Hebreus 12 - Tradução Bíblica Pacaas Novos

Ca hu xo' capari' Iri' Jam pain ca mana panxita' capari'

¹ Noro jujun oro hwanana nexi' cara pane, co howa nonon Iri' Jam pane. Ac ca coco' coco' morojam' cacapari' na. Ac ca ja' noro cacapari' na pain ca howa iri' ca'. Mija nana, om ca paric camain' caca. Je ca na e' ne pain ca an to an to pi' pin xin oro ca to' i'ina napari' ca'. An to pin xin oro ca caracat nexi' ca quep mip napari' ca' quem. Ac oro wari' co jein hwet xin nanain tawiri wana xi'. Quereme cara xin oro ca to' i'ina xim napari' pain ca win xumu xun Iri' Jam cwa'.

² Win xumu cara e' xun Jeju ma', xi wirico ara ca co mi' napari' pain ca howa wa pain ca xo' howa qui' xun pane, wirico co mi' xim napari' pain ca howa cara xun quem. Wixipa' paxi' nana wari' co tatatain mi' wawa pain pana ma', ane je i ma' ira ta pan ca Jeju ne. Quereme na pain ca tatatain mi' ma' tatarapa' pain ne ca pane, xi om ne ca coromicat ara cain ca aram aram tomi' querec te tamana ta' nucun pain pawin ta. Je ca pe ca pain xocori ca' quem, xao pe ho' nain iri' curucun Iri' Jam cwain.

³ Mam' pe wet jun pain ca jain jain tamana nucun pane. Querec pin' jun pain ca quereme cocon oro caracat co noc tamana nonon quem. Mam' pe wet cara jun, ma' ta om naro hwe, ma' ta hwara' opa cara hwe quem.

⁴ Tomi' in pin paxi' hwein oro ca caracat wa, ane om cono' querec hwe pain ca tomi' in pin nuhu' ne.

⁵ Je ca tomi' xuhu' ca'. Ji'am pin ara xi' hwein ca tomi' nucun Iri' Jam ma', pain ca hu ca' cuhu' pain ca mana panxita' cuhu' ma': Wata' pain ca Taramaxicon Iri' Jam ta' ca', tomi' ca' inem arain. Ta miri'om mapa' pain ca hu xo' xim ca' me. Ta naro ma pain ca tomi' tain tarajum me.

⁶ Xi hu xo' ara toton oro wari' co om noc ta' cwa'. Wap wap pi' pin inonon oro wari' co mana panxita' ta' cwa', ac i ma' na ca hu cuhu' Taramaxicon Iri' Jam.

⁷ Quereme jein oro ca to' i'ina nuhu' ma'. Jain jain iri hwein ne, je ca mam' hu xo' cuhu' Iri' Jam ma'. Tomi' xo' nuhu' pain tarajuhu', xi mana panxita' ara cuhu' ta. Je ca tomi' xuhu' ca'. Ma' tara wari' co wanxi' ma', co om hu xo' non panxica pain ca tomi' cain taraxicon ra? Om na ta.

⁸ Hu xo' hu xo' pi' pin nonon mana panxica Iri' Jam. Mo ta om hu xo' cuhu' ma', mo ta om tomi' xo' cuhu' pain ca tomi' cain tarajuhu' ma', om ca iri' panxica hwe. Ac ca om ca na cote hwe ma'.

⁹ Noro jujun mana cotere' pain macan' ca' quem. Hu xo' nanapari', tomi' xo' nanapari' pain ca tomi' cacain tarajixi'. Tomi' ha' ac ururun na quem. Je ca tomi' xuhu' ca'. Na e' na pain ca tomi' ha' xun Cotere' co pe pawin cain. E' cara ac iri' tara quem.

¹⁰ Hu nanapari' mana cotere' pain macan' ca', om ca mija homa ne cawaxi' pain ca tomi' cacain tarajixi' pain ca hwijima' nexi' quem. Maqui' nain ca coromicat nucucun pain ca am hohot ne pain ca tomi' ac i ma' tain taraxicocon mana panxita' cwa', je pain ca wap toton ta nana pane. Cotere' Iri' Jam cwa' iri na ne, hu xo' napari'. Tomi' xo' napari' pain ca tomi' cain tarajixi'. Quep xiho' iri'o' napari' pain ca wap capari' quem. Ma' ta an xiho' mahu' pain ca om caracat ne ca' napari'.

¹¹ Tomi' xaxa' paxi' iri' pain ca xo' hu capari', je pain ca xo' tomi' cain tarajixi' ca'. Om ca ja' tomi' querec te capari' quem. Ame hwe e'. Mo ta tomi' ha' xun pain ca hu capari', je pain ca tomi' xo' capari' pain ca tomi' cain tarajixi' ca', xuruxut xo' ac iri' tara, toron toron om pin ac ne tara ximixi'.

Ca hu capari' pain ca xuruxut xo' je capari' ca'

¹² Je ca tomi' xuhu' ca', pain ca naro pin hwe ma', pain ca an xiho' pin hun wari' co om hwara' opa mami' micon ma', je pain ca an xiho' hun wari' co cocoroc aracon ma' quem. Hwara' opa mami' je e'.

¹³ Xuruxut xo' je, ma' ta om camara' caca co om hwara' opa nana ma', co ac caji at nana pain ca howa nucucun ma'. Querec pin' iri tuturuhu' pain ca xuruxut xo' nuhu' ne, hwara' opa ac caca tara ta.

¹⁴ Win xumu jein i ca' quem, pain ca tomi' querec te xujuhu' pain ca jao jao ma' xujuhu' ma', je pain ca to ni ca' hwein ca caracat wa ma' quem. Wari' co om pe ni ca' nain ca caracat wa ma', om ta querec con Iri' Jam ta.

¹⁵ Ma' tara xumuhu' me, ma' ta om ma' camain' ca win ma' nuhu' co tomi' ximao ma', pain ca noc inon Iri' Jam pain ca xiram pa' capa' ca' ca ma'. Ma' tara xumuhu' me, ma' ta om ma' camain' ca win ma' nuhu' co juhum' ximicon ma', aram aram ma' mija pin ac caca tara co pan teretem pin nana con. Om ca na camain' ne pain ca to' ara ac i ma' cuhu' pain ca cut in xujuhu' ta.

¹⁶ Ma' tara xumuhu' me, ma' ta om ma' camain' ca win ma' nuhu' co quep ximao ma', co miri'om nain oro caramaxicon Iri' Jam ma', co om coromicat camain' non ma', co an xiho' non Esaú cara pane. Wirico paxi' xira co ara mi' wa pain ca wara tomi' pe nucun cote ca pane, xi om ne ca wara pan' cain' ara ca con coxa' ca ta. Ane param ni ca' cain ne. Param pan ac cain na wijimain carawa ca cao' wa pane.

¹⁷ Taxi' hun Esaú pain ca aram aram in pin ne ximicon quem. Tomi' xo' pan xirapa' te ta, tomi' mi' pan xirapa' con Iri' Jam ma', pain oro ca tomi' pe mi' capa' ta, ac i ma' na ca coromicat nucun. Tomi' mip paxi' non, aca xoc paxi' na quem. Ane noc pin tocwa ne, xi ha' con pain ca an in cain ca ara ca pane, pain ca param ni ca' cain ca tomi' pe mi' qui' con cote ca pane ta.

¹⁸ Je ca tomi' xuhu' ca'. Wixicam xun iri hun Iri' Jam ma' ne, om ca ac oro wari' nein Israel hwe pain ca wixicam e' cacain cote ne pacun ca tom tamana pane, je pain Sinai pane. Wixicam pin iri nanain pane ne, mixem pin ac cocon na xim, nuru mip ac cocon na camana' quem.

¹⁹ Taraju ac cacain na ca on ne caji taracom, taraju ac cacain na ca tomi' nucun Iri' Jam quem. Taraju iri nonon ne, tomi' ac cocon na Moisés, tomi' mip nonon. Om xi tomi' mami' capari' Iri' Jam ta ac caca na quem.

²⁰ Xi jin' ara cocon pain ca tomi' nucun ta. Om ca na camain' ne pain ca quep xine xiquijinain pacun ca' tata. Mo ta quep cain wari', to' to' mi' pin ac tocwa tara pain pacun. Mo ta quep nein carawa quem, to' to' mi' pin ac xine tara pain pacun quem, ac i ma' na ca tomi' mip tococwa.

²¹ Querec iri nanain ne, mija tamana ac ne na ca jin' nucucun. Jin' tamana na Moisés quem. Cocoroc ina pain ca jin' ne ta ac ca na.

²² Ane om wixicam hwein cote ne pacun pain mahweri ne, om na. Wixicam pan hwein xijein pacun ma', Sião ma', je ca pe ne macaracon Iri' Jam co e' cara ma'. Wixicam hwein Jerusalém ca pe pawin cain. Wixicam huhun oro jam co taramaja mi' nonon Iri' Jam ma', co mija tamana nana pain ca cut in xucucun pain ca tomi' querec te tamana nucucun ma' quem.

²³ Wixicam huhun oro co cut in xucucun pain ca howa cocon Jeju ma', co ac iri' panxica Iri' Jam co pan' cain' ma', co xirao' to wa wixicocon pain pawin cain. Wixicam hun Iri' Jam ma', co Juiz ma', co tomi' xo' tomi' xo' pi' pin nonon oro wari' pain oro carawa ca ara caca ma'. Wixicam hwein tamataracocon co wara cono' nana ma', co xuruxut xo' nana pain ca e' e' wet nucucun pain macan' pane, co to' hohot pin wawa ma' quem.

²⁴ Wixicam hun Jeju cwa', co tomi' an pe xo' nain xocori ca tomi' xo' nucun Iri' Jam ma'. Wixicam pin hwein quicon ca mam' to' hohot pin napari' pain ca cam huco' mi' capari' pain. Hwara' opa tamana na quicon Jeju, hwara' opa tiquin' ca' nain quicon Abel cara pane, xi om ne ca tomi' pe mi' ara capari' pain ca oro ca awi wa ta.

²⁵ Ma' tara xumuhu' me. Taraju wet jun Iri' Jam co tomi' nuhu' cwa', ta ari hun me. Noro jujun oro hwanana nexi' cara pane, co om taraju wet jun na nonon pain ca hu to tococwa pain macan' pane. Wap tata, om ca witan ca' cocon Iri' Jam pain ca wap toton cocon pane. Wari' pain xocori ca' iri na ne, mo ta om taraju wet xun Iri' Jam co pe pawin cain, mo ta ari xun pain ca hu capari' ca', ma' tara ca witan ca' ac xun pain ca wap xim capari' ra? Om na ta. Wap tamana tarapari' ta.

²⁶ Tomi' iri nonon oro hwanana nexi' Iri' Jam pane ne, to' cocoroc ac nein na macan' ca tomi' nucun. Tomi' pe ca' napari' pain xocori ca' quem: To' cocoroc mami' tain macan' ta. Om ta to' cocoroc e' tain macan' ma', to' cocoroc tain pawin ma' quem, ac i ma' na ca tomi' pe capari' pain xocori ca'.

²⁷ Pain ca tomi' pe cain i ma', pain ca to' cocoroc mami' tain macan' ca ma', taraju pa' irin i ca' quem: Main to' om pin tarain oro carawa ca tomi' ma' pin ca pane. To' cocoroc tarain, om pin ac ne tara. Ma' ta to wet cara e' ne oro carawa ca om cocoroc ac ne ma' ta na.

²⁸ Je ca na e' ne pain ca tomi' querec te xun Iri' Jam cwa', xi mi' xim ara capari' pain ca to ho' cara xun pain ca taramaxicon pe ho' xim capari' ta. Om ta pi' ra ha' ne quem. Tomi' querec te xun, in ac xun. Querec pin' xun pain ca Iri' Jam nucun, tomi' ha' xun quem.

²⁹ Xi ac xe ca tom tom pi' pin nain oro carawa ara ca Iri' Jam nexi' ta.