Canaã Josué cara pane, om xi tomi' hwet mami' capari' pain xijein xec nein ca main mi' xuhu' pain ca xao' to wa pin hwein xumuhu' ta capari' Iri' Jam quem.

⁹ Je ca taxi' iri' ca' quem: Main xao to wa jein xumuhu' ta tarapari' Iri' Jam pain ca wari' ne capari' ca'. Win ta' pane, pain ca xao pe wa ca' tain ca taramaja ne pain xec nein sábado pain cara pane ta napari'.

¹⁰ Je ca ara capari' pain ca mi' capari' pain ca xao to wa xin ximixi' ca' quem. Xao to wa ca' irin oro ca taramaja nexi' ca'. Win ne ca xao pe wa ca' cain ca taramaja nucun Iri' Jam pane.

¹¹ Je ca tomi' xuhu' ca'. Howa xun Iri' Jam, jain jain xun, ma' ta mi' capari' pain ca xao to wa xin ximixi' ta. Ma' ta om ma' camain' ca win ma' nexi' co pan' mao ma', pain ca om tomi' ha' nucun ma'. Noro jujun oro hwanana nexi' co om tomi' ha' je na nana pain cara pane. Om ta an xiho' xuxun ta.

¹² Oro capijacon Iri' Jam ma', ac ca e' ne ara xi' na. Meo napari'. Hwara' opa na. An xiho' paxi' nain cote ne quit ca ma' 2 quirinain ma', ca xa xa pi' ma'. Ane xa mip pan ne capijacon Iri' Jam ne. Ac ca wac corom capari' na. Ac ca hwet nein na iri' ximixi' pain tamataraxi' je pain oro ca param nexi' ca'. Ac ca hwet nein na oro ca coromicat nexi' pain ximixi'. An hwet mi' napari' pain ca coromicat nucun pain ca coromicat mi' pan capari' pain oro ca param nexi' je pain oro ca coromicat nexi' ca' quem.

¹³ Oro carawa ca tomi' ma' pin ca Iri' Jam ma', om ca xaraxa ca' ac con. Wari' quem, om ca xaraxa ca' ac xun quem. Om ca ma' camain' ne ca mam' tatep pa' ac xijexi' con. Querec querec pi' pin napari', taxi' taxi' pi' pin nain oro ca ara iri' quem. Main maqui' tara xec pain ca tomi' hwet xun iri' pain oro ca ara iri' quem.

Jeju co sacerdote co taramaxicon hwara' opa ta

¹⁴ Je ca tomi' xuhu' ca'. Ma' napari' sacerdote co iri' taramaxicon hwara' opa cwa', wirico Jeju co Panxica Iri' Jam cwa'. Corom hwet non Cote ca pain iri' ca pe pan ca pain pawin cain. Je ta hwara' opa cara xi' pain ca howa xun ca', pain ca tomi' hwet xuxun oro wari' pain ca howa xun quem.

¹⁵ Xi taxi' ara capari' pain ca om hwara' opa nexi' pain ca wari' nexi' ta. Ha' non pain ca xiram pa' capari', xi wara tomi' querec ximao pan ara tocwa pain oro ca caracat wa pane ta. Wirico Caxicon Jam co caracat ra caracat ra non pane, win capari' pain xocori ca' quem. Ane om caracat camain' ca ne.

¹⁶ Je ta wixicam xun Iri' Jam co xiram pa' taxipa' ma', co quep xiho' taxipa' ma' quem. Om ta jin' xun, ac ca wixicam xun tara pain iri' ca xao pe pe ca pain pawin cain. Ma' ta xiram pa' capari', ma' ta quep xiho' capari' quem. Ximin iri xi' ne, pain ca ma' capari' oro ca to' i'ina napari' ma', xiram pa' hap ac capari' tara, quep xiho' hap ac capari' tara quem.