Hebreus 13 - Tradução Bíblica Pacaas Novos

Ca hu mam' tococwa pain ca win pi' pin ta' ne ca xirao' nucun

¹ Ta noc caracan camain' xujuhu' pain ca xere xujuhu' ma'.

² Ta miri'om huhun oro wari' co aram aram tan' mama' nanain macarahu' ma'. Tomi' querec te jujun pain ca cao' to ho' xine, pi'am to jein xuru ta huhun ma'. Ac i ma' iri nana oro hwanana pane ne, ma' ac caca na co om querec pin' wawa quem. Wari' tara ma' tata, ane om wari' caca ne. Jam co taramaja mi' nonon Iri' Jam nana pane.

³ Ta ji'am pin huhun oro win ma' nuhu' co tao' to wawa pain xirinain ca tao' to tao' to to wa me. Xiram pa' jujun, ac ca tao' to wi xihwe cocon tara pain ca xiram pa' huhun. Ta ji'am pin huhun oro co quep em' wawa pain ca howa cocon Cristo quem. Xiram pa' jujun quem, ac ca quep em' wi xihwe cocon tara pain ca xiram pa' huhun ta.

⁴ Na e' na pain ca coromicat ca' hwe ma', pain ca awi tamana ne ca an wa narima' ma', je pain ca awi tamana ne ca an wa tarama' ma' quem. Om ca na camain' ne pain ca an wa xequem narima', om ca na camain' ne pain ca an wa xucun tarama' ma' quem. Wari' co quep ximao ma', co an nam xequem narima' ma', wap ac con tara Iri' Jam. Narima' co quep ximao ma' quem, co an non xucun tarama' ma' quem, wap ac cam tara Iri' Jam quem.

⁵ Ta win xumu ximama' hwein oro caramaji macan' me, pain ca caramaju xita' na ina me hwe ma'. Carawa ca wara ma' nuhu' ma', hohot napa' ta jein. Xi tomi' pe mi' ca' ara capari' Iri' Jam ta: Om ta an pe camain' xuhu'. Om ta in ca' camain' xuhu' ta, ac i ma' na ca tomi' pe capari' ta.

⁶ Je ca ha' capari' pain ca tomi' hwet xin ca xirao' pe xine capijacon Iri' Jam ta. Om ca tara ta'a camain' xin ca xirao' pe nein: Wirico Taramaxicon Iri' Jam co quep xiho' napa' ta. Je ca om jin' ta' ca'. Ma' tara ca quep em' ac capa' wari' ra? Ac i ma' na ca xirao' pe xine capijacon Iri' Jam.

⁷ Mam' pe wet jujun co querec wet nunuhu' pain ca howa hwe ma', pain ca tomi' hwet qui' cucuhu' pain capijacon Iri' Jam pain cara pane. Querec pin' jujun pain ca xuruxut xo' nucucun pain ca e' e' wet nucucun pane, querec pin' jujun pain ca howa howa aram aram cono' pin caca quem. An xiho' jujun pain ca howa nucucun ta.

⁸ Om ca xin in camain' ca Jeju Cristo. Om ca xin in ca pain cara pane, om ca xin in ca pain xocori ca', om ta xin in ca pain oro cawaxi' ca maqui' ta' ma' quem. Wirico cara tara, om ta xin in camain' ca ta.

⁹ Je ca tomi' xuhu' ca'. Ta xin ne huhun oro wari' co pijim' ximama' nunuhu' me, pain ca pijim' jimama' ca' cacain capijacon Iri' Jam ma'. Ta howa huhun pain me. Xiram pa' iri napari' Iri' Jam ne, je ca quep xiho' capari', je ca to' hwara' opa capari' pain iri' ximixi' ca'. Om ca to' hwara' opa capari' ca tomi' ha' ximama' xuxun oro wari' co hu nanapari' pain oro carawa ca cao' wa. Cao' e' jein i ca' ta, ta cao' hwein i ma' me ta nanapari'. Om ca quep xiho' camain' tococwa oro wari' co tomi' ha' nanain ca hu ximama' nucucun ta.

¹⁰ Xi ma' ara capari' maxinain ca tomi' querec te pe xun Iri' Jam cwa', ca an xiho' nain pana ca tom tain' pe mi' tocwa pain carawa ma'. Oro co taramaja to nanain xiricon Iri' Jam ma' iri nana ne, pain ca howa e' cacain carawa ca tom tain' mi' cocon ma', om ca quep xiho' ac cocon ca mi' pin nucun Jeju.

¹¹ Noro jein ca taramaja nucun sacerdote co iri' taramaxicon pain cara pane. Maqui' iri na xec nein ca corom mao cain Iri' Maxicon Iri' Jam ne, to' pa' ac cain na carawa, mam' corom ac cain na quinain, mi' ac con pain na Iri' Jam. Ma' ta xic am pin main ca caracat nuxut ta non. Cwerein iri na ne, an mamam' ac cacain na, an mamam' an mamam', pira ca' iri nanain xiricocon oro wari' ne, tom pe ac cacain na pain i cain quem. Tom tom pi' pin nanain.

¹² Je ca mi' pin pe ni ca' cain oro xirim pain Jerusalém Jeju quem. Ma' ta to' hohot pin toton oro wari' ne na, mam' to' hohot toton pain cocu ta na.

¹³ Je ca tomi' ca' xuhu' ca'. Hwet xun Jeju ma', pain ca pe ni ca' cain oro xirim ca to ho' pan xucucun oro wari' pane, ca tomi' xirac pe tocwa pane. Quereme xin ca tomi' xirac wa con, win ne ca quereme pan cain quem.

¹⁴ Xi ma' capari' ca to xo' cara iri' pain macan' ta. Winim' e' irin iri' macaraxi' pain pawin cain. Main maqui' tara ta, ame hwe e'.

¹⁵ Je ca tomi' xuhu' ca'. Tomi' querec te cara xun Iri' Jam ma', pain ca tama' awi ma awi ma xun ca'. Wirico Jeju co mi' napari' pain ca tomi' querec te ac i ma' xun ca'. Ac ca mi' xun pain carawa ca awi ma' tara pain ca tomi' hwet xun pain ca tomi' querec te nexi' ca', je pain ca wum co iri' Taramaxicon ne urut cwa' xun quem.

¹⁶ Ta miri'om xujuhu' me. Ara mi' iri xujuhu' pain ca awi wa ma' ne, pain ca quep xiho' caracan xujuhu' ma', ac ca ara mi' hun na pain ca awi wa Iri' Jam ma'. Hohot napa' pain ca ara ac i ma' hwe ta nuhu' quem.

¹⁷ Tomi' ha' jujun co querec wet nunuhu' pain ca hu cucuhu' ma'. Ta tomi' in pin huhun me. Wiricoco ara xi' nana co querec wet xo' nunuhu' pain ca howa nuhu' ma', xi taxi' pan ara xucucun pain ca maqui' ta' ne xec nein ca coco' quima hwet xun cocon Iri' Jam ma', pain ca tomi' hwet xun cocon pain oro ca taramaja nucucun pain ca querec wet cucuhu' ta. Je ca tomi' xuhu' ca'. Tomi' ha' jujun, ma' ta ara tomi' querec te cacain ca taramaja nucucun ta. Mo ta om tomi' ha' huhun, mo ta ara tomi' xaxa' e' cacain ca taramaja nucucun pahu', om ta quep xiho' ac cucuhu' ta.

¹⁸ Tomi' mi' xut con Iri' Jam me. Xi taxi' pan ara urut pain ca hohot ne oro ca ara urut ta. Je ca param urut quem, param urut pain ca xuruxut xo' cara urut quem.

¹⁹ Tomi' mip pan inuhu' quem, tomi' mi' xine con Iri' Jam me. Ma' ta mi' capa' pain ca in hwet hap xuhu' ta inuhu'.

²⁰ Quicon Taramaxicon nexi' Jeju ma', ca ao mao pane, je ca mam' tomi' an pe xo' cain ca tomi' xo' nucun Iri' Jam ma'. Om ta xic am camain' cain ca tomi' xo' nucun, mao ac ne ma' tara, to wet cara tara ta. Je ca to' e' mami' con Jeju ma', co iri' co querec wet xo' napari' pain ca ac ovelha nucun iri' ca'. Je ca tomi' xuhu' ca'. Tomi' mi' inuhu' con Iri' Jam cwa', co to' om pin nain ca toron ne ximixi' ca'. Param inon

²¹ pain ca mi' cuhu' pain ca ara taxi' hwein ca awi wa ma', ma' ta ha' cuhu' pain ca ara hwein ca param nucun ma'. Param inon pain ca meo capari' pain iri' ximixi' ca', pain ca mi' capari' pain ca ara e' xin ca hohot pan non quem. Wirico Jeju Cristo ara xi' na co mi' napari' pain ca ara e' xin ca hohot pan non quem. Na e' na pain ca tomi' querec te cara xun co awi tamana ta! Amém, iri'o' na ca tomi' ne ta.

²² Tomi' mip inuhu' pain i ca' quem xere. Taraju wet xine, na ra xine pain ca hu xuhu' ca'. Xi hwara' ne ca xirao' ne ca' ta.

²³ Tomi' hwet xim inuhu' con coxari' Timóteo co tao' pe wa pain xirinain ca tao' to tao' to to wa pane. Pa hwet pin nonon. Mo ta hwet hap capa', ja' ja' ac capa' tara pain ca hwet xim xuhu' ca'.

²⁴ Mam' pe wet inuhu' ta nuhu' cwajiri' ta jujun oro co querec wet nunuhu' pain ca howa hun Jeju ma', tomi' tomi' xam' jujun pain ca tomi' ne ca'. Tomi' tomi' xam' jujun oro co win howa hwe ma' quem, pain ca wari' ne cuhu' Iri' Jam ma' quem. Mam' pe wet urut pahu' ta nunuhu' oro co to nanain Itália quem.

²⁵ Param inon Iri' Jam pain ca quep xiho' quep xiho' xam' cuhu' pain ca mi' e' cuhu' pain ca param nucun ta. Je i ca' ca xirao' ne ca'.