Hebreus 10 - Tradução Bíblica Pacaas Novos

Ca to' witan cara capari' Cristo

¹ Oro ca xirao' nucun Moisés cara pane, an xiho' wijimain e' nain oro ca ara mi' xim capari' pain ca awi wa Iri' Jam cwa'. Om ca an xiho' iri'o' nein, tomi' joc mam' mi' e' napari' pain, ac ca querec tocohon e' xin na quem. Noro jujun oro co wixicam xun nonon Iri' Jam pain ca tom tain' mi' paxi' cocon pain winacocon ma'. Tom tain' ho' tom tain' ho' paxi' nanain pain oro xijein cawaxi' quem. Ane om to' hohot pin ac tococwa ne. Om ca to' hohot camain' tococwa pain ta.

² Mo xi mam' to' hohot pin tococwa oro co in ac xun nonon Iri' Jam ma', pain ca tom tain' mi' cocon pain oro carawa ma', tom tain' mi' tom tain' mi' om pin ac cocon pain xira. Je ca tomi' xuhu' ca'. Mo xi mam' xic am pin xine ca caracat nucucun pain ca tom tain' mi' tocwa pain carawa Iri' Jam ma', om xi toron mami' ne ximicocon pain ca caracat nucucun quem.

³ Ane om ac i ma' ne cocon ne. Tom tain' mi' tom tain mi' iri nonon pain carawa nucucun Iri' Jam pain oro xijein cawaxi' ne, to' mam' pe wet to' mam' pe wet ac tococwa na pain ca caracat nucucun.

⁴ Xi ha' camain' nein quinain boi je quinain bode pain ca xic am pin nein ca caracat wa ta.

⁵ Je ca tomi' ca' ca Cristo pain ca maqui' cain macan' pane quem. Tomi' ca' non Cote ca pane: Om ca param main winacocon oro wari' ma', pain ca tom tain' mi' xim pain quequem ma'. Om ca param main oro carawa ca mi' xim quequem ma' quem. Je ca to' ma' mi' mapa' pain cwere ca'.

⁶ Om ca hohot quem winacocon ca tom tain' mi' quequem pane. Om ca hohot quem pain ca xic am pin rain ca caracat nuxut, xi om ne ca mi' ara urut pum pain oro carawa ca' quequem ma'.

⁷ Tomi' ac xim na: Noro ne, awori pin ina ta Te Iri' Jam. Ara tain inain ca param nem. Win ne ca xirao' an pe xine pain capijam pata', ac i ma' na ca tomi' con Cote ca pane.

⁸ Pain ca tomi' con Iri' Jam Cristo pane, tomi' cain' ac con na: Om ca param main winacocon ca tom tain' mi' quequem ma', om ca param main oro carawa ca mi' quequem quem. Om ca hohot quem oro ca mi' quequem pain ca mam' xic am pin rain ca caracat nuxut pain ta quequem ma', ac i ma' na ca tomi' cain' con Iri' Jam Cristo pane. (Taraju pa' je e'. Mi' jun pain oro carawa Iri' Jam ta paxi' nonon oro wari' Moisés ma', pain ca xirao' nucun ma', ane tomi' ac i ma' pan con Iri' Jam Cristo ne.)

⁹ Tomi' tomi' wet ac con na. Noro ne, awori pin ina ta Te Iri' Jam. Ara tain inain ca param nem, ac i ma' na ca tomi' con ma'. Wirico Iri' Jam co to' om pin nain ca wara coromicat xo' nucun pane, ara hwara' opa pin ac cain na xocori ca coromicat xo' nucun quem.

¹⁰ To' hohot pin napari' Jeju Cristo, xi om ne ca tomi' ha' ara con Iri' Jam ta. Je ca om nain ho' xucun pain ca mi' ne pain cwerem ta con pane. Mi' pin ac ca na. Mi' xica' pe na, om ta mi' pin mami' ca quem.

¹¹ Oro sacerdote ma', coco' to ho' nanain pana ca tom tain' pe mi' cocon pain carawa Iri' Jam. Ara ara nanain ca taramaja nucucun pain oro xijein xec. Tom tain' mami' tom tain' mami' nanain. Ane om to' om pin taxi' ac nein ca caracat wa oro carawa ca tom tain' caca ne.

¹² Carawa ca mi' ca Cristo ma' iri na ne, pain ca mi' pin caho' capari' pain ca caracat nexi' ca', mi' xica' pe pan ac xucun na con Iri' Jam. Hohot cara na ca mi' pin nucun, om ta mi' pin caho' mami' capari'. Mi' pin caho' iri napari' pane ne, xao pe ho' pin ac con na pain iri' curucun Iri' Jam quem.

¹³ Xao pe ho' xao pe ho' wet non pain xocori ca' quem. Winim' nain xec nein ca aram aram to' quiji' pin xun tococwa cocon oro co noc nonon ma'. Taramaxicon pe ho' cara ac tococwa tara ta.

¹⁴ Je ca tomi' xuhu' ca'. Xica' pe na carawa ca mi' con Iri' Jam pane, pain ca mi' pan xucun con. Je ca ha' con pain ca to' hohot cara pin capari' ca'.

¹⁵ Je ca tomi' cain' capari' Tamataracon Iri' Jam ca'. Tomi' ca' ac ne na:

¹⁶ Tomi' ca' na Taramaxicon Iri' Jam: Maqui' iri tara xec nein ne, tomi' xo' ac toton tara oro wari'. Oro ca tomi' ne ca', pain ca tomi' ha' je toton ca', an pe xo' mi' toton pain ximicocon. Ac ca xirao' pe mi' toton tara pain ca coromicat nucucun. Ac i ma' na ca tomi' hwet cain' capari' Tamataracon Iri' Jam.

¹⁷ Tomi' tomi' wet ac capari' na quem: Om ta mam' pe wet mami' tain oro ca caracat nucucun. Om ta mam' pe wet mami' tain oro ca pan teretem nucucun quem. Ac i ma' na ca tomi' capari'.

¹⁸ Je ca tomi' xuhu' ca'. Om ca tom tain' mi' mami' ximahu' pain winahu' ca mam' xic am pin tain ca caracat nuhu' ta capari' Iri' Jam. Xi wara xic am pin ara capari' pain ta.

Ca wixicam pin xun Iri' Jam pain ca howa cara xun ca'

¹⁹ Je ca tomi' xuhu' ca' xere. Ha' pin napari' pain ca wixicam pin xun Iri' Jam. Om ca jin' xun, om ca hehe xun. Ac ca corom hwet xun na pain Iri' Maxicon cain, xi om ne ca ao mao ara ne quicon Jeju pain ca mi' pin caho' capari' ta.

²⁰ Mi' pin iri na ne, ac ca wein mao ca na cote ca wom co tao' caho' nain Iri' Maxicon Iri' Jam ca pe pan ca cain. Ac i ma' na ca pa mi' capari' pain xocori wana ca corom hwet ac xun ca', e' cara ac iri' tara quem.

²¹ Je ca tomi' xuhu' ca'. Ma' napari' iri' sacerdote co hwara' opa tamana cwa', co querec wet napari' pain ca xiricon Iri' Jam iri' ca'.

²² Je ca tomi' ca' xuhu' ca': Mam' wixicam pin xun Iri' Jam pain ca win xumu iri'o' xun, je pain ca howa mip xun ca'. Om ta tara con ta'a camain' xun pain ca xic am pin capari' pain ca caracat nexi' ta. Ac ca cam huco' mi' capari' na pain quicon Jeju pain ca coromicat pan teretem nexi' ca', ac ca hohoc xo' capari' na pain com ca awi tamana pain cwerexi' quem.

²³ Howa cara xun pain ca winim' xun pain ca mi' xim capari' oro ca tomi' pe mi' capari' ca'. Tomi' hwet xuxun pain ca howa nexi' oro wari' quem. Xi om ne ca taxi' ara xun Iri' Jam pain ca om mixein nucun ta.

²⁴ Ma' tara ximixi' pain ca hu caracan xijexi', ma' ta tomi' querec te tomi' querec te tiquin' xijexi'. Ma' ta ara mi' xijexi' pain oro ca awi wa quem.

²⁵ Om ta an to pin xin ca cut in xijexi' pain ca howa xun Jeju cwa'. Ma' ara xi' nana oro win ma' nexi' co an to taxipa' nanain ta. Om ta an xiho' xuxun. Tama' corom xi'. Ma' ta to' hwara' opa xijexi' pain ca howa nexi'. Na e' na pain ca hu xijexi', xi om ne ca taxi' ara xun Jeju pain ca maqui' ta' nucun. Wixicam pin ara xi' na xec nucun ta.

²⁶ Mo ta taraju pa' paxi' xin capijacon Iri' Jam ca iri'o' con Cristo cwa', mo ta je i ma' ira, caracat cara ma' xi' ne iri'. Cain' cain' xixi'? Xi ma' ne xijein carawa ca xic am ra ha' nain ca caracat nucucun oro wari' ta. Ma' xica' pe e' na curucun Jeju ta.

²⁷ Mo xi ac i ma' iri', mo xi caracat cara ma' xi' ne iri', na e' na pain ca jin' tamana xi' pain ca winim' xin carawa ca maqui' ta' ma'. Jin' e' xuxun Iri' Jam pain ca wap xim capari' pain ca caracat nexi'. Jin' e' xixin cote ne xe pain ca tom tom pi' pin xun tococwa oro wari' co noc nonon quem.

²⁸ Noro jun wari' co om tomi' ha' ra na nain ca xirao' nucun Moisés pain cara pane. Ma' 2 iri nana wari' co querec urut con nonon pain ca caracat nucun ne, am ma' 3 caca co querec urut con ta nonon ma', to' pa' pin ac tocwa na. Om ca xiram pa' camain' tocwa.

²⁹ Wap ac i ma' ta wari' co om tomi' ha' ra na nain ca xirao' nucun Moisés pane. Je ca tomi' xuhu' ca'. Cain' ca coromicat mi' hun wari' co tomi' xirac non Panxica Iri' Jam quem? Cain' ca coromicat mi' hun wari' co tomi' ximao nain quicon Jeju ca mam' tomi' an pe xo' cain xocori ca tomi' xo' nucun Iri' Jam ma', ca mam' to' hohot ton paxi' non ma' quem? Cain' ca coromicat mi' hun wari' co tomi' xirac nain Tamataracon Iri' Jam ca xiram pa' pan non quem? Om ca hohot ne pain ca wap mip tocwa ra? Hohot ne ca' ira!

³⁰ Taxi' ara xi' urun co ma' co tomi' ca' ma': Wata' co wap nonon oro caracat. Win hwe pane ac toton tara ta na. Tomi' nain i ca' quem: Wata' pain ca Taramaxicon Iri' Jam ta' ca', querec pin' iri inonon oro wari' pain ca caracat caca ma' ne, wap ac toton tara ta na.

³¹ Je ca tomi' xuhu' ca'. Wari' co quep xat ca Iri' Jam co e' cara ma', pain ca wap ton tocwa ma', jin' tamana ac ca tara ta.

³² Ane tomi' xim xuhu' pain i ca' ne: Mam' pe wet jein oro ca hwet pa' nuhu' pain cara pane, pain ca xo' toha mi' qui' cuhu' naran nucun Iri' Jam pain ca taraju pa' pin hwein capijacon con Cristo pane. Mija paxi' na oro ca to' i'ina nuhu' pane. Jain jain paxi' hwe pane. Ane quereme hwein ne.

³³ Ma' ho' ma' ho' na oro xec pain ca cut in xucucun oro wari' pahu', tomi' xirac tomi' xirac ac cucuhu' na, quep em' quep em' ac cucuhu' na quem. Ma' ac ne na oro xec pain ca quep xiho' huhun oro win ma' nuhu' co quep em' wawa pane quem.

³⁴ Xiram pa' tamana huhun oro co tao' to wawa pain xirinain ca tao' to tao' to to wa ma'. Cut ca' iri xihwe pain oro caramajuhu' ne, tomi' querec te cara ac hwe na quem. Je i ma' ira, ma' ma' wet ara xi' napari' iri' carawa ca om pi' ra ha' cain, ca to pawin cain. Awi tiquin' ca' nain caramajixi' ca pe macan' ca' quem ac hwe na pane quem.

³⁵ Je ca tomi' xuhu' ca'. Quereme cara je, ta jin' camain' hwe me ta. Mo ta howa cara hun Iri' Jam con Jeju Cristo ma', mi' ac xihwe tara pain ca awi tamana wa ta.

³⁶ Na e' na pain ca quereme cara hwein oro carawa ca to' i'ina nuhu' ma'. Ara cara jein oro ca param nucun Iri' Jam ma', ma' ta aram aram mi' xim cuhu' pain oro ca tomi' pe mi' cuhu' ma'.

³⁷ Je ca tomi' capari' capijacon Iri' Jam ca': Maqui' ta' iri na co ma' co maqui' ta' ma'. Om ta om om ca, maqui' ho' ta' na.

³⁸ E' cara tara wari' ne co to' hohot ta' cwa', xi om ne ca howa ara capa' ta. Mo ta in ca' capa' ma', om ta hohot capa' ta, ac i ma' na ca tomi' ca ma'.

³⁹ Ane om an xiho' xuxun oro wari' co in ca' nonon Iri' Jam ne, co to' om pin xun wawa ma'. Xi an xiho' ara xuxun co howa cara nonon Iri' Jam con Jeju Cristo ta. To' witan capari' ca' ira.