Hebreus 11 - Tradução Bíblica Pacaas Novos

Oro hwanana nexi' co howa nonon Iri' Jam

¹ Howa iri urun Iri' Jam ne, taxi' ac xun na pain ca ara mi' xim capari' pain oro ca winim' iri' ca', pain ca hwet pa' xim capari' ca'. Om paxi' na ca querec xin, ane taxi' xin ne. Ma' na ta irin, xi om ne ca howa ara xun Iri' Jam ta.

² Howa nonon Iri' Jam oro hwanana nexi' cara pane. Je ca hohot mahu' ta tococwa pane.

³ Howa urun Iri' Jam. Je ca taraju pa' xin i ca' quem, pain ca tomi' ma' pin e' cain macan' je pawin pane. Mam' tomi' ma' pin nain pain carawa ca om querec ac xine, ma' pin ac ne na oro carawa ca querec iri' quem.

⁴ Howa non Iri' Jam Abel cara pane. Je ca hohot napa' carawa ca mi' mapa' ta tocwa pane. Caim ma' iri na ne, om ca hohot con Iri' Jam carawa ca mi' con quem. Je ca querec pin' tocwa Abel ma', pain ca hohot con Iri' Jam. Xi om ne ca howa ara con ta. Aram aram mi' pin paxi' na Abel pane, ane hu hu wet capari' pain ca an xiho' xine pain ca howa ne ta capari' pain xocori ca' ne.

⁵ Howa non Iri' Jam Enoque cara pane. Je ca an mao hap e' con pain ca e' e' wet nucun pane. Om ca mi' pin ca. Om ca mam' tocwa, xi om ne ca an mao hap ara con Iri' Jam pane ta. Xi querec pin' ara tocwa pain ca wara hohot con Iri' Jam pain ca om an mao hap querec tocwa pane ta.

⁶ Je ca tomi' xuhu' ca'. Mo ta om howa xun Iri' Jam cwa', om ca hohot ac xun. Wixicam pin xun iri urun ne, na e' na pain ca howa xun pain iri' ca Iri' Jam nucun ma'. Na e' na pain ca howa xun pain ca mi' xim capari' pain oro ca awi wa pain ca win xumu xun ca'.

⁷ Howa non Iri' Jam Noé cara pane. Tomi' hwet iri ta pain carawa ca om hwet pa' querec nonon ne, tomi' ha' ac con na. Quep ac cain na mam' horoho wa, ma' ta witan pin ta' cocon oro ca nari ne cwa' ta na pane. Howa pan iri na Noé ne, querec pin' ac tococwa na oro win ma' caca pain ca om howa nucucun ma', wap pin ac tococwa na quem. To' hohot pin inem, xi howa ara mapa' ta pan ac con na Iri' Jam quem.

⁸ Howa non Iri' Jam Abraão cara pane. Je ca tomi' ha' con pain ca mao rain xijein macan' ca aram aram mi' xim ta con pane. Om paxi' na ca taxi' cain ca mao ta' ca pane, ane tomi' ha' ca ne. Mao ac ca na quem.

⁹ Howa non Iri' Jam. Tatirim pe ac cain na macan' ca tomi' pe mi' tocwa ma'. Ac macaracocon oro tatirim non. Pe nain caji xirim ca mam' quep xine pain tapari carawa. To nanain caji xirim Isaque con Jacó ma' quem, co tomi' pe mi' wi wawa pain macan' ca tatirim pe ca Abraão ma' quem.

¹⁰ Abraão ma', tatirim pe cara nain macan' ca wara tomi' pe mi' con Iri' Jam ma', xi om ne ca winim' ara cain xec nein ca pe tain cain iri' macaracon Iri' Jam ca pe pawin cain, ca xat pe nein iri' pacun ca to' teren nain cain. Wirico Iri' Jam co coromicat an pe xo' nain macaracon cain, wirico co quep nain quem.

¹¹ Howa non Iri' Jam Sara ma', manacon Abraão ma' quem. Om paxi' na ca ha' cam pain ca nam' wa ira. Mara' pin paxi' na ira. Ane mi' tacama pain ca wijima wa ne. Howa inon Iri' Jam, om ca mixein capa', ara mi' xim tarapa' pain ca tomi' pe mi' capa' ca' non pane.

¹² Mara' pin paxi' na Abraão, om paxi' na ca wanxi' mami' ac ca ira. Xica' pe paxi' na pain ca wari' nucun pane, ane mija pan caca oro waram winacon con panxica ne. Ac ca mija mija qui' ca oro pijo' pain pawin nana. Om ca pijim' ac tococwa, ac ca mija mija qui' ne namaji pain cacarain cote ne com nana pain ca mija nucucun.

¹³ Howa howa pi' pin nana oro co wara tomi' pe wawa pane. Howa howa, aram aram cono' pin ac caca na quem. Om paxi' na ca ara mi' tococwa pain oro ca wara tomi' pe mi' tococwa pain ca e' e' wet nucucun pane, ane howa cara caca ne. Main ara mi' tarapari' pain ta nonon Iri' Jam. Ac ca querec pira cacain na. Winim' nanain, tomi' querec te nanain. Tatirim e' urut, om ca wari' nein macan' ca' urut ta nana.

¹⁴ Pain ca tomi' ac i ma' caca pane, querec pin' tata pain ca win xumu cacain iri' macaracocon.

¹⁵ Mo xi mam' pe wet cacain wara macaracocon ca paca' caca pain cara pane, ha' xiroron pain ca in mama' wa quem.

¹⁶ Ane jain jain cacain xijein macan' ca awi tiquin' ca' nain wara macaracocon ne, jain jain nanain iri' macaracocon ca pe pawin cain. Je ca om wixipa' pan cocon Iri' Jam ma'. Tomi' querec te inuhu' pain ca Iri' Jam ne mahu' ta nonon. Je ca quep an pe xo' mi' cocon pain iri' macaracocon pain i cain.

^17-18 Tomi' mami' xin ca howa nucun Abraão cara pane, co wanxi' non Isaque pane. Wara tomi' pe pan non Iri' Jam con Isaque ira: Wirico Isaque tara co wanxi' ton non winam ta, mija tamana ac caca tara oro waram winam con ta non ira, ac i ma' paxi' na ca wara tomi' pe con Iri' Jam pane. Ane tomi' pan xucun ne. Iri'o' tara xin ca howa capa' Abraão cwa' na, ara querec ton ta ac ca na, tomi' ac con na. Mi' ne con iri' panxima co xica' xat nem ma', tom tain' mi' ne con ta ac con na. Ma ac ca na, om ca hehe ca, tomi' ha' xim ta ac con na.

¹⁹ Ca' na ca coromicat nucun con Iri' Jam quem: Mo ta mi' pin ca panxita' cwa', ha' ac con tara Iri' Jam pain ca to' e' mami' con ta na ca coromicat nucun. Ac je paxi' na ca ara ca Iri' Jam quem. Ac ca to' e' mami' con na Isaque.

²⁰ Howa non Iri' Jam Isaque cara pane. Je ca tomi' mi' cocon con Iri' Jam mana panxica ma', Jacó con Esaú ma'. Param inem pain ca ara mi' momon pain oro ca awi wa, ara mi' roron pain oro ca wara tomi' pe ma cocon me non Iri' Jam.

²¹ Howa non Iri' Jam Jacó cara pane. Mi' pin ta' iri na ne, tomi' mi' mam' ac cocon na con Iri' Jam waram winacon con panxica José ma', tomi' mi' tomi' mi' xam' nonon con. Param inem pain ca ara mi' momon pain oro ca awi wa ta non cocon, quep xat ac cain na pana mam' pan xu ca pain ca in ac con quem.

²² Howa non Iri' Jam José cara pane. Mi' pin ta' iri na ne, tomi' mam' ac cocon na xurucun: Main paca' tatarain Egito oro waram winaxi' ta nonon, tomi' xo' ac cocon na pain aracon ma' quem. Aram aram mama' iri tatara oro waram winaxi' ne, cut mama' ac cacain tara ara ta ac cocon na quem.

²³ Howa non Iri' Jam cote ca Moisés cam jicon cara pane. Je ca om jin' cocon taramaxicon pain ca tomi' mip nucun pane. Pan' mao iri na Moisés ne, noc xa pin ac cocon na. Xi querec pin' ara cocon pain ca awi tamana nucun ta. Ma' 3 na panawo' pain ca noc xa cocon pane.

²⁴ Howa non Iri' Jam Moisés ma' quem, je ca tomi' ca' pan xucun pain ca aram aram hwara' pin nucun pane: Noc inonon oro wari' pain ca cawinacam panxica taramaxicon mami' cacapa' ta na ca tomi' nucun.

²⁵ Ca' na ca coromicat nucun: Hohot napa' pain ca quep em' wi cacapa' cocon oro wari' nucun Iri' Jam cwa', je ca param ta' ca'. Hohot tiquin' ca' napa' pain ca ja' tomi' querec te cara capa' ca caracat wa ta na ca coromicat nucun.

²⁶ Mo ta tomi' xirac cacapa' oro wari' ma', je i ma' ira, tomi' xirac ma' tatarapa' ne! Hohot pan napa' ca jain jain wa pain ca howa ton Cristo ma', co wara tora' ca Iri' Jam pain ca wirico tara co Iri' Taramaxicon ta ca ma', hohot tiquin' ca' nain ca cut wa oro carawa ca awi pain Egito ta, ac i ma' na ca coromicat nucun pane. Xi win xumu pan ara cain oro ca awi wa ca aram aram mi' xim pain con Iri' Jam ta.

²⁷ Howa non Iri' Jam Moisés, je ca paca' cain Egito quem. Om ca jin' con taramaxicon co mana' non, xi howa pan ara con Iri' Jam ta. Quereme cara nain oro ca to' i'ina non, xi ac ca querec con ara ne co ma' co om querec ac wa ta.

²⁸ Howa non Iri' Jam, je ca tomi' querec te wi ca cocon oro win ma' ca pain Páscoa pane. Cam huco' mi' xin quinain wijimain taramaji ovelha pain panajinain manain xirixi' ma', pain quirinain je pain pawin ma'. Ma' ta witan pin caca mana pantiri' co wara camara' cain' nana cwa', pain ca wari' nein Israel iri' ca'. Ma' ta om to' parapa' pin cocon jam co to' pa' toton nonon wari' co om tomi' ha' nana ta na tata pane.

²⁹ Howa nonon Iri' Jam oro wari' nein Israel pane quem. Je ca xuruxut xom tacaracam' mama' cacain xijein cacarain Com Ca Paca' ma'. Xuruxut xom tacaracam' mama' e' nanain, ac macan' ca cawain' e' nonon. Oro wari' nein Egito ma' iri nana ne, xuruxut xom tacaracam' mama' xi' paxi' nanain quem, ane om ha' cocon ne. Pan corom mama' ac caca na, cono' cono' pi' pin ac caca na quem.

³⁰ Howa nonon Iri' Jam oro wari' nein Israel pane, je ca pa horohot pin ne ca tao' caho' nein oro xirinain Jericó quem. Ma' 7 pin iri na xec pain ca xuruxut morojam' cacain ne, pa horohot pi' pin ac ne na ca tao' caho' nein oro xirinain. Xi om ne ca howa ara cocon Iri' Jam ta.

³¹ Howa non Iri' Jam Raabe quem, co caxicam narima' quem. Je ca om mi' pin wi cama cocon oro win ma' cama co om tomi' ha' nonon Iri' Jam ma'. Xi quep xiho' ara cocon wari' nein Israel co noro noro nanain oro macan' pain Canaã ira.

³² Ma' paxi' nana oro xucucun hwanana nexi' co howa nonon Iri' Jam pane, ane om ha' capa' pain ca pijim' hwet pi' pin xuhu' cocon ne. Cote ne xira ca xirao' ne ca'. Ma' na Gideão con Baraque con Sansão con Jefté ma'. Ma' na Davi con Samuel cocon oro profeta nucun Iri' Jam ma' quem.

³³ Howa nonon Iri' Jam. Je ca ma' caca co mixita nonon oro tatirim, to' quiji' pin ac cocon na quem. Ma' ac caca na xucucun co ara xo' nana pain ca taramaxicon to ho' cocon oro win ma' caca. Ma' ac caca na xucucun co cut nanain oro ca wara tomi' pe mi' pan cocon Iri' Jam. Ma' ac caca na xucucun co to' om pin nanain ca hwara' opa nucun copacao'. Om ca ha' mami' con pain ca cao' con wari' quem.

³⁴ Ma' nana xucucun co wap jo' pin nanain cote ne xe. Ma' ac caca na xucucun co witan ca' nonon wari' co to' parapa' pin xun nonon pain cote ne quit. Ma' ac caca na xucucun co om hwara' opa nana, aram aram hwara' opa pin ac caca na quem. Mi' tata pain ca to' quiji' pin cocon oro soldado nucucun tatirim co mixita xun nonon, ja' wawaran pin ac tococwa na quem.

³⁵ Ma' ac cacama na oro narima' co to' e' mami' wawa ca nari nequequem co wara cono' nana quem. Ma' ac caca na xucucun co quep em' tamana wawa. Mo ta an to pin hun Iri' Jam ma', om pin ac xut pahu' tara paxi' tata. Ane tomi' in pin tococwa ne. Om ta an to xut con Iri' Jam ta tata, quep em' quep em' cono' pin ac tococwa na quem. Hohot naparut ca cono' wa, ma' ta to ho' cara xut con Iri' Jam pain ca aram aram e' mami' xut ta tata pane.

³⁶ Ma' nana co tomi' xirac wawa, tatam' tatam' ac tococwa na, wap mip ac tococwa na quem. Ma' ac caca na xucucun co pao' to wawa pain arain too, tao' to ac tococwa na pain xirinain ca tao' to tao' to to wa quem.

³⁷ Ma' nana co to' to' cono' pin wawa pain pacun, ma' ac caca na co wac tapiripit caracan wawa pain cote ne quit ca mam' wac xine pana ma'. Ma' ac caca na co to' parapa' pin e' wawa pain cote ne quit quem. Ma' nana co xuruxut ximama' e' nana quem. Om nonon wom, to e' nanain taparinain ovelha je bode. Om nonon carawa quem, ximin nana. To' i'ina tata, quep em' tata quem.

³⁸ Wawaran mama' e' ac cacain na oro mahweri ca om to caca wari' ma', wawaran mama' ac cacain na oro ca tamaja ne pacun quem. To ximama' ac cacain na oro manain pacun je oro manain macan' ma' quem. Je ca tomi' xuhu' ca': Hohot tamana nonon Iri' Jam, om xi to ho' tococwa oro wari', xi awi ara caca ta.

³⁹ Howa howa pi' pin nonon Iri' Jam oro hwanana nexi' co pijim' hwet xuhu' cwa'. Hohot mahu', xi howa ara mahu' ta tata. Ac i ma' paxi' na ca tomi' pan cocon Iri' Jam, ane om ara mi' cocon pain ca wara tomi' pe nucun ne.

⁴⁰ Xi ma' ara ne ca coromicat xo' mi' capari' cocon ta. Awi tiquin' ca' nain ca wara coromicat xo' mi' tococwa oro hwanana cara pane. Ca' na ca coromicat xo' nucun pari': Om ta ara mi' ho' toton pain ca wara tomi' pe ne ca' napari'. Winim' xuhu' pain ca aram aram howa xim mahu', to' hohot wi ac xuhu' cocon tara ta napari'.