Hebreus 2 - Tradução Bíblica Pacaas Novos

Ca om na ne pain ca miri'om xun Taramaxicon nexi'

¹ Hwara' opa tamana pan na Taramaxicon nexi' Jeju Cristo. Je ca na e' ne pain ca taraju wet xin ca tomi' nucun ca taraju iri' ca'. Ma' ta om aram aram an pe pin xin quem.

² Noro jein ca xirao' nucun Moisés cara pane. Oro jam co taramaja mi' nonon Iri' Jam pane, wiricoco nana co xirao' ca' ra ta nonon Moisés. Iri'o' na ca tomi' nucucun quem, om ca tomi' ximama' e' caca pane. Oro wari' co om tomi' ha' nanain ca xirao' nucun pane, wap ac tococwa na. Hohot na pain ca wap tococwa quem.

³ Je ca tomi' xuhu' ca'. Mo ta miri'om xun Jeju pain ca to' witan pin xim capari', ma' tara ca witan ac iri' ra? Wirico Taramaxicon nexi' pan ara xi' na co pijim' hwet cain' nonon pain oro wari' ca to' witan pin xun wawa pane, tomi' hwet ac cacapari' pain na oro co taraju nonon. Iri'o' na ca tomi' nucun ta nanapari'.

⁴ Iri'o' na ca tomi' nucucun ta ac ca na Iri' Jam quem, ac ca tomi' wi cocon na pain ca mi' tococwa pain ca ara cacain oro ca om ara taxi' ne ca wari' wa, wa wa tamana ac caca na oro wari' ma' quem. Ma' iri na wari' co param pan ca ne, pain ca mi' tocwa pain ca taramaja taxi' wa ca mi' ne Tamataracon ma', mi' ac tocwa pain na quem. Ac i ma' na ca an hwet cain ca tomi' iri'o' nucucun oro co tomi' hwet nanapari' con Jeju pane.

Ca an tan pan capari' Jeju pain ca xere capari' ca'

⁵ Iri' Jam ma', pain ca coromicat an pe xo' cain xocori macan' je xocori pawin ca maqui' ta' ma', om ca taramaxicon to ho' jein ta tococwa oro jam co taramaja mi' nonon ma'.

⁶ Ma' ara xi' na wari' co xirao' an pe ca' na pain capijacon Iri' Jam pane: Para mam' pe wet momon oro wari' cwa' Iri' Jam? Para xiram pa' momon quem?

⁷ Mi' paxi' momon pain ca hwara' opa wa oro jam co taramaja mi' nenem ma', hwara' opa tiquin' pije' ca' paxi' nonon oro wari' quem. Ane mi' pan momon pain ca awi tamana wa ne. Tomi' querec te tamana momon quem.

⁸ Mi' momon pain ca taramaxicon to ho' taramaxicon to ho' pi' pin cacain oro carawa ca' quem. Ac i ma' na ca xirao' an pe xine pain capijacon Iri' Jam pane. Pain ca mi' tococwa pain ca taramaxicon to ho' taramaxicon to ho' pi' pin cacain oro carawa oro wari' ma', om paxi' na carawa ca om tomi' ha' nonon. Om ara xi' na ca taramaxicon to ho' taramaxicon to ho' querec xine oro carawa pain xocori ca'.

⁹ Ane taxi' xun Jeju ma' ne, pain ca querec pin' tocwa pain ca awi tamana nucun ma', je pain ca in ac tamana tocwa ma', xi om ne ca mi' pin caho' ara capari' ta. Xiram pa' ara xi' napari' Cote ca ma'. Je ca tomi' ca' con pane: Mi' xim pain ca hwara' opa tiquin' ca' quequem oro jam co taramaja mi' nanapa' cwa'. Ma' ta mi' pin caho' momon oro wari' ta non. Om ta momon hwara' opa tiquin' ca' quequem, to' hwara' opa hap mami' ac xim tara ta, ac i ma' na ca tomi' con pane.

¹⁰ Wirico Iri' Jam co tomi' ma' tomi' ma' pi' pin nain oro carawa ma', co querec wet querec wet pi' pin nain ma' quem. Hohot na ca coromicat an pe xo' nucun pain ca jain jain jain jain mi' pin caho' roron ta con Jeju pari'. Ma' ta ha' quem pain ca ara pi' pin main ca taramaja nem pain ca to' witan toton momon ta non pari'. Ma' ta mija caca oro mana panxita' co to ho' xim nanapa' pain pawin ca' quem non pari'. Wum tara co o mi' napa' cocon ta non pari'.

¹¹ Wirico Jeju co to' hohot napari' ma', wari' cwa' quem, pain ca to' hohot capari' ca', Te Te pi' pin urun Iri' Jam cwa' ira. Je ca om wixipa' ca Jeju pain ca xere capari' ca'.

¹² Tomi' ca' na pain ca tomi' con Iri' Jam pari': Tomi' hwet toton xere pain oro ca ara nem ta. Cut in iri xujuxut ne, tomi' hwet ac xim tara pain ca tomi' querec te xim ca'. Ac i ma' na ca tomi' con Iri' Jam Jeju pari'.

¹³ Tomi' ca' na quem: Howa ton ina ta. Ac i ma' na ca tomi' con ma'. Tomi' mami' na quem, tomi' ca' na: Je ca pe ta' ca'. To ho' nanapa' caram cwa' co ac mana panxita' nana cwa' quem, pain ca mi' xim cocon ta capa' Te quem. Ac i ma' na ca tomi' con pari'.

¹⁴ Je ca tomi' xuhu' ca'. Wari' cwa', pain ca mana panxita' capari' Iri' Jam cwa', wari' e' iri'. Je ca wari' pin ca Jeju pane quem. An tan pan napari' pain ca wari' nexi'. Ma' ta na capa' pain ca mi' pin wa ta na, ma' ta mam' to' quiji' pin ton pain ca mi' pin ne Caxicon Jam ma', co hwara' opa paxi' pain ca to' cono' taxi' cain ca wari' wa ta na.

¹⁵ Mi' pin ina, ma' ta to' witan ca' xuhu' pain ca jin' hwein ca cono' wa ta napari' quem. Ac ca quep xat capari' na ca cono' wa ira, xi om ne ca jin' taxipa' jin' taxipa' cara ara xin pain ca e' e' wet nexi' pain xocori ca' quem.

¹⁶ Taxi' ara xi' irin i ca' quem, pain ca maqui' nucun Jeju pane. Om ca maqui' ca pain ca quep xiho' toton oro jam co taramaja mi' nonon Te ta ca, om na. Maqui' na pain ca quep xiho' toton oro waram winacon Abraão ta ca pane.

¹⁷ Je ca na e' ne pain ca an tan pan pin capari' pain ca xere capari' ca'. Ma' ta ha' con pain ca sacerdote wa pain ca iri' taramaxicon pin ta' ca ma', pain ca xiram pa' capari' ma', pain ca ara xo' cain ca taramaja nucun pain ca taramaja mi' con Cote ca ma' quem. Ma' ta pe cain maxixi' pain ca mi' pin caho' capari' ca', pain ca xic am pin cain ca caracat nexi' Cote ca quem.

¹⁸ Ha' non Jeju pain ca quep xiho' capari' pain ca tomi' querec capari' Caxicon Jam ma', pain ca caracat je capari' ma'. Xi om ne ca jain jain pan ara ca pain ca caracat ra con Caxicon Jam pane ta.