Hebreus 1 - Tradução Bíblica Pacaas Novos

Ca hwara' opa tiquin' ca' cocon oro jam co taramaja mi' nonon Iri' Jam Jeju

¹ Wirico Iri' Jam co tomi' nonon oro hwanana nexi' pain cara pane. Tomi' ho' tomi' ho' tata, mija nana oro profeta co tomi' hwet jujun pain capija ta ca pane, ac i ma' na ca tomi' cocon oro hwanana nexi' pane.

² Pain xocori ca' iri na ne, pain ca tomi' xim capari' ca', wirico Panxica co tomi' hwet roron pain capija ta ca quem. Wirico Panxica co tora' ca pain ca mene rain oro carawa ta con pane quem. Wirico Panxica co win mu ca pain ca to' ma' qui' cain macan' je pawin, je oro caramajinain ca' quem.

³ Wirico Panxica co toha pan, pain ca an hwet pan cain ca toc meremem nucun Iri' Jam pain ca awi tamana nucun, je pain ca hwara' opa tamana nucun ma' quem. Xi iri' wirico pan ara ca pain ca Iri' Jam nucun ta. Wirico co quep xat nain oro carawa pain oro maxinain ma' quem. Tomi' e' nain, ma' ac ne na, xi hwara' opa ara ca pain ca tomi' cain ta. Hohoc pin iri napari' pain ca caracat nexi' ca' ne, xao pe ho' ac cain na iri' curucun Cote ca co hwara' opa tamana cwain, pain pawin cain.

⁴ To' hwara' opa tamana non Cote ca, to' hwara' opa tiquin' ca' non cocon oro jam co taramaja mi' nonon ma'. Xi iri' Panxita' ara xim ta non. Oro jam ma', co taramaja mi' nonon Cote ca ma', om ca mana panxica Iri' Jam caca. Taramaja mi' e' nonon Iri' Jam.

⁵ Xi ma' camain' ca jam co tomi' ac i ca' ca Iri' Jam cwa', ca xirao' pe xine pain capijacon ca': Panxita' inem, Te pin mapa' pain xec ca'. Om na jam co tomi' ac i ma' ca Iri' Jam. Om na jam co tomi' ca' ca quem: Te tarapa', Panxita' ton quem. Om ca ma' camain' ca jam co tomi' ac i ma' ca quem.

⁶ Maqui' pin iri na xec pain ca hwet roron oro wari' pain macan' ta con Panxica ne, tomi' ac ca na: Na e' na pain ca in ac in ac xam' cocon Panxita' oro jam co taramaja mi' nanapa' ta. Ac i ma' na ca tomi' tococwa oro jam co taramaja mi' nonon pane.

⁷ Tomi' ca' tata oro jam co taramaja mi' nonon quem: To' jimama' pin inonon, ac hotowa nana pata', ac xe nana pata' ta. Tomi' ac i ma' tata.

⁸ Ane tomi' ca' ca con Panxica ne: Iri' Jam ma, taramaxicon cara ra. Om ta pi' ra ha' ne ca taramaxicon nem ma'. Taramaxicon xo' ma pain ca taramaxicon hwara' opa pe ho' momon oro wari' nem ta.

⁹ Tomi' querec te main ca xut xo' wa. Noc main ca xut pan tem wa. Je ca tora' xim ca'. Wata' pain ca Iri' Jam ta' ca', pain ca Iri' Jam ne mapa' ca', tora' inem pain ca to' hwara' opa tiquin' ca' xim cocon oro win ma' ma ma'. Ja' tomi' querec te inem ta. Ac i ma' na ca tomi' con Iri' Jam.

¹⁰ Ma' na xijein ca tomi' nucun pain ca tomi' con Panxica quem. Tomi' ca' non: Wum co tomi' ma' pin main macan' pain cara pane ta Taramaxicon. Wum co quep nain pawin pane quem. Wum co quep pan nain pane.

¹¹ Om pin ta' paxi' tara macan' pain pawin ma', ane e' cara ta' ma ne. Main em' pin tara macan' pain pawin. Win ca wom co main em' pin ta' ma' quem.

¹² Win ca wari' co joc top ton non to' om capin' ma', pain ca an pe pin ton con ma', pain ca pe ni ta' xucun wom ca ma' quem, ac i ma' tain main macan' pain pawin. Ane iri' wirico cara ta' ma ne, om ta mi' pin ra na ma ta. Ac i ma' na ca tomi' con Panxica.

¹³ Om na jam co tomi' ca' ca Iri' Jam: Xao pe ho' ne pain iri' cwere ca', aram aram maqui' pa' ac quem tara xec pain ca to' quiji' pin toton ta' co noc nenem ma'. Mi' ac xim tara pain ca taramaxicon pe ho' cara momon ta. Ac i ma' na ca tomi' con Panxica. Om ca ma' camain' ca jam co taramaja mi' non ma', co tomi' ac i ma' ca ma'.

¹⁴ Cain' cain' caca oro jam co taramaja mi' nonon quem? Om ca tomi' ha' tomi' ha' pi' pin cocon Iri' Jam pain ca quep xiho' jujun oro wari' co to' witan xuxun ta tococwa ra? Je i ma' ca taramaja nucucun ma' ira!