Hebreus 3 - Tradução Bíblica Pacaas Novos

Ca hwara' opa tiquin' ca' con Moisés Jeju

¹ Je ca tomi' xuhu' ca' xere, pain ca wari' ne cuhu' Iri' Jam ma', je pain ca tora' cuhu' pain ca howa xine cuhu' ma' quem. Tomi' xim inuhu'. Mam' pe wet cara jun Jeju cwa', co tomi' hwet napari' pain ca tomi' nucun Iri' Jam cwa', co sacerdote co iri' taramaxicon cwa'. Wirico co howa iri' cwa'.

² Jeju cwa', ara xo' taxipa' nain ca taramaja nucun pane, pain ca sacerdote co iri' taramaxicon ra ta qui' tocwa pane. Win ca Moisés cara pane, pain ca ara xo' cain oro ca taramaja nucun pain ca querec wet cain xiricon Iri' Jam pane quem.

³ Hohot paxi' na pain ca querec pin' tocwa Moisés pain ca taramaja xo' nucun pane, ane hohot tamana pan ne pain ca querec pin' tocwa Jeju ne, pain ca taramaja xo' tiquin' ca' con Moisés pane. Win ca wari' co quep nain xirim ma'. Hohot paxi' na pain ca querec pin' xine xirim pain ca quep awi xine ma', ane hohot tamana pan ne pain ca querec pin' tocwa wari' co taramaja xo' pain ca quep cain ne.

⁴ Oro xijein xirim ma', ma' ma' xam' ara xi' nain wari' co quep nain. Ane wirico Iri' Jam pan ca co tomi' ma' tomi' ma' pi' pin nain oro carawa ne.

⁵ Je ca tomi' xuhu' ca'. Moisés cara pane, ara xo' taxipa' nain oro ca taramaja nucun pain ca querec wet cain xiricon Iri' Jam. Oro ca taramaja xo' nucun pane, tomi' joc mam' mi' nain oro ca main an hwet mi' xim capari' Iri' Jam cwa'.

⁶ Cristo cwa' iri na ne, co taramaja xo' taxipa' ma', querec wet xo' nain xiricon Cote ca, xi om ne ca iri' panxica ara ca ta. Xiricon Iri' Jam iri' quem. Je ca tomi' xuhu' ca'. Mo ta howa cara urun pain ca winim' xin oro carawa ca mi' xim capari' Iri' Jam cwa', xiricon ac iri' na ta.

Ca hu capari' Tamataracon Iri' Jam pain ca howa cara je ta capari'

⁷ Je ca tomi' xuhu' ca'. Ac i ca' na ca xirao' an pe xine ca tomi' nein Tamataracon Iri' Jam pain capijacon: Mo ta taraju hun Iri' Jam pain ca tomi' cuhu' pain xec ca',

⁸ tomi' ha' ac hun tara, ta opain ne xumuhu' me. Ta an xiho' huhun oro hwanana nuhu' pain ca to cacain mahweri pane, pain oro xec nein ca ari qui' cocon pain ca tomi' taparam' qui' cocon pane.

⁹ Querec paxi' nanapa' pain ca an hwet mi' toton pain oro ca hwara' opa ne pane, ane tomi' taparam' ho' tomi' taparam' ho' cacapa' ne. Ma' 40 na cawaxi' pain ca tomi' taparam' cacapa' pane.

¹⁰ Je ca mana' pin toton pane. Tomi' ac xije na: Tama' howa ni ca' nanapa' caram cwa' ta. Om ca querec pin' cacain ca param ne ca', pain ca tomi' ha' xine toton ca'.

¹¹ Je ca mana' tamana toton ca'. Tomi' pe mi' ac toton na pain ca tomi' ne ca': Om ta tan' mama' hwein macan' ca mi' xim paxi' xuhu' pane, om ta mi' camain' xuhu' pain ca xao to wa hwein xumuhu' ta inonon. Ac i ma' na ca tomi' cocon oro hwanana Iri' Jam pane.

¹² Ma' tara xumuhu' me xere. Ma' ta om ma' camain' ca win ma' nuhu' co pan tem ximicon ta. Ma' ta om ma' camain' ca win ma' nuhu' co om howa xo' ra na ma', co an pe pin ton non Iri' Jam co e' cara cwa'.

¹³ Ta ac i ma' camain' hwe me ta. Hu caracan pan xujuhu' pain oro xijein xec ca', pain ca ha' ha' wet cuhu' pain ca taraju xin hwein capijacon Iri' Jam ma', pain ca tomi' ha' xun hwe ma' quem. Ma' ta om opain pin ne xumuhu' pain ca mixein cuhu' Caxicon Jam ma', pain ca caracat je cuhu' ma'.

¹⁴ Mo ta howa cara xun Cristo cwa', win ne ca howa mip urun pain ca xo' howa qui' urun pain cara pane. Mo ta cono' pa' ma' xin ca howa nexi' ca' ne iri' quem, iri' win ma' ne pin ac xun na, iri' win ma' ne pin ac capari' na quem.

¹⁵ Je ca xirao' an pe ca' xine pain capijacon Iri' Jam: Mo ta taraju hun Iri' Jam pain ca tomi' cuhu' pain xec ca', tomi' ha' ac hun tara, ta opain ne xumuhu' me. Ta an xiho' huhun oro hwanana nuhu' co ari qui' nonon pane. Ac i ma' na ca tomi' cocon hwanana nuhu' Iri' Jam pane na ca xirao' an pe xine pain capijacon ma'.

¹⁶ Je ca tomi' xuhu' ca'. Ma' co taraju nanain ca tomi' nucun Iri' Jam pane? Ma' co ari nonon quem? Om ca wiricoco caca oro hwanana co cut in qui' ca Moisés pain Egito pane ra? Wiricoco caca ma' ira.

¹⁷ Ma' co mana' ca Iri' Jam pain mahweri pane quem? Om ca mana' tococwa co caracat nana pane ra? Wiricoco caca ma' ira. Ma' 40 na cawaxi' pain ca mana' tococwa pane, cono' to ac cacain na mahweri pane.

¹⁸ Ma' co tomi' ca pain ca tomi' pe mi' cocon pain capijacon quem, pain ca om ta tan' mama' hwein macan' ca mi' xim paxi' xuhu' pane cocon ma', pain ca om ta mi' xuhu' pain ca xao to wa hwein xumuhu' ta cocon ma' quem? Wiricoco caca ma' ira, tomi' tata oro co om tomi' ha' nonon pane.

¹⁹ Je ca taxi' xuxun pain ca om tan' mama' ac caca pane. Xi howa je na caca ta.